Gwneud cais i astudio ar lefel ôl-raddedig

Yn wahanol i raddau israddedig, yn y rhan fwyaf o achosion, pan fyddwch yn gwneud cais am gwrs ôl-raddedig gallwch gyflwyno cais yn uniongyrchol i'r brifysgol unigol. Bydd gan bob sefydliad ei system ymgeisio bwrpasol ei hun y bydd angen i chi ei chwblhau. Mae rhai eithriadau i hyn, fel hyfforddiant athrawon, ymhlith eraill.

Mae rhai sefydliadau'n pennu terfynau amser penodol ar gyfer cyrsiau, tra bod eraill yn derbyn ceisiadau drwy gydol y flwyddyn. Fodd bynnag, mae'n ddoeth i wneud cais cyn gynted ag y gallwch. Gall rhai cyrsiau fod yn gystadleuol iawn, ac efallai y bydd gofyn i chi gyflwyno portffolio, trawsgrifiad academaidd, cael cyfweliad neu roi cyflwyniad, fel rhan o'r broses ymgeisio.

Darganfyddwch gymaint ag y gallwch am y cwrs cyn gwneud cais. Cofiwch fod pob prifysgol yn wahanol, a bydd cynnwys y cwrs, a’r dulliau addysgu ac asesu yn amrywio'n fawr.

Cysylltwch â phrifysgolion unigol i ddysgu mwy am eu cyrsiau a siaradwch â thimau derbyn i gael gwybodaeth am y brifysgol a'r cwrs.  Efallai y byddwch hefyd eisiau meddwl am:

• Faint o oriau addysgu sy’n cael eu cynnig? Faint o amser cyswllt y gallaf ei ddisgwyl?
• Beth yw'r gofynion mynediad?
• Pa fath o asesu y gallaf ei ddisgwyl?
• Pa mor gystadleuol yw'r lleoedd ar y cwrs hwn? Beth yw maint y garfan?
• A oes angen i mi dalu cost ymgeisio cychwynnol?
• Pa gyllid sydd ar gael? A oes bwrsariaethau ac ysgoloriaethau ar gael sy’n benodol i'r brifysgol dan sylw?
• A yw'r cwrs wedi'i achredu gan gorff proffesiynol?
• Pa gysylltiadau â diwydiant/cyflogwyr sydd gan y cwrs/prifysgol?
• Pa gymorth cymdeithasol a lles sydd ar gael i fyfyrwyr ôl-raddedig?
• Ar ba drywyddau mae myfyrwyr ôl-raddedig blaenorol wedi mynd ar ôl eu hastudiaethau?
• A oes man astudio ôl-raddedig penodol?

Bydd hyn yn amrywio o gwrs i gwrs, ac efallai y bydd gan wahanol brifysgolion ofynion gwahanol. Yn gyffredinol, bydd angen i chi gyflwyno datganiad personol. Dylai hyn roi manylion ynghylch pam yr hoffech astudio'r cwrs penodol, unrhyw sgiliau a phrofiad perthnasol a'ch cynlluniau gyrfa ar gyfer y dyfodol. Mae cymorth ar lunio datganiad personol ar gael drwy'r uned 'Ffurflenni Cais a Datganiadau Personol' yn ein Cwrs Datblygu Gyrfa.

Efallai y bydd angen i chi hefyd gynnwys:

• Eich CV
• Portffolio
• Cynnig ymchwil

Efallai y bydd angen i fyfyrwyr rhyngwladol hefyd ddarparu:

• Copi o'ch pasbort
• Tystiolaeth o’ch gallu ieithyddol

Mae geirdaon yn helpu i greu darlun o bob ymgeisydd. Ar gyfer y rhan fwyaf o geisiadau, bydd angen i chi ddarparu dau eirda academaidd.

Wrth ystyried pwy i ofyn iddo, dewiswch ddarlithwyr, goruchwylwyr neu diwtoriaid rydych chi wedi dod i'w hadnabod trwy astudio'ch gradd. Byddant yn gallu darparu gwybodaeth bersonol am eich perfformiad academaidd a'ch addasrwydd ar gyfer y cwrs rydych yn gwneud cais amdano.

Os nad ydych yn gallu darparu dau eirda academaidd, os ydych wedi cymryd seibiant rhwng eich astudiaethau er enghraifft, bydd angen i chi ddarparu geirda proffesiynol gan gyflogwr.

Rydym yn argymell siarad â'ch canolwyr ymlaen llaw. Bydd rhoi digon o rybudd ac amser iddynt yn caniatáu iddynt baratoi geirda i gefnogi eich cais.