Rheoliadau Academaidd Elfen Doethuriaeth y dyfarniad PhD (integredig + 2)

Dylid darllen yr adran hon ar y cyd â'r Canllawiau ar Dderbyn Myfyrwyr Ymchwil.

1.1

Dyfernir graddau doethurol i fyfyrwyr sydd wedi dangos eu bod wedi cyflawni'r canlynol:

• Creu a dehongli gwybodaeth newydd, trwy ymchwil wreiddiol neu ysgolheictod uwch arall, sydd o ansawdd sy'n bodloni adolygiad cymheiriaid, sy'n estyn ffiniau'r ddisgyblaeth ac sy'n deilwng o gael ei gyhoeddi;
• Caffael a deall yn systematig corff sylweddol o wybodaeth sydd ar flaen disgyblaeth academaidd neu faes o ymarfer proffesiynol;
• Y gallu cyffredinol i gysyniadu, cynllunio a gweithredu prosiect er mwyn creu gwybodaeth, cymwysiadau neu ddealltwriaeth newydd sydd ar flaen y ddisgyblaeth, ac addasu cynllun y prosiect yn wyneb problemau na rhagwelwyd;
• Dealltwriaeth fanwl o dechnegau cymwys ar gyfer ymchwil ac ymholi academaidd uwch.

Yn nodweddiadol, bydd deiliaid y cymhwyster yn gallu gwneud y pethau canlynol:  

• Dod i farn wybodus ar faterion cymhleth mewn meysydd arbenigol, yn aml yn absenoldeb data cyflawn, a gallu mynegi eu syniadau a'u casgliadau yn glir ac yn effeithiol i gynulleidfaoedd arbenigol a lleyg;
• Parhau i ymgymryd ag ymchwil a datblygu pur a/neu gymwysedig ar lefel uwch, gan gyfrannu'n sylweddol i ddatblygu technegau, syniadau neu ymagweddau newydd.

A bydd gan y deiliaid:

• Y rhinweddau a'r sgiliau trosglwyddadwy angenrheidiol ar gyfer cyflogaeth lle mae gofyn iddynt arfer cyfrifoldeb personol a menter annibynnol i raddau helaeth mewn sefyllfaoedd cymhleth nad oes modd eu darogan mewn amgylchedd proffesiynol neu gyfatebol.

1.2

Rhaid i’r holl ymgeiswyr gofrestru’n fyfyrwyr Prifysgol Abertawe a thalu’r ffioedd priodol a bennir gan y Brifysgol. Fel myfyrwyr cofrestredig, rhaid i’r ymgeiswyr gydymffurfio â rheoliadau academaidd a chyffredinol y Brifysgol.

1.3

Ni chaiff ymgeiswyr gofrestru ar raglen arall sy’n cynnig dyfarniad ar yr un pryd yn y brifysgol hon nac mewn unrhyw sefydliad arall oni chafwyd caniatâd penodol y Pwyllgor Rheoliadau, Ansawdd a Safonau, neu oni bai bod y dyfarniad yn rhan o’r cymwysterau a nodir yn y fframwaith graddau hwn. 

1.4

Rhaid i'r holl ymgeiswyr fonitro’r cyfrif e-bost a roddwyd iddynt gan y Brifysgol trwy gydol cyfnod yr ymgeisyddiaeth gan y bydd yr holl ohebiaeth electronig oddi wrth y Brifysgol yn cael ei hanfon i gyfrif e-bost Prifysgol yr ymgeisydd. Awgrymir yn gryf bod pob ymgeisydd yn defnyddio’r cyfrif e-bost Prifysgol a roddwyd iddynt wrth gyfathrebu â’r Brifysgol.

1.5

Lefel astudio'r radd ymchwil a reolir gan y rheoliadau hyn fydd Lefel 8 y Fframwaith Cymwysterau Addysg Uwch.

2.1

Rhaid i ymgeisydd ar gyfer Elfen Doethuriaeth y radd Doethuriaeth Athroniaeth (integredig +2) fod â gradd gychwynnol o un o brifysgolion y DU neu brifysgol arall a gymeradwywyd gan y Senedd ac mae’n rhaid iddo gwblhau elfen Gradd Meistr a Addysgir ac elfen Gradd Meistr Ymchwil y rhaglen yn olynol, a llwyddo ynddynt, cyn iddo barhau i ymgymryd ag elfen doethuriaeth y rhaglen yn ffurfiol. Gall ymgeiswyr gofrestru dros dro ar gyfer yr elfen Doethuriaeth ar ôl iddynt gyflwyno elfen Dysgu Annibynnol dan Gyfarwyddyd yr elfen Gradd Meistr Ymchwil, yn unol â'r rheoliad ar gofrestru cydamserol, hyd at gyfnod hwyaf o dri mis.

2.2

Er mwyn symud ymlaen yn ffurfiol i elfen Doethuriaeth y rhaglen, mae'n rhaid i ymgeiswyr gwblhau holl fodiwlau'r elfen Meistr yn llwyddiannus (ar yr ymgais gyntaf neu'r ail ymgais) a chyflwyno'r gydran dysgu annibynnol dan gyfarwyddyd.  

AC

Mae’n rhaid i ymgeiswyr lwyddo ym mhob modiwl yr elfen Gradd Meistr Ymchwil, gan ennill 60% neu fwy mewn dros hanner o’r modiwlau a addysgir yn ôl nifer y credydau, a chan ennill 60% yn nhraethawd hir y Radd Meistr Ymchwil.

2.3

Bydd gan unrhyw ymgeisydd y mae angen iddo ailgyflwyno’r elfen Dysgu Annibynnol dan Gyfarwyddyd un cyfle arall i lwyddo. Rhaid i ymgeiswyr felly lwyddo ar yr ail gynnig a bydd gofyn iddynt gychwyn ar yr Elfen Doethuriaeth yn ystod y pwynt mynediad nesaf a geir.

Darperir cefnogaeth i ymgeiswyr sy’n cyflwyno amgylchiadau esgusodol sy’n effeithio ar hyd yr ymgeisyddiaeth fel rhan o’u helfen Gradd Meistr Ymchwil a byddant yn gallu dewis gohirio eu hastudiaethau.

Caiff unrhyw ymgeisydd sy’n methu â chwblhau’r elfen Gradd Meistr Ymchwil ar y cynnig cyntaf neu ar yr ail gynnig ei dynnu’n ôl o’r rhaglen PhD (integredig).

2.4

Gwneir y penderfyniad i dderbyn ymgeisydd i raglen ymchwil arfaethedig gan Deon Gweithredol perthnasol neu Diwtor Derbyn y Gyfadran/Ysgol berthnasol gan rywun a enwebwyd ganddo. Dylai penderfyniadau fod yn seiliedig ar y ffactorau canlynol:

1. A yw’r Gyfadran/Ysgol yn fodlon bod yr ymgeisydd yn cyrraedd y safon academaidd angenrheidiol i allu cwblhau’r rhaglen ymchwil a fwriedir, waeth beth fo cymwysterau’r ymgeisydd;
2. A yw’r testun ymchwil a ddewiswyd gan yr ymgeisydd yn addas i’w astudio yn y dyfnder sydd ei angen ar gyfer y radd;
3. A allai aelod priodol o’r staff ddarparu goruchwyliaeth ddigonol yn unol â pharagraff 7;
4. A oes adnoddau a chyfleusterau addas ar gael i gynnal a chefnogi’r rhaglen ymchwil arfaethedig;
5. A yw’n ymddangos yn rhesymol y gellid cwblhau’r rhaglen arfaethedig o fewn y cyfnod byrraf posibl a bennwyd.
6. A yw'r ymgeisydd yn cwrdd â'r cymhwysedd iaith Saesneg gofynnol a amlinellir yn 2.3.

Pan fydd yr ymgeisydd yn bodloni’r holl ofynion i gofrestru (yn unol â Rheoliad 3.1) oni bai am ofynion llywodraethu matriciwleiddio’r Brifysgol, gall yr ymgeisydd, yn ôl disgresiwn y Swyddfa Derbyn, gael caniatâd i gofrestru dros dro am gyfnod penodol o amser, cyhyd â bod yr ymgeisydd yn cytuno i fodloni gofynion y Brifysgol o ran matriciwleiddio erbyn y dyddiad a bennir gan y Swyddfa Dderbyn. Os yw’r ymgeisydd wedyn yn methu â bodloni gofynion llywodraethu matriciwleiddio’r Brifysgol erbyn y dyddiad cau a bennir gan y Swyddfa Dderbyn, bydd y cofrestriad dros dro yn dod i ben, ac ystyrir nad yw’r ymgeisydd yn gymwys i gofrestru, a bydd Rheoliad 15.6 isod yn berthnasol.

3.1   Cofrestru

3.1.1

Mae’r Brifysgol yn disgwyl i bob ymgeisydd gofrestru er mwyn cael ei gydnabod yn fyfyriwr y Brifysgol. Dylai pob ymgeisydd gofrestru yn unol â chyfarwyddiadau cofrestru'r rhaglen astudio benodol ac o fewn y cyfnod cofrestru a bennir.

3.1.2

Mae’n ofynnol i ymgeiswyr gofrestru o fewn y cyfnod cofrestru a bennir:

• Os ydynt yn cofrestru yn y brifysgol am y tro cyntaf;
• Os ydynt yn cofrestru ar raglen astudio benodol am y tro cyntaf;
• Os ydynt yn mynd ymlaen i’r lefel astudio nesaf, y flwyddyn astudio nesaf neu mewn rhai achosion, rhan nesaf yr astudio ac yn mynychu'n amser llawn neu’n rhan-amser;
• Os yw’r Brifysgol yn disgwyl i ffi gael ei thalu yn unol â rheoliadau’r Brifysgol o ran cyllid a ffioedd myfyrwyr.

3.1.3

Er mwyn cofrestru yn y Brifysgol, mae’n ofynnol i ymgeiswyr, lle bo’n berthnasol, ddarparu tystiolaeth o’u hawl i astudio yn y Brifysgol yn unol â:

• Gofynion penodol y rhaglen;
• Rheoliadau’r Brifysgol o ran matriciwleiddio;
• Y ddeddfwriaeth ynghylch astudio yn y Deyrnas Unedig.

3.1.4

Os na fydd ymgeisydd yn cofrestru o fewn y cyfnod penodedig, bydd ei ymgeisiaeth yn dod i ben a bydd rhaid i’r ymgeisydd dynnu'n ôl o’r Brifysgol. Caiff ceisiadau i ailsefydlu'r ymgeisiaeth ac am ganiatâd i gofrestru'n hwyr eu hystyried gan y Deon Gweithredol a Gwasanaethau Addysg.

3.1.5

Bydd y Brifysgol yn hysbysu'r awdurdodau perthnasol, o fewn cyfnod penodedig, yn unol â deddfau’r Deyrnas Unedig parthed astudio yn y DU, am fyfyrwyr y tynnwyd eu henwau yn ôl oherwydd iddynt beidio â chofrestru ar raglen astudio o fewn y cyfnod cofrestru penodedig.

3.2

Caiff ymgeisydd astudio am radd Doethur mewn Athroniaeth (1+2) drwy un o’r dulliau canlynol:

A) Fel myfyriwr amser llawn, trwy ymgymryd ag ymchwil yn y Brifysgol;

B) Fel myfyriwr rhan-amser, trwy ymgymryd ag ymchwil naill ai yn y Brifysgol neu’n allanol;

C) Fel myfyriwr amser llawn, trwy wneud ymchwil ar raglen ymchwil gymeradwy a gynigir ar y cyd gan y Brifysgol a Phrifysgol arall neu bartner cymeradwy.

3.3

Ni ellir dyfarnu’r radd Doethur mewn Athroniaeth fel gradd er anrhydedd.

Dylid darllen yr adran hon ar y cyd â Chanllawiau’r Brifysgol ar Ymgeisyddiaeth Graddau Ymchwil a Chanllawiau’r Brifysgol ar gyfer Myfyrwyr Ymchwil ar Drosglwyddo a Thynnu yn ôl.

4.1

Rhaid i ymgeisydd fod wedi cwblhau rhaglen o addysgu ar lefel Gradd Meistr (yr elfen Gradd Meistr a Addysgir a’r elfen Gradd Meistr Ymchwil) ac astudio dan oruchwyliaeth, gan gynnwys datblygu sgiliau ymchwilio a sgiliau cyffredinol naill ai fel myfyriwr amser llawn neu’n rhan-amser, cyn iddo fod yn gymwys i gychwyn ar yr Elfen Doethuriaeth 

4.2

Caiff elfennau’r Graddau Meistr eu cwblhau (o ran y dyfarniad a hyd yr ymgeisyddiaeth) fel y nodir gan y Gyfadran/Ysgol neu’r Partner Cydweithredol perthnasol (Dull Ch) a chaiff yr asesiad ei gwblhau yn erbyn y dyddiadau a nodwyd. 

4.4

Er gwaethaf paragraff 4.1, gall myfyriwr a gofrestrwyd o dan ddull Ch (fel a ddiffinnir ym mharagraff 3.2), gyda chaniatâd penodol y Gyfadran/Ysgol a’r Brifysgol, dreulio cyfnod neu gyfnodau yn astudio mewn sefydliad arall. Cytunir ar y cyfnodau astudio byrraf posibl yn y Brifysgol adeg derbyn y myfyriwr gan Grŵp Gweithredol y Pwyllgor Rheoliadau, Ansawdd a Safonau.

4.5

Nid yw’r rheoliad sy’n ymwneud â lleihau’r cyfnod ymgeisyddiaeth yn berthnasol i’r radd hon.

4.6   Trosglwyddo Credydau neu Ymgeisyddiaeth

Fel arfer, bydd disgwyl i ymgeiswyr ar gyfer y PhD (integredig) astudio’r rhaglen gyfan mewn sefydliadau sydd o fewn y Rhaglen Hyfforddiant Doethurol, ac ni chaniateir iddynt drosglwyddo credydau ar gyfer yr elfen hyfforddiant o sefydliadau eraill nad ydynt yn rhan o’r consortiwm, neu o raglenni eraill o fewn Prifysgol Abertawe.

4.7

O dan rai amgylchiadau gall ymgeiswyr wneud cais, neu gall y Bwrdd Achosion Myfyrwyr fynnu hynny, i newid eu dull astudio neu eu rhaglen astudio yn unol â’r hyn a nodir yng  Canllawiau ar Drosglwyddo a Thynnu’n Ôl gan Fyfyrwyr Ymchwil. Mewn achosion o’r fath bydd y Brifysgol yn pennu cyfnod cofrestredig byrraf diwygiedig.

4.8

Fel rheol, gwaherddir ymgeiswyr rhag trosglwyddo’u hymgeisyddiaeth i sefydliad arall ar ôl cwblhau cyfnod byrraf posibl eu hymgeisyddiaeth, a amlinellir ym mharagraff 4.1, yng Nghanllaw Ymgeisyddiaeth Gradd Ymchwil y Brifysgol.

5.1

Bydd gradd gyffredinol PhD (dyfarniad integredig +2) yn cynnwys elfen Gradd Meistr Ôl-raddedig a Addysgir (blwyddyn 1 amser llawn, blynyddoedd 1 a 2 rhan-amser) a gyflwynir ym Mhrifysgol Caerdydd neu Brifysgol Abertawe, Gradd Meistr Ymchwil (MRes) (blwyddyn 2 llawn amser, blynyddoedd 3 a 4 rhan amser) a gyflwynir ym Mhrifysgol Caerdydd, ac elfen Doethuriaeth (blynyddoedd 3-4 amser llawn, blynyddoedd 5-8 rhan-amser) a gyflwynir ym Mhrifysgol Abertawe. Hefyd, gall ymgeiswyr gyflwyno cais am gyfnod ysgrifennu terfynol am gyfnod hwyaf o 1 flwyddyn.

5.2

Bydd elfen ymchwil y rhaglen yn gofyn i'r ymgeisydd lunio a chyflwyno traethawd ymchwil sylweddol a sefyll arholiad llafar.

5.3

Bydd strwythur y rhaglen PhD (integredig) fel a ganlyn, a dangosir yr elfennau sydd y tu allan i gwmpas uniongyrchol y rheoliadau hyn fel cysgodion:

6.1

Bydd ymgeiswyr yn cael eu goruchwylio yn rheolaidd ac yn barhaus yn unol â’r gweithdrefnau ar gyfer goruchwylio myfyrwyr ôl-raddedig a nodir yn y Canllawiau ar Feini Prawf Cymhwyster ar gyfer Goruchwylwyr Myfyrwyr Graddau Ymchwil.

6.2

Bydd gan bob ymgeisydd dîm goruchwylio a benodir gan y Deon Gweithredol neu ei enwebai. Bydd y tîm goruchwylio’n cynnwys o leiaf dau oruchwyliwr mewnol sy’n gymwys i gael eu penodi fel y nodir yng Nghanllawiau'r Brifysgol ar Feini Prawf Cymhwysedd ar gyfer Goruchwylwyr Myfyrwyr Graddau Ymchwil. Bydd un goruchwyliwr yn cael ei ddynodi’n oruchwyliwr cyntaf.

6.3

Mae’n rhaid i’r goruchwylwyr mewnol fod yn aelodau o staff Prifysgol Abertawe fel y nodir yn y Canllawiau ar Feini Prawf Cymhwyster ar gyfer Goruchwylwyr Myfyrwyr Graddau Ymchwil. Bydd y goruchwyliwr cyntaf yn bennaf gyfrifol am adrodd ar gynnydd i’r Gyfadran/Ysgol a’r Bwrdd Academaidd ar gyfer Ymchwil Ôl-raddedig, fel y nodir ym mharagraff 8.

6.4

Penodir goruchwyliwr allanol ar gyfer pob ymgeisydd sy’n cael ei dderbyn dan Ddull B yn ychwanegol i’r goruchwyliwr neu’r goruchwylwyr mewnol a nodir ym mharagraff 3.2. Penodir goruchwylwyr allanol yn unol â Chanllawiau'r Brifysgol ar Feini Prawf Cymhwysedd ar gyfer Goruchwylwyr Myfyrwyr Graddau Ymchwil, gyda chaniatâd y Bwrdd Academaidd ar gyfer Ymchwil Ôl-raddedig. Cydnabyddir y fath oruchwylwyr yn swyddogol yn y Brifysgol.

Dylid darllen yr adran hon ar y cyd â'r Canllawiau ar Fonitro Cynnydd Myfyrwyr Ymchwil.

7.1

Rhaid i’r Gyfadran/Ysgol gadarnhau ymgeisyddiaeth pob ymgeisydd o fewn tri mis i gofrestriad cychwynnol yr ymgeisydd fel y nodir yn y Canllawiau ar Fonitro Cynnydd Myfyrwyr Ymchwil.

7.2

Os nad yw’r Gyfadran/Ysgol yn gallu cadarnhau ymgeisyddiaeth ymgeisydd o fewn tri mis i'w gofrestriad cychwynnol, efallai y bydd raid i'w ymgeisyddiaeth gael ei gohirio neu efallai y bydd raid iddo adael y rhaglen.

7.3

Caiff cynnydd ymgeisydd yn ystod cyfnod byrraf ei ymgeisyddiaeth ei fonitro yn rheolaidd gan y Bwrdd Dilyniant Ymchwil Ôl-raddedig er mwyn penderfynu a ellir caniatáu i ymgeisydd symud ymlaen. Caiff cynnydd ei fonitro ar adegau penodol fel y nodir yng Nghanllawiau'r Brifysgol ar Fonitro Cynnydd Myfyrwyr Ymchwil.

7.4

Bydd ymgeiswyr sy’n mynd y tu hwnt i gyfnod byrraf posibl eu hymgeisyddiaeth yn parhau i gael eu monitro’n rheolaidd gan y Bwrdd Dilyniant Ymchwil Ôl-raddedig hyd nes y cyflwynir y traethawd ymchwil neu hyd ddiwedd yr ymgeisyddiaeth.

7.5

Os bernir bod cynnydd ymgeisydd yn anfoddhaol, efallai y caiff yr ymgeisydd ei orfodi i drosglwyddo rhaglen, neu ei orfodi i dynnu’n ôl o’r rhaglen.

7.6

Yng nghyd-destun paragraffau 7.2 a 7.5 uchod, bydd gan ymgeiswyr hawl i apelio yn erbyn penderfyniadau academaidd yn unol â gweithdrefnau Prifysgol Abertawe ar gyfer Cywirdeb y Marciau a Gyhoeddwyd neu ei gweithdrefnau ar gyfer Apeliadau Academaidd.

Dylid darllen yr adran hon ar y cyd â'r Canllawiau ar Gyflogi Myfyrwyr Ymchwil.

8.1

Rhaid i ymgeiswyr sy’n ceisio am swydd, ar ben eu hastudiaethau, naill ai yn y Brifysgol neu’r tu allan, gadw at y canllawiau ar gyflogaeth fel y’u cyhoeddir yng Nghanllawiau'r Brifysgol ar Gyflogi Myfyrwyr Ymchwil.

Dylid darllen yr adran hon ar y cyd â'r Canllawiau ar gyfer Myfyrwyr Ymchwil ar Gyflwyno Traethawd Ymchwil a'r Canllaw i Arholi Myfyrwyr Ymchwil.

9.1

Mae'n ofynnol i bob ymgeisydd gyflwyno traethawd ymchwil erbyn y dyddiad cyflwyno hwyaf fel y nodir yng Nghanllaw'r Brifysgol ar Ymgeisyddiaeth Gradd Ymchwil, a fu’n gyfredol ar adeg ei dderbyn ac fel y nodir yn y Llythyr Cynnig ffurfiol. 

9.2

Os bydd ymgeisydd yn methu â chyflwyno traethawd ymchwil erbyn y dyddiad cyflwyno hwyaf, gall y Brifysgol ei gwneud yn ofynnol terfynu'r ymgeisyddiaeth.

9.3

Rhaid i ymgeiswyr lenwi ffurflen Hysbysiad o Fwriad i Gyflwyno o leiaf tri mis cyn y dyddiad cyflwyno disgwyliedig.

9.4

Ar ôl cwblhau cyfnod byrraf posibl yr ymgeisyddiaeth caniateir i ymgeisydd gyflwyno copïau o draethawd ymchwil i’w arholi yn unol â'r Canllawiau ar gyfer Myfyrwyr Ymchwil ar Gyflwyno Traethawd Ymchwil.

9.5

Gellir caniatáu i ymgeisydd sy'n dilyn y rhaglen PhD (integredig) integredig gyflwyno gwaith sydd wedi'i asesu'n flaenorol fel rhan o elfen y Meistr (naill ai'n gyfan gwbl, yn rhannol neu wedi'i addasu) fel rhan o'r traethawd ymchwil ar gyfer yr elfen Ddoethurol, lle mae cysylltiad clir a profedig rhwng yr asesiad a'r elfen ymchwil. 

9.6 

Yn ogystal â'r copïau o'r traethawd ymchwil a gyflwynir yn unol â pharagraff 12.2 uchod, rhaid i bob ymgeisydd gyflwyno copi electronig hefyd cyn iddo gael ei arholi. Dylid cyflwyno copi electronig o'r traethawd ymchwil wedi'i ddiwygio ar ôl yr arholiad os gwneir unrhyw gywiriadau neu newidiadau. 

9.7

Gall unrhyw ymgeisydd sy’n dilyn rhaglen ymchwil yn y Brifysgol ddewis cyflwyno traethawd ymchwil neu waith arall yn Saesneg neu Gymraeg. Rhaid i ymgeisydd sy’n dymuno cael ei asesu mewn iaith nad yw’n brif iaith addysgu/asesu'r rhaglen dan sylw hysbysu'r Bwrdd Achosion Myfyrwyr cyn diwedd cyfnod byrraf posib yr ymgeisyddiaeth. Gwneir trefniadau yn unol â’r hyn a amlinellir yng Nghanllaw'r Brifysgol ar gyfer Arholi Myfyrwyr Ymchwil. Hefyd, rhaid cyflwyno ceisiadau am asesiad yn Gymraeg drwy'r Gyfadran/Ysgol cyn diwedd cyfnod byrraf posib yr ymgeisyddiaeth, er mwyn i drefniadau priodol gael eu rhoi ar waith i asesu'r gwaith drwy'r iaith y cafodd ei gyflwyno ynddi, lle bynnag y bo modd, neu drwy gyfieithu os nad yw hyn yn bosib.

9.8

Serch hynny, ni fydd y Bwrdd Achosion Myfyrwyr yn cymeradwyo ceisiadau sy’n deillio o ddiffyg gallu’r ymgeisydd i gynhyrchu gwaith i’w gyflwyno yn Gymraeg neu yn Saesneg.

9.9

Pan fydd y Brifysgol wedi cael ei hysbysu am fwriad yr ymgeisydd i gyflwyno, bydd y Deon Gweithredol neu enwebai’n hysbysu aelodau'r Bwrdd Arholi, y bydd ei aelodaeth yn unol â pharagraff 14 isod ac fel yr amlinellir yng Nghanllaw'r Brifysgol ar Arholi Myfyrwyr Ymchwil. Caiff yr ymgeisydd ei hysbysu am enwau aelodau arfaethedig y Bwrdd Arholi. Caiff penodiad aelodau’r Bwrdd Arholi ei gadarnhau gan y Bwrdd Cynnydd a Dyfarniau.

9.10

Bydd raid i ymgeiswyr sy’n ailgyflwyno traethawd ymchwil sydd wedi methu â bodloni’r Arholwyr yn y gorffennol gyflwyno’r traethawd diwygiedig yn unol â'r Canllawiau ar gyfer Myfyrwyr Ymchwil ar Gyflwyno Traethawd Ymchwil. Efallai hefyd y bydd raid i’r ymgeisydd dalu ffi ail-gyflwyno ychwanegol. 

Dylid darllen yr adran hon ar y cyd â'r Canllawiau ar gyfer Myfyrwyr Ymchwil ar Ohiriadau ac Estyniadau a'r Canllawiau ar Drosglwyddo a Thynnu’n Ôl gan Fyfyrwyr Ymchwil.

10.1

Dan amgylchiadau eithriadol, ac yn unol â Chanllawiau’r Brifysgol ar Ohiriadau ac Estyniadau i Fyfyrwyr Ymchwil, gall fod yn ofynnol i ymgeisydd ohirio ei ymgeisyddiaeth am resymau academaidd, disgyblaethol, ariannol neu iechyd.

10.2

O dan amgylchiadau eithriadol gall ymgeiswyr ofyn am ohirio eu hymgeisyddiaeth neu am estyniad i’w hymgeisyddiaeth. Dylid gwneud pob cais i ohirio ymgeisyddiaeth neu i estyn ymgeisyddiaeth yn unol â'r Canllawiau ar gyfer Myfyrwyr Ymchwil ar Ohiriadau ac Estyniadau.

10.3

Pan fydd ymgeisyddiaeth ymgeisydd yn cael ei gohirio, fel yr amlinellir ym mharagraffau 10.1 a 10.2 uchod, rhaid nodi, adeg y gohirio, ar ba ddyddiad y bydd yr ymgeisydd yn ailgydio yn yr astudio.

10.4

Pan fydd ymgeisydd yn methu ag ailgydio yn ei astudiaethau erbyn y dyddiad dychwelyd i astudio, tybir bod yr ymgeisydd wedi tynnu’n ôl o’r rhaglen yn unol â'r Canllawiau ar gyfer Myfyrwyr Ymchwil ar Drosglwyddo a Thynnu yn ôl.

10.5

Fel arfer, bydd y Grŵp Gweithredol yn gofyn bod myfyrwyr ymchwil sefydledig sydd wedi cwblhau blwyddyn neu fwy o'u hymchwil amser llawn ond sydd wedi mynd heibio i'r cyfnod gohirio hwyaf a ganiateir, yn tynnu'n ôl; fodd bynnag, mewn amgylchiadau eithriadol, mae'n bosibl y caniateir i'r myfyrwyr hyn ail-ymgeisio i ailgofrestru ar yr un cam â'r ymchwil blaenorol (o fewn cyfnod hwyaf o 2 flynedd o'r dyddiad tynnu'n ôl). Dim ond dan yr amgylchiadau hyn y caniateir cyfnod ymgeisyddiaeth byrrach i fyfyriwr.

Dylid darllen yr adran hon ar y cyd â'r Canllawiau ar gyfer Myfyrwyr Ymchwil ar Gyflwyno Traethawd Ymchwil a'r Canllawiau ar Arholi Myfyrwyr Ymchwil.

11.1

Caiff ymgeiswyr am radd Doethur mewn Athroniaeth eu harholi mewn dwy ran:

1. Bydd y rhan gyntaf ar ffurf traethawd ymchwil sy’n cynnwys dulliau a chanlyniadau’r prosiect ymchwil. Dylid cyflwyno pob traethawd ymchwil yn unol â'r Canllawiau ar gyfer Myfyrwyr Ymchwil ar Gyflwyno Traethawd Ymchwil.
2. Bydd yr ail ran ar ffurf arholiad llafar (viva voce) fel y nodir ym mharagraff 15 isod.

11.2

Caiff y Deon Gweithredol ddirprwyo'r gwaith gweinyddol ynghylch cyflwyno ac arholi traethawd ymchwil i aelod o'i staff, a bydd hefyd yn enwebu Cadeirydd i'r Bwrdd Arholi. Dylai'r Cadeirydd fod yn aelod o staff y Gyfadran/Ysgol, gyda phrofiad addas, nad yw wedi ymwneud yn uniongyrchol â goruchwylio'r ymgeisydd.

11.3 Arholiad Llafar (viva voce)

Bydd disgwyl i’r Bwrdd Arholi gynnal arholiad llafar ar gyfer bob ymgeisydd ar gyfer gradd ymchwil. Yn achos myfyriwr y caniateir iddo ailgyflwyno o fewn 12 mis, fel arfer byddai disgwyl ail viva. Fodd bynnag, mewn achosion eithriadol, gellir hepgor yr angen i gynnal ail arholiad llafar os darperir dadl fanwl o blaid ei ddileu yn adroddiad ysgrifenedig Cadeirydd y Bwrdd Arholi. Bydd angen i'r adroddiad ysgrifenedig gael ei gytuno, a'i gyd-lofnodi, gan bob aelod o'r Bwrdd Arholi.

11.4

Fel arfer, cynhelir pob arholiad llafar ym Mhrifysgol Abertawe o fewn chwe mis i ddyddiad cyflwyno’r traethawd ymchwil. Gellir cytuno eithriadau naill ai ar sail eithriadol neu ynteu i adlewyrchu natur y radd, e.e. yn achos myfyrwyr sy'n astudio dan Ddull 'D' (cydweithredol).

11.5

Rhaid i ymgeisydd y mae angen darpariaeth arbennig arno ar gyfer yr arholiad llafar roi gwybod i’r Gyfadran/Ysgol gartref cyn cyflwyno’r traethawd ymchwil. Bydd y Gyfadran/Ysgol gartref trefniadau yn unol â’r hyn a amlinellir yng Nghanllawiau'r Brifysgol ar gyfer Arholi Myfyrwyr Ymchwil. 

11.6

Bydd gan oruchwylwyr yr ymgeisydd hawl i gyfleu i Gadeirydd y Bwrdd Arholi unrhyw bryderon ynghylch prosiect ymchwil yr ymgeisydd, ynghylch y traethawd ymchwil sy’n deillio ohono, neu ynghylch ei arholi os teimla’r goruchwylwyr y dylai’r Bwrdd eu cymryd i ystyriaeth cyn gwneud ei benderfyniad. Bydd y goruchwylwyr yn cyfleu’r pryderon hyn, mewn ysgrifen, i’r Cadeirydd ac i’r ymgeisydd cyn gynted ag y bo modd wedi cyflwyno’r thesis ac yn ddigon cynnar i roi digon o amser i’r ymgeisydd, cyn arholi’r traethawd ymchwil (gan gynnwys unrhyw arholiad llafar), ystyried y pwyntiau a wnaed a pharatoi ymateb.

11.7

Cynhelir yr arholiad llafar yn unol â'r Canllawiau ar Arholi Myfyrwyr Ymchwil. Bydd argymhelliad y Bwrdd Arholi'n cael ei gyflwyno i’r Grŵp Gweithredol i’w gadarnhau.

Dylid darllen yr adran hon ar y cyd â'r Canllawiau ar Arholi Myfyrwyr Ymchwil.

12.1

Bydd pob Bwrdd Arholi ar gyfer ymgeiswyr yn cynnwys yr unigolion canlynol:

1. Cadeirydd annibynnol, a fydd yn y Deon Gweithredol neu’n aelod o staff a chanddo brofiad addas a enwebwyd gan y Deon Gweithredol. Mae disgwyl i Gadeirydd y Bwrdd Arholi gadeirio’r arholiad llafar ac unrhyw gyfarfod o’r arholwyr.
2. Arholwr neu arholwyr allanol a benodir yn unol â Chanllawiau'r Brifysgol ar Arholi Myfyrwyr Ymchwil.
3. Arholwr mewnol a benodir yn unol â Chanllawiau'r Brifysgol ar Arholi Myfyrwyr Ymchwil.

12.2

Bydd Cadeirydd y Bwrdd Arholi yn annibynnol yn y broses arholi a bydd yn atebol i’r Bwrdd Academaidd ar gyfer Ymchwil Ôl-raddedig pathed cynnal yr arholiad.

12.3

Ni chaniateir i oruchwylwyr yr ymgeisydd nac unrhyw aelod o staff sydd ynghlwm wrth oruchwylio’r ymgeisydd fod yn rhan o’r Bwrdd Arholi, ond gall Cadeirydd y Bwrdd Arholi eu gwahodd, wedi cael caniatâd ysgrifenedig penodol yr ymgeisydd ymlaen llaw, i fynychu’r arholiad llafar mewn rôl ymgynghorol. Ni chaiff ymgynghorydd siarad ond ar ôl cael ei wahodd i wneud hynny gan y Cadeirydd.

12.4

Pan fydd ymgeisydd yn aelod o staff y Brifysgol adeg yr arholiad, bydd y Bwrdd Arholi yn cynnwys yr unigolion canlynol:

1. Cadeirydd, fel y nodir ym mharagraff 14.1 a) uchod.
2. Dau arholwr allanol, a benodir yn unol â Chanllawiau'r Brifysgol ar gyfer Arholi Myfyrwyr Ymchwil.

12.5

Bydd Cadeirydd y Bwrdd Arholi yn gyfrifol am sicrhau bod yr arholwr neu arholwyr mewnol a’r arholwr neu arholwyr allanol yn derbyn copïau o’r traethawd ymchwil i’w arholi ynghyd ag unrhyw ddogfennau perthnasol eraill fel y nodir yn y Canllaw i Arholi Myfyrwyr Ymchwil.

13.1

Dylai’r Gyfadran/Ysgol gadw un copi o’r gwaith am o leiaf dwy flynedd. Pan fydd ymgeisydd wedi cyflwyno dau gopi â rhwymiad meddal, dylai'r copi arall fod ar gael i'r ymgeisydd ei gasglu, oni fernir bod y cynnwys yn berthnasol i Gymru, ac yn yr achos hwnnw dylid ei gadw yn Llyfrgell y Brifysgol.

14.1

Caiff ymgeisydd gyhoeddi’r gwaith cyfan neu ran o’r gwaith a gynhyrchwyd yn ystod ei gyfnod cofrestru yn y Brifysgol. Gall ymgeisydd gyhoeddi’r gwaith cyn ei gyflwyno yn ei gyfanrwydd neu'n rhannol, ar yr amod na nodir yn unrhyw le yn y gwaith a gyhoeddir ei fod yn cael ei ystyried ar gyfer gradd uwch. Caiff y fath waith ei ymgorffori wedyn yn y darn o ddysgu annibynnol dan gyfarwyddyd a gyflwynir i'w arholi.

Dylid darllen yr adran hon ar y cyd â'r Canllawiau ar gyfer Myfyrwyr Ymchwil ar Gyflwyno Traethawd Ymchwil a'r Canllawiau ar Arholi Myfyrwyr Ymchwil.

15.1

Bydd traethawd ymchwil a gyflwynir am radd uwch yn y Brifysgol ar gael yn agored, ac ni chaiff ei roi mewn unrhyw ddosbarthiad diogelwch ac ni fydd unrhyw gyfyngu ar ei ddefnyddio.

15.2 Gwaharddiad ar Fynediad

Er gwaethaf y darpariaethau yn y rheoliadau sy'n ymwneud ag argaeledd y traethawd ymchwil neu ddysgu annibynnol dan gyfarwyddyd, gellir caniatáu i'r Brifysgol, ar argymhelliad arbennig a gymeradwywyd gan Ddeon Gweithredol neu enwebai'r ymgeisydd, osod gwaharddiad ar fynediad i waith ymgeisydd am gyfnod o hyd at bum mlynedd. Cyfrifoldeb goruchwyliwr yr ymgeisydd fydd gwneud cais i'r Deon Gweithredol neu enwebai cyn gynted ag y bo'n rhesymol ymarferol ac yn achos y traethawd ymchwil doethurol, cyn archwilio'r traethawd ymchwil. Byddai'r gwaharddiad hwn hefyd yn berthnasol i aelodau'r Brifysgol. 

15.3

Dylai’r crynodeb a’r teitl fod ar gael yn ddirwystr.

15.4

Mae'n rhaid i unrhyw argymhelliad am wahardd mynediad gael ei gyflwyno i y Deon Gweithredol neu enwebai ar ôl i oruchwyliaeth ymgeisydd roi ystyriaeth i'r mater. Cyfrifoldeb y goruchwyliwr fydd cyflwyno’r cais cyn gynted ag y bo’n rhesymol ymarferol. Rhaid i’r argymhelliad gynnwys datganiad ynghylch y rhesymau dros wneud y cais. Gwneir y rhan fwyaf o’r ceisiadau hyn ar sail sensitifrwydd masnachol yr ymchwil, a allai fod wedi’i noddi’n rhannol gan gorff masnachol neu ddiwydiannol.

15.5

Pan ganiateir gwaharddiad ar fynediad dylid hysbysu Goruchwyliwr yr ymgeisydd. Yn achos gwaith y tybir ei fod yn berthnasol i Gymru, bydd y Gyfadran/Ysgol yn hysbysu llyfrgellydd Llyfrgell Genedlaethol Cymru o’r ffaith y dylid atal mynediad at y gwaith am gyfnod penodedig.

15.6

Tybir y bydd y penderfyniad i atal mynediad yn dod i rym cyn gynted ag y bydd y gwaith wedi’i gyflwyno, ond caiff y cyfnod a gymeradwywyd ei gyfrifo o’r dyddiad y caiff yr ymgeisydd ei hysbysu’n ffurfiol gan y Brifysgol am y ffaith ei fod yn gymwys i ennill gradd.

15.7

Pan gaiff gwaith ei gyflwyno, bydd yn ofynnol i ymgeisydd gynnwys datganiad wedi’i lofnodi ynddo a fydd yn dangos naill ai:

• Bod y gwaith, os yw’n llwyddiannus, yn gallu bod ar gael ar gyfer benthyciad rhwng llyfrgelloedd neu i’w lungopïo (yn unol â’r ddeddf hawlfraint), ac y gellir darparu’r teitl a’r crynodeb ar gyfer sefydliadau allanol; neu
• Y daw’r gwaith, os yw’n llwyddiannus, ar gael felly ar ddiwedd cyfnod y gwaharddiad.

16.1

Bydd yr holl fyfyrwyr sy’n cofrestru ar gyfer yr Elfen Doethuriaeth wedi cwblhau Gradd Meistr a Addysgir (MSc) a Gradd Meistr Ymchwil (MRes) a llwyddo ynddynt.

17.1

Bydd ymgeiswyr sydd wedi cymhwyso am eu dyfarniadau yn cael eu derbyn i’w graddau yn eu habsenoldeb, drwy orchymyn Is-ganghellor Prifysgol Abertawe. Gwahoddir yr ymgeiswyr i seremoni ddyfarnu yn ddiweddarach i ddathlu eu dyfarniad.

18.1

Bydd ceisiadau gan Gyfadrannau/Ysgolion am ddyfarniadau Aegrotat yn cael eu hystyried yn unol â gweithdrefnau’r Brifysgol ar gyfer Dyfarnu Graddau Aegrotat. 

19.1

Caiff ceisiadau gan Gyfadrannau/Ysgolion am ddyfarniadau ar ôl marwolaeth eu hystyried yn unol â gweithdrefnau’r Brifysgol ar gyfer Dyfarniadau ar ôl Marwolaeth.  

20.1

Caiff ymgeiswyr nad yw’r Bwrdd Arholi wedi’u hargymell ar gyfer y dyfarniad y cyflwynwyd y traethawd ymchwil ar ei gyfer apelio yn erbyn y penderfyniad a gofyn am apêl academaidd. Cynhelir pob apêl academaidd yn unol â gweithdrefnau Cywirdeb Marciau a Gyhoeddwyd a gweithdrefnau Apeliadau Academaidd Prifysgol Abertawe.

21.1

Ystyrir honiadau o gamymddygiad academaidd yn unol â gweithdrefnau a rheoliadau Camymddygiad Academaidd Prifysgol Abertawe. Caiff unrhyw honiadau o gamymddygiad academaidd a dderbynnir gan y Brifysgol ar ôl cyflwyno’r radd PhD (integredig +2) (Elfen Doethuriaeth) i’r ymgeisydd eu hystyried gan y sefydliad sy’n dyfarnu’r radd.

22.1

Caiff honiadau yn ymwneud ag addasrwydd i ymarfer eu hystyried yn unol â Rheoliadau Addasrwydd i Ymarfer Prifysgol Abertawe.

23.1

Dylai myfyrwyr sy’n anfodlon ar y dysgu a’r addysgu, y cyfleusterau neu'r gwasanaethau a ddarperir gan y Brifysgol, neu’r modd y mae’r Brifysgol, ei myfyrwyr, neu ei staff wedi ymddwyn neu heb ymddwyn, ddilyn y camau gweithredu a amlygir yng Y Weithdrefn Gwyno Prifysgol Abertawe.