Apeliadau Academaidd

AR GYFER POB RHAGLEN A ADDYSGIR A PHOB RHAGLEN YMCHWIL

Gwybodaeth Bwysig

Ni fwriedir i'r weithdrefn hon gael ei defnyddio i ystyried cwynion gan fyfyrwyr. Dylai myfyrwyr sydd am gwyno ddefnyddio Gweithdrefnau Cwynion y Brifysgol. Os yw ymgeiswyr am ofyn i farciau unigol gael eu gwirio, dylent ddefnyddio'r weithdrefn Cywirdeb Marciau a Gyhoeddwyd.

Mae’r gweithdrefnau hyn yn berthnasol i fyfyrwyr sy’n dymuno apelio yn erbyn penderfyniad a wnaed gan Fwrdd Arholi.

Os ydych yn teimlo eich bod yn gymwys, bod gennych reswm dros apelio, ac eich bod o fewn y terfynau amser, bydd angen i chi gwblhau’r Ffurflen Gais am Apêl.

Bydd angen cyflwyno’r Ffurflen Gais am Apêl, ynghyd ag unrhyw dystiolaeth i gefnogi’r cais trwy e-bostio studentcases@swansea.ac.uk. Gan fod staff yn gweithio o bell ar hyn o bryd, ni allwn dderbyn ffurflenni apêl neu unrhyw ddogfennaeth/ohebiaeth drwy’r post.

Cynghorir myfyrwyr hefyd i ddarllen y ddogfen Cwestiynau Cyffredin sy’n darparu rhagor o wybodaeth am ddyddiadau cau allweddol ar gyfer cyflwyno apeliadau a sut y penderfynir ar yr apeliadau.

Os oes gennych gwestiynau ar y weithdrefn neu’r rheoliadau, cysylltwch â’r Tîm Achosion Myfyrwyr, a fydd yn hapus i ateb ymholiadau sydd gennych, drwy e-bost: studentcases@abertawe.ac.uk

Yn ogystal â hyn, mae Canolfan Gyngor Undeb y Myfyrwyr ar gael i gynorthwyo ac i gynghori myfyrwyr, yn gyfrinachol, ynghylch apeliadau ac mae’r gwasanaeth yn rhad ac am ddim i fyfyrwyr. Gallwch gysylltu â’r ganolfan drwy e-bost i: ‘advice’.

Cysylltiadau Cyfadrannau/Ysgolion yn dilyn Cyhoeddi'r Canlyniadau

Cyfadran y Dyniaethau a'r Gwyddorau Cymdeithasol

Yr Ysgol Diwylliant a Chyfathrebu

assessment-cultureandcom@abertawe.ac.uk

Ysgol y Gyfraith Hillary Rodham Clinton

assessment-law@abertawe.ac.uk

Yr Ysgol Reolaeth

assessment-management@abertawe.ac.uk

Ysgol y Gwyddorau Cymdeithasol

assessment-socialsciences@abertawe.ac.uk

Y Gyfadran Gwyddoniaeth a Pheirianneg

studentsupport-scienceengineering@abertawe.ac.uk

Y Gyfadran Meddygaeth, Gwyddorau Iechyd a Bywyd

assessment-medicinehealthlifescience@abertawe.ac.uk

Y Coleg

the-college@abertawe.ac.uk

1. Cyflwyniad

Diffinnir apêl academaidd fel cais i ofyn am adolygiad o benderfyniad gan gorff academaidd sy’n gyfrifol am wneud penderfyniadau ynghylch dilyniant, asesu a dyfarniadau myfyrwyr. Dim ond yr unigolion eu hunain sy’n cael cyflwyno apêl; ni all cynrychiolydd, rhiant neu unrhyw drydydd parti arall gyflwyno apêl (oni fydd modd dangos bod rhesymau da pam na all y myfyriwr gyflwyno'r apêl ei hun).

Pan fydd apêl academaidd yn cynnwys cwyn hefyd neu, yn yr un modd, pan fydd cwyn yn cynnwys apêl, mae’n bosibl y bydd Gwasanaethau Academaidd yn newid categori'r apêl neu'r gŵyn (pa gam bynnag a gyrhaeddwyd) a’i phrosesu dan y rheoliad neu’r weithdrefn fwyaf perthnasol os yw hyn yn debygol o arwain at ganlyniad mwy priodol ar gyfer yr unigolyn/unigolion sy’n apelio neu sy'n cwyno. Bydd Gwasanaethau Academaidd yn hysbysu'r ymgeisydd yn ysgrifenedig (cael ei e-bostio) os penderfynir newid y categori.

Mae'r Brifysgol yn disgwyl i'r holl bartïon ymddwyn mewn modd rhesymol a theg a dangos parch i'w gilydd. Os na chaiff apêl ei chadarnhau, hysbysir yr ymgeisydd am y rhesymau dros y penderfyniad.

2. Cymhwysedd

Mae’r gweithdrefnau hyn ar gael i ymgeiswyr sydd wedi'u cofrestru yn y Brifysgol, gan gynnwys y rhai sy'n astudio neu’n byw dramor, y rhai sydd ar leoliad neu gyfnod dysgu yn y gweithle, ac ymgeiswyr sydd wedi gohirio eu hastudiaethau dros dro.

Mae'r gweithdrefnau hyn yn berthnasol hefyd i gyn-fyfyrwyr Prifysgol Abertawe sydd wedi tynnu'n ôl o'u rhaglen, neu sydd wedi cwblhau eu rhaglen, ar yr amod bod yr apêl yn cael ei chyflwyno o fewn 3 mis ar ôl derbyn penderfyniad y Bwrdd Arholiadau.

Mae’r gweithdrefnau apelio hyn yn berthnasol i ymgeiswyr sy’n dymuno apelio yn erbyn penderfyniad a wnaed gan Fwrdd Arholi yn y sefyllfaoedd canlynol:

Ymgeiswyr sy’n cael eu rhwystro rhag parhau â’u hastudiaethau ar ganol lefel astudio neu ran o raglen.
Ymgeiswyr sy’n methu cymhwyso i symud ymlaen i gam nesaf eu rhaglen ar ddiwedd lefel, ar ddiwedd rhan neu ar ddiwedd blwyddyn.
Lle gallai goblygiadau’r penderfyniad ynghylch dilyniant a wnaed gan y Bwrdd Arholi gael effaith sylweddol ar ganlyniad cyffredinol y myfyriwr (e.e. capio marciau).
Ymgeiswyr sydd wedi cwblhau eu rhaglen ond sy’n dymuno apelio yn erbyn y canlyniad, neu ymgeiswyr sy’n anfodlon ar ddyfarniad cymhwyster ymadael y Brifysgol.

2.1

Seiliau ar gyfer Apêl

2.2

Mae arholwyr yn defnyddio cyfuniad o brofiad a gwybodaeth am y myfyriwr, perfformiad y myfyriwr ac a yw wedi cyrraedd y safon academaidd ofynnol, ac ymwybyddiaeth o arfer gorau mewn addysg uwch i lunio barn academaidd ar allu myfyriwr. Barn academaidd yw penderfyniad y staff academaidd ar ansawdd gwaith academaidd neu'r meini prawf a ddefnyddir i farcio gwaith (yn hytrach na'r broses farcio weinyddol). Ni fydd apeliadau academaidd sy'n herio'r farn academaidd hon yn cael eu hystyried.

2.3

Ni fydd apeliadau yn erbyn penderfyniadau gan Bwyllgor Amgylchiadau Arbennig Cyfadrannau/Ysgolion (neu Bwyllgor priodol), neu Fwrdd Rheoliadau ac Achosion Academaidd y Brifysgol (neu ei enwebai), mewn perthynas ag amgylchiadau esgusodol fel arfer yn cael eu hystyried.

2.4

Ni fydd y Brifysgol ond yn ystyried apeliadau academaidd sy'n seiliedig ar un neu fwy o’r seiliau canlynol:

2.4.1

Ni wnaeth y Bwrdd Arholi ystyried yr holl waith a oedd i’w gyflwyno, ac a gyflwynwyd yn gywir, i’w asesu.

2.4.2

Cafwyd tystiolaeth o wall cyfrifo neu wall gweinyddol wrth wneud y penderfyniad diwedd lefel/rhan.

2.4.3

Cafwyd tystiolaeth o ragfarn neu dueddfryd neu asesu annigonol, heb fod o natur academaidd, gan un neu fwy o’r arholwyr.

2.4.4

Cafwyd diffygion neu anghysondebau yn y modd y cynhaliwyd yr arholiad neu mewn cyfarwyddiadau ysgrifenedig neu gyngor yn eu cylch sydd, oherwydd eu natur, yn peri amheuaeth resymol ynghylch a fyddai’r arholwyr wedi dod i’r un penderfyniad pe na baent wedi digwydd. Rhaid i ymgeiswyr ddarparu rheswm cymhellol dros beidio â thynnu sylw'r Gyfadran/Ysgol at y diffygion neu'r anghysondebau ar y pryd.

2.4.5

Roedd yr arholwyr yn ymwybodol o ddiffygion neu anghysondebau yn y modd y cynhaliwyd yr arholiad neu mewn cyfarwyddiadau ysgrifenedig neu mewn cyngor yn eu cylch, lle gallai'r diffygion neu'r anghysondebau, ym marn yr ymgeisydd, fod wedi cael effaith niweidiol ar ei berfformiad ond ni wnaeth yr arholwyr roi ystyriaeth lawn i'r diffygion neu'r anghysondebau hyn.

2.4.6

Amgylchiadau esgusodol (yn unol â'r diffiniad yn y Polisi ar Amgylchiadau Esgusodol sy'n Effeithio ar Asesu) nad oedd yr Arholwyr yn ymwybodol ohonynt ac a effeithiodd yn niweidiol ar berfformiad academaidd yr ymgeisydd. Mae'n rhaid i ymgeiswyr ddarparu esboniad, ynghyd â thystiolaeth ategol i ddangos:

Roedd yr ymgeisydd dan amgylchiadau esgusodol ar adeg yr asesiad(au) yr effeithiwyd arnynt; a
Chafodd yr amgylchiadau esgusodol effaith andwyol ar berfformiad academaidd yr ymgeisydd yn yr asesiad yr effeithiwyd arno; ac
Mae'r ymgeisydd:

a) wedi methu â phenderfynu a oedd yn addas i gynnal yr asesiad ai peidio; a/neu

b) roedd â rheswm da dros beidio â hysbysu'r Gyfadran/Ysgol o'i amgylchiadau ar yr adeg berthnasol (gweler Adrannau 2.5 a 2.6).

2.5

Yn unol â rheoliadau'r Brifysgol, disgwylir i ymgeiswyr gyflwyno cais i'w Cyfadran/Hysgol, ynghyd â thystiolaeth o unrhyw amgylchiadau personol a allai fod wedi cael effaith niweidiol ar eu hastudiaethau, yn unol â'r Polisi ar Amgylchiadau Esgusodol sy'n Effeithio ar Asesu. Rhaid i gais o'r fath gael ei gyflwyno yn unol â pholisi'r Gyfadran/Ysgol ac erbyn y dyddiad cau a nodwyd gan y Gyfadran/yr Ysgol. Fel arfer, ni fydd apêl academaidd sy'n seiliedig ar "amgylchiadau esgusodol newydd", nad yw wedi cael ei chyflwyno i'r Gyfadran/ Ysgol yn unol â pholisi'r Gyfadran/yr Ysgol wrth gyflwyno ac erbyn y dyddiad cau a nodwyd gan y Gyfadran/yr Ysgol yn cael ei hystyried.

Disgwylir i ymgeiswyr sy'n astudio ar y rhaglenni canlynol gyflwyno ceisiadau amgylchiadau esgusodol i'w Cyfadran/Hysgol, yn unol â'r gweithdrefnau a'r terfynau amser a nodir yn llawlyfr eu Cyfadran/Hysgol; rhoddir blaenoriaeth i'r rhain dros Bolisi'r Brifysgol ar Amgylchiadau Esgusodol sy'n Effeithio ar Asesu ar gyfer y rhaglenni hyn:

MBBCh Meddygaeth;
Cwrs Ymarfer y Gyfraith;
LLM - Rhaglen Meistr a Addysgir Hyblyg

Yn achos myfyrwyr ymchwil, disgwylir i ymgeiswyr hysbysu eu goruchwylwyr am amgylchiadau a allai effeithio ar eu hastudiaethau wrth iddynt godi er mwyn iddynt gael eu hystyried yn briodol a/neu er mwyn cymryd camau priodol. Lle bydd arholiad llafar (ymchwil) gan yr ymgeisydd, disgwylir i'r ymgeisydd hysbysu'r Bwrdd Arholi am unrhyw amgylchiadau esgusodol a allai effeithio ar ei arholiad. Ni fydd apeliadau academaidd sy’n seiliedig ar amgylchiadau esgusodol y gellid bod wedi tynnu sylw’r Bwrdd Arholi atynt cyn yr arholiad llafar yn cael eu hystyried.

2.6

Rhagdybir na fyddai'r ymgeisydd wedi gallu penderfynu a oedd yn ddigon iach i ymgymryd â'r asesiad a/neu fod rheswm da dros beidio â hysbysu’r Gyfadran/Ysgol o’r sefyllfa ar yr adeg berthnasol lle bo ymgeisydd yn darparu tystiolaeth ysgrifenedig briodol sy’n dangos:

(a) Bod unrhyw un o'r amgylchiadau esgusodol canlynol wedi effeithio arno:

Iselder ysbryd difrifol;
Problemau iechyd meddwl difrifol;
Cyfnod fel claf mewn lleoliad seiciatrig;
Marwolaeth perthynas agos (diffinnir hyn fel rhiant/prif ofalwr yr ymgeisydd, chwaer neu frawd/partner/priod, mab neu ferch);
Ymosodiad rhywiol difrifol.

(b) Nad oedd yr amgylchiadau uchod wedi digwydd ynghynt na mis calendr cyn y dyddiad cyflwyno/arholi'r asesiad dan sylw.

Nid yw'r uchod yn rhwystro ymgeisydd rhag cyflwyno apêl sy'n seiliedig ar unrhyw fath o amgylchiadau esgusodol a gododd ynghynt na mis cyn dyddiad cyflwyno/arholi'r asesiad dan sylw ar yr amod y bodlonir y meini prawf yn Adran 2.4.6.

2.7

Fel arfer, ni chaiff ymgeiswyr y caniatawyd arholiadau atodol iddynt gyflwyno apêl yn erbyn y penderfyniad hwnnw.

3. Cyflwyno Apêl Academaidd a Therfynau Amser

Yn achos ymgeiswyr sy’n astudio dan drefniadau cydweithredol, cyflwynir apeliadau yn erbyn penderfyniadau academaidd dan weithdrefn apelio’r sefydliad partner yn y lle cyntaf, a chânt eu hadolygu trwy Weithdrefnau Adolygiad Terfynol Prifysgol Abertawe os yw’r myfyriwr yn dal i fod yn anfodlon.

Darperir manylion gweithdrefnau apelio'r sefydliad i ymgeiswyr yn ystod eu cyfnod yn astudio yn y sefydliad dan sylw.

3.1

Rhaid cyflwyno pob apêl yn erbyn penderfyniad academaidd i'r Isadran Apeliadau Academaidd neu drwy e-bost i studentcases@abertawe.ac.uk. Mae rhagor o wybodaeth ac eglurhad pellach am y gweithdrefnau hyn hefyd ar gael gan Wasanaethau Academaidd.

3.2

Os yw ymgeiswyr yn dymuno apelio yn erbyn penderfyniad Bwrdd Arholi diwedd Lefel/Rhan, rhaid iddynt gyflwyno'r apêl o fewn 3 mis i dderbyn penderfyniad y Bwrdd Arholi perthnasol (h.y. y dyddiad pan gaiff y canlyniad academaidd ei gyhoeddi ar y fewnrwyd neu ar gael i’r ymgeisydd gan y Gyfadran/Ysgol). Felly, ni chaiff ymgeiswyr aros nes iddynt dderbyn dyfarniad/cymhwyster ymadael i apelio yn erbyn penderfyniad a wnaed gan Fwrdd Arholi yn ystod Lefel/Rhan gynharach. Gweler yr enghraifft benodol hon:

Byddai angen i fyfyriwr israddedig sydd am apelio yn erbyn ei farciau Blwyddyn 2 gyflwyno apêl o fewn 3 mis i gael ei hysbysu am benderfyniad Bwrdd Arholi Blwyddyn 2;
Byddai angen i fyfyriwr ar gynllun Meistr a Addysgir sydd am apelio yn erbyn marciau ei fodiwl a addysgir gyflwyno apêl o fewn 3 mis i gael ei hysbysu am benderfyniad y Bwrdd Arholi sy'n cadarnhau'r marciau hyn a'r penderfyniad ynghylch dilyniant.

Ni fydd y Brifysgol fel arfer yn ystyried apeliadau academaidd a gyflwynir mwy na 3 mis ar ôl hysbysiad o benderfyniad y Bwrdd Arholi perthnasol, oni bai fod yr ymgeisydd yn dangos rheswm cymhellol dros gyflwyno'r apêl yn hwyr.

3.3

Os na dderbynnir apêl o fewn y terfyn amser a bennwyd, fel rheol caiff yr apêl ei thrin fel un nad yw'n gymwys i'w hystyried, ar y sail ei bod 'allan o amser' oni bai fod yr ymgeisydd yn gallu dangos rheswm cymhellol dros beidio â chyflwyno'r apêl o fewn y terfyn amser. Lle penderfynir nad yw apêl yn gymwys i'w hystyried, hysbysir yr ymgeisydd am y canlyniad hwn drwy e-bost ac fe'i hysbysir am ei hawl i ofyn am adolygiad terfynol o'r canlyniad dan y Rheoliadau Adolygiad Terfynol.

3.4

Rhaid cyflwyno pob apêl yn ysgrifenedig, gan ddefnyddio ffurflen Apêl Academaidd AR1RD-1-B y Brifysgol.

Rhaid i'r apêl gynnwys:

Y sail ar gyfer yr apêl (gweler Adran 2).
Y canlyniad y mae’r ymgeisydd yn dymuno ei gael (er enghraifft, cais penodol am ganiatâd i sefyll arholiadau atodol). Rhaid bod modd caniatáu’r canlyniad a ddymunir o fewn y rheoliadau cyfredol.
Manylion am yr elfen neu'r elfennau o astudiaethau'r ymgeisydd yr effeithiwyd arnynt (er enghraifft côd y modiwl, aseiniad, arholiad a dyddiad yr asesiad) a manylion am effaith yr amgylchiadau ar yr elfennau penodol hynny.
Dogfennaeth lawn i ategu unrhyw amgylchiadau eithriadol neu honiadau (er enghraifft: tystysgrif feddygol/iechyd, tystysgrif marwolaeth, llythyr cefnogol gan wasanaeth cymorth yn y Brifysgol). Rhaid bod dyddiad ar y fath dystiolaeth, rhaid iddi nodi sut effeithiodd yr amgylchiadau ar y perfformiad academaidd, rhaid iddi fod yn berthnasol i'r asesiad yr effeithiwyd arno, a rhaid iddi ddangos nad oedd yr ymgeisydd yn gallu penderfynu a oedd yn ddigon iach i ymgymryd â'r asesiad a/neu fod rheswm da dros beidio â hysbysu’r Gyfadran/Ysgol o’r sefyllfa ar yr adeg berthnasol.

Mae’r Brifysgol yn cydnabod, serch hynny, y gall fod yn anodd i fyfyrwyr gael tystiolaeth, gan nodi'r pwysau presennol ar y gwasanaethau iechyd a gwasanaethau eraill, a bydd y Brifysgol yn gwneud pob ymdrech i ystyried ceisiadau gyda chydymdeimlad. Mae’n bosibl y byddwn yn gofyn am ragor o dystiolaeth os bydd angen.

4. Cadarnhau Cysondeb y Weithdrefn

4.1

Cyn ystyried unrhyw apêl, bydd enwebai Cyfarwyddwr y Gwasanaethau Academaidd (y cyfeirir ato o hyn ymlaen fel yr enwebai) yn sicrhau bod y Bwrdd Arholi wedi'i gyfansoddi'n briodol, a’i fod wedi ymgymryd â’i fusnes yn y modd priodol (h.y. yn unol â’r Rheoliadau Academaidd). Lle nad yw’r cyfarfodydd wedi eu cynnal yn gywir, bydd yr enwebai yn gwneud trefniadau i ailystyried yr holl benderfyniadau y gellid bod wedi effeithio arnynt.

5. Hidlo Cychwynnol Apeliadau

5.1

Bydd Gwasanaethau Academaidd yn ysgrifennu at yr ymgeisydd i gydnabod eu bod wedi derbyn apêl o fewn 5 niwrnod gwaith. Anfonir y gydnabyddiaeth drwy e-bost at yr ymgeisydd a bydd yn cynnwys trosolwg cyffredinol o'r weithdrefn apelio ac yn cynnwys amcan amser ar gyfer gwneud penderfyniad ar yr apêl.

5.2

Ar ôl cael eu cydnabod, caiff yr holl apeliadau eu hystyried i ddechrau gan aelodau staff Gwasanaethau Academaidd sydd â phrofiad ac wedi derbyn hyfforddiant priodol, y cyfeirir atynt fel y Pwyllgor Hidlo.

5.3

Gall y Pwyllgor Hidlo gysylltu â'r Gyfadran/Ysgol perthnasol, y Swyddfa Anableddau, neu'r Gwasanaethau Lles, fel y bo'n briodol, i ofyn am ragor o wybodaeth os tybir bod angen hynny er mwyn rhoi ystyriaeth gychwynnol i'r cais.

5.4

Gall y Pwyllgor Hidlo wrthod unrhyw apêl nad yw'n seiliedig ar y rhesymau a restrir yn Adran 2.4, neu le nad oes tystiolaeth i gefnogi’r apêl.

5.5

Nid ystyrir y canlynol yn rhesymau dilys dros apelio:

Herio barn academaidd neu broffesiynol yr arholwyr.
Siom ymgeisydd gyda chanlyniad lle mae’r marciau wedi eu cofnodi’n gywir, mae’r rheoliadau asesu wedi eu dilyn yn gywir, a lle nad oes tystiolaeth o anghysondeb materol.
Lle hysbyswyd y Gyfadran/Ysgol, Bwrdd Academaidd y Brifysgol, neu bwyllgor perthnasol am yr amgylchiadau esgusodol a rhoddwyd ystyriaeth lawn i'r amgylchiadau hynny.
Lle na chyflwynodd y myfyriwr dystiolaeth o amgylchiadau esgusodol i'r Gyfadran/Ysgol yn unol â'r Polisi ar Amgylchiadau Esgusodol sy'n Effeithio ar Asesu.
Lle nad yw'r dystiolaeth a gyflwynwyd i gefnogi apêl yn seiliedig ar amgylchiadau esgusodol yn cefnogi'r honiad bod gan yr ymgeisydd amgylchiadau esgusodol ar yr adeg berthnasol.
Lle nad yw'r dystiolaeth a gyflwynwyd i gefnogi apêl ar sail amgylchiadau esgusodol yn cefnogi'r honiad nad oedd yr ymgeisydd yn gallu gallu penderfynu a oedd yn ddigon iach i ymgymryd â'r asesiad a/neu fod rheswm da dros beidio â hysbysu’r Gyfadran/Ysgol o’r sefyllfa ar yr adeg berthnasol.
Lle nad yw'r dystiolaeth a gyflwynwyd i gefnogi apêl ar sail amgylchiadau esgusodol yn cefnogi'r honiad bod gan yr ymgeisydd amgylchiadau esgusodol ar yr adeg berthnasol sydd wedi'u cynnwys yn adran 2.6.

5.6

Bydd ymgeiswyr y mae eu hapêl wedi’i gwrthod yn sgil yr ystyriaeth gychwynnol yn cael eu hysbysu, lle bo hynny’n ymarferol, yn ysgrifenedig (cael ei e-bostio) gan y Pwyllgor Hidlo o fewn 30 niwrnod gwaith i'r dyddiad y derbyniwyd yr apêl neu unrhyw dystiolaeth y gofynnwyd amdani i ategu’r apêl. Bydd yr hysbysiad o wrthod yn cynnwys crynodeb byr o'r rhesymau dros y penderfyniad. Os nad yw hi'n ymarferol rhoi crynodeb o'r rhesymau dros wrthod ar yr un pryd â hysbysu am y penderfyniad, caiff y rhesymau eu darparu cyn gynted ag sy'n ymarferol wedi hynny. Ni fydd unrhyw fethiant i wrthod o fewn yr amserlen berthnasol yn golygu derbyn bod apêl ddilys o dan y rheoliadau hyn wedi'i gwneud gan yr ymgeisydd.

5.7

Os bydd y Pwyllgor Hidlo'n penderfynu bod yr apêl yn seiliedig ar y rhesymau a restrir ym mharagraff 2.4 a bod tystiolaeth gymhellol i gefnogi'r apêl, yn ôl disgreswin y Pwyllgor Hidlo:
(a) caiff yr apêl ei chyfeirio, at sylw'r Bwrdd Apeliadau Academaidd nesaf i'w hystyried.
(b) Bydd y Pwyllgor Hidlo yn ystyried ac yn penderfynu ar yr apêl yn lle’r Bwrdd Apeliadau Academaidd ac yn unol ag Adran 8. Pan fydd hyn yn berthnasol, bydd pob cyfeiriad yn Adran 8 i’r Bwrdd Apeliadau Academaidd yn cynnwys y Pwyllgor Hidlo.

5.8

Pwyllgor Hidlo ofyn am wybodaeth/rhagor o wybodaeth wrth y Gyfadran/Ysgol berthnasol a/neu Gadeirydd y Bwrdd Arholi, am sylwadau. Bydd y Cyfadrannau/Ysgolion a/neu Gadeirydd y Bwrdd Arholi’n gyfrifol am ddarparu manylion am unrhyw ffactorau ychwanegol a allai effeithio ar yr achos, megis rheolau/rheoliadau mewnol; camau gweithredu a gymerwyd gan y Gyfadran/Ysgol; gofynion a chyfyngiadau a bennwyd gan gyrff proffesiynol.

6. Bwrdd Apeliadau Academaidd

6.1

Yr enwebai fydd yn Ysgrifennydd y Bwrdd Apeliadau Academaidd.

6.2

Bydd pob Bwrdd Apeliadau Academaidd yn cynnwys isafswm o dri aelod a gaiff eu dewis gan Ysgrifennydd y Bwrdd o’r canlynol: y Dirprwy Is-gangellorion, aelodau Pwyllgorau/Byrddau'r Brifysgol â phrofiad/arbenigedd perthnasol ac uwch aelodau o'r staff addysgu academaidd (h.y. Uwch-ddarlithwyr neu’n uwch). Yn ogystal, er budd allanoldeb, gellir cyfethol aelodau staff o sefydliadau Addysg Uwch eraill yn ôl yr angen.

6.3

Os bydd angen, caiff un aelod o bob Bwrdd Apeliadau Academaidd ei benodi gan Ysgrifennydd y Bwrdd i fod yn Gadeirydd.

6.4

Gellir galw Bwrdd Apeliadau Academaidd ynghyd i ystyried mwy nag un achos, hyd yn oed os yw achosion o’r fath yn cael eu cyfeirio ato gan fwy nag un Bwrdd Arholi. Fodd bynnag, ni fydd unrhyw aelod yn cymryd rhan mewn trafodaethau ynglŷn ag achosion sy’n ymwneud â myfyriwr sydd wedi astudio yn yr un Gyfadran/Ysgol y mae’r aelod wedi’i gyflogi ynddo. Mewn achosion anochel lle caiff apêl ei chyflwyno gan ymgeisydd o’r un Gyfadran/Ysgol ag aelod o'r Bwrdd Apeliadau, bydd yr aelod yn ymatal rhag trafod yr achos a rhag cytuno ar ganlyniad.

6.5

Lle bo'r Bwrdd Apeliadau Academaidd yn ystyried apeliadau a gyflwynwyd gan ymgeiswyr ymchwil, bydd un aelod o'r Bwrdd yn uwch aelod staff â phrofiad o oruchwylio myfyrwyr ymchwil neu'n Gyfarwyddwr Ymchwil Ôl-raddedig. Lle nad yw hyn yn bosib, ymgynghorir â'r Bwrdd Rheoliadau ac Achosion Academaidd.

7. Gweithdrefnau ar gyfer Ystyried Achosion gan Fyrddau Apeliadau

7.1

Bydd yr holl ddogfennaeth sy’n berthnasol i’r achos, gan gynnwys yr apêl a gyflwynwyd, dogfennaeth ategol a sylwadau gan y Cyfadrannau/Ysgolion a/neu Gadeirydd y Bwrdd/Byrddau Arholi, a chopi o’r cofnod myfyriwr priodol, yn cael eu copïo i aelodau’r Bwrdd Apeliadau Academaidd o fewn cyfnod amser rhesymol.

7.2

Yn ogystal, darperir copi o’r holl ddogfennaeth berthnasol er gwybodaeth i’r ymgeisydd sy’n cyflwyno’r apêl, fel arfer i gyd-fynd â chanlyniad yr apêl.

7.3

Hysbysir y Bwrdd Apeliadau Academaidd am farn yr ymgeisydd drwy’r wybodaeth a ddarperir ar y ffurflen apêl ac unrhyw ddogfennaeth ategol.

7.4

Mewn amgylchiadau eithriadol a chyda chaniatâd Cadeirydd y Bwrdd Rheoliadau ac Achosion Academaidd neu ei enwebai, gellir caniatáu i ymgeiswyr gyflwyno sylwadau'n uniongyrchol i'r Bwrdd Apeliadau Academaidd.

8. Pwerau’r Bwrdd Apeliadau Academaidd

8.1

Bydd y Bwrdd Apeliadau Academaidd yn ystyried:

A rhoddwyd sylw priodol gan y Bwrdd Arholiadau i'r holl waith a oedd i'w gyflwyno, ac a gyflwynwyd yn briodol, i'w asesu;
A oes tystiolaeth o wall gweinyddol neu wrth gyfrifo sy'n peri amheuaeth resymol ynghylch a fyddai’r Bwrdd Arholi wedi dod i’r un penderfyniad pe na bai’r gwall hwnnw wedi digwydd;
A oes tystiolaeth o ddiffygion neu anghysondeb yn y modd y cynhaliwyd yr arholiad neu mewn cyfarwyddiadau ysgrifenedig, neu mewn cyngor yn eu cylch sydd, oherwydd eu natur, yn peri amheuaeth resymol ynghylch a fyddai’r Bwrdd Arholi wedi dod i’r un penderfyniad pe na bai’r diffyg neu’r anghysondeb hwnnw wedi digwydd ac mae'r ymgeisydd wedi darparu rheswm cymhellol dros beidio â dod â'r diffygion neu’r anghysondebau hyn at sylw'r Gyfadran/Ysgol;
A gyflwynwyd manylion ynghylch amgylchiadau esgusodol perthnasol a effeithiodd ar ymddygiad neu berfformiad yr ymgeisydd i’r Gyfadran/Ysgol yn unol â'r Polisi ar Amgylchiadau Esgusodol sy'n Effeithio ar Asesu;
A gymerwyd y camau priodol o ran yr amgylchiadau esgusodol;
A yw'r dystiolaeth a ddarparwyd gan yr ymgeisydd yn cefnogi'r honiad nad oedd yn gallu penderfynu a oedd yn ddigon iach i ymgymryd â'r asesiad a/neu fod rheswm da dros beidio â hysbysu’r Gyfadran/Ysgol o’r sefyllfa ar yr adeg berthnasol;
A yw'r dystiolaeth a ddarparwyd gan yr ymgeisydd yn cefnogi'r honiad bod gan yr ymgeisydd amgylchiadau esgusodol ar adeg yr asesiad(au) perthnasol sydd o fewn cwmpas adran 2.6;
A yw’r amgylchiadau esgusodol perthnasol yn dylanwadu ar yr achos o gwbl (h.y. cafodd effaith andwyol ar berfformiad academaidd yr ymgeisydd yn yr asesiad(au) berthnasol);
A oes tystiolaeth o ragfarn neu dueddfryd neu asesu annigonol ar ran un neu fwy o'r arholwyr;
A oedd penderfyniad y Bwrdd Arholi o’r fath na fyddai pobl resymol wedi gwneud y cyfryw benderfyniad.

8.2

Os yw’r Bwrdd Apeliadau Academaidd yn fodlon ar y materion uchod, gall gymryd un o’r camau gweithredu canlynol:

Yng ngoleuni’r amgylchiadau, a chan roi ystyriaeth briodol i ddymuniadau’r Cyfadrannau/Ysgolion perthnasol a/neu Gadeirydd y Bwrdd Arholi perthnasol, gall gefnogi'r apêl a diwygio penderfyniad y Bwrdd Arholi;
Yng ngoleuni’r amgylchiadau, gall gefnogi’r apêl ac argymell y dylai’r achos gael ei ailystyried gan y Bwrdd Arholi gwreiddiol gan roi arweiniad cryf ynghylch canlyniad posibl;
Yng ngoleuni’r amgylchiadau, gall gefnogi’r apêl ac argymell y dylai Bwrdd Arholi hollol newydd ailystyried penderfyniad y Bwrdd blaenorol;
Yng ngoleuni’r amgylchiadau, gall gefnogi’r apêl a rhoi caniatâd i’r ymgeisydd ailysgrifennu’r traethawd ymchwil a’i ail-gyflwyno i’w ailarholi gan y Bwrdd Arholi gwreiddiol o fewn terfyn amser penodol (yn arbennig ar gyfer graddau ôl-raddedig);
Yng ngoleuni’r amgylchiadau, gall gefnogi’r apêl a rhoi caniatâd i’r ymgeisydd ailysgrifennu’r traethawd ymchwil a’i ailgyflwyno i’w ailarholi gan Fwrdd Arholi hollol newydd o fewn terfyn amser penodol (yn arbennig ar gyfer graddau ôl-raddedig);
Lle canfyddir bod holl amgylchiadau ymgeisydd yn hysbys ac y cymerwyd y camau priodol, neu nad oedd yr amgylchiadau esgusodol yn berthnasol i'r achos, gall y Bwrdd Apeliadau Academaidd wrthod yr apêl, ac felly cadarnhau penderfyniad y Bwrdd Arholi;
Os canfyddir nad yw'r dystiolaeth yn cefnogi'r honiad nad oedd yr ymgeisydd yn gallu penderfynu a oedd yn ddigon iach i ymgymryd â'r asesiad a/neu fod rheswm da dros beidio â hysbysu’r Gyfadran/Ysgol o’r sefyllfa ar yr adeg berthnasol ac nid oedd felly reswm cymhellol dros beidio â datgelu'r amgylchiadau ar yr adeg briodol, gall y Bwrdd Apeliadau Academaidd wrthod yr apêl ac felly cadarnhau penderfyniad y Bwrdd Arholi;
Mewn achosion priodol, gallai’r Bwrdd Apeliadau Academaidd ofyn i ymgeiswyr ohirio eu hastudiaethau lle ystyrir ei bod yn amhriodol cynghori myfyrwyr i dynnu'n ôl;
Os oes angen gwybodaeth ellach ar y panel cyn y gall benderfynu’r canlyniad, gall y Cadeirydd ohirio ystyried yr achos nes y daw gwybodaeth ychwanegol i law;
Sylwer, nid oes gan y Bwrdd Apeliadau Academaidd hawl i newid marciau ymgeisydd mewn modiwl a/neu ddosbarthiad ei radd ar sail amgylchiadau esgusodol. Nod unrhyw asesiad yw mesur cyflawniad, nid potensial. Mae'r marciau a ddyfernir yn adlewyrchiad cywir o berfformiad, felly ac ni fyddant yn cael eu newid ar sail amgylchiadau esgusodol. Os cefnogir apêl ar sail amgylchiadau esgusodol, gellir rhoi cyfle arall i'r ymgeisydd ymgymryd â'r asesiad(au) dan sylw, heb gapio'r marciau o bosib;
Gellir cymryd camau gweithredu eraill fel y bo’n briodol.

8.3

Wrth wneud ei benderfyniad, mae’n rhaid i’r Bwrdd Apeliadau Academaidd gadw mewn cof unrhyw gyfyngiadau a osodwyd gan asiantaethau allanol megis cyrff proffesiynol.

8.4

Dylai myfyrwyr rhyngwladol sydd angen teitheb i allu astudio yn y Brifysgol fod yn ymwybodol bod ei gallu i barhau i astudio yn y Brifysgol yn ddibynnol ar gwrdd ag amgylchiadau eu teitheb a’r terfynau amser a osodwyr gan Asiantaeth Teithebau a Mewnfudo y DU (UKVI). Am fwy o wybodaeth, ewch i https://www.gov.uk/browse/visas-immigration/student-visas.

Bydd unrhyw benderfyniad gan y Bwrdd Apeliadau Academaidd yn unol â rheoliadau academaidd y Brifysgol a ni ddylanwadir gan gyfyngiadau teitheb na therfynau amser a osodir gan Asiantaeth Teithebau a Mewnfudo y DU. Yn achos myfyrwyr rhyngwladol a nodd.

Yn achos myfyrwyr Rhyngwladol a noddir gan y Brifysgol, bydd astudio pellach ar sail penderfyniad academaidd Bwrdd Apeliadau Academaidd neu Fwrdd Arholi yn amodol ar feddu ar deitheb myfyriwr ddilys (Llwybr Myfyrwyr, Haen 4 gynt).

Dylai unrhyw fyfyriwr sydd â phryderon ynghylch eu teitheb gysylltu â’r adran rhyngwladol.

8.5

Yn dilyn unrhyw ailarholi traethawd ymchwil dan baragraff 8.2 pwyntiau 4 a 5 uchod, bydd y Bwrdd Arholi, yn ei ddoethineb, yn penderfynu a ddylid cymeradwyo caniatáu i’r ymgeisydd gael un cyfle arall i ailgyflwyno’r traethawd hir, naill ai am y ffi lawn neu am ffi ostyngol.

8.6

Pan fo traethawd hir yn cael ei ailarholi o ganlyniad i bwynt 5 dan baragraff 8.2 uchod, penodir arholwr/arholwyr allanol newydd. Ni ddarperir unrhyw wybodaeth ar gyfer yr arholwr/arholwyr allanol ynghylch yr arholiad blaenorol ond fe'i hysbysir bod gwaith yr ymgeisydd yn cael ei ailarholi yn dilyn apêl.

8.7

Gall y Bwrdd Apeliadau, fel amod unrhyw ganlyniad, ofyn bod ymgeisydd yn darparu tystiolaeth i'r Brifysgol i ddangos ei ffitrwydd neu fel arall i barhau â'i astudiaethau neu i ddychwelyd iddynt.

9. Hysbysu am Benderfyniad y Bwrdd Apeliadau Academaidd

9.1

Bydd enwebai o’r Gwasanathau Academaidd yn hysbysu'r ymgeisydd yn ysgrifenedig am ganlyniad yr apêl, cyn gynted ag sy’n ymarferol bosibl yn dilyn gwneud penderfyniad ar yr apêl. Bydd y llythyr gan yr enwebai (a fydd yn cael ei e-bostio at yr ymgeisydd) yn cadarnhau penderfyniad y Bwrdd Apeliadau Academaidd/Pwyllgor Hidlo, ac yn rhoi crynodeb bras o'r rhesymau dros y penderfyniad. Bydd yr hysbysiad o wrthod yn cynnwys crynodeb byr o'r rhesymau dros y penderfyniad. Os nad yw hi'n ymarferol rhoi crynodeb o'r rhesymau dros wrthod ar yr un pryd â hysbysu am y penderfyniad, caiff y rhesymau eu darparu cyn gynted ag sy'n ymarferol wedi hynny. Bydd copi o’r llythyr yn cael ei anfon i’r Cyfadrannau/Ysgolion perthnasol/Cadeirydd y Bwrdd Arholi, a chaiff cofnod yr ymgeisydd ei ddiwygio yn unol â hyn.

9.2

Bydd y brifysgol yn hysbysu'r awdurdodau perthnasol (noddwyr, Awdurdodau Addysg Lleol a/neu Asiantaeth Fisâu a Mewnfudo'r DU) am ganlyniad yr apêl lle bo’n briodol.

10. Statws Ymgeisydd yn Ystod Apêl

10.1

Bydd ymgeisydd sy’n cyflwyno apêl ar ganol lefel, blwyddyn, neu ran yn gallu parhau ar sail dros dro hyd y gwneir penderfyniad. Mae hyn yn sicrhau na fydd ymgeisydd y mae ei apêl yn cael ei chefnogi yn ddiweddarach dan anfantais o safbwynt academaidd. Bydd presenoldeb ar leoliadau clinigol yn ôl doethineb y Gyfadran/Ysgol.

10.2

Ni chaiff ymgeisydd sy’n cyflwyno apêl ar ddiwedd lefel, blwyddyn neu ran astudiaethau symud ymlaen i’r lefel, y flwyddyn neu’r rhan nesaf tan y gwneir penderfyniad. Yn ôl doethineb y Gyfadran/Ysgol, fodd bynnag, gellir caniatáu i ymgeisydd fynychu'r addysgu'n anffurfiol ar y lefel neu'r rhan nesaf wrth aros am ganlyniad apêl. Nid ystyrir bod ymgeiswyr o'r fath wedi cofrestru ar y lefel neu'r rhan nesaf, ac ni fydd y Brifysgol yn atebol am unrhyw gostau sy'n codi yn ystod y presenoldeb anffurfiol hwn. Gwneir penderfyniadau'r Pwyllgor Hidlo/Bwrdd Apeliadau Academaidd er lles academaidd gorau'r myfyriwr, heb ystyried unrhyw gyfnodau o bresenoldeb anffurfiol.

10.3

Hysbysir ymgeisydd sy’n parhau â’i astudiaethau, wrth aros am ganlyniad unrhyw apêl, ei bod yn bosibl y bydd gofyn iddo dynnu'n ôl o'r rhaglen neu’r Brifysgol.

10.4

Caniateir i ymgeisydd y tybir ei fod yn gymwys am ddyfarniad ac sydd wedyn yn cyflwyno apêl raddio. Fodd bynnag, ni roddir dyfarniad nes bod canlyniad yr Apêl yn hysbys.

11. Opsiynau ar Gael i’r Ymgeisydd yn Dilyn Penderfyniad y Pwyllgor Hidlo neu'r Bwrdd Apeliadau Academaidd.

11.1

Gall ymgeisydd gyflwyno cais am adolygiad terfynol o ganlyniad yr apêl yn unol â Gweithdrefnau Adolygiadau Terfynol y Brifysgol.

11.2

Mewn achosion lle newidiwyd penderfyniad y Bwrdd Arholi o blaid yr ymgeisydd, fel arfer ni chaiff ofyn am adolygiad terfynol o’r penderfyniad hwnnw. Fodd bynnag, mae modd i fyfyrwyr wneud cais i’r penderfyniad gwreiddiol gael ei gadarnhau os dymunant.

12. Ad-dalu Costau

12.1

Ni waeth beth yw'r canlyniad, nid ad-delir i'r ymgeisydd unrhyw gostau, y bu’n rhaid eu talu wrth gyflwyno apêl.

13. Adrodd, Monitro, Gwerthuso ac Adolygu

13.1

Bydd y Pwyllgor Hidlo/ Bwrdd Apeliadau Academaidd yn cyfeirio unrhyw bwynt o egwyddor neu bryder cyffredinol sy’n codi yn ystod gwrandawiad achos penodol at sylw’r Bwrdd Rheoliadau ac Achosion Academaidd. Bydd y Cyfadrannau/Ysgolion perthnasol hefyd yn cael gwybod am ganlyniad pob gwrandawiad apêl.

13.2

Bydd Gwasanaethau Academaidd yn cynnal cronfa ddata o apeliadau academaidd a wnaed yn ystod pob sesiwn academaidd ac yn cyflwyno gwybodaeth ystadegol sy'n ymwneud ag apeliadau i’r Bwrdd Rheoliadau ac Achosion Academaidd yn flynyddol. Cyfrifoldeb y Bwrdd Rheoliadau ac Achosion Academaidd yw monitro'r data a gwneud argymhellion fel y bo'n briodol.

13.3

Cyfrifoldeb y Bwrdd Rheoliadau ac Achosion Academaidd fydd adolygu’r Rheoliadau ar gyfer Apeliadau Academaidd a’u heffeithiolrwydd a gwneud argymhellion ar gyfer newidiadau, lle y bo’n briodol, i’w hystyried gan y Senedd.