Mae bod i ffwrdd yn y brifysgol yn amser cyffrous iawn, ond efallai bydd cyfnodau pan rwyt ti'n teimlo bod angen ychydig o gymorth neu gyngor ychwanegol arnat ti.
Yma yn Abertawe, mae gennym ni lawer o wasanaethau gwych i dy helpu i ffynnu a manteisio i'r eithaf ar dy brofiad fel myfyriwr.
Edrycha ar yr wybodaeth isod i ddysgu am yr holl ffyrdd y gallwn dy gefnogi yn ystod dy daith yn y brifysgol.
Mae ein Gwasanaeth Lles yn darparu cymorth emosiynol i bob myfyriwr. Mae'r tîm yn cynnig amrywiaeth o ganllawiau, cyngor ac ymyriadau therapiwtig ar gyfer unigolion a grwpiau, gan gynnwys addasiadau academaidd, cwnsela, a mentora un-i-un.
Mae llawer o adnoddau hunangymorth y gallwch eu defnyddio ar-lein ar unrhyw adeg, ond os ydych yn teimlo y gall fod angen cefnogaeth ychwanegol arnoch chi, llenwch ein Ffurflen Cais Am Gymorth.
Ar ôl i'ch ffurflen gael ei hadolygu, bydd y tîm yn cysylltu i'ch cynghori ymhellach am y camau nesaf. Gallwch hefyd gysylltu â'r Gwasanaeth Lles drwy e-bost.
Mae'r tîm Llesiant@BywydCampws wedi paratoi llwyth o wybodaeth i dy helpu i ymgartrefu ac i gadw'n ddiogel yn y brifysgol. Mae gan y gwasanaeth dudalennau gwe sy'n llawn awgrymiadau a syniadau i dy gefnogi yn ystod dy gyfnod fel myfyriwr yma.
Mae ein tîm arobryn Arian@BywydCampws ar gael i roi gwybodaeth, cyngor, arweiniad a chymorth ar bob mater sy'n ymwneud â chyllid myfyrwyr, caledi ariannol a chyllidebu, o'r cyfnod cyn-gofrestru nes dy fod yn cwblhau dy radd. Maen nhw hefyd yn rhoi cymorth ariannol i fyfyrwyr sydd ag ystyriaethau ychwanegol megis y rhai sy'n ymadawyr gofal, yn ofalwyr, yn fyfyrwyr sydd wedi'u dieithrio o'u teuluoedd neu'n feichiog.
Gelli di ddysgu sut i elwa o gymorth gan Arian@BywydCampws yma.
Mae tîm anhygoel Ffydd@BywydCampws yma i ti. Maen nhw'n cynnig amrywiaeth eang o wasanaethau cymorth gan gynnwys mannau aml-ffydd diogel ar Gampws Singleton a Champws y Bae, cymorth i fyfyrwyr mewn profedigaeth, myfyrio, a'r Gwasanaeth Gwrando.
Cer i'r dudalen we i weld rhestr lawn o wasanaethau gwych.
Mae ein tîm Cyfranogiad@BywydCampws yn cynnig cymorth ychwanegol i Ymadawyr Gofal cymwys a myfyrwyr sydd wedi'u dieithrio o'u teuluoedd i'w helpu i bontio i fywyd yn y brifysgol, canolbwyntio ar astudiaethau, a graddio'n llwyddiannus.
Maen nhw'n darparu gwybodaeth, cyngor ac arweiniad ar bob agwedd ar fywyd prifysgol, er mwyn i fyfyrwyr allu gwneud penderfyniadau gwybodus am eu dyfodol ym Mhrifysgol Abertawe a'r tu hwnt.
Ymadawyr Gofal
Mae Ymadawr Gofal yn berson ifanc sydd wedi bod yng ngofal yr Awdurdod Lleol am o leiaf 13 wythnos ers yn 14 oed ac mewn gofal Awdurdod Lleol wrth adael yr ysgol yn 16 oed neu ar ôl hynny.
Myfyriwr sydd wedi'i ddieithrio o'i deulu
Ystyrir bod myfyrwyr wedi'u dieithrio o'u teuluoedd os yw'r berthynas â'u rhieni wedi methu ac nid oes modd rhagweld cyfle i gymodi.
Os wyt ti'n Ymadawr Gofal neu'n fyfyriwr sydd wedi'i ddieithrio o'i deulu, a hoffet ti gael mwy o wybodaeth am sut i roi gwybod i'r brifysgol am dy statws, sut i fod yn gymwys i gael cymorth a darganfod pa gymorth sydd ar gael, clicia yma. I ddarparu cymorth i ti, nid oes angen i ni wybod am dy amgylchiadau felly wnawn ni byth ofyn.
Os oes gennyt ti gwestiynau, e-bostia Swyddog Mynediad Cyfranogiad@BywydCampws: accessofficer.campuslife@abertawe.ac.uk.
Mae ein Gwasanaethau Cymorth Cynhwysol i Fyfyrwyr yn darparu cyngor, arweiniad, cymorth ymarferol ac emosiynol i fyfyrwyr sydd ag anableddau corfforol a synhwyraidd, Anawsterau Dysgu Penodol (SpLDs), cyflyrau meddygol tymor hir, Iechyd Meddwl a Chyflyrau ar y Sbectrwm Awtistig.
Maen nhw'n cynghori ar addasiadau rhesymol sydd ar gael i leihau'r effaith y gall y cyflwr ei gael ar astudiaethau academaidd myfyrwyr er mwyn cael y gorau o'u profiad yn y brifysgol, yn ogystal â rhoi cyngor ar gymorth ariannol ychwanegol sydd ar gael fel y Lwfans i Fyfyrwyr Anabl (DSA). Hefyd, gallwn gynnig ystod o arweiniad, cymorth ac opsiynau therapiwtig i unigolion a grwpiau, gan gynnwys cwnsela a mentora un-i-un.
Os wyt ti'n teimlo y gallai fod angen cymorth arnat ti ym Mhrifysgol Abertawe ond nid wyt ti wedi datgelu anabledd na gofyniad penodol eto, llenwa ein Holiadur Cymorth i Fyfyrwyr.
Mae Prifysgol Abertawe yn cydnabod y gall fod cyfrifoldebau gofalu gan lawer o’n myfyrwyr. Ein nod yw darparu amgylchedd croesawgar ar gyfer ein holl fyfyrwyr ac rydym am dy gefnogi i gyflawni llwyddiant.
Er mwyn i ni allu hyrwyddo lles a datblygiad academaidd ein holl fyfyrwyr a staff, rydym wedi llunio polisi i egluro trefniadau ar gyfer plant y gallai fod arnynt angen ymweld â mangreoedd y Brifysgol. Nod y polisi yw sicrhau diogelwch a lles plant sy’n ymweld â’r campws, bodloni ein rhwymedigaethau cyfreithiol a galluogi busnes y Brifysgol i weithredu’n barhaus:
Plant ym Mangreoedd y Brifysgol
Er ein bod yn cefnogi ac yn hyrwyddo gweithgarwch addysgol, mae’r Brifysgol yn weithle ac nid yw ei hadeiladau, ei gweithgareddau a’i mesurau rheoli risg ar gyfer plant yn gyffredinol. Sylwer na ddylid dod â phlant i fannau dysgu ac addysgu (oni bai fod digwyddiad wedi’i drefnu). Mewn amgylchiadau eithriadol neu ar yfer ymweliadau byr, e.e. wrth ymweld am gyfnodau byr er mwyn casglu gwaith, rhaid bod oedolyn gyda’r plant a chaiff plant ymweld ag ardaloedd hygyrch, risg isel yn unig.
Mae Meithrinfa Undeb y Myfyrwyr yn darparu gofal plant fforddiadwy o safon ar Gampws Singleton i blant rhwng 3 mis oed tan eu pen-blwydd yn 8 oed. Am ragor o wybodaeth am ofal plant ac ysgolion, gweler tudalennau gwe’r Cyngor:
Cyngor Castell-nedd Port Talbot
Rydym hefyd wedi llunio Canllaw Gwybodaeth i Deuluoedd cynhwysfawr i’n myfyrwyr rhyngwladol.
Am wybodaeth a chymorth i fyfyrwyr beichiog, cer i’n tudalennau gwe.
Os oes cwestiynau gennyt ti ynghylch yr wybodaeth yn yr e-bost hwn, cysyllta â thîm cymorth dy Gyfadran.
Tîm o Gynghorwyr hyfforddedig yw Canolfan Cyngor a Chymorth Undeb y Myfyrwyr, a all roi cyngor a chynrychiolaeth diduedd a chyfrinachol i ti am ddim, sy'n annibynnol ar y Brifysgol.
Gallant dy gefnogi drwy nifer o faterion cyfreithiol a materion personol, gan gynnwys arian, lles, materion academaidd, tai, ac aflonyddu.
Maen nhw'n cynnig apwyntiadau wyneb yn wyneb o ddydd Llun i ddydd Gwener 10-3pm yn eu swyddfa ar Gampws Singleton ar lawr gwaelod Tŷ Fulton. Mae eu swyddfeydd ar Gampws y Bae ar gau ar gyfer yr haf, ond gallant drefnu apwyntiadau yno os oes angen. Anfona e-bost atynt i drefnu apwyntiad.
E-bost: advice@swansea-union.co.uk
Ffôn: 01792 295 821
Sesiynau galw heibio dros Zoom: 9.30-12pm bob dydd Llun, dydd Mawrth, dydd Mercher a dydd Gwener - Rhif Adnabod y cyfarfod = 712 079 3003. Byddi di'n cyrraedd ystafell aros ddigidol nes bod un o'n cynghorwyr ar gael i siarad â thi.
Mae adnoddau newydd ynghylch iechyd meddwl a lles ar gyfer myfyrwyr Cymraeg eu hiaith wedi eu lansio yn ddiweddar. Mae Myf.Cymru yn cynnig gwefan, ap Cymraeg, podlediadau a chymaint mwy.
Ar y wefan, byddi di'n dod o hyd i gynnwys gwreiddiol gan fyfyrwyr Cymraeg ac adnoddau iechyd meddwl sydd wedi cael eu hadolygu gan therapyddion sy'n siarad Cymraeg.
Mae Myf.cymru wedi gweithio mewn partneriaeth â'r rhaglen Helping Groups to Grow Developments Ltd i greu ap Cymraeg i gefnogi myfyrwyr o ran camddefnyddio sylweddau. Mae'r ap yn llawn adnoddau defnyddiol ac ymarferol i dy gefnogi wrth adfer a bydd yn helpu unrhyw un i lywio heriau bywyd bob dydd.Mae myf.Cymru hefyd wedi creu cyfres o bum podlediad o'r enw 'Sgwrs?' sy'n ymdrin â materion sy'n effeithio ar fyfyrwyr heddiw.
MyUniHub yw dy bwynt cyswllt cyntaf ar gyfer dy holl ymholiadau. Gall y tîm cyfeillgar dy helpu â bron popeth o gofrestru tan i ti raddio!
Maen nhw ar gael wyneb yn wyneb ar Gampws Singleton a Champws y Bae, dros y ffôn drwy e-bost, a thrwy sgwrsio ar-lein.
Maen nhw'n gallu dy helpu â phob math o bethau, felly os nad wyt ti'n gwybod pwy i siarad ag ef, cysyllta â MyUniHub!
Am ragor o wybodaeth, cer i wefan MyUniHub.
Mae cadw'n actif yn wych ar gyfer dy iechyd corfforol a meddyliol.
Mae popeth gennym ni yma yn Abertawe - aelodaeth fforddiadwy o'r gampfa, clybiau, a chyfleusterau rhagorol gan gynnwys Pwll Cenedlaethol Cymru sy'n bwll 50 metr, campfa o'r radd flaenaf ac ardaloedd gemau aml-ddefnydd.
Mae llwyth o ffyrdd i gwrdd â phobl newydd ym Mhrifysgol Abertawe. Gelli di ymuno â chymdeithasau a chlybiau chwaraeon, neu wirfoddoli gydag elusennau lleol! Mae creu rhwydwaith cymorth yn ffordd wych o wella dy iechyd a dy les meddyliol. Dyma ychydig o ffyrdd y gelli di wneud hynny:
Ymaelodi â chymdeithas a chwrdd â phobl newydd
Ffordd wych o gwrdd â ffrindiau newydd a chwrdd â phobl o'r un meddylfryd yw ymaelodi â chymdeithas. Mae dy Undeb Myfyrwyr yn gofalu am dros 150 o gymdeithasau, o Anime i Ddartiau, ac o Quidditch i Ffotograffiaeth.
Mae rhywbeth i bawb. Edrycha ar y rhestr lawn o gymdeithasau yma.
Gwirfoddoli gyda Discovery!
Yma ym Mhrifysgol Abertawe, mae gennym ein helusen gwirfoddoli myfyrwyr ein hunain. Wedi'i sefydlu gan fyfyrwyr dros 50 mlynedd yn ôl, mae'n dal i gael ei rheoli ar gyfer myfyrwyr a chan fyfyrwyr â cymorth tîm bach o staff ymroddedig.
Gelli di wirfoddoli ar ystod enfawr o brosiectau gan gynnwys cyfleoedd gyda phlant, pobl hŷn, oedolion anabl, a phrosiectau amgylcheddol. Mae gan Discovery amrywiaeth o gyfleoedd arweinyddiaeth hefyd.
Mae gwirfoddoli yn cael effeithiau cadarnhaol enfawr ar dy iechyd meddwl, felly cymera ran!
Gelli di ymrwymo i brosiect sy'n cael ei gynnal yn wythnosol, bob pythefnos neu bob mis neu gelli di ddod i sesiynau unigol pryd bynnag fo'r awydd gennyt ti. Mae gan Discovery raglen hyfforddi lawn a phroses sefydlu gefnogol i wneud yn siŵr dy fod yn gyfforddus ac yn hyderus â beth bynnag rwyt ti'n ei ddewis.
Mae gwirfoddoli yn ffordd wych o ddod i adnabod cymuned Abertawe, gwneud gwahaniaeth cadarnhaol a chwrdd â phobl newydd, yn enwedig myfyrwyr eraill sy'n gwirfoddoli. A hynny wrth feithrin dy sgiliau a chael profiadau anhygoel i ychwanegu at dy CV.
Dyma beth dywedodd un o'n Cydlynwyr Prosiect gwych:
''Gwirfoddoli gyda Discovery oedd y peth gorau a wnes i yn y brifysgol; fe wnaeth gymaint o wahaniaeth i fy hyder ac fe wnes i gynifer o ffrindiau. Hefyd, fe helpodd i sicrhau fy swydd gyntaf ar ôl y brifysgol. Gwnaeth Discovery greu ail deulu a fy nghyflwyno i ystod eang o bobl sydd bellach yn rhai o fy ffrindiau agosaf. Mae'r gwersi dwi wedi'u dysgu wrth fod yn rhan o Discovery wedi gwella fy lles, wedi hybu fy nghyflogadwyedd ac wedi fy helpu i nodi'r
Dysgu rhagor am Discovery
Ymuno â grŵp Facebook swyddogol a chwrdd â dy gymdogion!
Mae ymuno â grŵp Facebook swyddogol yn ffordd gyfleus o gwrdd â phobl a fydd yn byw yn yr un Preswylfeydd â thi. Clicia ar y ddolen berthnasol isod i ymuno:
Bay Campus , Campws y Bae | Facebook
Singeton Park Campus, Campws Parc Singleton | Facebook
Dysgu awgrymiadau gwych ar gyfer cwrdd â ffrindiau!
Nid yw cwrdd â ffrindiau yn y Brifysgol bob amser yn hawdd i bawb. Rydym i gyd yn gweithio drwy'r amser i wella ein sgiliau cymdeithasol ac mae'n dod yn haws wrth i ni gael rhagor o brofiad. Mae cwrdd â phobl newydd yn frawychus!
Mae tîm BywydCampws wedi paratoi awgrymiadau defnyddiol ynghylch sut i gwrdd â ffrindiau. Wedi'r cyfan, mae ffrindiau o'r brifysgol yn ffrindiau am oes! Edrycha ar y rhestr o ddosbarthiadau isod.
Mynd i ddigwyddiadau!
Mae rhywle i fynd a rhywbeth i'w wneud drwy'r amser ym Mhrifysgol Abertawe. Mae mynd allan, rhoi cynnig ar bethau newydd, a chwrdd â phobl yn gallu cael effeithiau cadarnhaol mawr ar dy hyder a dy iechyd meddwl.
Edrycha ar Galendr Digwyddiadau MyUni, neu tudalen digwyddiadau Undeb y Myfyrwyr.
Mae gan bob Ysgol neu Gyfadran dîm cymorth a all dy helpu drwy gydol dy amser ym Mhrifysgol Abertawe. Clicia ar y ddolen berthnasol isod ar gyfer dy Ysgol neu dy Gyfadran di.
**awgrym euraidd – mae'n werth cadw'r dudalen i dy ffefrynnau er mwyn i ti gael mynediad ati'n hwylus!
Yr Ysgol Iechyd a Gofal Cymdeithasol
Yr Ysgol Feddygaeth
Yr Ysgol Seicoleg
Ysgol y Gwyddorau Cymdeithasol
Yr Ysgol Reolaeth
Ysgol y Gyfraith Hillary Rodham Clinton
Yr Ysgol Diwylliant a Chyfathrebu
Y Gyfadran Gwyddoniaeth a Pheirianneg
