Gwybodaeth i Fyfyrwyr

Eich Rhif Myfyriwr

Dynodir rhif chwe digid unigryw i chi, a hwn fydd eich rhif myfyriwr y byddwch yn ei gadw drwy gydol eich gyrfa academaidd yn Abertawe. Defnyddir y rhif hwn yn ystod prosesau cofrestru yn y Brifysgol, dewis modiwlau, trosglwyddo rhwng modiwlau, trosglwyddo rhwng rhaglenni, cyrchu cofnodion academaidd, ar eich cerdyn adnabod myfyriwr ac yn eich cyfrif e-bost swyddogol ayyb. Rydym yn argymell eich bod yn dysgu'ch rhif personol ar eich cof, a byddai'n ddefnyddiol dyfynnu'r rhif mewn unrhyw ohebiaeth â ni yn ystod eich astudiaethau.

Yn ogystal, os oes gennych fenthyciad myfyriwr, dynodir rhif Cymorth Myfyriwr unigryw i chi gan y Cwmni Benthyciadau Myfyrwyr. Defnyddir y rhif hwn gan wefannau cyllid myfyrwyr y Cwmni Benthyciadau Myfyrwyr a rhaid ei ddyfynnu mewn unrhyw ohebiaeth.

Cyfathrebu drwy e-bost

Bydd y Brifysgol yn anfon gohebiaeth electronig ffurfiol i'ch cyfeiriad e-bost yn y Brifysgol, ac ar adegau, i'ch cyfeiriad e-bost personol. Felly, mae'n bwysig eich bod yn gwirio'ch cyfrif e-bost yn y Brifysgol bob dydd ac yn diweddaru'ch cyfeiriad e-bost personol ar y fewnrwyd, yn enwedig ychydig cyn y cyfnodau arholi, yn ystod y cyfnodau arholi ac ar eu hôl.

Dylech roi sylw penodol i'ch cofnod academaidd wrth gofrestru yn y Brifysgol, gan wirio'ch manylion academaidd yn drylwyr. Rhaid i fyfyrwyr israddedig y flwyddyn olaf a myfyrwyr ôl-raddedig a addysgir yn benodol wirio manylion teitl ac enw eu gradd, (e.e. BA, MA). Defnyddir yr wybodaeth hon i gyhoeddi tystysgrifau dyfarniad, llyfrynnau seremonïau graddio, eich trawsgrifiad a'r Adroddiad Cyrhaeddiad Addysg Uwch (HEAR).

Felly, rhaid i fyfyrwyr israddedig y flwyddyn olaf sicrhau bod y manylion academaidd yn gywir, gan na fydd y Brifysgol, fel arfer, yn caniatáu trosglwyddo rhwng rhaglenni yn ystod y flwyddyn astudio olaf, ac yn bendant nid ar ôl pythefnos cyntaf Tymor Gŵyl Fihangel.

Nid yw'r gofyniad hwn yn berthnasol i 'Myfyrwyr 'Cyfnewid/Ymweld'.

Yn ôl, rhaid dynodi Tiwtor Personol o blith y staff addysgu i bob myfyriwr israddedig ac ôl-raddedig a addysgir a fydd yn cysylltu â nhw'n rheolaidd. Bydd eich Tiwtor Personol yn darparu arweiniad academaidd a chymorth ar gyfer datblygiad personol i chi ac yn eich helpu i nodi ffynonellau cyngor ac arweiniad ar faterion lles. Felly, mae'n bwysig iawn eich bod yn cadw mewn cysylltiad â'ch Tiwtor Personol. I gael gwybod pwy yw'ch Tiwtor, ewch i Fewnrwyd y Brifysgol. Os nad yw Tiwtor Personol wedi'i ddynodi i chi, cysylltwch â Swyddfa Wybodaeth eich Cyfadran/Ysgol.

Yn gryno, mae'r Brifysgol yn disgwyl i Tiwtor Personol:

• Ddarparu arweiniad academaidd a chymorth gyda datblygiad personol a'ch helpu i nodi ffynonellau o gyngor ac arweiniad ar faterion lles, gan gynnwys hiraeth am gartref, profedigaeth, bwlio a materion mwy difrifol megis ymosodiad;
• Cwrdd â'r myfyrwyr maent yn eu mentora ar ddechrau'r flwyddyn academaidd a thua hanner ffordd drwy'r flwyddyn;
• Dylai Tiwtoriaid Personol adnabod eu cyfyngiadau eu hunain ac, os oes ansicrwydd, dylent gyfeirio myfyrwyr at ffynonellau cyngor a chymorth arbenigol;
• Bydd y berthynas rhwng y myfyriwr a'r mentor yn gyfrinachol, yn amodol ar ganllawiau'r Brifysgol a deddfau Seneddol priodol a gofynion cyrff proffesiynol a statudol;
• Ni ddylai Tiwtoriaid Personol ddatgelu gwybodaeth a ddarparwyd gan fyfyrwyr i drydydd parti heb gydsyniad y myfyriwr ymlaen llaw. Mae eithriadau i hynny os tybir bod perygl difrifol y gallai’r myfyriwr niweidio rhywun arall neu ei niweidio ef ei hun, neu ble mae'n ofynnol i ddatgelu'r wybodaeth yn ôl y gyfraith. 

Dylai myfyrwyr:

• Hysbysu Tiwtoriaid Personol, a/neu staff y Gyfadran/Ysgol sy'n darparu cymorth lles i fyfyrwyr, am absenoldebau, problemau gyda pherfformiad a materion meddygol a phroblemau eraill a allai effeithio ar eu cynnydd academaidd, ar ddechrau eu hastudiaethau ac ar adegau eraill yn ystod eu cyfnod yn y Brifysgol. Argymhellir yn gryf bod myfyrwyr yn gwneud hyn er mwyn sicrhau eu bod yn derbyn cymorth priodol yn ystod eu hamser yn Abertawe. Bydd hefyd yn sicrhau bod amgylchiadau o'r fath yn cael eu tynnu at sylw Tiwtoriaid Personol a, lle y bo'n briodol, at sylw Pwyllgor Amgylchiadau Arbennig y Gyfadran/Ysgol;
• Mynychu holl gyfarfodydd grŵp a chyfarfodydd unigol gyda'u Tiwtor Personol a darparu esboniad boddhaol ymlaen llaw am unrhyw absenoldeb nad oes modd ei osgoi.
• Cynnal eu cynlluniwr datblygiad personol eu hunain a chyfrannu at weithgareddau cynllunio a drefnir yn ystod y cyfarfod gyda'r Tiwtor Personol;
• Rhoi gwybod i'r Tiwtor Personol os cânt eu harestio neu os ydynt yn derbyn rhybuddiad am drosedd yn ystod eu cyfnod cofrestru yn y Brifysgol.

Yn ystod eich astudiaethau, mae'n bosib y byddwch am drafod materion ymhellach ag aelodau staff y tu allan i'r Gyfadran/Ysgol. Mewn achosion o'r fath, byddai disgwyl i chi gysylltu â staff yn y Gwasanaethau Addysg, Gwasanaethau Myfyrwyr neu dîm Gwasanaethau Proffesiynol eraill y Brifysgol a allai fod o gymorth.

Dynodir goruchwyliwr i fyfyrwyr ar raglenni Meistr Ôl-raddedig a Addysgir. Bydd eich goruchwyliwr yn cynnig cyngor i chi ar eich dysgu annibynnol dan gyfarwyddyd. Dylech chi gael o leiaf dri chyfarfod gyda'ch Goruchwyliwr wrth ddatblygu'ch gwaith. Mae'r Brifysgol yn darparu ffurflen safonol i gofnodi cynnydd.

Mae'r Brifysgol yn cadw'r hawl i gymryd camau gweithredu priodol yn achos myfyrwyr nad ydynt wedi cyflawni eu rhwymedigaethau ariannol i'r Brifysgol o ganlyniad i ddyledion mewn perthynas â ffioedd llety neu ffioedd dysgu;

Yn gryno, disgwylir i chi dalu, neu drefnu talu, ffioedd ar ddechrau’r sesiwn. Rhaid i chi dalu unrhyw gostau ychwanegol a gafwyd yn ystod blwyddyn academaidd, e.e. costau llety, erbyn y dyddiadau a gytunwyd.

Ffioedd Dysgu'r Brifysgol

Os byddwch yn hwyr yn talu ffioedd dysgu a ffioedd eraill y Brifysgol, bydd y Brifysgol yn ceisio adennill unrhyw swm dyledus cyn gynted â phosib. Bydd y broses hon yn cynnwys anfon llythyr hysbysu cychwynnol atoch.

Os nad ydych yn talu'r ddyled yn dilyn yr ail lythyr hysbysu, efallai y bydd rhaid i chi atal eich astudiaethau. Cyn i ni gymryd y cam hwn, cewch gyfle i gyflwyno unrhyw amgylchiadau esgusodol i'w hystyried yn ystod y broses 'apelio yn erbyn penderfyniad i atal myfyriwr o'i astudiaethau'. Fel arfer, ni chaniateir i chi ailgydio yn eich astudio tan y sesiwn nesaf, hyd yn oed os byddwch yn talu'r ddyled wedyn.

Os oes gennych ddyled o sesiwn flaenorol, ni chaniateir i chi gofrestru ar ddechrau blwyddyn academaidd newydd. Os ydych ym mlwyddyn olaf eich rhaglen astudio, mae'n rhaid i chi dalu'ch dyledion i'r Brifysgol erbyn diwrnod cyntaf y cyfnod arholi fan bellaf. Os nad ydych yn gwneud hyn, bydd Cyfarwyddwr y Gwasanaethau Addysg yn cyfarwyddo Byrddau Arholi'r Brifysgol i beidio ag ystyried eich canlyniadau. O ganlyniad, ni fyddwch yn cael eich ystyried am ddyfarniad ac ni fyddwch yn cael eich gwahodd i'r seremoni wobrwyo ar gyfer y Sesiwn honno.

Ffioedd Llety'r Brifysgol

Os yw eich dyledion yn ymwneud â ffioedd llety'r Brifysgol, tynnir eich sylw at Bolisi Rheoli Dyledion Gwasanaethau Preswyl, sydd ar wahân i unrhyw weithdrefnau adennill dyledion eraill y Brifysgol. Os oes gennych anawsterau talu ffioedd preswyl erbyn y dyddiad dyledus, fe’ch cynghorir i gysylltu â Chydlynydd y Gwasanaethau Ariannol yn y Gwasanaethau Preswyl cyn gynted â phosib drwy ffonio +44 (0)1792 295101, neu drwy e-bostio llety).

Mae cyngor ariannol ar gael gan Arian@BywydCampws i fyfyrwyr sy'n wynebu anhawster ariannol ac mae'n bosib y bydd cymorth ariannol cyfyngedig ar gael hefyd.

Os penderfynwch newid eich dewisiadau modiwlau arfaethedig, rhaid i chi gwblhau Slip Awdurdodi Dewis Modiwlau a threfnu iddo gael ei awdurdodi a'i brosesu cyn y dyddiadau terfyn ar gyfer trosglwyddo rhwng modiwlau. Bydd cyfarwyddiadau ar gael gan Gyfadranau/Ysgolion ar ddechrau'r sesiwn.

Dyma grynodeb o weithdrefnau a rheoliadau'r Brifysgol:

Lawrlwythwch Slip Awdurdodi Dewis Modiwlau:

Slip Modiwlau ar gyfer Myfyrwyr Israddedig

Slip Modiwlau ar gyfer Myfyrwyr Ôl-raddedig

Bydd angen i chi geisio cymeradwyaeth y Gyfadran(au)/Ysgol(ion) sy'n addysgu’r modiwl.

Os hoffech ollwng neu ychwanegu modiwl sy'n cael ei addysgu yn ystod un semester yn unig, bydd rhaid i chi geisio cymeradwyaeth Cyfarwyddwr Addysgu Gyfadran/Ysgol bythefnos ar ôl iddo ddechrau neu bedair wythnos ar ôl iddo ddechrau os hoffech ollwng neu ychwanegu modiwl sy'n cael ei addysgu dros ddau semester.

Rhaid i chi fynd â'r slip wedi'i gwblhau naill ai i'ch Cyfadran/Ysgol Cartref neu, yn achos modiwl* amgen, anfonwch y ffurflen i Adran Cofnodion Myfyrwyr y Gwasanaethau Addysg.

*Modiwl amgen yw pan fydd myfyriwr yn methu modiwl Semester 1 ac yn dilyn modiwl Semester 2, â chaniatâd y Gyfadran/Ysgol, er mwyn cwblhau'r nifer gofynnol o gredydau yn yr un flwyddyn academaidd. Rhaid i'r marc gael ei gapio at ddibenion dosbarthiad. Rhaid i fodiwl amgen gael ei awdurdodi gan y Cyfarwyddwr Addysgu.

Gwybodaeth Gyffredinol ynghylch Trosglwyddo rhwng Rhaglenni

Os ydych yn fyfyriwr israddedig, gellir caniatáu i chi newid eich rhaglen astudio os teimlir bod y newid er eich lles gorau, ar ôl ymgynghori â'r tiwtor neu'r tiwtoriaid neu gynrychiolydd (cynrychiolwyr) eich Cyfadran/Ysgol Cartref (y Deon Gweithredol fel arfer). Ni chaniateir i fyfyrwyr ôl-raddedig a addysgir, fel rheol, newid rhaglenni, er y gellir caniatáu hyn mewn amgylchiadau eithriadol. Os yw'r broses newid rhaglen hefyd yn golygu newid modiwlau, bydd y terfynau amser trosglwyddo a nodir mewn rheoliadau rhaglenni penodol yn berthnasol hefyd. Os yw’r trosglwyddiad yn golygu dilyn rhaglen sy’n cael ei chynnig gan Gyfadran/Ysgol arall, mae’n debygol y bydd rhaid i Gadeirydd y Bwrdd Dilyniant a Dyfarnu awdurdodi newidiadau o'r fath.

Rhaid i chi gwblhau'r ffurflen trosglwyddo rhaglen ar-lein, trefnu iddi gael ei hawdurdodi gan aelod(au) priodol o'r staff academaidd, a'i chyflwyno'n electronig i adran Cofnodion Myfyrwyr y Gwasanaethau Addysg. Mae'r drefn hon yn berthnasol i bob cais am drosglwyddo rhwng rhaglenni, gan gynnwys trosglwyddiadau o fewn yr un Gyfadran/Ysgol.

Dyma grynodeb o weithdrefnau a rheoliadau'r Brifysgol:

• Ceisiwch gymeradwyaeth y Gyfadran/Ysgol sy’n derbyn a chyflwynwch ffurflen cais am drosglwyddiad yn electronig;
• Ceisiwch gymeradwyaeth y Gyfadran(nau)/Ysgol(ion) sy'n rhyddhau (darperir hyn yn electronig);
• Darperir cymeradwyaeth Cadeirydd y Bwrdd Dilyniant a Dyfarnu yn electronig;
• Cyflwynir y ffurflen yn electronig i’r Gwasanaethau Addysg;
• Cwblheir y trosglwyddiad;
• Mae'r myfyriwr a'r Brifysgol yn hysbysu'r Cwmni Benthyciadau Myfyrwyr/yr awdurdod lleol/y noddwr.

Gwybodaeth Benodol i Fyfyrwyr Israddedig am Drosglwyddo rhwng Rhaglenni

Tynnir eich sylw at y rheoliadau sy'n berthnasol i  drosglwyddo rhwng rhaglenni, oherwydd y gall methu bodloni terfynau amser a bennwyd gael effaith sylweddol ar eich Cyllid Myfyrwyr gan y Cwmni Benthyciadau Myfyrwyr i'ch cynnal drwy gydol y rhaglen.

Mae'r rheoliadau'n nodi bod rhaid i chi sicrhau caniatâd awdurdodau academaidd y Brifysgol cyn newid rhaglen ar neu cyn DIWRNOD CYNTAF ail flwyddyn y rhaglen wreiddiol y byddai disgwyl i chi ei mynychu fel rheol.

Mae hyn yn golygu y dylid derbyn ceisiadau i newid rhaglen fel arfer cyn diwedd y flwyddyn gyntaf o astudio neu fel arall yn ystod wythnos gofrestru'r ail flwyddyn. Gallai cymeradwyo ceisiadau i newid rhaglenni yn hwyr arwain at oblygiadau difrifol, yn enwedig os bydd angen estyn y cyfnod astudio, o ganlyniad i'r newid. Os caiff y cais i drosglwyddo ei gymeradwyo ar ôl y dyddiad cau, mae rheoliadau Cyllid Myfyrwyr y DU yn nodi "efallai na fydd ef neu hi'n derbyn cefnogaeth lawn ar gyfer yr ail gwrs", a byddai'n rhaid i'r myfyriwr dalu'r costau ychwanegol ei hun.

Bydd Gwasanaethau Addysg (Cyllid Myfyrwyr) yn hysbysu'r Cwmni Benthyciadau Myfyrwyr (Cyllid Myfyrwyr y DU) am unrhyw drosglwyddiadau rhwng rhaglenni. Gall y Brifysgol gymeradwyo cais hwyr, yn enwedig os nad oes unrhyw oblygiadau ariannol. Fodd bynnag, rhaid i'r cais gael ei gymeradwyo gan Gadeirydd y Bwrdd Dilyniant a Dyfarnu.

Gwybodaeth Benodol i Fyfyrwyr Ôl-raddedig a Addysgir am Drosglwyddo rhwng Rhaglenni

Sylwer, os oes angen cymeradwyaeth rhwng 2 a 4 wythnos ar ôl dechrau'r rhaglen, bydd angen cael cymeradwyaeth gan Gadeirydd y Bwrdd Dilyniant a Dyfarnu. Bydd rhaid i unrhyw geisiadau i drosglwyddo wedi hynny gael eu cymeradwyo gan y Bwrdd Achosion Myfyrwyr. Mae angen i fyfyrwyr a noddir roi gwybod i’w noddwr am unrhyw drosglwyddiadau.

Gwybodaeth Benodol i Fyfyrwyr Tramor am Drosglwyddo rhwng Rhaglenni

Os ydych yn fyfyriwr rhyngwladol o'r tu allan i'r UE sydd am newid rhaglen, mae'n rhaid i chi roi gwybod i’r Gwasanaethau Addysg cyn bwrw ymlaen â’ch cais i drosglwyddo oherwydd y gall effeithio ar eich fisa astudio.

Yn achos myfyrwyr rhyngwladol a noddir gan y Brifysgol, mae caniatâd i newid rhaglen yn amodol ar feddu ar fisa myfyriwr ddilys (Haen 4). Cyn y caiff y myfyriwr drosglwyddo i raglen arall, asesir a yw'r broses drosglwyddo'n bodloni deddfwriaeth Haen 4 gyfredol cyn y caiff y cais ei gymeradwyo. Bydd yr asesiad yn cyfeirio at lefel y rhaglen newydd, cyfnod caniatâd i aros presennol y myfyriwr, y terfynau amser cyfredol sy'n berthnasol i astudio Haen 4; asesir a yw'r rhaglen newydd yn bodloni 'dyheadau go iawn' y myfyriwr o ran ei yrfa ac ystyrir unrhyw ofynion eraill a bennir gan Swyddfa Fisâu a Mewnfudo'r DU (UKVI). Lle nad oes modd cwblhau'r rhaglen newydd o fewn y cyfnod caniatâd i aros sy'n weddill o dan Haen 4, bydd angen i'r myfyriwr adael y DU i gyflwyno cais pellach am ganiatâd i aros er mwyn cwblhau'r rhaglen. Os oes angen cymeradwyaeth gan y Cynllun Cymeradwyo Technoleg Academaidd (ATAS) ar raglen, bydd rhaid i fyfyrwyr rhyngwladol gael cymeradwyaeth a darparu copi o'r dystysgrif ATAS i'r Brifysgol cyn y gellir cymeradwyo cais i newid rhaglen.

Trosglwyddo sy'n Arwain at Ddyfarniad Uwch

Os ydych yn astudio ar raglen Ôl-raddedig a Addysgir sy'n arwain at Dystysgrif neu Ddiploma Ôl-raddedig, os yw’r Deon Gweithredol  cymeradwyo hynny, gellir caniatáu i chi drosglwyddo i ddyfarniad uwch yn yr un maes pwnc.

Gohirio Astudiaethau/Tynnu'n ôl o'r Brifysgol

Mae rheoliadau penodol yn berthnasol i fyfyrwyr israddedig ac ôl-raddedig sy'n dymuno gohirio eu hastudiaethau neu dynnu'n ôl o'r Brifysgol.

Dylai myfyrwyr sy'n gwneud cais am gopi newydd o dystysgrif nodi y dechreuodd Prifysgol Abertawe gyhoeddi ei thystysgrifau ei hun yn 2010. Byddai tystysgrifau'r rhan fwyaf o'r myfyrwyr a raddiodd cyn y dyddiad hwn wedi cael eu cyhoeddi gan Brifysgol Cymru, a dylai myfyrwyr gysylltu â'r sefydliad hwnnw i gael copi newydd o dystysgrif. Mae gan Brifysgol Cymru siop ar-lein lle gellir archebu copïau newydd o dystysgrifau: https://shop.wales.ac.uk/

Cymeradwyir ceisiadau am gopïau newydd o dystysgrifau lle mae'r dystysgrif wreiddiol wedi'i cholli'n barhaol. Ni fydd colli tystysgrif dros dro yn rheswm digonol dros ddarparu un newydd. Mae gan y Brifysgol hawl i wrthod ceisiadau am gopïau newydd o dystysgrifau, yn enwedig pan fydd un dystysgrif newydd eisoes wedi'i darparu. Dylai'r rhai sy'n gwneud cais am dystysgrifau newydd gofio bod y cais hwn yn gyfystyr â datganiad bod y dystysgrif wreiddiol wedi'i cholli neu ei dinistrio.

Codir ffi o £30 am gopi newydd o dystysgrif. Cysylltwch â MyUniHub ar +44 (0) 1792 606000 i drefnu taliad.

Os yw eich tystysgrif wedi'i difrodi, dylech ei dychwelyd i Brifysgol Abertawe a chaiff un newydd ei darparu yn rhad ac am ddim, ar yr amod bod y dystysgrif sydd wedi'i difrodi'n cael ei dychwelyd. Bydd y dystysgrif newydd yn nodi'n glir bod y ddogfen yn gopi dyblyg.