Canllaw ar Ddyfeisiau Myfyrwyr

Ystyriwch y System Weithredu (OS). Mae'r rhan fwyaf o labordai cyfrifiadurol Prifysgol Abertawe yn defnyddio Windows. Fodd bynnag, lle rydym yn cynnig meddalwedd i'w lawrlwytho, rydym fel arfer yn darparu fersiynau Windows a MAC. Chwiliwch am y system weithredu ddiweddaraf wrth brynu dyfais; a fydd yn golygu na ddylech gael unrhyw broblemau petai angen cymorth gan y cyflenwr.

Ystyriwch eich cyllideb, y lle sydd ar gael gartref ac os yw'r gwneuthurwr neu'r manwerthwr yn cynnig gwarant ar eich dyfais wrth brynu. Os oes gennych ddigon o gyllideb, gallwch brynu gwarant estynedig.

Cyfrifiadur Bwrdd Gwaith / Mac: mae cyfrifiaduron bwrdd gwaith weithiau’n cynnig manylebau uwch am bris rhatach. Fodd bynnag, efallai y bydd costau ychwanegol os ydych am brynu offer ymylol fel gwe-gamerâu ar gyfer cyfarfodydd Zoom er enghraifft. Er hyn, nid yw cyfrifiadur bwrdd gwaith yn ddewis cludadwy felly mae'n anaddas os nad oes gennych weithle penodol.

Gliniadur/Macbook: mae gliniadur yn gludadwy ac fel arfer bydd ategolion fel gwe-gamerâu neu lygoden yn dod gyda’r ddyfais. Gallant hefyd redeg oddi ar fatri, sy'n cynnig mwy o hyblygrwydd. Yn dibynnu ar y gwneuthuriad/model, mae gan rai dyfeisiau fywyd batri hirach nag eraill.

Tabled / iPad: mae dyfais fel tabled yn annhebygol o roi digon o bŵer prosesu i chi allu rhedeg meddalwedd. Gall tabled fod yn ddefnyddiol fel dyfais symudol i wirio e-byst ond mae'n debyg na fydd yn addas ar gyfer y rhan fwyaf o gyrsiau.

Wrth ddewis dyfais efallai yr hoffech ystyried maint y sgrîn neu a oes angen monitor ychwanegol arnoch; eto, mae'n dibynnu ar eich cyllideb, y math o gwrs rydych chi'n bwriadu astudio a pha feddalwedd y bydd angen i chi ei defnyddio.

Noder: Dylai myfyrwyr y Coleg Peirianneg gyfeirio at Ganllaw'r Coleg a ddarperir ar y dudalen we hon ar gyfer y Coleg peirianneg. Gellir dod o hyd i gyngor ar ofynion cyfrifiadurol o dan y pennawd: Pa galedwedd gyfrifiadurol fydd ei hangen arnaf ar gyfer y flwyddyn academaidd nesaf?

Bydd angen defnyddio meddalwedd Microsoft Office ar y mwyafrif o gyrsiau ac efallai y bydd angen i chi ddefnyddio Zoom i gynnal cyfarfodydd 1:1 gyda darlithwyr, er enghraifft - mae'r Brifysgol yn sicrhau bod nifer o becynnau ar gael i chi eu gosod ar eich dyfeisiau eich hun. Felly os ydych chi'n ystyried gliniadur Windows, er enghraifft, mae'r manylebau isod yn fannau cychwyn i'ch helpu i ystyried eich opsiynau:

Noder: efallai y byddwch hefyd am ystyried seinydd ychwanegol a/neu glustffonau i gefnogi eich defnydd o liniadur neu gyfrifiadur personol ar gyfer astudio/dysgu o bell.

Mae cysylltiad WiFi / rhyngrwyd wrth gwrs yn bwysig iawn – mae WiFi ar gael ar draws holl gampysau a Neuaddau Preswyl y Brifysgol, ond os byddwch mewn llety preifat mae angen i chi sicrhau y bydd band eang ar gael. Gweler hefyd ein canllaw ar sut i gael y gorau o'ch cysylltiad rhyngrwyd.

Dim byd mewn gwirionedd oni bai fod eich Adran/tiwtor yn dweud wrthych fel arall.

Fel myfyriwr cyfredol, mae'r Brifysgol yn darparu tanysgrifiad i Microsoft Office, felly nid oes angen prynu hwn.

Bydd rhai dyfeisiau'n cynnwys tanysgrifiad cyfnod penodol o feddalwedd gwrth-feirysau. Mae nifer o becynnau meddalwedd gwrth-feirysau ar gael am ddim ar-lein. Efallai fod gennych danysgrifiad teulu eisoes, sy'n eich galluogi i’w osod ar sawl dyfais. Eich penderfyniad chi fyddai hyn. Os yw'ch cyllideb yn dynn, mae gan ddyfeisiau Windows 10 ‘Windows Defender’, a ddylai fod yn ddigonol ar gyfer y mwyafrif o bobl. Ar ôl i chi gael eich cyfrif Prifysgol Abertawe, edrychwch ar ein tudalennau Diogelwch Gwybodaeth am fwy o wybodaeth ynglŷn â sut i gadw'n ddiogel ar-lein. Gallwch hefyd edrych ar ein tudalennau Meddalwedd am wybodaeth ynghylch meddalwedd fwy penodol y gallai fod ei hangen arnoch ar eich cwrs.