Camau Cyntaf

Camau cyntaf: Yr hyn y mae angen i Fyfyriwr Llysgennad newydd ei wybod

Crynodeb

Fel Myfyriwr Llysgennad, mae Prifysgol Abertawe bellach yn eich cyflogi'n ffurfiol ac mae'n rhaid i chi ddilyn ei pholisïau a'i gweithdrefnau. Rheolwr y Cynllun Myfyrwyr Llysgennad yw eich rheolwr llinell chi bellach, ac mae'n cael ei gefnogi gan ddau Gynorthwy-ydd y Cynllun Myfyrwyr Llysgennad.

Sut mae'r Cynllun Myfyrwyr Llysgennad yn gweithio?

Fel Myfyriwr Llysgennad, mae gennych gontract heb oriau sefydlog ac nid oes angen i chi weithio isafswm o oriau felly. Y rheswm dros hyn yw rhoi hyblygrwydd i chi drefnu’r gwaith i gyd-fynd â’ch ymrwymiadau academaidd ac unrhyw gyfrifoldebau eraill.

Mae'r Cynllun Myfyrwyr Llysgennad yn wasanaeth a ddarperir i adrannau ledled y Brifysgol ac, ar adegau, y tu allan i'r Brifysgol. Dim ond ychydig gyfleoedd gwaith, megis Diwrnodau Agored neu Ymgyrchoedd Galw a gynhelir bob blwyddyn, sy'n galw am niferoedd mawr o Lysgenhadon i'w cefnogi. Ceir braslun syml isod o'r ffordd y caiff cyfleoedd gwaith eu prosesu.

Cylch Bywyd Cyfleoedd Gwaith

Bydd adrannau'n gofyn am Lysgenhadon drwy ddefnyddio ffurflen ar-lein.
Yna bydd tîm y Cynllun Myfyrwyr Llysgennad yn anfon y cais at y Myfyrwyr Llysgennad, a gallwch fynegi eich diddordeb yn y gwaith.
Bydd tîm y Cynllun yn casglu'r ymatebion ac yn eu cyflwyno i'r adran a ofynnodd am y cymorth, a fydd yn dewis Llysgenhadon i weithio.
Bydd tîm y Cynllun yn cadarnhau'r Llysgenhadon sydd wedi cael eu dewis drwy e-bost, a bydd yr adran yn cysylltu â nhw i roi rhagor o wybodaeth a chyfarwyddiadau.
Bydd yr Adran yn cadw cofnod o'r Llysgenhadon a weithiodd ac yn cyflwyno'r oriau hynny i dîm y Cynllun ar ddiwedd y mis.
Bydd tîm y Cynllun yn prosesu'r holl oriau sydd wedi'u cyflwyno gyda'r adran Gyflogres a fydd yn talu'r Llysgennad ar ddiwedd y mis canlynol (er enghraifft, Pe bai chi wedi gweithio oriau yn ystod mis Ionawr, byddech yn derbyn eich cyflog ar ddiwrnod gwaith olaf mis Chwefror).

Fel rhan o'ch proses gynefino, gofynnwyd i chi gwblhau ffurflen casglu data ar gyfer y gronfa ddata. Gwnaeth y ffurflen hon holi am fanylion eich cwrs, gweithgareddau allgyrsiol, diddordebau gwaith a'ch taith wrth gyflwyno cais i Brifysgol Abertawe. Yna rydym yn rhannu'r wybodaeth hon â'n cleientiaid sy'n defnyddio'r wybodaeth i deilwra cyfleoedd gwaith a phrosiectau Marchnata/Recriwtio ar sail yr wybodaeth hon. Ceir rhagor o wybodaeth am y cyfleoedd gwahanol y gallwch gymryd rhan ynddynt ar ein tudalen Cyfleoedd Gwaith.

MWY O WYBODAETH

Cyfrif Staff

Fel Myfyriwr Llysgennad, byddwch yn cael cyfeiriad e-bost i staff a chyfrinair newydd. Yn aml, byddwn ni'n cyfeirio at y rhain fel Manylion i Staff. Mae'r manylion hyn yn hollol wahanol i'ch cyfeiriad e-bost a chyfrinair i fyfyriwr, ac ni fyddant yn rhannu mynediad .

Pan fyddwch yn dechrau, byddwch yn cael Llythyr/Contract Cyflogaeth a fydd yn cynnwys eich Rhif Adnabod Staff. I gael mynediad at eich cyfrif staff, bydd angen i chi siarad â'r Gwasanaethau Cwsmeriaid. Gallwch gwrdd â'r tîm wrth y Ddesg Gymorth yn y ddwy Lyfrgell a dangos eich llythyr cyflogaeth iddynt, a gallant eich helpu i gael mynediad at eich Manylion Staff.

Gallwch gysylltu â'r tîm Gwasanaethau Cwsmeriaid drwy ffonio +44 (0) 1792 295500 neu drwy e-bostio customerservice@abertawe.ac.uk a byddant yn eich tywys drwy'r broses ddilysu.

Fisâu Haen 4 a Gweithio

Fisâu Myfyriwr/Haen 4 a Gweithio 

Os ydych chi'n fyfyriwr rhyngwladol sydd â Fisa Myfyriwr/Haen 4, caniateir i chi weithio neu wirfoddoli:

Am uchafswm o 20 awr yr wythnos o ran gwaith â thâl neu waith di-dâl yn eich holl swyddi yn ystod y tymor i fyfyrwyr gradd; neu
am uchafswm o 20 awr yr wythnos drwy gydol y flwyddyn i fyfyrwyr ôl-raddedig, oherwydd ystyrir nad yw myfyrwyr ymchwil yn dilyn tymhorau; neu
am uchafswm o 10 awr yr wythnos o ran gwaith â thâl neu waith di-dâl yn eich holl swyddi yn ystod y tymor i fyfyrwyr sy'n dilyn cyrsiau ar lefel sy'n is na gradd (yn is na lefel 6 NVQ).

Mae hyn yn cynnwys pob swydd sydd gennych yn y Brifysgol a'r tu allan iddi. Er enghraifft, os oes gennych swydd yn y Cynllun Myfyrwyr Llysgennad a swydd yn Tesco, bydd yn rhaid i chi rannu 20 awr rhwng y ddwy swydd hyn er mwyn cydymffurfio â chyfyngiadau eich fisa. Pan wnaeth yr adran AD eich cynefino, byddent wedi rhoi gwybod i dîm y Cynllun Myfyrwyr Llysgennad faint o oriau mae eich fisa yn caniatáu i chi eu gweithio ac unrhyw ymrwymiadau eraill sydd gennych.  

Eich cyfrifoldeb chi fel deiliad fisa Myfyriwr/Haen 4 yw rheoli'r oriau rydych chi'n eu gweithio a sicrhau nad ydych chi'n mynd y tu hwnt i'r terfyn cyfreithiol o ran nifer yr oriau y mae eich fisa yn caniatáu i chi eu gweithio.

Gallwch gysylltu â thîm y Cynllun am arweiniad a thaflenni amser y gallwch eu defnyddio i reoli eich oriau'n well.  

Caniateir i fyfyrwyr sydd â Fisa Myfyriwr/Haen 4 weithio mwy nag 20 awr yr wythnos y tu allan i'r tymor (yn ystod gwyliau'r haf yn unig, yn unol ag arweiniad adran AD y Brifysgol). Fodd bynnag, mae angen cadarnhau gwyliau'n ffurfiol gyda'r adran AD/y Cynllun Myfyrwyr Llysgennad cyn i'r gwaith gael ei ddyrannu/cyn ymgymryd ag ef. Bydd uchafswm o 20 awr yr wythnos o hyd ar gyfer myfyrwyr ôl-raddedig sydd â fisa Haen 4 yn ystod gwyliau'r haf oherwydd ystyrir y bydd yn amser tymor iddyn nhw o hyd wrth iddynt gwblhau eu traethodau hir/prosiectau ymchwil (oni bai eu bod yn cymryd cyfnod ffurfiol o wyliau blynyddol, wedi'i gadarnhau’n ffurfiol gyda'r adran AD/y Cynllun Myfyrwyr Llysgennad cyn i'r gwaith gael ei ddyrannu/cyn ymgymryd ag ef).

Mae Rhyngwladol@BywydCampws wedi llunio taflen arweiniad i fyfyrwyr rhyngwladol sydd â chyflogaeth neu sy'n chwilio amdani. Ewch i'w tudalen we ynghylch Gweithio yn ystod eich astudiaethau ar gyfer Myfyrwyr Rhyngwladol er mwyn cyrchu'r daflen arweiniad.

Côd Ymddygiad

Fel Myfyriwr Llysgennad, mae'n rhaid i chi ddilyn Côd Ymddygiad y Myfyrwyr Llysgennad. Mae hyn yn amlinellu ein disgwyliadau ynghylch sut byddwch yn ymddwyn yn y rôl yn ogystal ag amlinellu gweithdrefnau i chi eu dilyn mewn perthynas ag Iechyd a Diogelwch, beth i'w wneud os byddwch yn sâl ac yn methu gweithio, a Gweithdrefnau Disgyblu pe baech chi'n gweithredu’n groes i'r Côd Ymddygiad.

Dylech ddarllen yr wybodaeth hon cyn cofrestru am gyfleoedd gwaith.