Paratoi ar Gyfer Gwaith yn Llwyddiannus

• Meddyliwch am y sgiliau sydd gennych ar hyn o bryd, yn ogystal â’ch cryfderau a gwendidau. Ym mha ffordd y gallai’r profiad gwaith ehangu eich sgiliau presennol a’ch helpu i ddatblygu rhai newydd?
• Wrth asesu eich sgiliau, cofiwch ystyried eich sgiliau trosglwyddadwy megis adeiladu tîm, cyflwyno, arwain, cyfathrebu ac ati, yn ogystal â sgiliau mwy galwedigaethol-benodol megis gwybodaeth am brosesau, gweithgareddau a diwylliannau sy’n benodol i yrfa benodol.
• Sut y byddwch yn teithio i’r gweithle? Faint bydd hyn yn ei gostio?
• Pa amser y mae angen i chi gyrraedd y gwaith ar eich diwrnod cyntaf?
• Pa mor hir y bydd yn ei gymryd i gyrraedd?
• Beth ddylech chi ei wisgo? Bydd rhai sefydliadau neu sectorau yn disgwyl i chi wisgo gwisg busnes, tra bydd pobl yn gwisgo’n fwy anffurfiol mewn mannau eraill, felly mae’n syniad da gwirio diwylliant y sefydliad cyn i chi ddechrau.

Yn dibynnu ar sector a natur gyffredinol eich lleoliad profiad gwaith neu interniaeth, a pha mor hir y bydd yn para, gallwch ddisgwyl amrywiaeth o bethau, a’r annisgwyl wrth gwrs!

Hyfforddiant: dylai interniaeth neu leoliad roi’r profiad a hyfforddiant i chi, nid yn unig am hyd eich amser gyda’r sefydliad, ond hefyd ar gyfer swyddi yn y dyfodol a’ch gyrfa ar ôl graddio.

Cyfrifoldebau: bydd eich cyfrifoldebau fel intern neu fyfyriwr profiad gwaith yn dibynnu’n fawr ar y math (a maint) o sefydliad, a’ch llwyth gwaith penodol. Mae rhai pobl ar interniaeth yn gweithio ar brosiectau penodol, naill ai ar eu pen eu hunain neu fel rhan o dîm, ac mae hyn fel arfer yn golygu lefel uchel o gyfrifoldeb dros y tasgau a’r canlyniadau. Fodd bynnag, bydd rhai pobl ar interniaeth yn gweithio ar ran benodol o’r busnes, ac yn gyfrifol am y rhan hon yn unig - er nad yw hyn yn beth gwael oherwydd, yn aml, mae hyn yn rhan hanfodol o sicrhau llwyddiant yn gyffredinol!

Pwy y byddwch yn gweithio gyda nhw: mae hyn yn dibynnu’n fawr ar faint y sefydliad; gallai fod gydag un unigolyn yn unig, neu gannoedd! Byddwch yn barod am y ddau – efallai y bydd angen i chi adeiladu perthynas waith dda gydag un unigolyn arall, neu gynnal perthnasau gyda nifer o bobl. Mae cyfathrebu yn hanfodol.

Disgwyliadau eraill: peidiwch â disgwyl gwneud y te a’r coffi (wel, dim drwy’r amser!) – dyma gynrychiolaeth hen ffasiwn iawn o bobl sydd ar interniaeth, felly ymunwch gyda gweddill y tîm a chymryd eich tro, ond cofiwch gynnig bob tro er mwyn i chi greu’r argraff gywir.

Nid yw rhwydweithio mor ofnus ag y mae’n ymddangos; mae’n ymwneud â chyfarfod pobl, ac rydych yn gwneud hynny bob dydd. Mae dechrau lleoliad gwaith newydd yn ffordd wych o adeiladu eich rhwydwaith proffesiynol. Mae rhwydwaith proffesiynol yn bwysig a gall gefnogi eich datblygiad yn y dyfodol – mae’n bosibl mai’r unigolyn y gwnaethoch ei gyfarfod yn yr ystafell staff un diwrnod fydd y sawl sy’n eich recriwtio ar gyfer eich swydd ddelfrydol.

Cyn i chi ddechrau eich lleoliad gwaith – byddwch yn barod. Mae rhwydweithwyr crebwyll yn gwybod gyda phwy y byddant yn cyfarfod. Ewch ar wefan y cwmni – a oes adran ‘cyfarfod â’r tîm?’ Os oes, ewch i gael cipolwg! Y bobl hyn fydd eich cydweithwyr. Mae’r cyfryngau cymdeithasol yn arf da i rwydweithio – sefydlwch gyfrif proffesiynol ar LinkedIn a’i ddefnyddio i gyflwyno eich hun.

Sut?
Cyflwynwch eich hunan i bawb unwaith a chynnig eich cymorth. Efallai y bydd hyn yn codi braw arnoch i gychwyn, ond mae’n ffordd dda i bobl wybod pwy ydych a beth y gallwch ei wneud i’w helpu.

Cadwch lygad am unrhyw ddigwyddiadau cymdeithasol/chwaraeon a chofrestrwch amdanynt. Mae’n ffordd dda o gwrdd â phobl eraill yn y cwmni.

Byddwch yn agored, gwnewch gyswllt llygad gydag eraill, gwenwch ar bobl pan fyddwch yn gallu yn y coridorau, yn y lifft neu’r gegin, a dywedwch helô.

Trefnwch i fynd am goffi gyda rhywun y mae gennych ddiddordeb yn ei waith. Codwch y ffôn / anfonwch e-bost ato/ati i ofyn i gwrdd; bydd pobl wrth eu bodd bod gennych ddiddordeb ynddynt.

Ac mae hynny’n bwysig – dangoswch ddiddordeb! Sicrhewch eich bod yn gofyn cwestiynau penagored, a gwrandewch yn astud ar eu hymatebion. Mae angen mwy nag ateb ‘ie’ neu ‘na’ ar gwestiwn penagored. Os ydych yn gwrando ar eu hymatebion, bydd pobl yn cynhesu tuag atoch.

Pan fyddwch yn gorffen eich lleoliad, cysylltwch â nhw ar LinkedIn, a gofyn i’ch rheolwr am argymhelliad.Cofiwch, y ffordd orau o rwydweithio a chael pobl i’ch adnabod yw gwneud swydd dda!