Llunio’ch CV

Dylech bob amser gynnwys: gwybodaeth bersonol a manylion cyswllt; addysg a chymwysterau; gwaith hanes a/neu brofiad; sgiliau sy’n berthnasol i’r swydd dan sylw; eich diddordebau, eich cyflawniadau neu eich hobïau; a rhai geirdaon.

Mae CV llwyddiannus bob amser wedi’i gyflwyno’n ofalus ac yn glir, ac wedi’i argraffu ar bapur gwyn glân. Cofiwch ran allweddol y CV bob amser – yng nghanol hanner uchaf y dudalen gyntaf y bydd y recriwtiwr yn edrych gyntaf yn naturiol, felly rhowch eich gwybodaeth bwysicaf yno.

Mae CV da yn glir, yn gryno ac yn nodi pob pwynt angenrheidiol heb siarad gwag. Mae CV yn rhoi sicrwydd i ddarpar gyflogwr; mae’n gyfle i roi tic yn y blychau cywir. Bydd dwsinau o CVs – cannoedd weithiau – yn cael eu hanfon at gyflogwyr drwy’r amser felly mae’n annhebygol y byddant yn darllen pob un o glawr i glawr. Bydd y rhan fwyaf ohonynt yn llunio barn ar CV o fewn eiliadau, felly cadwch at ddwy dudalen o bapur A4 ar y mwyaf.

Mae’r cliwiau yn y cais am swydd, felly darllenwch y manylion o’r dechrau i’r diwedd. Gwnewch nodiadau a phwyntiau bwled, gan dynnu sylw at bopeth y gallwch ei fodloni a phopeth na allwch ei fodloni. Yn y meysydd lle rydych braidd yn brin, llenwch y bylchau drwy addasu’r sgiliau sydd gennych.

Pan fyddwch wedi canfod yr hyn y mae’r swydd yn ei olygu a’r ffordd y gallwch fodloni pob gofyniad, dylech greu CV yn benodol ar gyfer y rôl honno. Cofiwch – nid oes y fath beth â CV cyffredinol. Dylai pob CV a anfonwch at ddarpar gyflogwr fod wedi’i deilwra i’r rôl honno felly peidiwch â bod yn ddiog a gobeithio y bydd CV cyffredinol yn gweithio, oherwydd nid yw hynny’n wir. Dylech greu CV unigryw ar gyfer pob swydd y byddwch yn gwneud cais amdani.

O dan adran sgiliau eich CV, cofiwch sôn am sgiliau allweddol a all eich helpu i sefyll allan. Gallai’r rhain gynnwys: sgiliau cyfathrebu; sgiliau cyfrifiadurol; gweithio mewn tîm; datrys problemau neu hyd yn oed siarad iaith dramor. Gall sgiliau ddod i’r amlwg yn y mannau mwyaf annisgwyl, felly meddyliwch yn ofalus am yr hyn rydych wedi’i wneud i feithrin eich sgiliau eich hun, hyd yn oed os byddwch yn defnyddio enghreifftiau o fod mewn tîm chwaraeon lleol neu ymuno â grŵp gwirfoddol – mae’r cyfan yn berthnasol.

Wrth sôn am eich diddordebau, nodwch y pethau sy’n arddangos y sgiliau rydych wedi’u dysgu y mae cyflogwyr yn chwilio amdanynt. Disgrifiwch unrhyw enghreifftiau o rolau sy’n cynnwys cyfrifoldeb, gweithio mewn tîm neu unrhyw beth sy’n dangos eich bod yn gallu gweithio ar eich menter eich hun. Dylech gynnwys unrhyw beth sy’n dangos pa mor amrywiol, chwilfrydig a medrus ydych chi. Peidiwch â chynnwys diddordebau goddefol fel gwylio’r teledu a hobïau a ddilynwch ar eich pen eich hun, a all roi’r argraff bod gennych ddiffyg sgiliau rhyngbersonol.

Defnyddiwch iaith bendant a chadarnhaol yn yr adrannau ar hanes gwaith a phrofiad, fel “datblygais”, “trefnais” neu “cyflawnais”. Ceisiwch gysylltu’r sgiliau rydych wedi’u dysgu â’r swydd rydych yn gwneud cais amdani. Rhowch lawer o fanylion am y profiad a’r sgiliau gwerthfawr rydych wedi’u meithrin mewn swyddi blaenorol, hyd yn oed os mai dim ond gweithio mewn bwyty oeddech chi – mae pob tipyn yn gymorth.

Dylai geirda fod gan rywun sydd wedi eich cyflogi yn y gorffennol ac sy’n gallu tystio i’ch sgiliau a’ch profiad. Os nad ydych wedi gweithio erioed o’r blaen, gallwch ddefnyddio athro neu diwtor fel canolwr. Ceisiwch gynnwys dau os oes modd.

Mae’n hanfodol eich bod yn bwrw golwg dros eich CV yn rheolaidd gan ychwanegu unrhyw sgiliau neu brofiad newydd sydd ar goll. Er enghraifft, os ydych newydd fod yn gwirfoddoli neu’n gweithio ar brosiect newydd, dylech nodi hynny – mae ymgeiswyr sy’n mynd yr ail filltir i gyfoethogi eu sgiliau a’u profiad eu hunain bob amser yn gwneud argraff ar ddarpar gyflogwyr.