Cyfweliadau Swydd: Sut i Baratoi

Mae paratoi yn rhywbeth allweddol ar gyfer cyfweliad

Y ffordd orau o leihau’r nerfau yw paratoi a sicrhau eich bod yn perfformio’n dda ar y diwrnod.
Dyma agweddau allweddol o’r gwaith paratoi:

Yr hyn y mae’r cyflogwr yn chwilio amdano: deall yr hyn y mae’r cyflogwr yn chwilio amdano a sut rydych yn bodloni’r meini prawf penodol. Ewch yn ôl i’r tri chwestiwn cychwynnol hynny (Allwch chi wneud y swydd? Fyddwch chi’n gwneud y swydd? Fyddwch chi’n addas?). Meddyliwch am y sgiliau a’r profiadau sydd gennych, a sut y maen nhw’n addas ar gyfer y swydd rydych yn gwneud cais amdani.

Ymwybyddiaeth fasnachol: beth yw natur eu busnes? Bydd deall y diwylliant, y cwsmeriaid, y farchnad a’r sawl sy’n cystadlu yn eu herbyn yn eich rhoi chi ar y blaen.

Gwybod manylion am eich cyfweliad: yr hyn a ddisgwylir – cyflwyniad, prawf neu gyfweliad, amser, lleoliad, teithio, manylion cyswllt rhag ofn y bydd problem. Fel y dywed yr hen ddihareb, mae methu â pharatoi yn paratoi i fethu.

Beth yw’r mathau gwahanol o gyfweliadau?

1-2-1

Gellir defnyddio’r rhain gan BBaChau neu o ganlyniad i gais ar hap i gwmni. Er y gallai’r cyfweliad ymddangos yn anffurfiol, cyfweliad ydyw o hyd, ac mae’n werth paratoi amdano yn yr un ffordd ag y byddech ar gyfer unrhyw gyfweliad arall.

Panel

Dyma batrwm cyffredin ar gyfer cyfweliad. Mae sefydliadau yn y sector cyhoeddus a’r sector preifat yn ei ddefnyddio. Gall paneli gynnwys dau neu fwy o bobl, e.e. rheolwr llinell a chynrychiolydd o’r adran adnoddau dynol. Gall y cyfweliadau hyn hefyd gynnwys cyflwyniad o bryd i’w gilydd.

Grwp

Gallai hyn olygu gweithio gyda chyfweledigion eraill mewn sefyllfaoedd grŵp. Y nod yw arddangos eich rhinweddau rhyngbersonol, datrys problemau ac arwain, ac wrth weithio mewn tîm. Mae’r dull cyfweld hwn yn dod yn fwyfwy cyffredin, a gallai fod yn rhan o ddiwrnod mwy mewn canolfan asesu a allai gynnwys cyfweliad unigol o hyd.

Dros y ffôn

Mae’r rhain yn cael eu defnyddio’n gyffredin gan recriwtwyr mawr neu mewn sefyllfaoedd lle mae’r swydd a hysbysebwyd wedi denu nifer fawr o ymgeiswyr. Mae’n debygol mai dyma’r asesiad ffurfiol cyntaf yn ystod y broses recriwtio ar ôl cyflwyno eich cais neu CV. Dylech drin cyfweliad dros y ffôn yn yr un ffordd ag y byddech yn trin cyfweliad wyneb yn wyneb. Cofiwch wenu pan fyddwch yn siarad dros y ffôn – bydd hyn yn eich helpu i ymlacio ac ymddangos yn hyderus.

Skype

Defnyddir y dull hwn gan amlaf pan mae’r lleoliad yn broblem: gallwch fod ar wyliau, yn cymryd blwyddyn dramor neu flwyddyn i ffwrdd, ac nad ydych yn dychwelyd i’r DU am gryn amser, neu gall y cyflogwr fod wedi’i leoli y tu allan i’r DU. Wrth gymryd rhan mewn cyfweliad dros Skype, meddyliwch am leoliad y cyfweliad. A yw’n rhywle tawel? Beth am yr hyn sydd o’ch cwmpas – beth fydd y cyfwelwyr yn ei weld?

Cyfweliadau sy’n seiliedig ar gryfder

Mae rhai recriwtwyr graddedigion megis Unilever, Ernst & Young, EY Recruitment a’r Post Brenhinol yn defnyddio “cyfweliadau sy’n seiliedig ar gryfder” yn ystod eu proses o recriwtio graddedigion. Fel arfer, mae cyflogwyr yn agored am y dull hwn o recriwtio, ond ni fyddant bob amser yn egluro’r cryfderau y maen nhw’n chwilio amdanynt. Felly, ceisiwch wneud eich gwaith cartref a gwaith ymchwil i’r cwmnïau.

Syniad yr arddull gyfweld hon yw asesu eich agwedd, egni a brwdfrydedd, yn ogystal â’ch cymwyseddau. Mae’n bosibl y byddwch yn clywed cwestiynau tebyg i’r canlynol: “Beth ydych chi’n ei wneud yn dda?”, “Pryd ydych chi’n teimlo eich bod fwyaf tebyg i chi’ch hun?” a “Pryd byddwch chi ar eich gorau?”

Deall yr hyn y mae’r cyflogwr yn chwilio amdano

Wrth recriwtio ar gyfer unrhyw swydd, bydd y cyflogwr yn creu dwy ddogfen:

Disgrifiad swydd: Dyma ddogfen sy’n amlinellu dyletswyddau a chyfrifoldebau’r swydd ei hun. Bydd yn disgrifio’r dyletswyddau cyffredinol y bydd angen i chi eu gwneud os ydych yn llwyddiannus yn ystod y broses recriwtio.

Manyleb person: Dyma ddogfen allweddol oherwydd bydd yn nodi’n glir y cymysgedd o sgiliau, gwybodaeth a phrofiad a geisir. Mewn geiriau eraill, mae’n disgrifio’r math o unigolyn y maen nhw’n chwilio amdano.

Mae disgrifiadau swydd a manylebau person ar gael yn rhwydd wrth wneud cais am swyddi yn y sector cyhoeddus, ond mae’n bosibl na fyddant mor hawdd eu canfod wrth wneud cais am swyddi yn y sector preifat neu ar gyfer rhaglenni i raddedigion. Yn yr achos hwn, bydd angen dadansoddi’r hysbyseb swydd neu’r tudalennau gwe ar gyfer recriwtio graddedigion er mwyn canfod y cymysgedd o sgiliau, gwybodaeth a phrofiad a geisir.

Deall yr hyn y mae’r sefydliad yn chwilio amdano, a nodi’r dystiolaeth i ddangos sut rydych yn bodloni eu meini prawf yw’r agwedd bwysicaf o’ch gwaith paratoi o bosibl. Bydd y cwestiynau a ofynnir yn ystod y cyfweliad yn canolbwyntio ar y meini prawf, ac mae disgwyl y byddwch yn rhoi rhywfaint o dystiolaeth benodol sy’n dangos y cymhwysedd y canolbwyntir arno.

Gall dull STAR eich helpu i feddwl am yr amrediad o brofiadau sydd gennych, a nodi enghreifftiau penodol y gellir eu defnyddio mewn cyfweliad i ddangos sut rydych wedi datblygu a chymhwyso’r sgiliau, cymhwysedd neu’r ansawdd y maen nhw’n chwilio amdanynt.

Mae’n bosibl y gofynnir i ymgeisydd ar gyfer swyddog gweithredol marchnata: “Dywedwch fwy wrthyf am gyfnod y gwnaethoch ddatrys problem mewn amserlen dynn.” Dyma sut y gallwch strwythuro eich ateb:

Situation (Sefyllfa)

Situation (Sefyllfa) – rhowch gyd-destun ar gyfer eich stori.

Er enghraifft, “Roedd disgwyl i ni wneud cyflwyniad ar gyfer grŵp o 30 chwaraewyr yn y diwydiant â diddordeb ar ein cynnyrch newydd, ac roedd Stuart, y bachgen oedd i fod yn gwneud y cyflwyniad, wedi cael ei ddal ar drên o Firmingham.”

Task (Tasg) Action (Cam gweithredu) Result (Canlyniad)

Mathau o gwestiynau cyfweliad

Gall y cwestiynau a ofynnir yn ystod cyfweliad gael eu holi mewn amryw o ffyrdd, ond yn gyffredinol maen nhw’n cynnwys y mathau canlynol:

Cwestiynau gwirio: Allwch chi gadarnhau eich cyfeiriad cyswllt?
Cwestiynau cynhesu: Dywedwch ychydig am eich hunan?
Cwestiynau cymhwysedd: Dywedwch wrthym am gyfnod lle rydych wedi cyfrannu’n effeithiol at dîm?
Sefyllfa ddamcaniaethol: Beth fyddwch chi’n gwneud mewn sefyllfa lle...
Cwestiynau herio: Dywedwch wrthyf am rywbeth nad aeth cystal ag y byddech wedi’i hoffi a sut y gwnaethoch chi ddelio â hyn?
Cwestiynau am ymddygiad: Enghraifft o hyn fyddai, “Dywedwch wrthyf am brofiad llwyddiannus diweddar o wneud araith neu gyflwyniad.”

Rhoddwyd nifer o themâu ac amrywiadau ar yr opsiynau uchod; gallwch fod yn sicr y bydd nifer o gwestiynau yn dod o dan yr ymbareli hyn.

Gallwch baratoi ymlaen llaw trwy feddwl am enghreifftiau o atebion y gallwch eu rhoi, ac un ffordd o wneud hyn yw edrych ar y disgrifiad swydd a’r fanyleb person unwaith eto, a meddwl am yr hyn sydd yn rhan o’r swydd.

Holi cwestiynau

Mae’n arferol cael y cyfle i ofyn unrhyw gwestiynau i’r panel. Mae’n syniad da paratoi eich cwestiynau, a gall fod yn ddefnyddiol mynd â nhw gyda chi i’r cyfweliad.

Byddai’n syniad da osgoi cwestiynau sy’n ymwneud â thâl a gwyliau yn ystod y cam hwn – gallwch drafod y rhain pan gewch gynnig. Canolbwyntiwch yn hytrach ar bynciau megis hyfforddiant a datblygiad, cynlluniau ar gyfer y sefydliad yn y dyfodol, a rhaglenni mentora. O ran rôl y swydd yn benodol, gallwch ofyn, “Beth yw tasgau allweddol y swydd ei hun?” neu “Beth fyddai fel arfer yn cael ei wneud gan rywun sydd newydd ddechrau yn y cwmni?”

Yn ogystal, os ydych yn gweld bod eich cwestiynau wedi cael eu hateb yn ystod y cyfweliad, yna mae’n iawn dweud, “Rydych wedi ateb pob un o fy nghwestiynau'.

graffig o berson gyda braich wedi ' i chodi

Paratoi yn derfynol

Gwnewch rywfaint o waith ymchwil ar y cwmni a pharatoi cwestiynau i’w gofyn – mae hyn yn dangos eich bod yn awyddus i gael y swydd a bod gennych ddiddordeb yn y cwmni
Ailddarllenwch eich ffurflen gais a/neu CV
Penderfynwch pa enghreifftiau o’ch sgiliau a’ch profiadau i’w defnyddio yn y cyfweliad
Ailddarllenwch y llythyr gwahodd i sicrhau eich bod wedi paratoi popeth sydd ei angen ar gyfer y diwrnod. Gwiriwch eich trefniadau teithio unwaith eto os yw’n bosibl er mwyn sicrhau bod digon o amser gennych
Gwnewch apwyntiad gyda’r Thîm Cyflogadwyedd, a all fynd â chi drwy broses cyfweliad ffug

Ar ôl y cyfweliad

Mae bob amser yn ddefnyddiol ceisio adborth ar eich perfformiad yn ystod y cyfweliad – hyd yn oed os ydych wedi bod yn llwyddiannus. Trwy gysylltu â’r cyfwelwyr yn ystod y diwrnodau ar ôl y cyfweliad, efallai y cewch rywfaint o wybodaeth am yr argraff a wnaethoch a sut y gallwch wella’ch perfformiad.

Cymorth pellach

Mae’n bosibl trefnu ffug gyfweliad gyda’r Tîm Cyflogadwyedd, a fydd yn rhoi’r cyfle i chi ymarfer a phrofi eich hunan mewn sefyllfa cyfweliad. Os oes angen mwy o gymorth arnoch neu os hoffech wneud apwyntiad gyda'n Tîm Cyflogadwyedd, defnyddiwch y manylion cyswllt isod.