Rheoliadau Fframwaith ar gyfer Graddau Doethur ar y cyd

Dyfernir graddau doethurol i fyfyrwyr sydd wedi dangos eu bod wedi cyflawni'r canlynol:

• Creu a dehongli gwybodaeth newydd, trwy ymchwil gwreiddiol neu ysgolheictod uwch arall, sydd o ansawdd sy'n bodloni adolygiad cymheiriaid, sy'n estyn ffiniau'r ddisgyblaeth ac sy'n deilwng o gael ei gyhoeddi;
• Caffael a deall yn systematig corff sylweddol o wybodaeth sydd ar flaen y gad mewn disgyblaeth academaidd neu faes o ymarfer proffesiynol;
• Y gallu cyffredinol i gysyniadu, cynllunio a gweithredu prosiect er mwyn creu gwybodaeth, cymwysiadau neu ddealltwriaeth newydd sydd ar flaen y gad o fewn y ddisgyblaeth, ac addasu cynllun y prosiect yn wyneb problemau nas rhagwelwyd;
• Dealltwriaeth fanwl o dechnegau cymwys ar gyfer ymchwil ac ymholi academaidd uwch.

Yn nodweddiadol, bydd deiliaid y cymhwyster yn gallu gwneud y pethau canlynol:

• Dod i farn wybodus ar faterion cymhleth mewn meysydd arbenigol, yn aml yn absenoldeb data cyflawn, a gallu mynegi eu syniadau a'u casgliadau yn glir ac yn effeithiol i gynulleidfaoedd arbenigol a lleyg;
• Parhau i ymgymryd ag ymchwil a datblygu pur a/neu gymwysedig ar lefel uwch, gan gyfrannu'n sylweddol i ddatblygu technegau, syniadau neu ymagweddau newydd.

A bydd gan y deiliaid:

• Y rhinweddau a'r sgiliau trosglwyddadwy angenrheidiol ar gyfer cyflogaeth lle mae gofyn iddynt arfer cyfrifoldeb personol a menter annibynnol i raddau helaeth mewn sefyllfaoedd cymhleth nad oes modd eu darogan mewn amgylchedd proffesiynol neu gyfatebol.

Rhaid i ymgeisydd ar gyfer gradd ddoethurol ar y cyd fodloni amodau derbyn yr holl sefydliadau partner neu bartneriaid cymeradwy dan sylw.

Ym Mhrifysgol Abertawe:

Rhaid i ymgeisydd am radd Doethuriaeth ar y cyd fod â gradd gychwynnol, o Brifysgol yn y DU neu brifysgol arall a gymeradwywyd gan Senedd y Brifysgol, ac fel arfer bod â gradd Meistr, neu fod yn astudio am radd Meistr, o brifysgol yn y DU neu brifysgol arall a gymeradwywyd gan y Senedd.

Rhaid i'r holl ymgeiswyr nad y Saesneg yw eu hiaith gyntaf ddarparu tystiolaeth bod eu hyfedredd yn yr Iaith Saesneg yn ddigonol ar gyfer astudiaethau ymchwil, ac ar ôl eu derbyn i’r Brifysgol mae'n bosibl y bydd raid iddynt gymryd gwersi Saesneg ychwanegol.

Bydd y penderfyniad i dderbyn ymgeisydd i raglen arfaethedig o ymchwil yn gyfrifoldeb y Deon Gweithredol perthnasol neu unigolyn a enwebwyd ganddo.

Ni cheir llofnodi contract rhwng sefydliadau partner neu bartneriaid cymeradwy ar gyfer ymgeisydd unigol tan fod yr ymgeisydd ar gyfer y ddoethuriaeth ar y cyd wedi'i dderbyn i raglen ddoethurol pob sefydliad partner neu bartner cymeradwy.

Ym Mhrifysgol Abertawe:

Caiff ymgeisydd ei dderbyn dan ddull D, yn fyfyriwr amser llawn, trwy wneud ymchwil o fewn rhaglen ymchwil gymeradwy a gynigir ar y cyd neu'n gydweithredol gan y Brifysgol a chan Brifysgol arall neu bartner cymeradwy.

Rhaid i bob ymgeisydd ar gyfer doethuriaeth ar y cyd gofrestru ym mhob sefydliad partner a thalu'r ffioedd perthnasol a bennir gan bob sefydliad partner.

Fel myfyrwyr cofrestredig, rhaid i ymgeiswyr gydymffurfio â rheoliadau academaidd a chyffredinol bob sefydliad partner neu bartner cymeradwy.

Ni chaiff ymgeiswyr cofrestru ar raglen arall sy’n cynnig dyfarniad mewn unrhyw sefydliad partner nac mewn unrhyw brifysgol neu sefydliad arall oni chafwyd caniatâd penodol y Bwrdd Academaidd ar gyfer Ymchwil Ôl-raddedig.

Ni chaiff ymgeiswyr fod wedi’i gofrestru ar raglenarall sy’n arwain at ddyfarnu cymhwyster yn y brifysgol hon neu mewn prifysgol/sefydliad arall ar yr un pryd heb ganiatâd penodol Cadeirydd y Pwyllgor Rheoliadau, Ansawdd a Safonau.

Rhaid i ymgeisydd ar gyfer doethuriaeth ar y cyd ddilyn rhaglen astudio dan oruchwyliaeth, gan gynnwys ymchwil a datblygu medrau generig fel myfyriwr amser llawn. Y cyfnod astudio byrraf dan oruchwyliaeth o'r dyddiad cofrestru yw tair blwyddyn academaidd.

Bydd ymgeisydd ar gyfer doethuriaeth ar y cyd yn cynnal ei ymchwil ym mhob sefydliad partner naill ai ar sail dreigl, neu ynteu ar sail ddilyniannol.

Ym Mhrifysgol Abertawe:

Fel arfer, byddai ymgeisydd ar gyfer doethuriaeth ar y cyd o dan ddull D yn astudio ym Mhrifysgol Abertawe am gyfnod neu gyfnodau sy'n cyfateb i o leiaf un flwyddyn academaidd yn ystod cyfnod llawn yr astudio.

Dyddiad Cyflwyno

Mae gofyn i bob ymgeisydd ar gyfer doethuriaeth ar y cyd gyflwyno traethawd ymchwil erbyn y dyddiad cyflwyno olaf a nodir yn y Llythyr Cynnig ffurfiol.

Goruchwylio

Bydd gan bob ymgeisydd ar gyfer doethuriaeth ar y cyd dîm goruchwylio sy'n cynnwys o leiaf un goruchwyliwr wedi'i enwi o bob sefydliad partner.

Ym Mhrifysgol Abertawe:

Bydd tîm goruchwylio Prifysgol Abertawe’n cynnwys o leiaf dau oruchwyliwr mewnol sy’n gymwys i gael eu penodi fel y nodir yng Nghanllawiau Prifysgol Abertawe ar Oruchwylio Myfyrwyr Graddau Ymchwil. Bydd un goruchwyliwr yn cael ei ddynodi’n oruchwyliwr cyntaf.

Bydd y tîm goruchwylio llawn yn cwrdd yn rheolaidd trwy gydol cyfnod yr ymgeisyddiaeth, naill ai wyneb yn wyneb neu ynteu trwy gyfrwng electronig, er mwyn trafod cynnydd yr ymgeisydd.

Ym Mhrifysgol Abertawe:

Rhaid i’r Gyfarwyddiaeth/Ysgol gadarnhau ymgeisyddiaeth pob ymgeisydd o fewn tri mis i gofrestriad cychwynnol yr ymgeisydd fel y nodir yn y Canllawiau ar Fonitro Cynnydd Myfyrwyr Ymchwil.

Caiff cynnydd ymgeisydd yn ystod cyfnod ymgeisyddiaeth byrraf ei fonitro yn rheolaidd gan y Bwrdd Dilyniant a Dyfarnu er mwyn penderfynu a ellir caniatáu i ymgeisydd symud ymlaen ai peidio. Caiff cynnydd ei fonitro ar adegau penodol fel y nodir yng Nghanllawiau Prifysgol Abertawe ar Fonitro Cynnydd Myfyrwyr Ymchwil.

Os bernir bod cynnydd ymgeisydd yn anfoddhaol, efallai y caiff yr ymgeisydd ei orfodi i drosglwyddo rhaglen, neu ei orfodi i dynnu’n ôl o’r rhaglen.

Asesu Gradd

Arholir bob ymgeisydd ar gyfer doethuriaeth ar y cyd mewn dwy ran:

1. Bydd y rhan gyntaf ar ffurf traethawd ymchwil sy’n cynnwys dulliau a chanlyniadau’r prosiect ymchwil.
2. Bydd yr ail ran ar ffurf arholiad llafar (viva voce).

Cynhelir y broses arholi mewn un o'r sefydliadau partner, ond bydd bob un o'r sefydliadau partner yn cymeradwyo'r broses.

Iaith y Traethawd Ymchwil a'r Arholiad Llafar

Fel arfer, ysgrifennir y traethawd ymchwil mewn iaith genedlaethol un o'r sefydliadau partner. Fel arfer, cynhalir yr arholiad llafar mewn iaith genedlaethol un o'r sefydliadau partner.

Ym Mhrifysgol Abertawe:

Gall unrhyw ymgeisydd sy’n dilyn rhaglen ymchwil yn y Brifysgol ddewis cyflwyno traethawd ymchwil, neu waith arall, yn Saesneg neu yn Gymraeg.

Mewn achosion lle y gellid barnu ei bod yn briodol cyflwyno traethawd ymchwil mewn iaith heblaw am Saesneg/Cymraeg am resymau academaidd neu le y mae cyflwyno’r traethawd ymchwil mewn iaith arall yn un o ofynion y rhaglen benodol, gall y Bwrdd Achosion Myfyrwyr roi caniatâd lle y cyflwynir dadl resymol i’r perwyl hwnnw. Serch hynny, ni fydd y Bwrdd Achosion Myfyrwyr yn cymeradwyo ceisiadau sy’n deillio o ddiffyg gallu’r ymgeisydd i gynhyrchu gwaith i’w gyflwyno yn Gymraeg neu’n Saesneg.

Ym Mhrifysgol Abertawe:

Rhaid i ymgeiswyr ddatgan eu bwriad i gyflwyno traethawd i'w arholi o leiaf tri mis cyn y dyddiad cyflwyno disgwyliedig.

Ar gwblhau cyfnod byrraf yr ymgeisyddiaeth, bydd ymgeisydd yn cyflwyno copi electronig o draethawd ymchwil i’w arholi yn unol â Chanllaw’r Brifysgol i Gyflwyno Traethawd Ymchwil ar gyfer myfyrwyr Ymchwil. Os bydd arholwr yn gofyn am gopi papur o’r traethawd ymchwil darperir hyn gan yr ymgeisydd trwy’r tîm cymorth Ymchwil Ôl-raddedig.

Mae’n rhaid i bob ymgeisydd gyflwyno copi electronig o’r traethawd ymchwil wedi’i ddiweddaru ar ôl iddo gael ei arholi os gwnaethpwyd cywiriadau neu ddiwygiadau.

Argaeledd Traethawd Ymchwil

Bydd traethawd ymchwil a gyflwynir am radd doethuriaeth ar y cyd fel arfer ar gael yn agored ac ni chaiff ei roi mewn unrhyw ddosbarthiad diogelwch ac ni fydd unrhyw gyfyngu o ran diogelwch neu gyfyngu ar ei ddefnyddio.

Fodd bynnag, ar sail argymhelliad arbennig a gymeradwyir gan yr holl sefydliadau partner, gellir gwahardd mynediad at waith ymgeisydd am gyfnod o hyd at bum mlynedd.

Bydd pob Bwrdd Arholi ar gyfer ymgeiswyr yn cynnwys yr unigolion canlynol:

• Cadeirydd annibynnol, y bydd raid iddo gadeirio'r arholiad llafar ac unrhyw gyfarfod o'r arholwyr.
• Arholwr neu arholwyr allanol a benodir gyda chydsyniad llwyr yr holl sefydliadau partner.
• Arholwr neu arholwyr mewnol o bob sefydliad partner.

Ym Mhrifysgol Abertawe:

Penodir arholwr mewnol Prifysgol Abertawe yn unol â Chanllawiau'r Brifysgol ar Arholi Myfyrwyr Ymchwil.

Ni chaniateir i oruchwylwyr yr ymgeisydd nac unrhyw aelod o staff sydd ynghlwm wrth oruchwylio’r ymgeisydd fod yn rhan o’r Bwrdd Arholi, ond gall Cadeirydd y Bwrdd Arholi eu gwahodd, wedi cael caniatâd ysgrifenedig penodol yr ymgeisydd ymlaen llaw, i fynychu’r arholiad llafar mewn rôl ymgynghorol, ond ni chânt siarad ond ar ôl cael eu gwahodd i siarad gan y Cadeirydd.

Bydd disgwyl i’r Bwrdd Arholi gynnal arholiad llafar ar gyfer bob ymgeisydd ar gyfer gradd ymchwil.

Ym Mhrifysgol Abertawe:

Fel arfer, cynhelir pob arholiad llafar ym Mhrifysgol Abertawe o fewn chwe mis i ddyddiad cyflwyno’r traethawd ymchwil. Gellir cytuno eithriadau naill ai ar sail eithriadol neu ynteu i adlewyrchu natur y radd, e.e. yn achos myfyrwyr sy'n astudio dan Ddull 'D' (cydweithredol).

Cynhelir yr arholiad llafar yn unol â Chanllawiau'r Brifysgol ar Arholi Myfyrwyr Ymchwil. Bydd argymhelliad y Bwrdd Arholi'n cael ei gyflwyno i Grŵp Gweithredol y Bwrdd Dilyniant a Dyfarnu i’w gadarnhau.

Dilynwch y ddolen isod i weld y rheoliadau ar raddau Aegrotat.

Rheoliadau Dyfarniadau Aegrotat

Dilynwch y ddolen isod i weld y rheoliadau ar raddau wedi marwolaeth.

Rheoliadau Dyfarniadau ar ôl Marwolaeth

Ymdrinnir ag unrhyw apêl academaidd neu gŵyn a wneir tra bod yr ymgeisydd mewn sefydliad partner yn unol â'r rheoliadau perthnasol yn y sefydliad hwnnw.

Camymddygiad Academaidd

Ymdrinnir ag unrhyw honiad am Gamymddygiad Academaid a wneir tra bod yr ymgeisydd mewn sefydliad partner yn unol â'r rheoliadau perthnasol yn y sefydliad hwnnw.

Addasrwydd i Ymarfer

Ymdrinnir ag unrhyw honiad am addasrwydd i ymarfer a wneir tra bod yr ymgeisydd mewn sefydliad partner yn unol â'r rheoliadau perthnasol yn y sefydliad hwnnw.

Os oes angen fisa ar fyfyrwyr rhyngwladol i'w galluogi i astudio yn y Brifysgol, dylent sylwi bod eu hawl i astudio yn y Brifysgol yn amodol ar fodloni amodau eu fisa a'r terfynau amser a bennir gan Fisâu a Mewnfudo’r DU (UKVI). Am ragor o wybodaeth, ewch i https://www.gov.uk/browse/visas-immigration/study-visas.

Gwneir penderfyniadau gan y Brifysgol ynghylch statws cofrestru, perfformiad academaidd, dilyniant a dyfarniad ymgeisydd yn unol â rheoliadau academaidd ac ariannol y Brifysgol, ac ni fydd cyfyngiadau fisa a therfynau amser a bennir gan y UKVI yn effeithio arnynt. Fodd bynnag, mae'r hawl i barhau i astudio yn amodol ar fodloni gofynion Brifysgol bod â fisa. 

Dylai myfyrwyr sydd â phryderon neu ymholiadau ynghylch eu fisa gysylltu â Rhyngwladol@BywydCampws.

Atodiad i Reoliadau Fframwaith Prifysgol Abertawe ar gyfer Graddau Doethurol ar y cyd - Prifysgol Abertawe i lywodraethu rhaglenni PhD ar y cyd rhwng Prifysgol Abertawe ac Université Grenoble Alpes

1. Gwybodaeth gefndirol gyffredinol

Sefydlwyd Partneriaeth Strategol Grenoble - Prifysgol Abertaweyn 2012 at ddibenion cydweithio ar ymchwil ryngwladol.

2. Arholi Myfyrwyr Ymchwil

Ceir esboniad o'r broses Arholi Myfyrwyr Ymchwil yn y Canllaw i Arholi Myfyrwyr Ymchwil - Prifysgol Abertawe. Mae'r arholiad llafar yn dilyn fformat y sefydliad cartref. Os cynhelir yr arholiad llafar ym Mhrifysgol Abertawe, bydd yr eithriadau canlynol yn berthnasol:

2.1

Bydd aelodau'r Bwrdd Arholi ar gyfer myfyrwyr sy'n astudio mewn partneriaeth ag Université Grenoble Alpes yn cynnwys yr unigolion canlynol:

• Cadeirydd annibynnol o Brifysgol Abertawe, sef y Deon Gweithredol neu aelod o staff athrawol sydd â phrofiad priodol ac sydd wedi'i enwebu gan y Deon Gweithredol. Mae'n ofynnol i Gadeirydd y Bwrdd Arholi gadeirio'r arholiad llafar ac unrhyw gyfarfod o'r arholwyr. Cynhelir yr arholiad llafar ym Mhrifysgol Abertawe naill ai wyneb yn wyneb neu ar-lein.

Yn achos arholiadau llafar a gynhelir yn Grenoble, detholir un o aelodau'r bwrdd arholi (h.y. dau arholwr allanol a dau arholwr mewnol a adwaenir fel "y rheithgor") fel Cadeirydd.

• Dau arholwr allanol (un o bob partner);
• Dau arholwr mewnol (un o bob partner);
• Ni all nifer yr arholwyr mewnol (hynny yw staff Prifysgol Abertawe ac Université Grenoble) fod yn fwy na nifer yr arholwyr allanol yn unol â'r gyfraith yn Ffrainc. Hefyd, mae'n rhaid cael nifer cyfartal o athrawon ag aelodau nad ydynt yn athrawon ar y panel ac mae'n rhaid i'r Cadeirydd fod yn athro. Rhaid bod o leiaf bedwar aelod ar y panel a dim mwy nag wyth aelod. Gall goruchwylwyr ddod i arsylwi ond, yn ôl gofynion y DU, ni allant fod yn aelodau o'r panel;
• Bydd pob aelod o'r bwrdd yn cymryd rhan wrth drafod a chwestiynu;
• Bydd pob aelod o'r bwrdd yn cytuno ar yr asesiad terfynol.

2.2

Mae Université Grenoble Alpes yn gofyn am adroddiad cyn yr arholiad llafar. Fel arfer, cynhelir hwn un mis cyn yr arholiad llafar ond, os cytunir i hynny, gall hwn gael ei gynnal un wythnos cyn yr arholiad llafar. Enwebir dau o'r arholwyr fel adroddwyr a byddant yn cyflwyno'r adroddiad cyn yr arholiad llafar (bydd hyn yn caniatáu i Université Grenoble Alpes gymeradwyo'r panel yn ffurfiol).

2.3

Cyfyngir ar yr amser a ganiateir ar gyfer cywiriadau i 3 mis oherwydd deddfwriaeth Ffrainc ar arholiadau llafar. Ystyrir bod ymgeiswyr doethurol yn Ffrainc yn weithwyr gyda'r hawliau cysylltiedig. Os bydd y Bwrdd Arholi yn penderfynu bod angen cywiriadau sy'n cymryd mwy na 3 mis, gellir caniatáu hyn ond bydd angen i'r myfyriwr amddiffyn ei waith o'r newydd ar ddiwedd y cyfnod a ganiateir.

2.3.1

Os bydd y rheithgor yn gofyn am gywiriadau, rhaid i'r myfyriwr doethurol wneud y rhain o fewn uchafswm o 3 mis. Bydd Université Grenoble Alpes yn datgan bod y myfyriwr doethurol wedi cael ei dderbyn ar gyfer y radd ddoethurol cyn gynted ag y bydd yr amddiffyniad wedi’i gwblhau. Ar ddiwedd y cyfnod o 3 mis, caiff y traethawd ymchwil ei gyflwyno gan ei awdur i Université Grenoble a Phrifysgol Abertawe. Ni fydd angen amddiffyniad newydd wrth gyflwyno'r deipysgrif sydd wedi cael ei chywiro.

2.3.2 

Caniateir cwblhau cywiriadau y mae'r rheithgor wedi gofyn amdanynt o fewn cyfnod o fwy na 3 mis. Bydd Université Grenoble Alpes yn cyfleu hyn cyn yr arholiad llafar fel gohirio'r myfyriwr doethurol ond bydd Prifysgol Abertawe'n cyfleu hyn fel cais am gywiriadau mewn cyfnod o fwy na 3 mis. Pan fydd y deipysgrif yn barod, bydd proses amddiffyn newydd yn dechrau, gan gynnwys:

• Penodi canolwyr (gall fod yr un unigolion);
• Anfon y traethawd ymchwil at y canolwyr;
• Bydd y canolwyr yn astudio'r traethawd ymchwil ac yn cynnig eu barn arno;
• Anfon y traethawd ymchwil at aelodau eraill o'r rheithgor;
• Amddiffyniad;
• Fel arfer, bydd angen amddiffyn y traethawd ymchwil o'r newydd pan fydd y deipysgrif ddiwygiedig yn cael ei chyflwyno.

Atodiad i’r Fframwaith Rheoliadau ar gyfer Graddau Doethurol ar y cyd - Prifysgol Abertawe i lywodraethu rhaglenni PhD ar y cyd rhwng Prifysgol Abertawe a'r Rhwydwaith Hyfforddiant Doethurol mewn Moeseg ac Uniondeb Chwaraeon.  

1. Gwybodaeth gefndirol gyffredinol

Mae'r Rhwydwaith Hyfforddiant Doethurol mewn Moeseg ac Uniondeb Chwaraeon (DaiSI)  Hafan | DAiSI (daisi-project.eu) yn rhwydwaith rhyngddisgyblaethol o sefydliadau ymchwil a sefydliadau anllywodraethol ym maes moeseg ac uniondeb chwaraeon. Mae'r rhwydwaith yn cynnwys wyth prif gorff rhyngwladol a phum Prifysgol:

KU Leuven, Gwlad Belg (y partner sy'n cydlynu)  https://www.kuleuven.be/  

Prifysgol Johannes Gutenberg (JGU) Mainz, yr Almaen https://homepage.uni-mainz.de/ 

Ysgol Gwyddorau Chwaraeon Norwy (NJH) (NSSS), Norwy https://www.nih.no/en/ 

Partneriaid Cysylltiedig:

Prifysgol Lausanne (UNIL), y Swistirhttps://www.unil.ch/central/en/home.html 

Prifysgol Abertawe, https://www.swansea.ac.uk/. 

2. Amodau Mynediad 

Gofynion penodol ar gyfer rhaglenni PhD ar y cyd y Rhwydwaith Hyfforddiant Doethurol mewn Moeseg ac Uniondeb Chwaraeon:

• Sylwer nad oes modd llofnodi contract rhwng sefydliadau partner/partneriaid cymeradwy ar gyfer ymgeisydd unigol nes bod yr ymgeisydd doethurol ar y cyd wedi cael ei dderbyn ar y rhaglen ddoethurol gan yr holl sefydliadau partner/bartneriaid cymeradwy.

• Gofynnir i fyfyrwyr yn NSSS gyflwyno cais, o fewn chwe mis ar ôl y dyddiad dechrau, i Bwyllgor Sicrhau Ansawdd NSSS sy'n cynnwys disgrifiad 10 dudalen o hyd o'r astudiaeth arfaethedig.

3. Cyfnod Ymgeisyddiaeth 

Gofynion penodol ar gyfer rhaglenni PhD ar y cyd y Rhwydwaith Hyfforddiant Doethurol mewn Moeseg ac Uniondeb Chwaraeon:

• Gofynnir i fyfyrwyr yn NSSS astudio 30 o gredydau a addysgir (ECTS) yn ystod cyfnod yr ymgeisyddiaeth. Caiff y credydau hyn eu cwblhau yn ystod eu harhosiad yn un o'r ysgolion hyfforddi yn NSSS.

4. Monitro Cynnydd 

Gofynion penodol ar gyfer rhaglenni PhD ar y cyd y Rhwydwaith Hyfforddiant Doethurol mewn Moeseg ac Uniondeb Chwaraeon:

• Mae angen darparu adroddiad blynyddol i NSSS ar gynnydd y myfyriwr.”

5. Arholi Myfyrwyr Ymchwil

5.1

Cyfansoddiad y Bwrdd Arholi ar gyfer Arholi Myfyrwyr Ymchwil (ceir esboniad yn y Canllaw i Arholi Myfyrwyr Ymchwil - Prifysgol Abertawe). 

1. Bydd cyfansoddiad y Bwrdd Arholi ar gyfer myfyrwyr sy'n astudio mewn partneriaeth ag NSSS yn cynnwys yr unigolion canlynol:

• Dau Arholwr Allanol (un o bob partner) a dau arholwr mewnol (un o bob partner).
• Cynhelir yr arholiad llafar ym Mhrifysgol Abertawe naill ai ar y safle neu ar-lein. Gellir gwneud cywiriadau ar ôl yr arholiad llafar os bydd angen hynny.
• Darperir adroddiad ysgrifenedig (ar ôl gwneud cywiriadau os bydd eu hangen) i NSSS a chynhelir yr arholiad llafar/amddiffyniad cyhoeddus (naill ai ar y safle neu ar-lein).

5.2

Arholi Myfyrwyr Ymchwil sy'n astudio mewn partneriaeth â Phrifysgol Mainz (JGU)

I gydymffurfio â'r rheoliadau sydd ar waith ym mhob sefydliad ac er mwyn cael adroddiad ffafriol gan y pwyllgor arholi, mae'r ddau sefydliad yn mynd ati i ddyfarnu gradd ddoethurol ar y cyd i'r ymgeisydd llwyddiannus, a fydd yn cael ei chydnabod gan y ddau sefydliad:

 Doethur (teitl y radd) ar y cyd gan y sefydliad cartref

a 

 Doethur (teitl y radd) ar y cyd gan y sefydliad lletyol. 

Bydd pob sefydliad yn cyhoeddi ei ddogfen ddiploma ei hun. Bydd y diploma a/neu'r atodiad i’r diploma yn nodi'n glir y bartneriaeth â'r sefydliad arall a'r oruchwyliaeth ar y cyd o'r traethawd estynedig, i gydymffurfio â'r rheoliadau sydd ar waith ym mhob un o'r ddau sefydliad.

5.3

Arholi Myfyrwyr Ymchwil sy'n astudio mewn partneriaeth â Phrifysgol Lausaunne

Arholir myfyrwyr sy'n astudio mewn partneriaeth â Phrifysgol Lausaunne gan golocwiwm sy'n cynnwys rheithgor sy'n cynnwys aelodau o'r Bwrdd Arholi a goruchwylwyr (er gall y goruchwylwyr ddod i'r digwyddiad, ni allant gyfrannu at y colocwiwm).