Presenoldeb

Cyflwyniad

Mae'r Brifysgol yn cydnabod bod presenoldeb ac ymrwymiad i ddysgu ac addysgu yn elfennau allweddol wrth sicrhau cyfraddau llwyddiannus o gadw myfyrwyr, a chynnydd, cyflawniad a chyflogadwyedd myfyrwyr. Mae'r ymagwedd hon yn ein helpu i adnabod myfyrwyr a allai fod yn wynebu anawsterau ac y gallai fod angen cymorth penodol arnynt, er enghraifft gan y Gwasanaethau Myfyrwyr.

Dylech hefyd ymgyfarwyddo â'r Datganiad ar Ymgysylltu a'r Polisi Monitro Cyfranogiad Myfyrwyr a Addysgir. Mae dyletswydd gyfreithiol ar y Brifysgol i fonitro presenoldeb ac i weithredu ynghylch presenoldeb gwael er mwyn bodloni ei gofynion o ran hysbysu noddwyr allanol am bresenoldeb.

Monitro Presenoldeb

Myfyrwyr sy’n astudio ar Raglenni Israddedig ac Ôl-raddedig a Addysgir

Mae'r Brifysgol wedi datblygu Polisi, Canllawiau a System Monitro Presenoldeb Myfyrwyr fel rhan o'i hymrwymiad i ddarparu amgylchedd dysgu cefnogol a phrofiad ardderchog i fyfyrwyr.

Bydd y Brifysgol yn monitro’ch presenoldeb ac yn cymryd camau gweithredu addas os tybir bod eich ymrwymiad yn anfoddhaol. Mae'r Brifysgol yn disgwyl i chi ymgymryd â'r holl sesiynau dysgu a drefnwyd, sy'n gysylltiedig â phob modiwl rydych chi wedi dewis ei astudio, yn unol â Datganiad ar Ymgysylltu y Brifysgol. Rhaid i chi gydymffurfio â Pholisïau Monitro Presenoldeb y Brifysgol a’r holl ofynion ychwanegol ym Mholisi Cyfranogiad y Gyfadran/Ysgol sy'n berthnasol i sesiynau addysgu gorfodol.

Datblygwyd system electronig ganolog i fonitro presenoldeb at y dibenion hyn ac fe'i haddaswyd yn unol ag anghenion penodol Cyfadrannau/Ysgolion.

Bydd myfyrwyr a addysgir (nad ydynt yn y DU ar fisa Llwybr Myfyrwyr (Haen 4 gynt)) yn cael eu monitro bob pythefnos, ar adeg i'w phennu gan y Gyfadran/Ysgol. Bydd myfyrwyr sydd yn y DU ar Fisa Llwybr Myfyrwyr (Haen 4 gynt) yn cael eu monitro'n wythnosol gan yr Uned Cydymffurfiaeth Myfyrwyr Rhyngwladol.

Gall y rhestr o fathau o gyfranogiad gynnwys: seminarau/darlithoedd bach, tiwtorialau, sesiynau ymarferol/labordy, cyflwyniadau, gwaith maes, sesiynau adborth, cyfarfodydd goruchwylio, arholiadau llafar ac yn y blaen. Mae rhestr lawn ar gael yn y Polisi Monitro Presenoldeb Myfyrwyr.

Os ydych yn absennol am gyfnod o unrhyw hyd, mae’n bosibl y bydd eich Gyfadran/Ysgol yn gofyn i chi gyflwyno cais am Absenoldeb dros dro o raglen astudio, ac i egluro eich absenoldeb.

Myfyrwyr sy’n Astudio Rhan Dau Rhaglen Meistr Ôl-raddedig a Addysgir neu Radd Ymchwil

Os ydych ar Ran Dau rhaglen Meistr a Addysgir Safonol neu’n astudio am radd Ymchwil, byddwch yn cael eich monitro’n fisol. Bydd rhyngweithiadau o’r fath fel arfer yn cynnwys sesiynau goruchwylio ffurfiol.

Os ydych yn absennol am gyfnod o unrhyw hyd, mae’n bosibl y bydd eich Cyfadran/Ysgol yn gofyn i chi gyflwyno cais am absenoldeb dros dro o astudio, ac i egluro eich absenoldeb. Am ragor o gyngor, cysylltwch â'ch Cyfadran/Ysgol.

Ar gyfer unrhyw astudiaeth neu ymchwil arfaethedig a gynhelir i ffwrdd o unrhyw Gampws Prifysgol Abertawe, rhaid i fyfyrwyr gael caniatâd i astudio o bell o'r Gyfadran/Ysgol cyn gadael Abertawe a bydd gofyn iddynt gadw at y polisi monitro presenoldeb yn ystod y cyfnod hwn. Bydd angen caniatâd ar fyfyrwyr Llwybr Myfyrwyr (Haen 4 gynt) hefyd i astudio o bell oddi wrth Wasanaethau Cydymffurfiaeth Myfyrwyr.

Mae gan fyfyrwyr Ymchwil Ôl-raddedig hawl i wyliau a gwyliau blynyddol. Am gyngor pellach cysylltwch â'ch Cyfadran/Ysgol.

Presenoldeb Anfoddhaol

Os byddwch yn absennol o gyfnod astudio cynlluniedig, byddwch yn destun proses uwchgyfeirio. Diben hyn yw eich galluogi i ailgydio yn eich astudiaethau, nodi rhesymau am eich absenoldeb a darparu cymorth a chefnogaeth i chi gydag unrhyw anawsterau. Os byddwch yn absennol am gyfnod penodol o astudio cynlluniedig, heb esbonio'r rhesymau am eich absenoldeb i'ch Cyfadran/Ysgol neu, os nad ydych wedi gofyn am ganiatâd eich Cyfadran/Ysgol i fod yn absennol, gofynnir i chi adael y Brifysgol. Hysbysir y Cwmni Benthyciadau Myfyrwyr, a/neu unrhyw gorff allanol perthnasol arall. Yn achos myfyrwyr Llwybr Myfyrwyr (Haen 4 gynt), hysbysir Fisâu a Mewnfudo'r DU nad yw'r Brifysgol yn noddi'r myfyriwr bellach. Bydd hyn yn golygu diddymu'r fisa Llwybr Myfyrwyr (Haen 4 gynt). Os yw'r myfyriwr yn derbyn nawdd ariannol swyddogol, hysbysir y Noddwr hefyd.

Os gofynnir i chi adael y Brifysgol ar sail diffyg ymrwymiad, cewch bum niwrnod i ofyn i’r penderfyniad hwn gael ei adolygu.

Monitro Presenoldeb - Llwybr Myfyrwyr (Haen 4 gynt)

Monitro Presenoldeb yn y Gyfadran/Ysgol

Disgwylir i chi fynychu'r holl ddarlithoedd, seminarau, tiwtorialau a sesiynau ymarferol wyneb yn wyneb a rhithwir neu unrhyw gysylltiad arall a amserlennwyd gan eich Cyfadran/Ysgol academaidd. Bydd y Gyfadran/Ysgol yn defnyddio'r digwyddiadau hyn i gadarnhau eich presenoldeb ar lefel Cyfadran/Ysgol. Am ragor o wybodaeth ynglŷn â hyn, cysylltwch â'ch Cyfadran/Ysgoll.

Am ragor o wybodaeth am y gwasanaethau a'r rheoliadau a reolir gan y Gwasanaethau Academaidd, gan gynnwys monitro cyfranogiad ym Mhrifysgol Abertawe, cliciwch yma.

Os oes gennych chi ymholiadau am fonitro presenoldeb, ewch i'n tudalennau Monitro Presenoldeb neur gysylltu â’ch Cyfadran/Ysgol.

Am wybodaeth fanwl a chyngor ynglŷn â'r amodau sy'n gysylltiedig â fisa penodol, gan gynnwys eich cymhwyster i weithio yn ystod eich astudiaethau, cysylltwch â Rhyngwladol@BywydCampws sydd wedi'i leoli ar lawr gwaelod Adeilad Keir Hardie neu drwy e-bostio international.campuslife@abertawe.ac.uk

Am wybodaeth ynglŷn â chanllawiau'r Brifysgol am fyfyrwyr llawn-amser yn ymgymryd â chyflogaeth yn ystod y tymor, gweler y gwefannau canlynol:

Myfyrwyr Israddedig

Cyflogaeth yn ystod y tymor - Myfyrwyr Israddedig

Graddau Meistr Ôl-raddedig a Addysgir

Os ydych yn dilyn rhaglenni Graddau Meistr Ôl-raddedig a Addysgir, mae'n bosib y bydd hawl gennych weithio mewn swydd am dâl am hyd at 15 awr yrwythnos yn ystod Rhan Un a hyd at 6 awr yr wythnos yn ystod Rhan Dau.

Cyfranogiad yn ystod Tymor yr Haf

Mae'n bosib y bydd rhaid i'r Brifysgol gysylltu â chi yn ystod tymor yr haf, gan gynnwys yn y cyfnod ar ôl arholiadau mis Mai/Mehefin ac mewn rhai achosion, anfonir gohebiaeth drwy e-bost ac at eich cyfeiriad yn ystod y tymor. Ni ddylech fynd adref, trefnu gwyliau neu wneud ymrwymiadau eraill a fydd yn golygu nad ydych ar gael ar gyfer busnes y Brifysgol cyn diwedd y tymor, oherwydd efallai y bydd amgylchiadau'n codi lle bydd angen i chi fod yn bresennol yn y Brifysgol. Gallai amgylchiadau o'r fath gynnwys cwrdd ag arholwyr allanol, ailsefyll arholiadau cynlluniedig neu fod yn bresennol mewn cyfarfodydd neu wrandawiadau disgyblu.

Ni fydd y Brifysgol yn atebol am y canlyniadau os na fydd myfyriwr ar gael yn ystod tymor yr haf.

Absenoldebau a Awdurdodir

Myfyrwyr Israddedig

Absenoldeb Dros Dro

Fel arfer, ni ddisgwylir caniatáu i fyfyrwyr sy'n dilyn rhaglen israddedig fod yn absennol yn ystod y tymor. Fodd bynnag, cewch wneud cais am ganiatâd i fod yn absennol dros dro. Dylai Cyfadrannau/Ysgolion ystyried y rhesymau am y cais, hyd yr absenoldeb y gofynnir amdano ac effaith yr absenoldeb ar eich astudiaethau academaidd. Os oes gennych anawsterau personol, ariannol neu feddygol, y disgwyl arferol yw y byddech yn cael eich cynghori i ohirio'ch astudiaethau yn hytrach na chael absenoldeb dros dro.

Ail-wneud Modiwlau a Fethwyd

Mae rheoliadau Visas a Mewnfudo yn nodi, os nad yw'n ofynnol i fyfyriwr Llwybr Myfyrwyr (Haen 4 gynt)/Myfyriwr gymryd rhan yn ei raglen astudio (naill ai mewn sesiynau dysgu rheolaidd neu drwy ryw gyswllt arall) am fwy na 60 diwrnod, rhaid i'r myfyriwr adael y DU. Mewn achosion o'r fath, bydd y Brifysgol yn tynnu'n ôl ei nawdd Llwybr Myfyrwyr (Haen 4 gynt) i'r myfyriwr, bydd ei record myfyriwr yn cael ei 'hatal' a bydd Fisâu a Mewnfudo'r DU yn cael gwybod am yr amgylchiadau.

Mae'r rheoliad 60 diwrnod yn berthnasol i bob myfyriwr Llwybr Myfyrwyr (Haen 4 gynt) sy'n methu modiwlau ac sy'n gorfod ailadrodd modiwlau a fethwyd mewn un bloc addysgu yn unig (h.y. nad ydynt yn ymgymryd ag unrhyw astudiaeth nac yn mynychu unrhyw ddosbarthiadau yn y cyfamser) fel yn yr amgylchiadau canlynol, ond nid hollgynhwysfawr:

a) Mae'r myfyriwr yn cael ail-wneud Semester Un ac yna nid oes angen cyswllt pellach yn Semester Dau: dylai'r myfyriwr gwblhau Semester Un yn ôl y gofyn ac yna dychwelyd i'w wlad gartref ar gyfer Semester Dau;

b) Mae'r myfyriwr yn cael ail-wneud Semester Dau ond nid oes angen cyswllt yn ystod Semester Un: rhaid i'r myfyriwr ddychwelyd i'w wlad gartref ar gyfer Semester Un a dychwelyd i'r DU ar gyfer Semester Dau yn unig.

Os nad yw'n ofynnol i fyfyriwr gymryd rhan mewn astudiaeth o fewn cyfnod o 60 diwrnod, gofynnir i fyfyrwyr ddarparu tystiolaeth eu bod wedi gadael y DU (fel stamp ymadael wedi'i sganio yn ei basbort neu docyn aer wedi'i sganio). Bydd hyn wedyn yn eu heithrio o'r Polisi Monitro Ymgysylltu ar gyfer Myfyrwyr Llwybr Myfyrwyr (Haen 4 gynt) /Myfyrwyr a Noddir gan Lwybrau.

Argymhellir bod myfyrwyr yn cyflwyno cais am ddatganiad CAS i'r Gwasanaethau Academaidd tua thri mis cyn iddynt ddychwelyd i ailddechrau astudio.

I gael gwybodaeth fanwl a chyngor am adnewyddu eich fisa Llwybr Myfyrwyr Llwybr Myfyrwyr (Haen 4 gynt), cysylltwch â Rhyngwladol@BywydCampws, sydd wedi'i leoli ar lawr gwaelod Adeilad Keir Hardie neu e-bostiwch international.campuslife@abertawe.ac.uk.

Graddau Meistr Ôl-raddedig a Addysgir

Cwblhau'r rhaglen

Os ydych chi wedi cyflwyno'ch dysgu annibynnol dan gyfarwyddyd a/neu ddod i ddiwedd eich astudiaethau, ni fydd eich enw ar y rhestr weithredol o fyfyrwyr i'w monitro ar ôl eich dyddiad gorffen disgwyliedig.

Myfyrwyr sy'n Ailgyflwyno

Os yw myfyrwyr wedi cael caniatâd y Bwrdd Arholi i ailgyflwyno eu dysgu annibynnol dan gyfarwyddyd, byddant yn parhau'n fyfyrwyr mewnol a byddant yn parhau ar y rhestr o fyfyrwyr i'w monitro. Felly, bydd rhaid i chi barhau i gwrdd â goruchwyliwr eich prosiect unwaith y mis nes i chi ailgyflwyno'ch gwaith dysgu annibynnol dan gyfarwyddyd.

Ymchwil Ôl-raddedig

Absenoldeb Dros Dro

Cewch wneud cais am ganiatâd i fod yn absennol am resymau personol neu feddygol ac, yn achos myfyrwyr ymchwil, er mwyn gwneud ymchwil y tu allan i Brifysgol Abertawe. Ni ddylai'r cyfnod y byddwch yn gofyn amdano fod mor hir fel y byddai gofyn i chi ohirio eich astudiaethau. 60 o ddiwrnodau yw'r cyfnod hwyaf a ganiateir ar gyfer absenoldeb dros dro a awdurdodwyd.

Mewn achosion fel hyn, dylech gwblhau ffurflen absenoldeb dros dro o astudiaethau gan fanylu ar y rhesymau am yr absenoldeb. Dylai'r absenoldeb gael ei awdurdodi a'i gymeradwyo gan y Deon Gweithredol neu ei enwebai.
Dylai'r Gyfadran/Ysgol gofnodi absenoldebau a awdurdodwyd yn y System Rheoli Ymchwil.

Ysgrifennu’ch Traethawd Ymchwil

Os ydych yn aros yn y DU yn ystod y cyfnod ysgrifennu, dylech barhau i ymwneud â'r Brifysgol, ac felly mae angen i ni eich monitro. Gellir caniatáu absenoldeb dros dro o dan yr amgylchiadau a amlinellwyd uchod.

Os ydych yn y DU ar Fisa Llwybr Myfyrwyr (Haen 4 gynt) myfyriwr ac os ydych yn cadarnhau'n ysgrifenedig eich bod wedi dychwelyd i'ch gwlad enedigol i ysgrifennu'ch traethawd ymchwil ac y byddwch yn aros yno am y cyfnod cyfan, bydd y cyfrifoldeb am eich monitro yn trosglwyddo o'r Uned Cydymffurfiaeth Myfyrwyr Rhyngwladol i'ch Cyfadran/Ysgol. Fodd bynnag, os byddwch yn dychwelyd i'r Brifysgol yn ystod y cyfnod hwn, bydd yr Uned Cydymffurfiaeth Myfyrwyr Rhyngwladol yn ailddechrau monitro eich cysylltiadau misol â'ch goruchwyliwr.