Mwy o Wybodaeth, Cymorth ac Arweiniad i Fyfyrwyr y Flwyddyn Olaf

Bydd nifer fach o'n myfyrwyr wedi derbyn penderfyniadau am ddyfarniad y mae’r Boicot Marcio ac Asesu wedi effeithio arnynt yn anffodus. Mae'r Brifysgol wedi cyflwyno set o Reoliadau Asesu Eithriadol i sicrhau bod safonau academaidd yn cael eu cynnal a bod yr effaith ar fyfyrwyr cyn lleied â phosib. I'r myfyrwyr hynny mae hyn wedi effeithio arnynt, bydd eich Cyfadran wedi cysylltu â chi ynghylch yr effaith. Rydym yn gwybod bod hon yn sefyllfa anodd sy'n peri gofid i'n myfyrwyr, ac roeddem am roi mwy o gyngor, cyd-destun a chymorth am oblygiadau’r penderfyniadau hyn, beth yw'r camau nesaf, a sut gall y Brifysgol ac Undeb y Myfyrwyr eich helpu chi.

Mae'r categorïau isod yn esbonio'n fanylach beth yw ystyr pob penderfyniad ar y cam hwn.

Os ydych wedi derbyn;

Dyfarniadau Israddedig

Yn fy mhroffil, ceir 'PV' a/neu 'FV' ar bwys y marciau. Beth mae hyn yn ei olygu ar gyfer y dosbarthiad rwyf wedi'i gael?

Mae dy broffil o farciau wedi cael ei ystyried a lle mae modiwl wedi'i nodi â 'PV' a 'FV' mae Rheoliadau Eithriadol y Boicot Marcio ac Asesu wedi cael eu gweithredu a dyfarnwyd marc dros dro i ti. Pan fydd dy farc/iau go iawn ar gael ar gyfer y modiwlau hyn, bydd dy broffil yn cael ei ailystyried yn y Bwrdd Arholi priodol nesaf. Os dyfernir marc/iau go iawn is i ti, bydd yr Egwyddor Marc Gorau yn berthnasol ac ni fydd yn disodli'r marc a gadarnhawyd ym Mwrdd Dilyniant a Dyfarniadau Mehefin 2023 ac nid effeithir ar dy ddosbarthiad gradd.

Rwyf wedi cael penderfyniad o ddyfarniad wedi'i ragfynegi. Beth mae hyn yn ei olygu?

Mae dy broffil o farciau wedi cael ei ystyried; fodd bynnag, yn anffodus mae gennyt ormod o farciau ar goll ar hyn o bryd i'r byrddau dyfarnu allu rhoi dyfarniad i ti. Mae'r bwrdd yn rhagfynegi dy fod yn debygol o gael dyfarniad pan fydd y marciau ar gael. Bydd y dyfarniad hwn yn cael ei gadarnhau yn y bwrdd nesaf sydd ar gael. Gwahoddir i ti ymuno â seremoni raddio i ddathlu cwblhau dy raglen.

Rwyf wedi cael penderfyniad wedi'i ohirio ar gyfer fy ngradd, ond rwy'n gymwys i ymuno â seremoni raddio. Beth mae hyn yn ei olygu?

Mae dy broffil o farciau wedi cael ei ystyried. Fodd bynnag, yn anffodus oherwydd bod dy raglen wedi'i hachredu gan gorff proffesiynol ac ar hyn o bryd mae gennyt ormod o farciau ar goll, felly nid oes modd i'r bwrdd dyfarnu roi dosbarthiad neu ddyfarniad i ti ar hyn o bryd. Bydd dy ddyfarniad yn cael ei gadarnhau pan fydd y marciau ar gael, a bydd hyn yn cael ei gadarnhau yn y bwrdd nesaf sydd ar gael. Fodd bynnag, gwahoddir i ti ymuno â seremoni raddio i ddathlu cwblhau dy raglen.

Rwyf wedi cael penderfyniad wedi'i ohirio ar gyfer fy ngradd, ond dydw i ddim yn gymwys i ymuno â seremoni raddio. Beth mae hyn yn ei olygu?

Mae dy broffil o farciau wedi cael ei ystyried. Fodd bynnag, yn anffodus mae gennyt ti ormod o farciau ar goll a/neu mae dy broffil o farciau sydd ar gael yn golygu nad oes modd i'r bwrdd dyfarnu roi dosbarthiad neu ddyfarniad i ti ar hyn o bryd. Bydd canlyniad dy ddyfarniad yn cael ei gadarnhau pan fydd y marciau ar gael. Bydd hyn yn cael ei gadarnhau yn y bwrdd nesaf sydd ar gael. Oherwydd nifer y marciau sydd ar goll a dy broffil presennol o farciau sydd ar gael, nid wyt ti'n gymwys i ymuno â seremoni raddio ar hyn o bryd.

Dyfarniadau Ôl-raddedig a Addysgir

Rwy'n fyfyriwr Ôl-raddedig a Addysgir ac rwyf wedi cael penderfyniad i barhau gan symud ymlaen â modiwlau nad yw eu credydau wedi’u cadarnhau.

Er nad yw rhai o dy farciau ar gael ar hyn o bryd oherwydd y Boicot, mae'r Bwrdd Dilyniant a Dyfarniadau wedi penderfynu y cei di barhau â dy astudiaethau fel y bwriadwyd. Pan fydd dy farc/iau eraill ar gael, bydd dy broffil academaidd yn cael ei ailystyried yn y Bwrdd Arholiadau priodol nesaf yn unol â Rheoliadau Asesu'r Brifysgol. Os bydd angen gwneud yn iawn am fethiannau, caiff yr asesiadau hyn eu hamserlennu cyn gynted ag y bo cyfle i asesu.

Rwy'n fyfyriwr Ôl-raddedig a Addysgir ac rwyf wedi cael penderfyniad i symud ymlaen i ddysgu annibynnol dan gyfarwyddyd (prosiect), gan symud ymlaen wrth aros am benderfyniad ar gyfer modiwlau nad yw eu credydau wedi’u cadarnhau.

Er nad yw rhai o dy farciau ar gael ar hyn o bryd oherwydd y Boicot, mae'r Bwrdd Dilyniant a Dyfarniadau wedi penderfynu y cei di barhau â dy astudiaethau fel y bwriadwyd a dechrau ar dy ddysgu annibynnol dan gyfarwyddyd (prosiect). Pan fydd dy farc/iau eraill ar gael, bydd dy broffil academaidd yn cael ei ailystyried yn y Bwrdd Arholiadau priodol nesaf yn unol â Rheoliadau Asesu'r Brifysgol. Os bydd angen gwneud yn iawn am fethiannau, caiff yr asesiadau hyn eu hamserlennu cyn gynted ag y bo cyfle i asesu.

Rwy'n fyfyriwr ôl-raddedig a addysgir. Beth os bydd fy marc go iawn, pan fydd yn hysbys, yn fethiant?

Mae'r rheoliadau asesu'n caniatáu ar gyfer goddef methiannau mewn hyd at 30 o gredydau i lawr i 40% mewn modiwlau nad ydyn nhw'n rhai craidd (yn amodol ar ofynion cyrff proffesiynol, statudol a rheoleiddiol (PSRB)). Os byddi di'n methu mwy na 30 o gredydau a/neu os bydd gennyt farc islaw 40%, byddi di'n cael cyfle arall i wneud iawn am y methiant yn ystod y cyfle asesu nesaf (ar yr amod nad wyt ti wedi cyrraedd yr uchafswm cynigion). Os wyt ti'n dilyn rhaglen broffesiynol sy'n destun gofynion PSRB, a wnei di gysylltu â'th Gyfadran yn uniongyrchol.

Rwyf yn fyfyriwr gradd Meistr sydd i fod i gyflwyno fy mhrosiect/traethawd hir erbyn diwedd mis Medi, a fydd y MAB yn effeithio arnaf i?

Mae'r asesiadau'n mynd rhagddynt yn ôl y disgwyl, felly mae'n bwysig dy fod yn parhau i fodloni'r dyddiad cau o ran cyflwyno. Oni bai bod estyniad, disgwylir i'r boicot presennol ddod i ben erbyn diwedd mis Medi. Os bydd y gweithredu'n parhau, bydd y rheoliadau asesu eithriadol ar waith.

Ymchwil Ôl-Raddedig

Rwy'n fyfyriwr ymchwil ôl-raddedig, a fydd y MAB yn effeithio ar fy rhaglen gradd ymchwil?

Dylet ti gymryd yn ganiataol bod unrhyw arholiad llafar, cyfarfod neu gyfarfodydd adolygu dilyniant yn mynd rhagddynt yn ôl y disgwyl. Serch hynny, rydym yn argymell dy fod yn cysylltu â'th oruchwyliwr neu ysgol i gadarnhau hyn. Dylet gyflwyno dy draethawd ymchwil neu unrhyw waith arall ar amser.

Nid yw fy ngoruchwyliwr wedi cynnal fy nghyfarfod dilyniant gan ei fod yn rhan o'r boicot, beth gallaf ei wneud?

Byddwn yn rhoi penderfyniad dilyniant dros dro ar dy gofnod er mwyn iti barhau â'th raglen ymchwil, yna byddi di a'th oruchwyliwr yn gorfod cwrdd cyn gynted ag y bydd y boicot wedi dod i ben i gwblhau dy gyfarfod dilyniant yn ôl-weithredol.

Mae'r holl benderfyniadau uchod yn golygu bod rhai o'ch marciau ar goll o'ch proffil*, nifer y marciau sydd ar goll a/neu oherwydd bod eich rhaglen wedi'i hachredu gan gorff proffesiynol, sy'n golygu i rai myfyrwyr, nid ydym wedi gallu cynnig dosbarthiad neu ganlyniad y dyfarniad ar y cam hwn.

*Mae marciau sy'n nodi FV/PV yn cynnwys marciau sydd ar goll a ddisodlwyd gan farc deilliadol ar yr adeg hon.

Beth sy'n digwydd nesaf?

Bydd penderfyniad eich dyfarniad terfynol yn cael ei gadarnhau unwaith byddwn wedi derbyn eich holl farciau a bydd y rhain wedi'u hystyried a'u cadarnhau mewn bwrdd dyfarnu. Oherwydd natur barhaus y boicot, mae'n anodd rhoi union amserlen ar gyfer cadarnhau dyfarniadau, ond byddwn yn gwneud ein gorau i gadarnhau dyfarniadau i fyfyrwyr cyn gynted â phosib.

Mae mwy o wybodaeth ar gael ar ein tudalen Cwestiynau Cyffredin. Dylech gysylltu â ni os oes gennych unrhyw gwestiynau neu bryderon yn student-ia@abertawe.ac.uk a byddwn yn gwneud ein gorau i'ch helpu chi.

Mae'r Brifysgol yn gwerthfawrogi ei bod hi'n sefyllfa anodd sy'n peri gofid i chi, ond hoffwn achub ar y cyfle hwn i'ch llongyfarch ar gwblhau eich rhaglen astudio a'ch canmol am eich gwaith caled a'ch ymrwymiad dros yr ychydig flynyddoedd diwethaf. Gallwn dawelu eich meddwl ein bod yn gweithio i'ch cefnogi gan sicrhau bod canlyniad eich dyfarniad wedi'i gadarnhau yn llawn cyn gynted â phosib.

Byddwn yn parhau i gyfathrebu â chi drwy eich cyfeiriadau e-bost myfyrwyr a fydd yn dal i fod yn hygyrch i fyfyrwyr yn eu blwyddyn olaf.

Cywirdeb y Marciau a Gyhoeddwyd ac Apeliadau

Os ydych chi'n meddwl bod unrhyw un o'ch marciau yn anghywir a'u bod wedi'u cofnodi'n anghywir, gallwch holi am hyn yn unol â'r Polisi Cywirdeb y Marciau a Gyhoeddwyd.

Gallwch hefyd apelio yn erbyn eich penderfyniad. Sylwer y gellir apelio ar seiliau cyfyngedig yn unig. Nid yw apêl a gyflwynir ar sail sy'n gysylltiedig â'r boicot marcio ac asesu neu gymhwyso'r Rheoliadau Eithriadol yn unig yn debygol o fod yn llwyddiannus. Mae manylion llawn y gweithdrefnau a'r profformas perthnasol ar y dudalen Gweithdrefn Apeliadau Academaidd.

Trawsgrifiadau

Er efallai nad yw eich set lawn o farciau ar gael eto, mae trawsgrifiadau ar gael i'r holl fyfyrwyr:

I lawrlwytho copi o'ch Trawsgrifiad Academaidd

Mewngofnodwch i’r fewnrwyd
Dewiswch fanylion y cwrs o’r ddewislen ar yr ochr chwith
Ewch i’r ochr dde a byddwch yn gweld ‘Trawsgrifiad.’ Cliciwch arno a gallwch lawrlwytho PDF o’ch trawsgrifiad.

Sut gall y Brifysgol fy nghefnogi i?

Mae timau ar draws y Brifysgol sydd yno i'ch cefnogi ar yr adeg hon.

Os oes gennych unrhyw gwestiynau neu bryderon am ganlyniad eich dyfarniad, dylech gysylltu â'ch Cyfadran i ddechrau.

Mae Canolfan Cyngor a Chymorth Undeb y Myfyrwyr hefyd ar gael i gynnig cyngor ac arweiniad i chi. Mae Gwasanaethau Lles a Llesiant y Brifysgol hefyd wrth law.

Os ydych chi'n Fyfyriwr Rhyngwladol sy'n poeni am sut gallai eich penderfyniad effeithio ar eich fisa neu gais am fisa Llwybr i Raddedigion, e-bostiwch y tîm Cydymffurfiaeth Myfyrwyr am fwy o gyngor a chymorth studentcompliance@abertawe.ac.uk.

Efallai fod rhai ohonoch am symud ymlaen i astudiaethau pellach, cael cyflogaeth neu eisiau cymorth wrth esbonio sut mae'r boicot wedi effeithio ar eich dyfarniad ar yr adeg hon. Mae tîm MyUniHub yn gallu rhoi llythyr i chi er mwyn esbonio hyn. Cwblhewch y ffurflen hon a byddan nhw'n anfon llythyr ategol atoch.

Rwy'n fyfyriwr yn fy mlwyddyn olaf. Beth os bydd fy marc go iawn, pan fydd yn hysbys, yn fethiant? Fydda i'n dal i gael fy ngradd?

Mae'r rheoliadau asesu'n caniatáu ar gyfer goddef methiannau mewn hyd at 40 o gredydau i lawr i 0% mewn modiwlau nad ydyn nhw'n rhai craidd (yn amodol ar ofynion cyrff proffesiynol, statudol a rheoleiddiol (PSRB)). Os byddwch chi'n methu modiwl craidd, gellir rhoi cyfle arall i chi wneud iawn am eich methiant pan ddaw'r cyfle asesu nesaf. Os ydych chi'n dilyn rhaglen broffesiynol sy'n destun gofynion PSRB, a wnewch chi gysylltu â'ch Cyfadran yn uniongyrchol.

Yn seiliedig ar y boicot marcio ac asesu, ar ba ddyddiadau caiff myfyrwyr yn eu blwyddyn olaf wybod am eu dyfarniad a chaiff canlyniadau symud ymlaen myfyrwyr nad ydyn nhw yn eu blwyddyn olaf eu cyhoeddi?

Ar hyn o bryd, mae'r Brifysgol yn gweithio yn unol â'r dyddiadau dyfarnu a symud ymlaen gwreiddiol. Os bydd effaith ar fyfyrwyr, byddan nhw'n cael penderfyniad dros dro.

Fydd effaith ar ansawdd fy ngradd os na chaiff fy asesiadau eu marcio, neu os na?

Bydd y rheoliadau'n sicrhau bod safonau academaidd a phroffesiynol yn cael eu cynnal.

Pryd byddaf yn cael fy nhystysgrif gradd?

Bydd tystysgrifau gradd yn cael eu hanfon at yr holl fyfyrwyr, pan fyddant ar gael. Bydd argaeledd yn dibynnu ar dy ganlyniad. Sicrha fod dy gyfeiriad cartref ar dy broffil myfyriwr yn gywir. Ar gyfer y rhai nad yw'r boicot yn effeithio arnynt, bydd y rhain yn cael eu hanfon erbyn diwedd mis Awst. Yna byddwn ni'n anfon y gweddill ohonynt pan fydd yr holl farciau wedi'u rhyddhau a'r dosbarthiadau wedi'u cadarnhau. Byddi di hefyd yn gallu cyrchu fersiwn electronig o dy dystysgrif pan fydd yn barod drwy dy gyfrif GradIntel.

A fydd modd i mi gael prawf o'm dyfarniad cyn i'r dosbarthiad gael ei gyhoeddi?

Os yw'r boicot yn effeithio arnat ti, bydd modd i MyUniHub ddarparu datganiad dros dro yn cadarnhau dy ganlyniad. A wnei di gyflwyno cais drwy'r ffurflen hon.

Rwy'n barod i symud ymlaen i radd meistr/ymchwil – fydd modd i mi wneud hynny o hyd os nad yw dosbarthiad terfynol fy ngradd yn hysbys?

Mae Gweithredu Diwydiannol yn effeithio ar brifysgolion ledled y DU. Bydd y Brifysgol y gallet ti fod yn symud ymlaen iddi ar gyfer astudiaethau pellach fod wedi rhoi ei mesurau lliniaru ei hun ar waith i ymdrin ag ymgeiswyr y bu oedi wrth gyflwyno eu dyfarniadau o ganlyniad i'r boicot. Os oes oedi wrth gyflwyno dy ddyfarniad, gall Prifysgol Abertawe dy helpu wrth gyfathrebu â nhw. Bydd modd i MyUniHub ddarparu datganiad dros dro yn cadarnhau dy ganlyniad. A wnei di gyflwyno cais drwy'r ffurflen hon.

Rwy'n astudio am radd broffesiynol (e.e. meddygaeth, nyrsio, Cydymaith Meddygol); sut bydd y Boicot Marcio ac Asesu yn effeithio arnaf?

Ar gyfer rhaglenni sy'n arwain at achredu proffesiynol, bydd y Brifysgol yn gweithio gyda'r cyrff priodol i gadarnhau gofynion ac addasiadau derbyniol. Mae'r Rheoliadau Asesu Eithriadol ar gael yma.

A oes arnaf angen canlyniad/dosbarthiad fy ngradd er mwyn ymgeisio am swyddi/astudiaethau pellach?

Os oes arnat angen canlyniad dy radd er mwyn ymgeisio am astudiaethau pellach neu oherwydd bod gennyt ti gynnig swydd sy'n amodol ar gyflawni dosbarthiad penodol, bydd Prifysgol Abertawe yn dy gefnogi di wrth ymgysylltu a chyfathrebu â'r brifysgol neu'r cyflogwr er mwyn esbonio'r sefyllfa. A wnei di gyflwyno cais i MyUniHub drwy'r ffurflen hon.

Rwyf wedi cael fy mhenderfyniad, ond dydw i ddim yn siŵr a yw'n golygu fy mod yn gymwys i ymuno â seremoni raddio. Ble gallaf wirio hynny?

Bydd manylion am dy gymhwysedd i ymuno â seremoni raddio ar dy broffil ar y fewnrwyd. Clicia ar Fanylion Cwrs ac yna Modiwlau 2022 er mwyn dod o hyd i dy Benderfyniad Lefel. Bydd dolen i glicio arni i ddod o hyd i ddogfen sy'n manylu ar yr hyn y mae dy ganlyniad yn ei olygu, gan gynnwys dy gymhwysedd i raddio. Gwna'n siŵr dy fod yn darllen y ddogfen yn drwyadl. Os bydd gennyt ymholiadau o hyd, cysyllta â dy gyfadran am ragor o wybodaeth.

Oes modd i mi ohirio fy seremoni raddio tan i mi wybod fy nosbarthiad/marciau go iawn?

Oes, cei di ofyn i ohirio dy seremoni nes bod dy ddyfarniad yn cael ei gadarnhau, drwy e-bostio graddeferral@abertawe.ac.uk erbyn 10.00am ddydd Llun 10 Gorffennaf 2023. Cynhelir y seremonïau nesaf ym mis Rhagfyr 2023 ar Gampws y Bae.

Rwyf wedi cael penderfyniad dyfarniad bod gen i ddyfarniad wedi'i ragfynegi. Ydw i'n gymwys i ymgeisio am y Llwybr i Raddedigion?

Os wyt ti wedi cael penderfyniad o ddyfarniad wedi'i ragfynegi, bydd y Gwasanaethau Cydymffurfiaeth Myfyrwyr yn cysylltu â thi â rhagor o wybodaeth am dy gymhwysedd am y Llwybr i Raddedigion. Efallai na fydd modd i ni roi gwybod ar unwaith am dy gymhwysedd am y Llwybr i Raddedigion; fodd bynnag, rydym yn ymrwymedig i gefnogi myfyrwyr rhyngwladol y gallai'r Boicot Marcio ac Asesu effeithio arnynt. Byddwn yn ceisio cadarnhau dy ddyfarniad cyn i dy fisa bresennol ddod i ben.

Rwyf wedi cael penderfyniad dyfarniad dros dro. Ydw i'n gymwys i ymgeisio am y Llwybr i Raddedigion?

Os wyt ti wedi cael penderfyniad dyfarniad dros dro, yn y rhan fwyaf o achosion byddwn ni'n gallu cadarnhau i UKVI dy gymhwysedd am y Llwybr i Raddedigion, ar yr amod dy fod yn bodloni'r holl ofynion am y llwybr. Nid oes angen i ti ddweud wrthym dy fod wedi cael y penderfyniad hwn. Pan fyddwn ni wedi rhoi gwybod am dy gymhwysedd, bydd y Gwasanaethau Cydymffurfiaeth Myfyrwyr yn anfon cadarnhad drwy e-bost yn cynnwys yr wybodaeth y bydd ei hangen arnat i ymgeisio am y Llwybr i Raddedigion.

Mae fy mhenderfyniad dyfarniad wedi'i ohirio. Beth mae hynny'n ei olygu ar gyfer fy nghymhwysedd am y Llwybr i Raddedigion?

Bydd y Gwasanaethau Cydymffurfiaeth Myfyrwyr yn cysylltu â thi â rhagor o wybodaeth am dy gymhwysedd am y Llwybr i Raddedigion. Ni fydd modd i ni roi gwybod ar unwaith am dy gymhwysedd am y Llwybr i Raddedigion; fodd bynnag, rydym yn ymrwymedig i gefnogi myfyrwyr rhyngwladol y gallai'r Boicot Marcio ac Asesu effeithio arnynt sy'n dymuno ymgeisio am y Llwybr i Raddedigion.