Chwalu Perthynas

Gall fod yn brofiad llethol pan fydd perthynas ramantus yn chwalu, yn enwedig os yw'n syndod i un ohonoch nad oedd y llall yn hapus yn y berthynas. Gall hyn achosi i chi deimlo eich bod wedi cael eich anafu, eich bradychu ac yn drallodus.

Pethau i Fod ar eich Gwyliadwriaeth Amdanynt

Symud Ymlaen yn Rhy Gyflym

Ar ôl i berthynas chwalu, gall rhai pobl deimlo mor unig y byddant yn rhuthro i mewn i berthynas arall, yn rhannol oherwydd eu hofn o fod ar eu pennau eu hunain. Mae hwn yn ymateb cyffredin sy'n gallu creu problemau nes ymlaen yn y berthynas newydd. Os ydych yn dechrau perthynas â rhywun yn rhy gyflym, gallech ddewis rhywun na fyddech wedi'i ystyried fel arfer. O ganlyniad, efallai na fyddwch yn cyd-fynd cystal â'ch partner newydd ar ôl i chi ddod dros ddiwedd y berthynas wreiddiol ac yn dechrau teimlo fel chi eto.

Colli Hyder

Pan fydd perthynas yn chwalu mewn ffordd anniben, gall ddinistrio'ch balchder a'ch hunan-barch, yn enwedig os oedd anffyddlondeb yn un o'r rhesymau pam chwalodd y berthynas. Efallai y byddai'n ddefnyddiol i chi dderbyn, yn yr un modd y gall rhywun gwympo mewn cariad, gall hefyd gwympo allan o gariad. Efallai nad oedd unrhyw beth y gallech fod wedi'i wneud i'w atal. Cofiwch, os oedd un ohonoch neu'r ddau ohonoch yn anhapus yn y berthynas, drwy ddod â'r berthynas i ben nawr, bydd gennych gyfle i gwrdd â phartneriaid newydd a allai wneud y ddau ohonoch chi'n fwy hapus yn y dyfodol.

Edrych ar yr Ochr Orau

Mae'n well caru a cholli na pheidio â charu o gwbl. Os cawsoch amserau hapus gyda'ch cyn-gariad, meddyliwch am yr atgofion cadarnhaol hyn a gwerthfawrogwch fod rhai pobl heb gael profiadau o'r fath gyda pherson arall hyd yn oed. Os cawsoch amserau da gyda'ch cyn-gariad, gallwch edrych ymlaen at gael amserau gwell yn y dyfodol gyda rhywun sy'n fwy addas i chi.

Dysgu o'r Profiad Hwn

Gall fod yn ddefnyddiol edrych yn ôl ar y berthynas a cheisio gweld pethau o safbwynt gwrthrychol. Efallai y gallwch weld elfennau o'r berthynas y gallwch ddysgu ohonynt. Gellir defnyddio profiadau i'ch gwneud chi'n bartner cefnogol a chariadus yn y dyfodol. Cofiwch beidio â meddwl gormod am y gorffennol; ni allwch newid eich gweithredoedd. Gallwch ddefnyddio'ch safbwynt newydd i'ch helpu unwaith y byddwch wedi symud ymlaen.

Gofalu Amdanoch Chi Eich Hun

Ar ôl i berthynas ddod i ben, mae rhai pobl yn ei chael hi'n ddefnyddiol defnyddio'u hamser rhydd i gymryd pleser mewn sbwylio eu hun. Ewch ati i gael y steil gwallt roeddech chi bob amser ei eisiau, ymaelodwch â'r gampfa a rhowch gynnig ar ddosbarth ymarfer corff newydd neu ymaelodwch â chymdeithas i dreulio mwy o amser ar eich diddordebau. Gwnewch yn siŵr eich bod yn cymryd amser i ddod i adnabod eich hun eto; efallai y byddwch yn mwynhau pob dydd, ac efallai mwy fyth nawr!

Gwasanaeth Gwrando 

Mae gwasanaeth gwrando Ffydd@BywydCampws yn cynnig clust i bawb – beth bynnag yw’ch crefydd, neu ddim crefydd. Cynhelir y sgyrsiau hyn dros y ffôn neu drwy alwad fideo, beth bynnag sy’n well gennych chi. Os hoffech chi siarad ag aelod penodol o’r tîm, nodwch yr enw wrth gysylltu. I gyrchu’r gwasanaeth hwn, e-bostiwch Listeningservice.campuslife@abertawe.ac.uk 

Lles

Mae gwasanaeth Lles Prifysgol Abertawe yn cynnig arweiniad a chymorth iechyd meddwl a Chyflwr Sbectrwm Awtistiaeth (ASC) i fyfyrwyr: mae hyn yn cynnwys cymorth un i un gydag ymarferwyr iechyd meddwl ac awtistiaeth, mentoriaid a chynghorwyr, addasiadau academaidd ac adnoddau a chyrsiau hunan-gymorth. Gallwch chi weld yr ystod o gymorth sydd ar gael [yma]. Gallwch chi hefyd ofyn am gymorth drwy lenwi’r Ffurflen Cais am Gymorth Lles. Gallwch chi gysylltu â’r Gwasanaeth Lles drwy e-bostio wellbeingdisability@abertawe.ac.uk 

Togetherall

Mae Togetherall yn wasanaeth iechyd meddwl digidol sydd ar gael yn togetherall.com. Gan ddefnyddio eich cyfeiriad e-bost Prifysgol, gallwch chi gyrchu cymorth ar-lein yn ddienw gan glinigwyr hyfforddedig 24/7 yn ogystal ag ystod o offer ac adnoddau defnyddiol. Mae’n rhywle diogel ar-lein lle y gallwch chi rannu eich problemau, cael sgwrs, mynegi eich hun yn greadigol, a dysgu sut i reoli eich iechyd meddwl. Gallwch chi gyrchu’r gwasanaeth yma: https://www.swansea.ac.uk/wellbeing/togetherall/ 

Cefnogaeth Allanol

Y Samariaid

Os oes angen gwybodaeth arnoch chi neu os ydych chi’n pryderu am rywbeth neu’n teimlo’n ypset neu’n ddryslyd, neu os hoffech chi siarad â rhywun, mae’r SAMARIAID yn cynnig cymorth emosiynol cyfrinachol, 24 awr y dydd. Cysylltwch â’r Samariaid drwy e-bost neu yn www.samaritans.org neu drwy ffonio (o’r Deyrnas Unedig) 08457 90 90 90 neu 116 123 oddi ar ffôn symudol