Canllawiau ac Awgrymiadau Arbed Arian.

Fel myfyriwr, byddwch yn  gwybod bod arian yn aml yn brin. Rydyn ni wedi casglu rhai o’r canllawiau ariannol gorau yn ein barn ni i’w rhannu â chi. Gobeithio y byddwch yn rhoi cynnig arnynt ac yn arbed arian.

• Os oes gennych eich llygad ar rywbeth ond dydych chi ddim yn siŵr a ddylech ei brynu, beth am ddefnyddio’r rheol 30 diwrnod? Os ydych yn dal i eisiau’r eitem gymaint ar ôl 30 diwrnod, ystyriwch ei phrynu. Byddwch fel arfer yn sylweddoli nad ydych eisiau’r eitem bellach unwaith y mae 30 diwrnod wedi dod i ben. 
  
  
• Ewch drwy'r holl gostau mae’n rhaid i chi eu talu – byddwch siŵr o fod yn sylweddoli bod modd i chi dorri ambell beth allan. Eisiau gwybod beth i’w wneud? Ysgrifennwch bob cost sydd gennych i lawr, edrychwch am y costau y gallwch eu torri allan yn llawn ac edrychwch am ffyrdd o arbed arian ar y costau sy’n weddill. 
  
  
• Un canllaw sy’n bwysig iawn yn ein barn ni yw adolygu eich cyfriflenni banc bob mis. Nid yw’n anghyffredin gweld costau annisgwyl yn ymddangos ar eich cyfrif.
  
  
• Mae bob amser yn syniad da cael cronfa wrth gefn fel bod rhywfaint o arian gennych wrth gefn i leddfu’r straen os oes angen i chi dalu bil annisgwyl. 
  
  
• Mae siopau’n hoffi anfon e-byst di-ri gyda disgowntiau i geisio denu cwsmeriaid i mewn i brynu pethau. Tynnwch eich hun oddi ar restrau post siopau i osgoi’r temtasiwn, mae wir yn gweithio!
  
  
• Os oes angen prynu rhywbeth arnoch ar gyfer achlysur ond rydych yn gwybod na fyddwch byth yn ei ddefnyddio eto, beth am logi yn lle prynu? Erbyn hyn gallwch logi gwisgoedd a dillad ffurfiol, offer chwaraeon ac offer gwersylla.
  
  
• Mae cyllidebu’n hanfodol er mwyn gwneud yn siŵr bod digon o arian gennych. Mae’n bosib y byddwch yn ei chael hi’n anodd cadw at gyllideb i ddechrau ond byddwch yn dod i arfer â hyn a byddwch yn siŵr o weld y buddion. Edrychwch ar ein modiwlau am ragor o wybodaeth am gyllidebu.

• Wrth i gost bwyd gynyddu a gwasanaethau dosbarthu bwyd barhau i fod yn boblogaidd ymhlith myfyrwyr, mae cost bwyta’n dod yn ddrutach byth. Drwy fod yn drefnus a pharatoi prydau o fwyd, bydd gennych chi brydau o fwyd wrth law bob dydd sy’n gallu eich helpu i beidio â dibynnu ar gludfwyd o gwbl, gan olygu y byddwch chi’n arbed arian yn ogystal â bwyta bwyd maethlon bob dydd.

Mae bron pawb yn siopa ar-lein y dyddiau hyn a pham lai? Mae’n syml, yn gyflym a gallwch ei wneud bron ym mhobman. Yr hyn nad yw pobl yn ei ystyried yw’r peryglon diogelwch wrth brynu pethau ar gyfrifiaduron a rhwydweithiau WiFi cyhoeddus. Treuliwch ychydig funudau’n darllen ein canllawiau gorau am sut i gadw eich cardiau banc a’ch manylion adnabod personol yn ddiogel. 

• Dylech chi brynu o wefannau yr ydych yn ymddiried ynddynt yn unig. Mae hyn yn swnio’n amlwg ond mae llawer ohonom yn anghofio gwneud hyn.
  
  
• Wrth siopa ar-lein, gwnewch yn siŵr bod yr URL yn dechrau gyda 'https' yn lle 'http'. Hefyd, edrychwch am symbol clo neu eicon cwmni diogelwch gan gwmni dibynadwy – mae’r symbolau hyn yn dynodi y dylai’r safle fod yn ddiogel. 
  
  
• Dylech osgoi defnyddio cyfrifiaduron a WiFi cyhoeddus wrth brynu pethau a gwirio eich cyfrifon banc ar-lein. Mae’n dod yn fwy cyffredin i bobl siopa ar-lein ac edrych ar eu cyfrifon banc ar eu ffôn symudol gan ddefnyddio WiFi cyhoeddus. Gall hyn fod yn beryglus gan fod y platfformau hyn yn arbennig o agored i hacwyr. Arhoswch nes eich bod ar gyfrifiadur yr ydych yn gwybod ei fod yn ddiogel cyn i chi brynu unrhyw beth neu edrych ar eich cyfrifon banc.
  
  
• Byddwch yn wyliadwrus wrth dderbyn e-byst gan manwerthwyr/HMRC ayyb sy’n gofyn i chi glicio ar ddolen neu’n gofyn i chi am rifau eich cardiau - mae’n bosib mai twyll yw’r rhain. Y peth gorau i’w wneud yw cysylltu â’r manwerthwr y cawsoch yr e-bost ganddynt i wirio ai nhw a’i hanfonodd.

Dros y 18 mis diwethaf rydym wedi gweld cynnydd yn nifer y myfyrwyr sy'n gamblo ar-lein ac yn buddsoddi mewn marchnadoedd rhithwir a cryptocurrency fel ffordd i gynyddu eu cronfeydd. Rydyn ni eisiau codi ymwybyddiaeth er mwyn i fyfyrwyr ddeall na ddylid cyrchu gamblo neu fuddsoddi mewn rhith-farchnadoedd fel ffynhonnell ariannu, yn enwedig os ydyn nhw'n profi caledi ariannol. Os oes unrhyw un yn profi anawsterau ariannol yna cysylltwch ag money.campuslife@abertawe.ac.uk i gael rhywfaint o gyngor ac arweiniad.

Mae benthyciadau diwrnod tâl yn fenthyciadau tymor byr sydd wedi’u dylunio i’ch helpu gydag arian tan eich diwrnod tâl nesaf. Gall cymryd benthyciad diwrnod tâl ymddangos fel ffordd hawdd o gael arian ychwanegol ond mae’n ffordd gostus tu hwnt o fenthyca arian. Os nad ydych yn gallu fforddio ad-dalu’r benthyciad, mae’n bosib y bydd y benthycwyr yn cynnig estyniad i chi, rhywbeth a elwir yn oediad neu’n dreigl. Gall hyn fod yn ddeniadol ond nid yw benthyciadau diwrnod tâl yn hawdd eu rheoli os ydych yn eu defnyddio am fwy na’r tymor byr.

Os ydych yn ystyried cymryd benthyciad diwrnod tâl, gofynnwch i’ch hun yn gyntaf:

• Ydy hyn ar gyfer rhywbeth hanfodol?
• Ydw i’n gallu fforddio ad-dalu ar amser?

Os mai na yw’r ateb i un o’r cwestiynau hyn, yna nid ydych yn gallu fforddio un. 

Os ydych yn wynebu caledi ariannol, ystyriwch y canlynol:

• Ymestyn eich gorddrafft
• Agor cerdyn credyd 0%
• Benthyciad gan undeb credyd
• Gwneud cais i Gronfa Galedi Prifysgol Abertawe am gymorth ariannol

Os ydych yn ei chael hi’n anodd ad-dalu’r benthyciad diwrnod tâl neu dalu  ad-daliadau dyled eraill, gallwch ddod o hyd i gyngor cyfrinachol ac annibynnol a ddim gan Y Ganolfan Cyngor ar Bopeth neu National Debtline. Fel arall, gallwch ddod i un o’n sesiynau galw heibio a siarad ag un o’n cynghorwyr.

Mae disgownt myfyrwyr yn wych, gallai arbed llawer iawn o arian i chi. Bydd ambell manwerthwr yn derbyn cardiau UCM fel yr unig brawf o statws myfyriwr ond bydd y mwyafrif yn derbyn cerdyn llyfrgell eich prifysgol. Edrychwch ar ein rhestr am rai o’r manwerthwyr sy’n cynnig disgownt i fyfyrwyr

Siopau

• Amazon - 5% - 10%
• Warehouse - 10%
• Blue Inc - 10%
• Miss Selfridge - 10%
• New look - 10%
• Accessorize - 10%
• Soletrader - 10%
• Office - 10%
• The Fragrance Shop - 10%
• Superdrug - 10%
• Savile Row - 15%
• Surfdome 15%
• Jack Wills - 20%

Teithio

• Megabus - 10%
• National Express - 25%

Bwyd ac adloniant

• The Co-operative Food - 10%
• Frankie and Bennys - 20%
• Chiquito - 25%
• Odeon - 25%
• Pizza Express - 40%

Bydd rhaid i nifer o fyfyrwyr ddefnyddio cludiant cyhoeddus yn ystod eu cyfnod yn y brifysgol. Edrychwch ar ein canllawiau ar sut i deithio’n rhatach:

Hedfan

• Os oes rhaid i chi hedfan adref, defnyddiwch wefan gymharu ar gyfer teithiau hedfan i gael y prisiau hedfan gorau. Bydd modd i chi hefyd osod hysbysiadau i adael i chi wybod pryd y mae’r teithiau hedfan rhatach ar gael. 
• Ceisiwch hedfan yn ystod yr wythnos neu yn ystod oriau anghymdeithasol os yw’n bosib. Bydd y tocynnau awyren yn rhatach a bydd y teithiau hefyd yn dawelach. 

Trên

• Gall cardiau rheilffordd arbed 1/3 i chi ar gost eich tocyn – arbedwr arian gwych os ydych yn defnyddio’r trên yn rheolaidd. Ond cofiwch, os ydych yn anghofio’ch cerdyn rheilffordd bydd rhaid i chi dalu’r gwahaniaeth rhwng tocyn rheilffordd am bris gostyngol a thocyn pris arferol. 
• Os ydych yn mynd ar daith trên sy’n aros mewn nifer o leoedd ar hyd y ffordd, edrychwch i weld a fyddai’n rhatach prynu tocynnau ar wahân am bob arhosfan – fel arfer, bydd yn rhatach o lawer. 

Bws

• Mae gan rai o’r prif gwmnïau bws docynnau bws rhad dros ben, weithiau am £1 yn unig! Peidiwch ag anghofio edrych ar y bysiau y tro nesaf yr hoffech fynd adref. 
• A fyddwch yn defnyddio’r bws i fynd o amgylch Abertawe wrth i chi astudio yma? Os felly, efallai y bydd yn werth i chi brynu pas bws. Gall hyn arbed arian i chi a hefyd ni fydd rhaid i chi boeni am dalu ar gyfer bws ar ôl prynu pas bws.  

Mae’r gost o fyw yn Abertawe’n gymharol rad o’i chymharu â nifer o ddinasoedd eraill yn y DU. Serch hynny mae’n dal i fod yn bwysig iawn bod darpar fyfyrwyr yn paratoi eu cyllideb cyn iddynt ddod i’r Brifysgol.

Mae lefel y costau hyn yn dibynnu’n fawr ar eich ffordd o fyw a bydd yn amrywio o berson  i berson, ond mae bob amser yn syniad da llunio cyllideb - a chadw ati! Mae’r ffigyrau isod i gyd wedi’u cyfrifo ar gyfer y Flwyddyn Academaidd 22/23.

 *Yn seiliedig ar ystafell en-suite ganolig ar Gampws Singleton (mae costau llety’r Brifysgol yn amrywio o £95 yr wythnos - £240 yr wythnos)

SYLWCH: mae'r holl gostau byw yn amcangyfrifon rhesymol ond ni ddylid dibynnu arnynt. Cyfrifoldeb y myfyriwr yw sicrhau bod ganddo ddigon o arian i dalu ei gostau byw tra'n astudio yn y brifysgol. Ni all y ffigurau hyn roi cyfrif am amgylchiadau unigol ac fe'u bwriedir fel canllaw cyffredinol yn unig i'ch helpu i baratoi eich arian cyn mynd i'r brifysgol.

Mae'r ffigurau'n seiliedig ar gostau cyfartalog a dalwyd gan fyfyrwyr o ffynonellau amrywiol gan gynnwys Save The Student, Consumer Price Index a Money Helper. Byddai'n hawdd lleihau'r costau hyn gyda chyllidebu gofalus.