Coleg Gŵyr - BA (Anrhydedd) mewn Hyfforddi Chwaraeon a Pherfformiad

Caiff presenoldeb myfyrwyr ei fonitro'n agos iawn – bydd hyn yn cynnwys monitro eich prydlondeb. Fe'ch atgoffir na fydd Coleg Gŵyr Abertawe na Phrifysgol Abertawe'n goddef ymagweddau annerbyniol tuag at eich astudiaethau a bydd methu  ymateb i rybuddion ynghylch presenoldeb yn arwain at gymryd camau gweithredu priodol ar ran y Coleg a'r Brifysgol. Bydd y Coleg a'r Brifysgol yn disgwyl i chi fynd i'r holl sesiynau addysgu sy'n gysylltiedig â phob modiwl rydych chi wedi cofrestru ar ei gyfer. 

Os byddwch yn absennol, rhaid i chi roi esboniad am hynny i'r Coleg a'r Brifysgol. Lle bynnag y bo modd, dylech chi geisio caniatâd ymlaen llaw i fod yn absennol os bydd hynny'n anochel. 

Fel y corff dyfarnu, gofynnir i chi fodloni'r disgwyliadau a amlinellir ym mholisi Monitro Cyfranogiad Prifysgol Abertawe. Mae monitro cyfranogiad yn bwysig am nifer o resymau; fodd bynnag, y rheswm pwysicaf yw rhoi'r cyfle gorau i chi lwyddo yn y maes astudio o'ch dewis. Am ragor o wybodaeth, gweler Polisi a Gweithdrefn Monitro Cyfranogiad Prifysgol Abertawe.  

Sylwer bydd staff yng Ngholeg Gŵyr Abertawe'n adrodd i'r Brifysgol am gyfranogiad myfyrwyr â'r rhaglenni. 

Diffinnir Amgylchiadau Esgusodol fel problemau neu ddigwyddiadau difrifol a sydyn sydd y tu hwnt i allu myfyriwr i'w rheoli neu eu rhagweld, a all fod wedi effeithio ar berfformiad y myfyriwr a/neu a all fod wedi effeithio ar allu myfyriwr i fynychu, cwblhau, neu gyflwyno asesiad mewn pryd (h.y., problemau iechyd, gofynion gwaith, problemau teuluol gan gynnwys profedigaeth sy'n cynnwys perthynas agos.) 

Os ydych chi'n teimlo bod amgylchiadau o'r fath wedi effeithio ar eich astudiaethau, mae'n bwysig i chi siarad â'ch Tiwtor Academaidd neu Arweinydd eich Modiwl cyn gynted â phosib a chyflwyno Ffurflen am Amgylchiadau Esgusodol. Gweler ein Canllaw i Fyfyrwyr ar Gyflwyno Cais am Amgylchiadau Esgusodol i gael gwybodaeth fesul cam ar sut i gyflwyno cais. Ceir rhagor o gyngor ac arweiniad ar y dudalen: Amgylchiadau Esgusodol. Gweler y Polisi ar Amgylchiadau Esgusodol am fanylion llawn. Eich prif gyswllt gweinyddol am gymorth wrth gyflwyno cais am amgylchiadau esgusodol yw Tîm Partneriaethau Cydweithredol ac Addysg Drawswladol y Gyfadran Gwyddoniaeth a Pheirianneg, drwy e-bostio FSE-Gower@abertawe.ac.uk. 

Os caiff eich cais ei dderbyn, gellir rhoi dyddiad cau estynedig, gohiriad neu eithriad i chi, fel y bo'n briodol. Cynhelir y broses gyfan ar-lein a rhoddir gwybod i chi am y canlyniad drwy e-bost o’r system ar-lein i'ch Cyfrif Abertawe.   

Nodiadau pwysig: 

• Rhaid cyflwyno ceisiadau o fewn 5 niwrnod gwaith (cyn neu ar ôl) dyddiad cau yr aseiniad yr effeithir arno. 

• Dylid cyflwyno ceisiadau cyn y dyddiad cau lle bynnag y bo modd. Rydym bob amser yn cynghori myfyrwyr i gyflwyno cais am amgylchiadau esgusodol cyn y dyddiad cau i gyflwyno gwaith oni bai bod gennych amgylchiadau na fydd yn caniatáu i chi gyflwyno gwaith cyn y dyddiad cau, a gellir gwrthod ceisiadau os cânt eu cyflwyno ar ôl y dyddiad cau heb reswm dilys dros yr oedi. 

• Dylid lanlwytho tystiolaeth ategol i'r system amgylchiadau esgusodol ar-lein ar adeg cyflwyno'r cais am amgylchiadau esgusodol, os bydd hynny'n bosib, ond gallwch chi gyflwyno eich ffurflen gais am Amgylchiadau Esgusodol ac yna fewngofnodi i atodi dogfennau/tystiolaeth ategol yn hwyrach. Rhaid i chi ddarparu tystiolaeth ategol o fewn 5 niwrnod gwaith ar ôl y dyddiad rydych chi'n cyflwyno eich cais am amgylchiadau esgusodol. 

• Os ydych chi'n gwybod na fyddwch yn gallu darparu'r dogfennau/dystiolaeth i ategu eich cais o fewn y dyddiad cau o 5 niwrnod gwaith, gallwch chi lanlwytho datganiad personol i adran dogfennau'r system amgylchiadau esgusodol ar-lein i esbonio pam na allwch chi ddarparu tystiolaeth annibynnol ar yr adeg honno ac yna gynghori pan fydd y dystiolaeth ar gael. Sylwer na fydd datganiad personol yn disodli tystiolaeth a bydd angen tystiolaeth allanol/annibynnol i gadarnhau eich amgylchiadau o hyd. 

• Bydd y Coleg a'r Brifysgol yn asesu pob achos ar sail unigol ac yn penderfynu a fydd estyniad neu eithriad yn bosib. Mae'r Coleg yn cadw'r hawl i ymgynghori â chydweithwyr ym Mhrifysgol Abertawe ar unrhyw achos cyn gwneud penderfyniad. 

Cyfeiriwch at y dogfennau polisi priodol, y Cwestiynau Cyffredin a'r enghreifftiau o gamymddygiad academaidd ar dudalennau gwe canlynol y Brifysgol: 

• Uniondeb Academaidd a Chamymddygiad Academaidd   

• Gweithdrefn Camymddygiad Academaidd    

Uniondeb Academaidd  

Mae uniondeb academaidd yn cyfeirio at gasgliad cyffredin o egwyddorion sy'n cynnwys gonestrwydd, ymddiriedaeth, diwydrwydd, tegwch a pharch a'i nod yw cynnal uniondeb eich gwaith a'ch dyfarniad. Mae uniondeb academaidd yn seiliedig ar yr ethos bod y ffordd rydych chi'n dysgu yr un mor bwysig â'r hyn rydych chi'n ei ddysgu. 

Mae uniondeb academaidd yn seiliedig ar nifer o egwyddorion craidd. Golyga hyn: 

• Cymryd cyfrifoldeb dros eich gwaith a'ch astudiaethau eich hun. 

• Parchu barn pobl eraill hyd yn oed os nad ydych chi'n cytuno â hwy. 

• Parchu hawl pobl eraill i weithio ac astudio yn y ‘gymuned ddysgu’. 

• Cydnabod gwaith pobl eraill, lle mae hyn wedi cyfrannu at eich astudiaethau, eich ymchwil neu eich cyhoeddiadau eich hun. 

• Sicrhau bod eich cyfraniad at waith grŵp wedi cael ei gynrychioli'n onest.  

• Cefnogi pobl eraill i ymddwyn gydag uniondeb academaidd. 

• Dilyn y gofynion moesegol a'r safonau proffesiynol sy'n briodol i'r ddisgyblaeth. 

• Osgoi gweithredoedd a fyddai'n rhoi mantais annheg i chi dros bobl eraill. 

• Sicrhau bod canlyniadau ymchwil neu ddata arbrofol yn cael eu cynrychioli'n onest. 

• Cydymffurfio â gofynion yr asesiad. 

Uniondeb academaidd yw'r egwyddor arweiniol ar gyfer pob agwedd ar asesu myfyrwyr, gan gynnwys sefyll arholiadau, rhoi cyflwyniadau llafar neu ysgrifennu aseiniadau, traethodau hir neu draethodau ymchwil i'w hasesu. 

Mae'r Coleg a'r Brifysgol yn ymrwymedig i ddarparu cymorth ac arweiniad i fyfyrwyr o ran sgiliau astudio, i leihau nifer yr achosion o lên-ladrad damweiniol ac fe'ch cynghorir i geisio rhagor o gyngor gan eich Tiwtor Personol os oes gennych amheuon ynghylch yr hyn sy'n angenrheidiol. 

Camymddygiad Academaidd  

Ceir camymddygiad academaidd pan fydd myfyriwr yn ymddwyn mewn ffordd sy'n rhoi mantais nas caniateir iddo ef neu i fyfyriwr arall. Mae hyn yn berthnasol os yw’n gweithredu ar ei ben ei hun neu gydag eraill i wneud hyn. Gall hyn ddigwydd mewn unrhyw asesiad y mae myfyriwr yn ymwneud ag ef fel rhan o'i astudiaethau ar gyfer ei gymhwyster ym Mhrifysgol Abertawe. Gall myfyrwyr gyflawni camymddygiad academaidd yn fwriadol neu'n anfwriadol; felly, mae'n bwysig i chi fod yn ymwybodol o'r hyn y mae'r Brifysgol yn ei ystyried yn dramgwydd. 

Mae Prifysgol Abertawe a Choleg Gŵyr Abertawe'n ymrwymedig i sicrhau profiad addysgol o safon i'w myfyrwyr, gyda chymorth gwasanaethau a chyfleusterau cymorth academaidd, gweinyddol a lles priodol. Fodd bynnag, bydd adegau pan fydd myfyrwyr yn teimlo'n anfodlon ar yr addysgu neu'r dysgu, y cyfleusterau neu'r gwasanaethau a ddarperir gan y Brifysgol, neu gyda'r ffordd y mae'r Brifysgol neu ei staff wedi gweithredu neu heb weithredu. Disgwylir i fyfyrwyr a staff wneud ymdrechion rhesymol i ddatrys problemau'n anffurfiol yn y lle cyntaf. Gellir ymdrin â'r rhan fwyaf o gwynion gan fyfyrwyr mewn ffordd deg a chyfeillgar, gan fodloni pawb sy'n gysylltiedig â'r broblem drwy sianeli anffurfiol. Dylid cyfeirio cwynion ynghylch cyfleusterau Coleg Gŵyr a/neu addysgu neu wasanaethau a ddarperir gan Goleg Gŵyr Abertawe at Goleg Gŵyr Abertawe drwy'r Weithdrefn Cwynion. Os bydd gennych gwynion ynghylch y rhaglen ei hun a/neu wasanaethau a ddarperir gan Brifysgol Abertawe, cyfeiriwch y rhain at Brifysgol Abertawe drwy'r weithdrefn a amlinellir yng Ngweithdrefn Cwynion Prifysgol Abertawe.  

Mae gan y Coleg amrywiaeth eang o wasanaethau Cymorth i Ddysgwyr. Mae'r rhain yn cynnwys:  

• Cymorth ariannol i fyfyrwyr 

• Cyngor ac arweiniad ar yrfaoedd  

• Cymorth astudio 

• Togetherall   

• Asesu am y Lwfans i Fyfyrwyr Anabl 

• Hyfforddwyr Bugeiliol 

• Gwell Swyddi Gwell Dyfodol 

• Llyfrgell Addysg Uwch 

Ynghyd â'ch Tiwtor Personol, mae gan y Coleg dîm dynodedig Cymorth i Fyfyrwyr  

Dyma swyddogion sy'n gallu cynnig cymorth gyda nifer o broblemau a all fod yn effeithio ar eich astudiaethau. 

 Mae'r tîm yn cynnig cymorth un i un a gall eich cyfeirio chi at asiantaethau eraill am gymorth ychwanegol os bydd angen hynny. 

 Am ragor o wybodaeth, gallwch chi e-bostio StudentSupport@Email.com.   

Mae gan y Brifysgol hefyd amrywiaeth fawr o wasanaethau cymorth sydd ar gael i fyfyrwyr, gan gynnwys Gwasanaethau Lles ac Anabledd, Arian a Chymorth etc. Mae'r gwasanaethau hyn yn hollol gyfrinachol a'u nod yw rhoi cymorth i chi os bydd ei angen arnoch. Am restr lawn o'r gwasanaethau hyn, ewch i dudalennau gwe Gwasanaethau Myfyrwyr y Brifysgol.  

Mae'n bwysig i chi nodi eich bod yn gymwys i gael mynediad at gymorth a ddarperir naill ai gan Brifysgol Abertawe neu Goleg Gŵyr Abertawe; fodd bynnag, bydd y tîm (timau) yn eich cyfeirio at y cydweithiwr neu'r gwasanaeth mwyaf priodol am gymorth. Coleg Gŵyr Abertawe yw eich prif ddarparwr gwasanaeth o ran cymorth i fyfyrwyr. Gallwch weld yr holl wybodaeth a'r gwasanaethau cymorth a lles sydd ar gael ar y dudalen Cymorth Lles Prifysgol Abertawe a thudalen Coleg Gŵyr Abertawe, GCS and You.  

Os ydych chi'n penderfynu aros yn llety Prifysgol Abertawe, gweler ein tudalennau Cymorth i Breswylwyr am gyngor a gwybodaeth.   

Mae Prifysgol Abertawe a Choleg Gŵyr am sicrhau bod eich lles yn cael ei flaenoriaethu, mae hyn yn cynnwys gwneud yn siŵr eich bod yn ddigon iach i astudio. Gweler y weithdrefn Cymorth i Astudio am ragor o wybodaeth.