Awgrymiadau a Chyngor ar gyfer Strwythuro eich Dadl

Bydd hyd yn oed yr aseiniad gorau, sy'n cynnwys yr holl wybodaeth berthnasol, yn methu cael sgôr uchel os nad yw'r wybodaeth honno wedi'i threfnu'n gywir; dylai fod yn amlwg, felly, fod strwythur a chynnwys  yn cydweithio er mwyn adeiladu dadl dda. Yn ogystal â defnyddio'r awgrymiadau ynghylch strwythur a amlinellir uchod, meddyliwch am sut rydych am symud eich darllenydd o'ch man cychwyn i gasgliad eich dadl: beth mae angen i'ch darllenydd ei wybod am un rhan o'ch aseiniad er mwyn deall rhan arall?

Fel arfer, bydd dadl yn ein hargyhoeddi os yw'n gwneud dau beth: mae'n rhoi rhesymau da inni sy'n cefnogi'r casgliad ac mae'n rhoi rhesymau da pam mae safbwyntiau gwrthwynebol (os oes rhai) yn anghywir neu'n waeth. Fel arfer, cyfeirir at safbwyntiau gwrthwynebol fel 'gwrthddadlau'. Fel arfer, cyfeirir at ddatganiadau a thystiolaeth sy'n ein hargyhoeddi o wendid neu annilysrwydd (hynny yw, diffyg cywirdeb) gwrthddadlau, fel 'gwrthbrofion'. Mae'n bwysig cynnwys gwrthddadlau er mwyn sicrhau nad oes tuedd yn eich dadl, ond hefyd mae'n bwysig cynnwys gwrthbrofion er mwyn sicrhau bod eich dadl yn aros ar y trywydd iawn a'i bod yn gydlynol. Mae'r cwrs Meddwl yn Feirniadol a'r cyrsiau Ysgrifennu Academaidd a gynhelir gan y Ganolfan Llwyddiant Academaidd yn gallu eich helpu i feithrin y sgiliau y mae eu hangen arnoch er mwyn adeiladu dadl.

Mae angen i'r honiadau rydych yn eu gwneud fod yn rhan o'ch maes astudio, ac mae hynny'n golygu ymgysylltu â syniadau pobl eraill (naill ai'n cytuno neu'n anghytuno â nhw). Byddwch yn gwneud hyn yn amlaf drwy ddyfynnu ac aralleirio. Mae'r rhan fwyaf ohonom yn gwybod ein bod yn cynnwys dyfyniad uniongyrchol pan fyddwn yn defnyddio geiriau rhywun arall heb eu newid, ac mae angen defnyddio dyfynodau o amgylch y dyfyniad hwnnw a'i gyfeirnodi'n llawn. Gall aralleirio fod ychydig yn fwy anodd oherwydd yn aml ystyrir mai 'rhoi rhywbeth yn eich geiriau eich hun' yw hynny. Fodd bynnag, mae hi ychydig yn fwy cymhleth na hyn oherwydd, yn ogystal â gweithio gyda geiriau rhywun arall, rydych hefyd yn defnyddio ei syniadau. Ceisiwch ddilyn y camau allweddol hyn ar gyfer aralleirio'n dda:

1. Darllenwch y ffynhonnell: gwnewch yn siŵr eich bod yn deall yr hyn sy'n cael ei ddweud
2. Nodwch eiriau allweddol: beth yw'r prif eiriau sy'n cyfleu neges y testun ?
3. Gwnewch nodiadau: ydych chi'n gallu crynhoi'r syniadau mewn ychydig o nodiadau?
4. Darllenwch ac ysgrifennwch eich nodiadau eto: ydych chi'n gallu ehangu eich nodiadau er mwyn mynegi'r syniadau mewn ffordd wahanol (heb gyfeirio'n ôl at y testun gwreiddiol)
5. Ysgrifennwch aralleiriad llawn, gwiriwch hynny yn erbyn y testun gwreiddiol, a chofiwch gydnabod y ffynhonnell

Mae aralleirio'n dda yn eich galluogi i ddangos dealltwriaeth o gysyniadau allweddol sy'n ymwneud â'ch gradd, a rheoli syniadau'n dda wrth i chi ysgrifennu.

Gair i gall: gwiriwch eich canllaw cyfeirnodi am enghreifftiau, cysylltwch â'ch llyfrgellydd pwnc am gymorth, neu cysylltwch â'r Ganolfan Llwyddiant Academaidd am ragor o gymorth.

Mae dewis ffynonellau academaidd priodol er mwyn ategu eich ymchwil yn hanfodol i ddadl dda. Mae defnyddio llenyddiaeth eich disgyblaeth yn eich aseiniadau eich hun yn cyflawni sawl pwrpas:

1. Mae'n rhoi trosolwg i chi o'r prif ddamcaniaethau a rhagdybiaethau yn eich maes
2. Mae'n sicrhau eich bod yn gyfarwydd â’r farn academaidd ddiweddaraf ynghylch y pwnc, a bod gennych wybodaeth gefndirol
3. Ac mae'n dangos eich bod yn gallu meddwl yn feirniadol am eich disgyblaeth drwy gyflwyno eich barn a'ch syniadau eich hun

Gallwch deimlo ar goll wrth geisio penderfynu ble i ddechrau os ydych yn ystyried faint o lenyddiaeth ar gael. Mae eich llyfrgellwyr pwnc yn ffynhonnell ardderchog o wybodaeth, a gallant helpu gydag amrywiaeth o faterion, o ddod o hyd i wybodaeth mewn e-lyfrau a chronfeydd data, i chwilio ar y rhyngrwyd, i gyfeirnodi'n gywir. Gallwch ddod o hyd i'ch llyfrgellydd pwnc ar dudalennau'r canllawiau i'r llyfrgell.

Mae'n bwysig cofio bod angen i'ch deunydd ddod o ffynhonnell academaidd ddibynadwy (yn aml, bydd deunydd wedi'i adolygu gan gymheiriaid neu ffynonellau gan gyhoeddwyr academaidd yn dangos mai dyma'r achos) felly byddwch yn ofalus wrth ddefnyddio llenyddiaeth sy'n ymddangos mewn chwiliad syml ar y we (gwiriwch o le mae'n deillio). Gwiriwch y rhestrau darllen rydych wedi eu derbyn, cadwch nodyn o'r ysgolheigion mae eich darlithwyr yn cyfeirio atynt, a dylech ddod i adnabod y cyfnodolion o bwys yn eich maes astudio.

Gair i gall: Bydd defnyddio meddalwedd fel Endnote neu Zotero yn eich helpu i olrhain eich cyfeiriadau a chadw eich rhestr o gyfeiriadau’n gyfredol. Ond sut bynnag rydych yn dewis trefnu eich ymchwil, cofiwch nodi pob darn o ddeunydd ffynhonnell wrth i chi ei ddefnyddio!