Troseddau Casineb

Sut y gellir rhoi gwybod am droseddau casineb?

Gellir rhoi gwybod i’r heddlu am droseddau a digwyddiadau casineb. Fodd bynnag, os na fyddwch yn dymuno dweud wrth yr heddlu am unrhyw ddigwyddiad, mae cynlluniau adrodd trydydd-parti ar gael, sy’n caniatáu i ddioddefwyr roi gwybod i’r heddlu am droseddau casineb yn ddienw, trwy law trydydd parti megis grŵp cymunedol neu wefan. Bydd unrhyw wybodaeth a roddwch i Ganolfan Adrodd Trydydd Parti yn gyfrinachol ac yn ddienw, os dyna fydd eich dewis. Ni fydd rhaid i’r wybodaeth gael ei rhannu; cewch ddewis pa wybodaeth i’w rhoi, ac i bwy y’i trosglwyddir.

Pam y dylech chi adrodd am drosedd casineb?

Gall dioddef trosedd casineb fod yn brofiad arbennig o frawychus i’r dioddefwr, oherwydd iddo gael ei dargedu am yr hyn ydyw, neu’r hyn ydyw yn nhyb yr ymosodwr. Yn wahanol i droseddau nad oes a wnelont â hunaniaeth y dioddefwr, mae’r ymosodiad yn dra phersonol, wedi ei dargedu’n benodol, ac oherwydd hynny yn llai tebygol o fod yn ddigwyddiad ar hap.
Hwyrach y byddwch yn teimlo’n swil ynghylch cyfeirio at y digwyddiad, neu’n teimlo na ddylech fod yn creu ffwdan. Fodd bynnag, mae’n bwysig adrodd yn gyhoeddus am droseddau casineb ac ymateb iddynt yn briodol rhag i unrhyw un digwyddiad ddatblygu’n rhywbeth mwy difrifol.

• Cymorth i ddioddefwyr 
• Llinell gymorth 
• Mae’r elusen New Pathwaysyn cynnig ystod o wasanaethau cwnsela, eiriolaeth a chymorth i fenywod, dynion, plant a phobl ifanc yr effeithiwyd arnynt gan drais a chamdriniaeth rywiol. 
• Byw Heb Ofn – Os ydych chi neu rywun rydych yn ei adnabod yn dioddef o drais domestig, neu drais rhywiol, gall Byw Heb Ofn eich helpu i ddod o hyd i'r cymorth sydd ei angen arnoch. Llinell Gymorth Byw Heb Ofn: 0808 8010 800. E-bost: gwybodaeth@llinellgymorthbywhebofn.cymru
• True Vision
• YMCA 
• Stonewall CYMRU 
• Gov.uk 
• Cyngor ar Bopeth

Mae Prifysgol Abertawe yn gweithredu polisi dim goddefgarwch mewn perthynas ag aflonyddu ac unrhyw fath o ymddygiad bygythiol neu gamwahaniaethol.

Gall nifer o adrannau o fewn y Brifysgol eich cynorthwyo os ydych wedi dioddef trosedd casineb

• Llesiant@BywydCampws – Gallwch drefnu i gael gair gydag un o’n Swyddogion Bywyd Myfyrwyr, a all eich cefnogi a chynnig cyngor a chanllawiau ar sut i ymateb i droseddau casineb.
• Undeb y Myfyrwyr – Menter newydd yw 'SPEAK OUT', a lansiwyd gan Undeb Myfyrwyr Abertawe a’n Swyddog Cyswllt Cymunedol lleol, i fynd i’r afael â throseddau casineb gyda chymorth Heddlu De Cymru. Rhoddwyd pob cefnogaeth i’r fenter gan y Brifysgol, a chafwyd cyngor hefyd gan y Tîm Cyfleoedd Cyfartal.
• Cewch naill ai siarad gyda rhywun yng nghanolfan cyngor a chymorth Undeb y Myfyrwyr  neu gallwch lenwi’r ffurflen ganlynol. 

Yn anffodus, mae casineb ar-lein yn broblem sy’n gwaethygu. Mae’n bresennol ar ffurf geiriau ysgrifenedig ar-lein yn y cyfryngau cymdeithasol, mewn negeseuon e-bost neu ar dudalennau gwe, neu ar ffurf lluniau, fideos neu gerddoriaeth. Mae’n wir ei bod yn anodd sefydlu cydbwysedd priodol weithiau, rhwng caniatáu rhyddid mynegiant a galluogi troseddau casineb; ond er hynny, dylid adrodd am y troseddau. Mae gwefannau a llwyfannau’r cyfryngau cymdeithasol eu hunain yn caniatáu ichi adrodd am unrhyw bostiadau; ond gallwch adrodd amdanynt hefyd wrth y cynlluniau adrodd trydydd-parti.

Os ydych wedi dioddef trosedd casineb, cofiwch nad arnoch chi oedd y bai am hynny. Beth bynnag, mae rhai pethau y gallwch eu gwneud i leihau’r risg y bydd yr un peth ddigwydd eto; ac ar ôl eu gwneud hwyrach y byddwch yn teimlo eich bod yn dechrau cael ei bywyd yn ôl dan reolaeth.

Dyma rai o’r pethau hynny:

• Gwella diogelwch sylfaenol eich cartref – er enghraifft trwy ychwanegu cloeau a bolltau ar ddrysau a ffenestri.
• Mynd un cam ymhellach trwy osod cyfarpar diogelwch, megis offer teledu cylch cyfyng, intercoms fideo neu fotymau braw
• Cofnoi pob digwyddiad sy’n gysylltiedig â’r drosedd casineb, gan gynnwys yr amseroedd, y dyddiadau a manylion yr hyn a ddigwyddodd.
• Trefnu i rywun fynd gyda chi os byddwch yn penderfynu adrodd am y drosedd wrth yr heddlu

Beth ddylech ei wneud os byddwch yn gweld trosedd casineb yn cael ei chyflawni?

Os ydych chi, nu rywun o’ch cydnabod, wedi dioddef trosedd casineb, dylech adrodd am hynny fel digwyddiad casineb. Hyd yn oed os nad ydych yn dymuno i’r heddlu ymchwilio i’r digwyddiad, mae’n bwysig bod yr heddlu yn gwybod amdano, fel y gallant gael amcan pa mor niferus yw’r digwyddiadau ac ym mhle y maent yn digwydd. Gall yr wybodaeth honno helpu’r heddlu i ymchwilio i ddigwyddiadau casineb eraill.

Pwy all eich helpu?

Gallwch adrodd am Drosedd Casineb fel a ganlyn:

Ffôn (Achosion brys): 999
Ffôn (Nid achosion brys): 101

Yn bersonol: Unrhyw orsaf heddlu
Tîm gofal dioddefwyr lleol: 0300 303 0161

Gorsaf Heddlu Ganolog Abertawe
Grove Place, Abertawe. SA1 5EA.
Agored 8.00am-2.00am, 7 niwrnod yr wythnos.

Gorsaf Heddlu Castell-nedd
Heol Parc Gnoll, Castell-nedd. SA11 3BW.
Agored 8.00am-6.00pm, 7 niwrnod yr wythnos.