Israddedig: Ail-wneud / Trosglwyddo

Angen Ail-wneud Elfen neu Drosglwyddo

Os oes angen i chi ail-wneud elfen neu drosglwyddo o gwrs israddedig, gwelwch yr holl wybodaeth angenrheidiol yn y cwymplenni isod. Gwnewch yn siŵr eich bod wedi darllen POB pennawd - rydym wedi'u rhannu fel eu bod yn haws eu darllen, ond mae pob un yn berthnasol.

Gall ail-wneud neu drosglwyddo effeithio ar eich cyllid.

Sylwch fod y wybodaeth hon yn gywir ar gyfer myfyrwyr nad ydynt yn cael eu hariannu gan y GIG. Os ydych chi'n cael eich ariannu gan fwrsariaeth y GIG ar gyfer eich gradd mae'n bwysig eich bod chi'n gwirio'ch cymhwysedd i gael cyllid cyn newid eich statws cofrestru. Fe'ch cynghorir i drafod eich amgylchiadau gyda thîm Swyddfa Bwrsari'r GIG trwy e-bostio: chhs-bursary@swansea.ac.uk ac i gysylltu â swyddfa Money@CampusLife i gael cefnogaeth bellach: money.campuslife@swansea.ac.uk Rhaid i fyfyrwyr ddefnyddio eu e-bost myfyriwr wrth gysylltu ag unrhyw un o e-byst neu staff Arian@BywydCampws

Trosglwyddo

Os ydych yn anhapus ar eich cwrs presennol, efallai eich bod yn meddwl am drosglwyddo i gwrs arall ym Mhrifysgol Abertawe, neu drosglwyddo i gwrs mewn sefydliad arall. Bydd angen cael caniatâd eich adran bresennol yn ogystal â’r adran rydych chi am drosglwyddo iddi cyn i chi allu gwneud hyn.

Gall trosglwyddo i gwrs arall achosi problemau o ran eich cyllid myfyriwr, yn enwedig os yw hyd y ddau gwrs yn wahanol (e.e. mae un yn cynnwys blwyddyn sylfaen neu flwyddyn dramor). Os ydych wedi talu'ch ffioedd eich hun am flwyddyn o astudio o'r blaen, mae'n hanfodol eich bod yn ceisio cyngor pellach.

Ail-wneud modiwlau

Os oes angen i chi ail-wneud modiwlau a fethwyd yn ystod blwyddyn ychwanegol o astudio, mae'n bosib y bydd cyllid cynhaliaeth llawn ar gael o hyd. Y naill ffordd neu'r llall, ystyrir y flwyddyn hon yn flwyddyn lawn o gyllid.

Cyfrifir eich ffioedd dysgu ar sail pro rata, gan ddibynnu ar nifer y credydau mae'n rhaid i chi eu hail-wneud.

Y Rheol '+1'

Mae gan bob myfyriwr cymwys hawl i gyllid ffioedd dysgu a chyllid cynhaliaeth am hyd ei gwrs, ac 1 flwyddyn ychwanegol ar ben hyn. Gallwch ddefnyddio’r flwyddyn ychwanegol o gyllid os ydych yn gohirio’ch astudiaethau ran o’r ffordd drwy’r flwyddyn academaidd, neu os oes rhaid i chi ail-wneud blwyddyn o’ch cwrs.

Er enghraifft: Cwrs 3 blynedd + 1 flwyddyn ychwanegol = 4 blynedd o gyllid

Mae nifer y blynyddoedd a gaiff eu hystyried gan ddarparwr eich cyllid yn seiliedig ar eich cyfnod yn gofrestredig yn y Brifysgol, yn hytrach nag a ydych wedi cwblhau blwyddyn lawn o astudio neu wedi derbyn cyllid myfyriwr. Hynny yw, bydd cofrestru am ychydig wythnosau gyfwerth â blwyddyn lawn o astudio blaenorol.

Fel arfer, ni fydd blynyddoedd o astudio blaenorol yn effeithio ar fenthyciadau cynhaliaeth.

Os nad oes gennych hawl i gyllid digonol ar gyfer hyd llawn eich cwrs, disgwylir i chi dalu eich ffioedd dysgu eich hun*. (Bydd hyn yn berthnasol ym mlynyddoedd cynnar eich cwrs, oherwydd y bydd eich hawl i gyllid yn weithredol ar gyfer blwyddyn olaf eich cwrs newydd, gan weithio'n ôl o hynny).

*Hyd yn oed os ydych yn fyfyriwr sy'n byw yng Nghymru ac yn derbyn Grant Ffioedd Dysgu, byddai rhaid i chi dalu swm llawn y Ffioedd Dysgu eich hun, oherwydd bod blynyddoedd blaenorol o astudio'n effeithio ar Fenthyciadau Ffioedd Dysgu a Grantiau fel ei gilydd.

*Caiff myfyrwyr o'r UE wneud cais am flynyddoedd ychwanegol o gyllid hefyd, yn seiliedig ar resymau personol anorchfygol os yw hynny'n berthnasol.

Rhesymau Personol Anorchfygol

Os teimlwch fod rhywbeth y tu hwnt i'ch rheolaeth wedi cael effaith niweidiol sylweddol ar eich perfformiad academaidd neu eich gallu i astudio a bu'n rhaid i chi ohirio'ch astudiaethau neu ail-wneud y flwyddyn o ganlyniad, mae'n bosib y cewch wneud cais am gyllid ychwanegol ar sail Rhesymau Personol Anorchfygol.

Gall y rhain gynnwys materion sy'n ymwneud ag iechyd, anabledd, problemau teuluol neu brofedigaeth, ond nid yw'r rhestr hon yn gynhwysfawr. Os credwch fod hyn yn berthnasol i chi, ffoniwch ein swyddfa ar 01792 606699 neu e-bostiwch money.campuslife@abertawe.ac.uk. Bydd ymgynghorydd yn cynghori ar eich achos a'r dystiolaeth y bydd ei hangen a darparu cymorth fesul cam.

*Does dim sicrwydd y byddwch yn derbyn cyllid ychwanegol gan mai penderfyniad eich darparwr cyllid fydd hyn.

Astudiaethau Achos

ASTUDIAETH ACHOS 1

Mae'n rhaid i Chloe ail-wneud modiwlau o flwyddyn 1 ei chwrs tair blynedd.

ASTUDIO BLAENOROL - Nid yw Chloe wedi astudio ar lefel addysg uwch o'r blaen.

Serch hynny, ystyrir bod ail-wneud modiwlau gyfwerth â blwyddyn lawn o astudio. Bydd hyn yn defnyddio'r flwyddyn ychwanegol o gyllid mae gan Chloe hawl iddi. Felly, bydd gan Chloe gyllid ar gyfer gweddill ei chwrs, ond nid ar gyfer ail-wneud modiwlau eraill, oni bai fod rhesymau personol anorchfygol dros hyn.

ASTUDIAETH ACHOS 2

Ar hyn o bryd, mae Rachel yn ail flwyddyn cwrs pedair blynedd, ond bydd hi'n trosglwyddo i flwyddyn un cwrs tair blynedd newydd mewn sefydliad newydd ar ddechrau'r flwyddyn academaidd ganlynol.

ASTUDIO BLAENOROL - Ystyrir bod Rachel wedi cwblhau dwy flynedd o astudio blaenorol ar gyfer ei chwrs cyntaf. Bydd cwrs newydd Rachel yn golygu bod ganddi hawl i gyllid am bedair blynedd (hyd y cwrs 3 blynedd + 1 flwyddyn ychwanegol = hawl i gyllid am 4 blynedd). Fodd bynnag, oherwydd astudio blaenorol, bydd Rachel yn derbyn dwy flynedd yn unig o gyllid ar gyfer y cwrs newydd (hawl i gyllid am 4 blynedd - 2 flynedd o astudio blaenorol = 2 flynedd o gyllid). Caiff y ddwy flynedd hyn eu dyrannu i ran olaf y cwrs, sy'n golygu y bydd gan Rachel hawl i Grant Cynhaliaeth yn unig am flwyddyn gyntaf y cwrs newydd.

ASTUDIAETH ACHOS 3

Ar hyn o bryd, mae Josh ym Mlwyddyn Dau o astudio cwrs BEng tair blynedd a bydd yn trosglwyddo i gwrs MEng pedair blynedd yn y flwyddyn academaidd newydd.

ASTUDIO BLAENOROL - Nid yw Josh wedi astudio ar lefel addysg uwch o'r blaen. Bydd Josh yn symud yn uniongyrchol o Flwyddyn 2 i Flwyddyn 3 heb ail-wneud/trosglwyddo na gohirio, felly ni fydd hyn yn effeithio ar ei gyllid - bydd yn derbyn cyllid am weddill ei gwrs a bydd ganddo hawl am un flwyddyn ychwanegol o gyllid os bydd ei hangen arno.