Adroddiad Cyrhaeddiad Addysg Uwch

Bydd hyn o ddiddordeb i chi yn bendant!
Ydych chi am gael y swydd orau bosibl ar ôl y Brifysgol? Beth am gael cymorth wrth hybu eich cyflogadwyedd, a help llaw wrth baratoi am gyfweliadau swydd? Bydd angen i chi wneud yn siŵr bod eich CV ar ei orau... Mae ymarfer go iawn yn syniad da hefyd! Dysgwch sut mae'r Adroddiad Cyrhaeddiad Addysg Uwch (HEAR) yn gallu eich helpu hefyd.

Beth yw HEAR?

Yr Adroddiad Cyrhaeddiad Addysg Uwch (HEAR) yw eich unig gofnod cynhwysfawr o'ch dysgu a'ch cyflawniadau yn ystod eich amser ym Mhrifysgol Abertawe. Mae HEAR yn cynnwys llwyth o wybodaeth werthfawr amdanoch chi y bydd cyflogwyr am wybod amdani! Bydd y Dyfarniadau Cyflogadwyedd, cynlluniau a phrosiectau rydych chi'n eu cwblhau oll yn ymddangos ar eich cofnod HEAR er mwyn i gyflogwyr allu gweld popeth rydych chi wedi'i gyflawni.

Ble gallaf weld fy nghofnod HEAR?

GradIntelligence yw'r gwasanaeth y mae Prifysgol Abertawe yn ei ddefnyddio er mwyn cyhoeddi eich cofnod HEAR yn electronig, gan eich galluogi i'w rannu â darpar gyflogwyr a phrifysgolion eraill. Yma gallwch roi'ch cyfrif ar waith a dysgu rhagor am yr hyn y gellir ei gynnwys yn eich HEAR.

Mae sawl nodwedd gan GradIntelligence y gallwch elwa arni:

Cyfleuster rhannu sy'n galluogi cyflogwyr neu sefydliadau eraill i ddod o hyd i chi.
Holiadur personoliaeth sy'n eich galluogi i nodi cryfderau y mae cyflogwyr yn chwilio amdanynt, yn ogystal â gwendidau y gallwch geisio eu datrys. Yna, bydd modd dod o hyd i'r proffiliau gyrfa delfrydol i chi.
Canolfan asesu seicometrig sy'n mesur eich sgiliau llafar, rhifiadol a rhesymegol. Mae dros 70% o gyflogwyr graddedigion yn gofyn am y rhain bellach, felly wrth ymarfer byddwch yn gallu perfformio i'ch potensial llawn pan fo'n bwysig.
Byddai'n costio dros £170 tasech chi’n prynu'r feddalwedd hon eich hunan, ond mae hi ar gael am ddim fel rhan o feddalwedd GradIntelligence.

Pryd byddaf yn cwblhau fy nghofnod HEAR?

Nid oes terfyn amser penodol ar gyfer cael mynediad i'ch cyfrif HEAR. Bydd yn aros ac yn tyfu gyda chi drwy gydol eich astudiaethau. Fodd bynnag, er mwyn cael y gorau ohono dylech chi anelu at ei gwblhau mor drylwyr â phosibl, ac efallai bydd angen sawl sesiwn er mwyn gwneud hyn.

Pam defnyddio'r cofnod HEAR?

Mae'r cofnod HEAR yn gallu gwella eich cyflogadwyedd neu'ch cyfleoedd addysg oherwydd ei fod yn darparu gwybodaeth amdanoch sydd wedi'i dilysu gan y Brifysgol.Prifysgol Abertawe yw un o'r sefydliadau cyntaf yn y Deyrnas Unedig i weithredu'r HEAR yn llwyddiannus ac i sicrhau eich bod yn gallu elwa ohono.

Pwy gallaf siarad ag ef am fy nghofnod HEAR?

Ym Mhrifysgol Abertawe, bydd eich Tiwtor Personol dynodedig yn rhoi arweiniad academaidd i chi, a chymorth ar gyfer eich datblygiad personol. Mae'n bwysig eich bod yn cael cyfarfodydd rheolaidd â'ch tiwtor, ac mae eich cofnod HEAR yn gallu bod yn bwynt trafod gwych yn y cyfarfodydd hyn. Bydd trafod eich cofnod HEAR yn eich helpu i nodi a mynegi'r sgiliau rydych chi'n eu meithrin a myfyrio ar y ffordd y bydd datblygu'r rhain yn eich galluogi i gyflawni eich nodau yn y dyfodol.

Os oes gennych ymholiadau ynghylch eich cofnod HEAR, e-bostiwch hear@abertawe.ac.uk.