Pholisi Asesu, Marcio ac Adborth

Mae’r polisi hwn yn cyd-fynd â Strategaeth Dysgu ac Addysgu Prifysgol Abertawe. Ei nod yw gwella effeithiolrwydd a thrylwyrder dulliau asesu ac adborth i staff a myfyrwyr drwy bennu egwyddorion clir a phenodol sy’n llywio ymarfer. Mae’r egwyddorion hyn yn deillio o ymchwil academaidd ac o Gôd Ansawdd yr Asiantaeth Sicrhau Ansawdd ar gyfer Addysg Uwch (QAA) ar gyfer Addysg Uwch: Asesu. Mae canllawiau manwl ar asesu ac adborth i staff ar gael yng Nghôd Ymarfer Dysgu, Addysgu ac Asesu y Brifysgol.

Mae’r egwyddorion canllaw a amlinellir isod yn cynrychioli’r gwaelodlin ar gyfer sicrhau ansawdd a safonau asesu ac adborth a dyfarniadau ym Mhrifysgol Abertawe. Gall cyfadrannau ddewis gwneud mwy na’r gwaelodlin hyn ar sail gwella ymarfer effeithiol.

1. Mae dulliau asesu yn cyd-fynd â deilliannau dysgu bwriedig a dulliau addysgu 

Beth y mae hyn yn ei olygu i’r myfyrwyr:

• Mae gan bob Rhaglen a Modiwl ddeilliannau dysgu bwriedig clir a mesuradwy; mae’r asesu’n bwrpasol ac wedi’i gyfeirio at gyflawni’r deilliannau hyn.
• Mae myfyrwyr yn deall pwrpas yr asesiad, sut y bydd yn datblygu eu gwybodaeth a’u sgiliau a sut mae’n cyfrannu at eu datblygiad personol ar draws eu gradd gyfan.

Beth y mae hyn yn ei olygu i’r staff:

• Mae’r broses o gynllunio asesiad yn cael ei gwneud yn gyfannol gan gyfeirio at ddeilliannau bwriedig y modiwl a’r rhaglen.
• Mae’r staff yn sicrhau bod y myfyrwyr yn deall y deilliannau dysgu bwriedig a’u perthnasedd i asesiadau.
• Mae’r myfyrwyr yn cael gwybod am ddeilliannau dysgu ac asesiadau yn yr iaith astudio o’u dewis (Cymraeg neu Saesneg).

Sut y gellir gweithredu hyn:

• Côd Ymarfer, Cynllunio asesiad, Deilliannau dysgu, Safonau Cymhwysedd, a Dylunio Cynhwysol)
• Canllaw Addasiadau Rhesymol

2. Mae dulliau asesu mewn rhaglenni yn amrywio ac maent yn defnyddio amrywiaeth o wahanol ddulliau i sicrhau y caiff sgiliau a gwybodaeth berthnasol eu datblygu.

Beth y mae hyn yn ei olygu i’r myfyrwyr:

• Mae’r myfyrwyr yn profi amrywiaeth o wahanol asesiadau sy’n datblygu ystod o sgiliau academaidd, ymarferol, technegol a throsglwyddadwy a fydd yn gwella eu cyflogadwyedd a’u datblygiad personol. Efallai y bydd y myfyrwyr yn rhan o ddylunio’r asesiad. 

Beth y mae hyn yn ei olygu i’r staff:

• Mae’r staff yn defnyddio amrywiaeth o ddulliau asesu ar draws y rhaglen i fynd i’r afael â’r deilliannau dysgu bwriedig yn y ffordd orau, sicrhau cynhwysiant a hybu cynnydd y myfyrwyr.
• Mae’r staff yn dylunio asesiadau modiwl mewn perthynas â’r cwricwlwm a’r rhaglen astudio ehangach, mewn ymgynghoriad â Chyfarwyddwyr y Rhaglen a thîm y rhaglen.
• Mae partneriaeth â’r myfyrwyr wrth gynllunio asesiad yn cael ei annog.

Sut y gellir gweithredu hyn:

• Côd Ymarfer Ymagweddau at Asesu Cynhwysol
• Mathau o Asesiad a’r Defnydd Ohonynt
• Ddiffiniadau o Asesiad
• Canllaw Addasiadau Rhesymol

3. Mae asesu’n gynhwysol ac yn deg

Beth y mae hyn yn ei olygu i’r myfyrwyr:

• Mae asesiadau wedi’u dylunio fel y gall pob myfyriwr gyflawni’r deilliannau dysgu bwriedig.
• Bydd myfyrwyr yn cael y cyfle i ymgysylltu ag asesiadau ffurfiannol i wella eu datblygiad.
• Gall myfyrwyr gwblhau asesiadau a derbyn adborth yn Gymraeg neu Saesneg, a bydd asesiadau a gyflwynir yn Gymraeg yn cael eu marcio yn Gymraeg yn unol â pholisi’r Brifysgol ar gyfer Asesu ac Arholiad mewn Iaith Arall.

Beth y mae hyn yn ei olygu i’r staff:

• Mae Asesiadau’n hygyrch i’r holl fyfyrwyr ac yn cefnogi cyfle cyfartal (yn cynnwys darpariaeth Gymraeg).
• Mae Asesiadau’n cael eu dylunio’n gynhwysol o’r dechrau, a gwneir unrhyw addasiadau rhesymol pellach i sicrhau bod asesiad yn hygyrch i bawb. Mae’r Asesiad a’r Adborth yn cydymffurfio â gofynion cyfreithiol y Ddeddf Cydraddoldeb (2010).

Sut y gellir gweithredu hyn:

• Côd Ymarfer dyluniad yr asesiad,
• Marcio a chymedroli, meini prawf ar gyfer addasu marciau ac ati
• Fframwaith Asesu Cyfrwng Gymraeg)
• Canllaw Addasiadau Rhesymol

4. Mae dulliau asesu ac adborth/blaenborth yn effeithiol, yn deg ac yn amserol

Beth y mae hyn yn ei olygu i’r myfyrwyr:

• Mae’r myfyrwyr yn cael eu cefnogi ac yn barod am yr asesiad; mae yna ganllawiau asesu a meini prawf marcio clir a dealladwy, yn cynnwys gwybodaeth benodol am sut a phryd y bydd adborth /blaenborth yn cael eu cynnig, gyda gwybodaeth berthnasol ar gael yn Gymraeg a Saesneg*.
• Mae cyfle i fyfyrwyr drafod asesu ac adborth gyda staff academaidd.
• Bydd yr holl fyfyrwyr yn derbyn adborth/blaenborth ar y gwaith a aseswyd. Gall hyn fod yn adborth gan unigolyn, grŵp, cymheiriaid neu yn gyffredinol.
• Mae myfyrwyr yn cael eu harwain ar sut i ymgysylltu â’u hadborth/blaenborth a’u defnyddio i lywio eu dysgu.
• Mae asesiadau a strategaethau adborth yn bodloni canllawiau pwnc-benodol a safonau allanol a ddiffinnir gan Gyrff Proffesiynol, Statudol neu Reoleiddiol perthnasol.

*Lle bo hynny’n bosib, bydd yr holl feini prawf asesu yn cael eu darparu’n ddwyieithog, ac fel isafswm i unrhyw fyfyriwr sy’n dilyn modiwl drwy gyfrwng y Gymraeg neu unrhyw fyfyriwr ar fodiwl di-Gymraeg sy’n dewis arfer ei hawl i gyflwyno gwaith ysgrifenedig yn Gymraeg fel rhan o asesiad neu arholiad, yn unol â phrosesau cytunedig y Brifysgol a Hawliau Myfyrwyr Cymraeg eu Hiaith.

Beth y mae hyn yn ei olygu i’r staff:

• Mae staff yn dylunio ac yn darparu meini prawf asesu sy’n eglur, tryloyw, dealladwy ac yn cael eu darparu i fyfyrwyr yn Gymraeg a Saesneg pan fydd asesiadau’n cael eu gosod.
• Mae’r staff yn sicrhau bod asesiadau’n cael eu cymedroli’n effeithiol.
• Mae Arholwyr Allanol yn monitro strategaethau asesu ac adborth.
• Bydd marciau wedi’u cymedroli ac adborth/blaenborth yn cael eu darparu i fyfyrwyr o fewn 15 niwrnod gwaith fel arfer fel eu bod yn cyfrannu at ddatblygiad y dysgu.

Sut y gellir gweithredu hyn:

• Côd Ymarfer marcio, cymedroli, adborth
• Meini Prawf ar Gyfer Asesu
• Cyfarwyddiadau Asesu

5. Mae asesu yn annog uniondeb academaidd

Beth y mae hyn yn ei olygu i’r myfyrwyr:

• Mae myfyrwyr yn deall pwysigrwydd uniondeb academaidd a’r gwahanol fathau o gamymddygiad academaidd.
• Mae’r myfyrwyr yn deall sut i ddefnyddio deallusrwydd artiffisial (AI) a meddalwedd cynorthwyol yn ddiogel ac yn foesegol.
• Mae’r myfyrwyr yn deall canlyniadau camymddygiad academaidd.

Beth y mae hyn yn ei olygu i’r staff:

• Mae asesiadau wedi’u cynllunio i hyrwyddo uniondeb academaidd, lleihau cyfleoedd am gamymddygiad academaidd, a chydag atebion AI mewn golwg.
• Caiff myfyrwyr wybodaeth glir gan staff ynghylch dulliau o sicrhau uniondeb academaidd a defnydd diogel o AI, sut y bydd hyn yn cael ei fonitro, a chanlyniadau camymddygiad academaidd.

Sut y gellir gweithredu hyn:

• Côd Ymarfer Cynllun Asesu
• Uniondeb Academaidd

6. Mae asesu ac adborth yn effeithiol ac yn hawdd i’w rheoli (i bawb)

Beth y mae hyn yn ei olygu i’r myfyrwyr:

• Ar ddechrau pob semester, mae’r myfyrwyr yn cael gwybod am yr holl ddyddiadau asesu, cyflwyno a dychwelyd adborth arfaethedig, yn cynnwys cyfnodau arholiadau, fel y gallant gynllunio eu hastudiaethau.
• Lle bo hynny’n bosib, mae asesiadau’n cael eu gwasgaru’n gytbwys ar draws y flwyddyn academaidd; gan osgoi pentwr o ddyddiadau cyflwyno yn yr un cyfnod.
• Lle bo hynny’n bosib, bydd asesiad yn cael ei gyflwyno a’i farcio, ac adborth yn cael ei ddychwelyd, yn electronig.

Beth y mae hyn yn ei olygu i’r staff:

• Mae asesiadau’n cael eu dylunio gan ystyried y rhaglen gyffredinol, llwyth gwaith cyffredinol a deilliannau myfyrwyr er mwyn sicrhau eu bod yn effeithiol, yn hawdd i’w rheoli a’u bod yn ateb y diben.
• Mae asesiadau’n cael eu paratoi mewn da bryd er mwyn gallu eu cyfieithu i’r Gymraeg ar gyfer y myfyrwyr sy’n astudio yn Gymraeg neu’n dymuno cwblhau eu haseiniadau yn Gymraeg.

Sut y gellir gweithredu hyn:

• Côd Ymarfer Faint o Asesu

1.1 Amserlennu Asesiadau

Bydd amserlen asesu rhaglen (neu faes pwnc) ar gyfer pob gwaith asesedig (pob asesiad crynodol ac unrhyw asesiad ffurfiannol wedi’i drefnu) yn cael ei darparu i bob myfyriwr ar ddechrau pob Semester er mwyn sicrhau bod yr amrywiaeth o asesiadau, asesiadau ffurfiannol rheolaidd ac asesiadau crynodol effeithiol yn cael eu cydbwyso â’r angen i beidio â gorlwytho myfyrwyr a staff gydag asesiadau. Bydd yr amserlen yn nodi dyddiadau cyflwyno a dulliau cyflwyno asesiadau, cyfnodau arholiadau, pwysoliad pob dull asesu, dulliau marcio a’r dyddiad y gall myfyrwyr ddisgwyl marciau dros dro ac adborth. Bydd Cynrychiolwyr y Myfyrwyr yn cael cyfle i drafod yr amserlen yng nghyfarfod cyntaf Fforwm y Myfyrwyr a’r Staff bob semester.

Amserlennir yr asesiadau yn y fath fodd fel bod y dyddiadau cyflwyno yn cael eu gwasgaru gydol y flwyddyn academaidd, ac o amgylch y cyfnodau arholiadau diffiniedig, ar draws y rhaglen er mwyn osgoi cael pentwr o ddyddiadau cyflwyno ar yr un pryd . Rhaid gofalu hefyd fod ystyriaeth briodol yn cael ei rhoi i wyliau a dyddiadau crefyddol pwysig lle bo hynny’n bosib wrth amserlennu asesiadau.

Lle bo hynny’n bosib, bydd asesiadau’n cael eu hamserlennu i sicrhau y gall myfyrwyr ddefnyddio adborth/blaenborth a gafwyd ymhob asesiad fel sail i ddatblygu eu hasesiad perthnasol nesaf. Ni ddylid pennu dyddiadau cyflwyno asesiadau yn ystod cyfnodau pan fydd y Brifysgol ar gau (yn cynnwys y tu allan i oriau swyddfa) nac yn y cyfnodau gwyliau diffiniedig er mwyn sicrhau bod myfyrwyr yn gallu cael gafael ar gymorth, yn enwedig wrth gyflwyno, a dylid pennu amseroedd cyflwyno rhwng oriau gwaith o ddydd Llun i ddydd Iau er mwyn i fyfyrwyr allu cael cymorth pe baent yn cael unrhyw broblemau wrth geisio cyflwyno.

Nid yw asesiadau parhaus yn cael eu hamserlennu na’u cyflwyno yn ystod Cyfnodau Arholiadau diffiniedig y Brifysgol fel arfer pan fo gan y myfyrwyr arholiadau ffurfiol, cyfyngedig eu hamser ac wedi’u trefnu dros gyfnod o sawl diwrnod, er mwyn osgoi gorlwytho’r myfyrwyr. Fodd bynnag, efallai y bydd hyn yn cael ei ganiatáu o dan rai amgylchiadau pan na fydd unrhyw fyfyrwyr yn y garfan yn cael eu heffeithio’n negyddol gan ddyddiadau asesu/arholiad sy’n gwrthdaro, a bydd rhaid i’r myfyrwyr hynny gytuno i hyn ymlaen llaw.

1.2 Cyflwyno Asesiadau Parhaus

Fel arfer, bydd pob asesiad parhaus yn cael ei gyflwyno mewn fformat electronig drwy’r Platfform Dysgu Digidol i hyrwyddo hygyrchedd, effeithlonrwydd a chynaliadwyedd asesiadau. Fel rheol, bydd pob myfyriwr yn derbyn cadarnhad ei fod wedi cyflwyno’n llwyddiannus (drwy’r Platfform Dysgu Digidol os yw wedi cyflwyno’n electronig).

Pan fydd canfyddiad o angen i gyflwyno gwaith ar ffurf copi caled, gellir gofyn am eithriad gan Bennaeth Addysg yr Ysgol. Ym mhob achos, bydd y Gyfadran/Ysgol/Adran yn sicrhau bod y myfyrwyr yn ymwybodol o’r dull cyflwyno ymlaen llaw. Ni fydd gofyn i fyfyrwyr dalu i argraffu copi caled, ac mae’n rhaid i’r Gyfadran wneud trefniadau i dalu unrhyw gostau a ddaw i ran y myfyrwyr.

Unwaith y bydd yr asesiadau wedi’u cyflwyno a’r dyddiad cyflwyno wedi mynd heibio, ni chaiff myfyrwyr wneud unrhyw newidiadau i’w gwaith asesedig. Cyfrifoldeb y myfyriwr yw sicrhau bod unrhyw waith wedi’i gwblhau a’i wirio cyn ei gyflwyno. Gall myfyrwyr gyflwyno asesiadau hyd at y dyddiad cyflwyno a disodli unrhyw gyflwyniadau blaenorol lle bo angen.
Cymerir mai’r myfyriwr y mae ei rif adnabod myfyriwr ynghlwm wrth y gwaith a gyflwynwyd sydd wedi ysgrifennu’r gwaith a’i fod yn datgan mai ei waith ef neu hi ydyw a’i fod yn cyfeirio a chydnabod gwaith eraill yn llawn. Ni chaiff myfyrwyr gyflwyno gwaith ar ran myfyriwr arall, oni roddir cyfarwyddiadau penodol ar gyfer gwaith grŵp. Fel arfer, bydd pob myfyriwr yn rhoi teitl unigol i’w asesiad grŵp.

Gall myfyrwyr sydd wedi gwneud datganiadau ffug fod yn destun gweithdrefnau Camymddygiad Academaidd.

Fel arfer, ystyrir bod eiddo deallusol y gwaith asesedig a gyflwynwyd yn eiddo i’r myfyriwr, ac eithrio pan gaiff ei ddiffinio’n benodol drwy drefniadau contractiol. Gweler Polisi Eiddo Deallusol Myfyrwyr y Brifysgol am ragor o wybodaeth.

1.3 Asesiadau Parhaus Atodol

Dim ond myfyrwyr sy’n methu modiwlau neu asesiadau gorfodol a all gael caniatâd gan Bwyllgor priodol y Brifysgol neu Gyfadran/Ysgol, Bwrdd Arholi neu Gynnydd a Dyfarniadau i gyflwyno asesiad(au) atodol, yn unol â’r rheoliadau asesu perthnasol. Gall unrhyw ailgyflwyniadau gael eu capio yn unol â rheoliadau asesu perthnasol y rhaglen.

Fel arfer, bydd Asesiadau Parhaus Atodol yn ddarn o waith newydd, oni bai y bydd y Gyfadran/Ysgol yn cytuno’n benodol bod modd ailgyflwyno’r asesiad gwreiddiol (er enghraifft, traethawd hir neu brosiectau estynedig).

Ni chaniateir i fyfyrwyr ailadrodd unrhyw fodiwlau (na chydrannau asesu lle bo hynny’n berthnasol) y dyfarnwyd marc llwyddo ynddynt.

1.4 Cosbau am Gyflwyno’n Hwyr

Caiff unrhyw fyfyriwr a fydd yn cyflwyno asesiad ar ôl y dyddiad cyflwyno heb wneud cais am Amgylchiadau Esgusodol (yn unol â’r Polisi Amgylchiadau Esgusodol) ei ystyried yn fyfyriwr heb gyflwyno a bydd yn derbyn marc o 0% am yr asesiad. Ni fydd asesiadau a gyflwynir ar ôl y dyddiad cyflwyno heb Amgylchiadau Esgusodol yn cael eu marcio ac ni fydd y myfyrwyr yn derbyn adborth.

Dylai myfyrwyr sy’n debygol o gael eu hatal rhag cadw at y dyddiad cyflwyno yn sgil amgylchiadau esgusodol hysbysu eu Cyfadran/Ysgol/Prifysgol cyn gynted â phosib a chyn y dyddiad cau i gyflwyno’r asesiad lle bo hynny’n bosib. Gweler y Polisi Amgylchiadau Esgusodol am ragor o wybodaeth.

1.5 Cosbau am Gyflwyno Gwaith sy’n torri Paramedrau Diffiniedig (e.e. Terfyn Geiriau)

Bydd unrhyw fyfyriwr sy’n cyflwyno asesiad sy’n torri paramedrau diffiniedig yr asesiad (e.e. mwy o eiriau nag sy’n ofynnol, hyd fideo, maint ffont, maint poster ac ati) yn derbyn cosb ar farc terfynol ei asesiad.

Mae’n rhaid datgan yr uchafswm geiriau yn glir ar yr holl wybodaeth am yr aseiniad/arholiad ac ar y tudalennau Canvas priodol. Mae’n ofynnol i fyfyrwyr gadw at y paramedrau diffiniedig uchaf (yn cynnwys yr uchafswm geiriau) a dylent nodi cyfanswm geiriau eu haseiniad terfynol/arholiad yn y gofod a ddarperir ar y daflen sy’n cyd-fynd, lle bo hynny’n berthnasol. Bydd myfyrwyr yn cael cosb o 5 marc am fynd y tu hwnt i’r paramedrau diffiniedig uchaf.

Nodwch na ddylai cyfansymiau geiriau gynnwys tudalennau blaen, troednodiadau llyfryddiaethol neu lyfryddiaethau neu ddeunydd ychwanegol y gofynnwyd amdano ac a ddiffiniwyd yn glir fel deunydd sydd y tu allan i’r paramedrau (e.e. ysgogiadau ac allbynnau AI) oni nodwyd hynny yng nghyfarwyddiadau’r asesiad.

Ni fydd unrhyw waith a gyflwynir yn Gymraeg sy’n cael ei gyfieithu fel dewis olaf er mwyn ei farcio yn cael ei gosbi os yw’r cyfieithiad yn torri’r paramedrau asesu, lle’r oedd y cyflwyniad Cymraeg o fewn y paramedrau diffiniedig.

Darllenwch yr adran hon ar y cyd â’r Côd Ymarfer Dysgu, Addysgu ac Asesu: Dulliau Asesu a Darparu Adborth Cynhwysol.

2.1 Marcio Gwaith Asesedig

Rhaid i’r holl asesiadau fod â Meini Marcio clir, a fydd yn pennu sut y caiff pob asesiad ei farcio, a rhaid iddynt gael eu cyhoeddi i fyfyrwyr cyn yr asesiad a’i gwneud hi'n bosib defnyddio'r marciau dros yr ystod lawn (0-100), y gellir eu defnyddio mewn dull marcio cam wrth gam.

Rhaid i bob asesiad ac arholiad gael ei farcio gan staff academaidd neu berthynol* sydd wedi derbyn hyfforddiant priodol i farcio ac sy’n gyfarwydd â deilliannau dysgu’r modiwl, y canllawiau marcio a meini prawf yr asesu. Gall Myfyrwyr Ymchwil Ôl-raddedig sy’n Uwch Gynorthwywyr Addysgu fod yn farciwr cyntaf ar gyfer gwaith yn Lefelau 3, 4 a 5, a bod yn ail farciwr ar gyfer Lefelau 6 a 7, ar yr amod eu bod nhw wedi derbyn hyfforddiant cyfwerth â hyfforddiant staff academaidd a’u bod yn cael eu cymedroli a’u goruchwylio’n agos gan staff academaidd. Ni chaiff myfyrwyr sy’n ymwneud ag addysgu islaw’r lefel hon farcio asesiadau myfyrwyr yn ffurfiol.

*Gall ‘staff perthynol’ gynnwys clinigwyr a chydweithwyr allanol eraill lle bo’n briodol, cyn belled bod gofynion perthnasol a ddarparwyd gan y Brifysgol ar gyfer marcio yn cael eu dilyn.

Rhaid i'r holl farcwyr fod yn gwbl ymwybodol o ystyriaeth a roddir i fyfyrwyr â gofynion dysgu penodol wrth farcio, a sicrhau y cânt eu parchu.

Bydd Cyfadrannau/Ysgolion yn sicrhau bod eu gweithdrefnau marcio yn glir a hygyrch i’r holl fyfyrwyr.

Bydd marciau wedi’u cymedroli dros dro ac adborth/blaenborth fel arfer yn cael eu rhyddhau i fyfyrwyr o fewn uchafswm o 15 diwrnod gwaith o’r dyddiad cyflwyno/cwblhau, oni nodir yn wahanol.

2.2 Marcio Dienw

At ddibenion y polisi hwn, bydd myfyrwyr yn ddienw ac yn defnyddio eu rhif adnabod myfyriwr, ac ni chaiff enwau eu defnyddio wrth farcio lle bynnag y bo hynny’n bosib. Ni fydd staff yn cymryd unrhyw gamau i ganfod pwy yw’r myfyriwr drwy ei rif myfyriwr.

Bydd yr holl waith asesedig gan fyfyrwyr sy'n cael ei gyflwyno drwy'r Platfform Dysgu Digidol (DLP) yn cael ei farcio’n ddienw i sicrhau nad oes rhagfarn (boed yn ymwybodol neu’n ddiarwybod) wrth farcio. Dim ond rhif myfyriwr gaiff ei ddefnyddio mewn gwaith a gyflwynwyd y tu allan i'r DLP, neu lle mae angen dulliau marcio penodol (e.e. canllawiau marcio penodol neu farcio drwy gyfrwng y Gymraeg).

Mae eithriadau angenrheidiol i fod yn ddienw pan fydd asesiadau'n cynnwys elfennau 'personol' (gan gynnwys rhithwir), sy'n gallu cynnwys (heb fod yn gyfyngedig i) berfformiadau, gwaith ymarferol, cyflwyniadau, gwaith maes, lleoliadau, sgiliau clinigol a rhai asesiadau tîm neu grŵp.

Bydd Cyfadrannau/Ysgolion yn hysbysu myfyrwyr lle na fydd modd marcio asesiadau penodol yn ddienw.

2.3 Datgelu Hunaniaeth

Ni chaiff enwau myfyrwyr eu defnyddio wrth farcio, ac am gyhyd ag sy'n rhesymol ymarferol ar ôl hynny. Mae'r Brifysgol yn cydnabod:

• Ei bod yn bosibl na fydd cadw marciau'n ddienw bob amser yn cadw enw'r myfyriwr yn ddienw;
• Ygall fod angen i adnabod gwaith myfyrwyr sydd wedi cyflwyno cais am amgylchiadau esgusodol, neu addasiadau rhesymol, er mwyn ystyried pa gamau pellach sydd angen eu cymryd;
• Nid ystyrir gwaith ar sail ddienw at ddibenion dosbarth y radd derfynol.

Gall Cyfadrannau/Ysgolion gynnal Byrddau Arholi ar Lefel Pwnc naill ai'n ddienw neu yn ôl enw. Ni fydd Bwrdd Dyfarnu a Dilyniant y Brifysgol yn ddienw a chaiff ei gynnal yn ôl enw.

2.4 Gwrthdaro Buddiannau wrth Farcio

Er gwaethaf y defnydd o farcio dienw, mae sefyllfaoedd lle gallai staff weld fod ganddynt achos o wrthdaro buddiannau wrth farcio. Rhaid i staff ddatgan unrhyw wrthdaro buddiannau posib i sicrhau y caiff myfyrwyr eu trin yn deg ac nad yw staff yn teimlo dan ormod o bwysau. Os bydd staff yn canfod eu bod yn marcio gwaith myfyrwyr maent wedi cael perthynas flaenorol â nhw, rhaid iddynt ddatgan gwrthdaro buddiannau, gan ddilyn y broses Gwrthdaro Buddiannau wrth Farcio.

2.5 Gwaith Asesedig Annarllenadwy

Mae gan fyfyrwyr gyfrifoldeb i sicrhau bod modd darllen eu gwaith asesedig. Os nad oes rhan o'r gwaith yn ddarllenadwy, neu fod y gwaith cyfan yn annarllenadwy, nid oes modd ei ddarllen yn llawn a bydd hyn yn cael effaith ar farc terfynol y gwaith asesedig. Yn yr achos hwn, gall y Gyfadran gymryd un o'r tri cham canlynol:

a. Mewn achosion lle byddai darllen yr asesiad annarllenadwy yn cymryd amser afresymol i aelod staff academaidd, ac ni fyddai'n caniatáu i'r cynnwys gael ei ystyried yn briodol, gall y Gyfadran ddewis defnyddio gwasanaeth trawsgrifio, a mynnu i'r myfyriwr dalu'r costau;

b. Mewn achos lle mae'r asesiad yn gwbl amhosibl i'w ddarllen, mynnir i'r ymgeisydd ddod i'r campws i ddarllen y cynnwys i drydydd parti ym mhresenoldeb goruchwyliwr. Disgwylir i'r myfyriwr dalu am y gwasanaeth hwn;

c. Os nad yw un o'r ddau opsiwn hyn yn berthnasol, mae'r sefydliad yn cadw'r hawl i roi marc o 0%.

Mae'n ofynnol bod Cyfadrannau/Ysgolion, mewn ymgysylltiad â'r Gwasanaethau Cymorth i Fyfyrwyr, yn sicrhau bod cymorth digonol (fel arfer drwy Addasiadau Rhesymol neu Asesiadau Amgen lle bo angen) ar gael i fyfyrwyr sydd angen addasiadau rhesymol, cyn cyflwyno unrhyw asesiad.

2.6 Cymedroli Marcio

Mae cymedroli marcio yn broses ar wahân i farcio asesiadau, sy'n sicrhau bod canlyniadau asesu (marciau) yn deg, yn ddilys ac yn ddibynadwy, bod y meini prawf asesu wedi'u cymhwyso'n gyson, bod modd cydnabod unrhyw wahaniaeth o ran barn academaidd rhwng marcwyr unigol a mynd i'r afael â hynny, a bod yr adborth o safon uchel a chyson. Dylid hefyd adolygu marciau'r modiwl yn y Bwrdd Arholi.

Rhaid i weithdrefnau marcio a chymedroli fod yn glir, yn gyson, yn dryloyw a chael eu cyfathrebu'n effeithiol i fyfyrwyr.

Fel arfer, nid oes gofyn i gymedrolwyr wneud sylwadau manwl ar ddarnau unigol o waith asesedig ond, yn hytrach, gyflwyno sylwadau cyffredinol am y sampl, y marcio ac unrhyw argymhellion i newid marciau. Rhaid bod tystiolaeth o gymedroli a chofnodi'n gyson ar Ffurflen Cymedroli’r Brifysgol y cytunwyd arni.

Caiff cymedroli ei gynnal ar asesiadau ar bob lefel (gan gynnwys traethodau estynedig Ôl-raddedig a Addysgir), ac eithrio dulliau asesu sy'n awtomatig (h.y. caiff yr atebion eu darllen gan beiriannau neu'n optegol), neu mewn asesiadau meintiol lle darperir atebion enghreifftiol i'r marciwr. Mae'r dulliau hyn fel arfer wedi'u heithrio o gymedroli, ond lle efallai y bydd angen eu gwirio am gywirdeb neu raddnodi. Nid oes gofyniad gan y Brifysgol i gynnal marcio dall dwbl llawn.
 
Dylid cymedroli gwaith a gyflwynir yn y Gymraeg yn unol â pholisi'r Brifysgol ar Asesu yn y Gymraeg/Iaith Arall.

Mae cymedroli fel arfer yn berthnasol i sampl o bob elfen o'r asesiad o fewn modiwl, gan gynnwys samplau o waith sydd wedi methu a gwaith sy'n agos i'r ffin o ran methiannau a oddefir (30% mewn modiwlau israddedig a 40% ar gyfer modiwlau ôl-raddedig a addysgir). Rhaid i samplau ar gyfer cymedroli gynnwys o leiaf:

• 10% o gyfanswm yr asesiadau sy'n cynrychioli croestoriad o ddosbarthiadau, gan dalu sylw penodol i asesiadau sydd wedi methu a gwaith sy'n agos i ffiniau dosbarthiadau.

Maint sampl lleiaf:10% ac o leiaf 10 (gan gynnwys yr ystod a nodir uchod).

Gellir capio'r sampl ar faint mwyaf o 40 (i gynnwys yr ystod a nodir uchod). Lle na ellir darparu ar gyfer yr ystod a nodir o fewn y maint sampl mwyaf, dylid addasu'r cap i fyny i wneud iawn am hynny.

Fel arfer, bydd y broses gymedroli yn cael ei chwblhau cyn i farciau dros dro ac adborth gael eu rhyddhau i fyfyrwyr. Rhaid i samplau o asesiadau wedi'u marcio a'u cymedroli, ynghyd â ffurflenni cymedroli wedi'u cwblhau, fod ar gael i Arholwyr Allanol i graffu arnynt o leiaf 3 wythnos cyn y Bwrdd Arholi perthnasol (ac eithrio o dan amgylchiadau eithriadol ac mewn cytundeb â'r Deon Cyswllt, Addysg.

Yn gyffredinol, bydd cymedroli sampl effeithiol yn cael gwared ar yr angen am farcio dwbl llawn sgriptiau.
Fodd bynnag, efallai y bydd angen i dasgau asesedig penodol a ddiffiniwyd gan y Gyfadran/Ysgol fod yn destun Marcio Dwbl, a bydd yn rhaid dilyn y broses sefydledig ar gyfer cytuno ar farciau. Fel arfer, bydd ail farcio neu farcio dwbl dim ond yn angenrheidiol pan fydd cyrff Proffesiynol, Statudol neu Reoleiddio yn galw amdano, neu os nodwyd problemau o ran cysondeb marcio (gan gynnwys drwy'r broses gymedroli).

Gall Cyfadrannau ddewis rhagori ar y disgwyliad gwaelodlin a chynnal cymedroli ychwanegol, lle maent yn teimlo bod hyn yn angenrheidiol neu y gellir ei gyfiawnhau o ran ymdrech a chynnal ansawdd a safonau.

Rôl yr Arholwr Allanol wrth Farcio a Chymedroli

Ni ddylai Arholwyr Allanol, ar lefel israddedig neu ôl-raddedig a addysgir, ond goruchwylio'r broses gymedroli. Ni ddylent weithredu fel ailfarcwyr neu safonwyr eu hunain.  

Pan fydd anghytundeb am farciau, disgwylir i Gyfadrannau/Ysgolion ddatrys anghydfod rhwng marcwyr drwy ddefnyddio trydydd marciwr neu gymedrolwr allanol pan fydd angen. Rhaid datrys problemau cyn cyflwyno'r gwaith i'r Arholwyr Allanol i'w adolygu.

Rhaid i'r Arholwyr Allanol perthnasol adolygu sampl o'r holl waith a farciwyd a'i gymedroli er mwyn sicrhau tegwch a chysondeb marcio. 

Mae rhagor o wybodaeth am rôl yr Arholwyr Allanol wedi'i chyhoeddi yng Nghod Ymarfer Arholwyr Allanol. 

2.7 Asesu yn Gymraeg

Mae Prifysgol Abertawe yn trin y Gymraeg a'r Saesneg yn gyfartal wrth gydymffurfio â Rheoliadau Safonau'r Gymraeg (Rhif 6) 2017. Mae gan yr holl fyfyrwyr yr hawl i gwblhau gwaith asesedig yn Gymraeg, oni bai bod gofyniad penodol i fyfyrwyr gwblhau asesiadau mewn iaith arall (ar raglenni Ieithoedd Tramor Modern, er enghraifft). Mae'r Brifysgol wedi ymrwymo lle bynnag y bo modd i farcio'r gwaith yn yr iaith y cafodd ei gyflwyno ynddi, ac i beidio â dibynnu ar gyfieithiad at ddibenion marcio. Gellir dim ond cyfieithu gwaith at ddibenion marcio lle nad oes opsiwn arall, ac yn unol â chanllawiau a gyhoeddwyd gan y QAA.  Mae hyn wedi'i amlinellu yn y Fframwaith Asesu Cyfrwng Cymraeg. 

Rhaid i fyfyrwyr sy'n dymuno cwblhau gwaith asesedig drwy gyfrwng y Gymraeg nad ydynt fel arall yn astudio ar fodiwlau cyfrwng Cymraeg hysbysu eu Cyfadran cyn dechrau addysgu pob semester. Caniateir i fyfyrwyr yn eu blwyddyn gyntaf o astudio hyd at 4 wythnos o ddechrau'r modiwl perthnasol i hysbysu eu cyfadran o'u dymuniad i wneud yr asesiad yn Gymraeg. O dan yr holl amgylchiadau, rhaid i fyfyrwyr hysbysu cyfadrannau drwy gyflwyno'r ffurflen gais, er mwyn sicrhau y gellir gwneud paratoadau i wneud yr asesiad yn Gymraeg. Os na chyflwynir y ffurflen o fewn yr amserlen ddiffiniedig, ni all y Brifysgol warantu y bydd modd asesu'r myfyriwr yn Gymraeg.

Bydd myfyrwyr sy'n astudio yn Gymraeg yn cael meini prawf asesu sy'n eglur, yn dryloyw ac yn ddealladwy, ac ar gael i fyfyrwyr yn y Gymraeg a'r Saesneg ar yr un pryd ac ar adeg gosod yr asesiad(au). 

Cyfieithu Cwestiynau Arholiadau  

Lle darparwyd cyfieithiad Cymraeg o bapur arholiad ar gyfer modiwl cyfrwng Saesneg, dylid caniatáu i fyfyrwyr hefyd weld y papur Saesneg ac ateb yn Saesneg os byddant yn dewis gwneud hynny.

Adborth ar gyfer Asesiadau a gyflwynir yn Gymraeg

Darperir adborth ar asesiadau yn yr iaith y cawsant eu cyflwyno gan y myfyriwr o fewn yr amserlen safonol ar gyfer dychwelyd marciau ac adborth.

2.8 Asesu a Marcio mewn iaith ar wahân i'r Gymraeg neu'r Saesneg 

I fyfyrwyr sy'n astudio rhaglenni gydag asesiadau mewn ieithoedd heblaw'r Gymraeg a'r Saesneg (rhaglenni Ieithoedd Modern, er enghraifft), disgwylir i fyfyrwyr gwblhau asesiadau parhaus neu arholiadau yn yr iaith darged. Fodd bynnag, os yw'r meini prawf asesu yn gofyn am gyflwyno gwaith yn y Gymraeg neu'r Saesneg, yna bydd y gofyniad hwn yn rhagori. 

Rhaid bod Marcwyr, Cymedrolwyr ac Arholwyr Allanol fod yn ddigon cymwys i farcio, cymedroli ac arholi'n allanol yn yr iaith/ieithoedd perthnasol, ac ni chaniateir cyfieithu gwaith cyn ei farcio.

2.9 Cyhoeddi Marciau Myfyrwyr 

Ystyrir yr holl farciau nad ydynt wedi cael eu cyflwyno eto gerbron Bwrdd Dyfarnu a Dilyniant y Brifysgol i fod yn rhai dros dro, ac felly gallant newid.

Fel arfer, bydd marciau dros dro ar gyfer asesiadau parhaus ar gael i fyfyrwyr israddedig ac ôl-raddedig drwy eu cyfrifon Mewnrwyd y Brifysgol cyn gynted ag y bydd y Gyfadran/Ysgol yn eu dilysu. Bydd marc cyffredinol dros dro y modiwl yn ymddangos pan fydd yr holl farciau cydrannol ar gyfer y modiwl wedi'u cofnodi. Caiff myfyrwyr eu hysbysu am unrhyw eithriadau i hyn.

Caiff marciau modiwl eu cadarnhau ar ôl iddynt gael eu hadolygu a'u cytuno gan Fyrddau Dyfarnu a Dilyniant y Brifysgol ac Arholwr Allanol y Rhaglen. Bydd marciau a chanlyniadau a gadarnhawyd ar gael i fyfyrwyr israddedig ac ôl-raddedig trwy gyfrif Mewnrwyd y myfyriwr.

Y Gwasanaethau Addysg sy’n gyfrifol am roi gwybod yn ffurfiol i fyfyrwyr israddedig ac ôl-raddedig a addysgir am farciau a gadarnhawyd ar ôl cyfarfod Bwrdd Dilyniant a Dyfarnu'r Brifysgol fel arfer. Gwneir pob ymdrech i hysbysu ymgeiswyr o'u canlyniadau o fewn un wythnos waith o gynnal Bwrdd Dyfarnu a Dilyniant y Brifysgol. 

Y Coleg, Prifysgol Abertawe a fydd yn gyfrifol am y broses hon mewn perthynas â myfyrwyr Y Coleg.

Rhaid i farciau/penderfyniadau a ryddheir fod yn gyfrinachol a chael eu datgelu i'r bobl y mae angen mynediad arnynt ac sydd â hawl i'w gweld yn unig. 

Gall myfyrwyr wneud cais i ddilysu cywirdeb marciau a gyhoeddwyd drwy'r Weithdrefn Cywirdeb Marciau Cyhoeddedig. Ni all myfyrwyr herio'r marcio, gan fod hyn yn seiliedig ar farn academaidd yn unol â'r meini prawf asesu a ddiffiniwyd.

Bydd yr holl fyfyrwyr yn derbyn adborth/blaenborth o safon, sy'n gadarnhaol ac yn ddatblygol ar eu hasesiadau, gan gynnwys asesiadau ac arholiadau ffurfiannol ar amrywiaeth o ffurfiau, a lle bynnag y bo modd, bydd ganddynt y cyfle i ddefnyddio'r adborth hwn i lywio asesiadau yn y dyfodol.

Fel arfer, bydd adborth/blaenborth ar gyfer asesiadau parhaus yn benodol ac yn unigol i bob myfyriwr, gan ddarparu gwybodaeth am yr hyn mae'r myfyriwr wedi'i wneud yn dda a meysydd y gellid eu gwella. Gall adborth fod gan farcwyr neu gymheiriaid, gan ddibynnu ar yr ymagwedd asesu sy’n cael ei defnyddio. Gellir hefyd ddefnyddio adborth gan y garfan ar gyfer mathau priodol o asesu, yn enwedig yn achos asesiadau ac arholiadau gwrthrychol ar raddfa fawr.

Bydd adborth/blaenborth wedi'i gysylltu'n glir i'r meini prawf marcio a'r deilliannau dysgu arfaethedig ar gyfer yr asesiad, y modiwl a/neu'r rhaglen ac yn cael ei ddarparu yn yr iaith gyflwyno (Cymraeg neu Saesneg).

Fel arfer, darperir adborth/blaenborth ar bob math o asesiad y tu allan i Gyfnodau Arholi swyddogol y Brifysgol i fyfyrwyr o fewn uchafswm o 15 niwrnod gwaith i sicrhau bod yr adborth yn ddefnyddiol i fyfyrwyr, a chan gyhoeddi'r dyddiad dychwelyd disgwyliedig i fyfyrwyr ymlaen llaw. Pan na fydd hyn yn bosib, rhaid hysbysu myfyrwyr yn glir a chyn gynted â phosib, gan gynnwys dyddiad rhyddhau diwygiedig a rhesymeg neu esboniad clir am yr oedi.

Fel arfer, caiff yr holl adborth/blaenborth ei ddychwelyd i fyfyrwyr ar ffurf ddigidol a bydd Cyfadrannau/Ysgolion yn defnyddio amrywiaeth o ddulliau a chyfryngau i sicrhau bod adborth yn gynhwysol, yn ennyn diddordeb ac yn hygyrch i'r holl fyfyrwyr, gan gynnwys y defnydd o daflenni adborth neu anodiadau wedi'u digideiddio lle bydd hynny'n berthnasol. Pan ddarperir adborth a ysgrifennwyd â llaw, rhaid iddo fod yn glir ac yn ddarllenadwy, ac yn ddelfrydol, dylid osgoi ei ysgrifennu mewn inc coch. I fyfyrwyr y mae angen addasiadau rhesymol arnynt, rhaid darparu adborth ysgrifenedig yn electronig hefyd am resymau hygyrchedd. Yn ogystal, bydd myfyrwyr yn gallu gofyn am eglurhad adborth gan farcwyr, gan gynnwys ar sgriptiau arholi. Fel arfer, ni fydd myfyrwyr yn derbyn copi llawn o'u sgriptiau arholiad, ond gallant eu darllen ar y cyd â'u Tiwtor Personol neu aelod perthnasol arall o staff.

Ni chaniateir oedi wrth ryddhau marciau dros dro neu adborth i fyfyrwyr os oes myfyrwyr ag estyniad am unrhyw reswm, neu er mwyn ymgynghori â'r Arholwr Allanol. Mae'n ofynnol i Gyfadrannau/Ysgolion ddal marciau ac adborth yn ôl oddi wrth fyfyrwyr unigol pan fydd achos Camymddygiad Academaidd gweithredol ar waith.

Bydd myfyrwyr yn cael cyfleoedd clir i drafod neu ofyn am eglurhad ar eu hadborth ar unrhyw ffurf ar asesu, gan gynnwys arholiadau, gyda'r Tiwtor Personol neu Gydlynydd y Modiwl (neu aelodau eraill o staff) fel y bo'n briodol.

Mae'r Brifysgol wedi buddsoddi yn Turnitin a Feedback Studio a systemau uniondeb academaidd i sicrhau bod asesiadau'n gadarn ac yn drylwyr, yn cynnal safon graddau ac yn atal twyllo â chontract a defnydd anawdurdodedig o geisiadau Deallusrwydd Artiffisial. Bydd yr holl fyfyrwyr yn gallu cyrchu'r cyfleusterau hyn drwy'r Llwyfan Dysgu Digidol i bob modiwl.

Datganiad o Gydymffurfiaeth

Mae myfyrwyr yn cytuno drwy gofrestru ar raglen a dewis modiwl neu fodiwlau, bod yr holl asesiadau gofynnol yn destun cyflwyno i Turnitinuk.com ar gyfer adolygiad tebygrwydd testun i gynorthwyo i ddatgelu llên-ladrad. Caiff yr holl asesiadau a gyflwynwyd eu cynnwys fel dogfennau ffynhonnell yng nghronfa ddata gyfeirio Turnitin.com at ddiben datgelu darnau sydd yn union yr un peth yn y papurau hynny. Mae defnyddio gwasanaeth Turnitin.com yn destun y Polisi Defnyddio a gyhoeddwyd ar wefan Turnitin.com.

Defnyddio Turnitin a Feedback Studio

Caiff yr holl asesiadau priodol eu cyflwyno drwy Turnitin i'w hadolygu i weld a oes darnau yr un peth â ffynonellau eraill, ac fel arfer, darperir adborth drwy Feedback Studio. Gellir hefyd ddefnyddio Turnitin fel arf dysgu, a gall Cyfadrannau/Ysgolion ei gwneud hi'n bosib i fyfyrwyr gyflwyno asesiadau i Turnitin a derbyn Adroddiadau Tebygrwydd fel rhan o'u datblygiad sgiliau astudio, ar gyfer asesiadau ffurfiannol diffiniedig a chytunedig yn unig.

Uniondeb Academaidd a Chamymddygiad Academaidd

Darperir gwybodaeth am Uniondeb Academaidd a Chamymddygiad Academaidd yn Llawlyfrau Myfyrwyr y Brifysgol. Bydd pob Cyfadran/Ysgol hefyd yn darparu gwybodaeth a chanllawiau atodol a/neu benodol i fyfyrwyr.

Atgyfnerthir yr wybodaeth hon gan fodiwlau sgiliau astudio ychwanegol a sesiynau sefydlu myfyrwyr. Darperir cyngor a chymorth ychwanegol i fyfyrwyr drwy lyfrgellwyr pwnc, neu drwy'r Rhaglen Llwyddiant Academaidd. Mae cyngor a chymorth ar gael yn Gymraeg a Saesneg.

Bydd defnydd heb ei awdurdodi neu heb ei gydnabod o Ddeallusrwydd Artiffisial a/neu gymwysiadau cyfieithu peirianyddol yn cael ei ystyried yn gamymddygiad academaidd. Darperir canllawiau i fyfyrwyr ar ddefnydd priodol o'r offer hyn.

Bydd unrhyw fyfyriwr dan amheuaeth o gyflawni llên-ladrad yn dilyn adolygiad o Adroddiad Tebygrwydd Turnitin yn destun gweithdrefnau Camymddygiad Academaidd y Brifysgol.

Dehongli'r Adroddiadau Tebygrwydd

Mae Adroddiadau Tebygrwydd yn rhoi arwyddion i staff academaidd o gynnwys a allai fod wedi'i lên-ladrata drwy gymharu a pharu cofnodion testun. Nid ydynt yn cynnig tystiolaeth ddi-ffael, a bydd rhaid i'r marciwr neu'r adolygwr adolygu'r gwaith o hyd gyda'r Adroddiad Tebygrwydd, a defnyddio rhesymeg, synnwyr cyffredin a chrebwyll academaidd i benderfynu a yw'r myfyriwr wedi cyflawni Camymddygiad Academaidd ai peidio.

Bydd cronfa ddata Turnitin yn croesgyfeirio asesiadau a gyflwynwyd gyda'r holl gofnodion o waith blaenorol a gyflwynwyd i’r system, a'r holl ffynonellau sydd ar gael i ddarparu asesiad o wreiddioldeb gwaith y myfyriwr.

Caiff yr holl Adroddiadau Tebygrwydd eu hadolygu gan staff academaidd priodol. Disgwylir i farcwyr archwilio'r holl waith yn ofalus i benderfynu a oes pryderon dilys, ac efallai y bydd staff am drafod pryderon â Swyddog Uniondeb Academaidd y Gyfadran/Ysgol. Dylid uwchgyfeirio achosion lle codir pryderon drwy weithdrefnau Camymddygiad Academaidd.

Mae canllawiau pellach ar ddefnyddio Adroddiadau Tebygrwydd wedi'u cynnwys yn y Côd Ymarfer Dysgu, Addysgu ac Asesu.

Bydd pob Cyfadran/Ysgol yn penodi Swyddog(ion) Arholiadau/Asesu neu unigolyn enwebedig arall, a fydd yn gyfrifol am oruchwylio rheolaeth a diogelwch asesiadau ar gyfer y Gyfadran/Ysgol/Maes Pwnc, ac am adrodd wrth y Byrddau Astudio perthnasol a Phwyllgor Dysgu ac Addysgu'r Gyfadran/Ysgol.

Rhaid i Gyfadran/Ysgol nodi'r unigolion sy'n gyfrifol am gyfrifiadau cywir, gwneud cofnod o benderfyniadau asesu a'u gwirio, sydd fel arfer yn staff Cydlynu Modiwlau a'r Gwasanaethau Proffesiynol.

Cyfrifoldeb Cydlynydd y Modiwl a'r Swyddogion Arholiadau perthnasol yn y Gyfadran/Ysgol yw cofnodi penderfyniadau asesu yn gywir ac yn brydlon.

Rhaid bod gan Gyfadrannau/Ysgolion systemau a phrosesau cadarn a diogel ar waith i sicrhau y caiff gwaith asesedig ei storio'n ddiogel, a'i fod ar gael i'w adolygu gan Arholwyr Allanol ac i'w gyflwyno yn achosion lle mae amheuon o Gamymddygiad Academaidd a/neu apeliadau.

Rhaid i Gyfadrannau/Ysgolion sicrhau diogelwch yr asesu ar yr adeg cyflwyno (gan gynnwys cadw cofnod o'r cyflwyno, boed trwy dderbynneb, llofnod, neu'n electronig), yn ystod y marcio, ac wrth ddychwelyd asesiadau/adborth i fyfyrwyr. Dylid trin Asesiadau a Phapurau Arholiad fel deunydd 'cyfrinachol' o ran diogelwch, a dylid eu cadw'n unol â Pholisi Rheoli Cofnodion y Brifysgol.

5.1 Cadw Gwaith Asesedig

Rhaid i Gyfadrannau/Ysgolion gadw asesiadau at y dibenion canlynol:

• Darparu tystiolaeth os bydd achos neu gŵyn, apêl neu achos a amheuir o ymarfer annheg;
• Sicrhau a Gwella Ansawdd.

Fel arfer, bydd y Brifysgol yn cadw copïau (a chopi digidol ar gyfer asesiadau a gyflwynwyd yn ddigidol) o'r holl asesiadau, gan gynnwys gwaith cwrs, papurau a sgriptiau arholiad, cyflwyniadau a gwaith a gyflwynir ar ffurfiau digidol, sain neu weledol sy'n cyfrannu at ddyfarniad terfynol, ynghyd â chofnodion o farciau, cymedroli ac adborth y myfyriwr, am gyfnod sylfaenol o flwyddyn ar ôl i'r myfyriwr raddio neu ar ôl i'w gofrestriad fel myfyriwr ddod i ben yn y Brifysgol.

Yn achos traethodau hir Ôl-raddedig a Addysgir, rhaid cadw'r rhain am ddwy flynedd ar ôl i'r myfyriwr raddio.

Yn dilyn y cyfnod hwn, caiff asesiadau eu dinistrio mewn ffordd ddiogel i osgoi gormod o ddogfennaeth am resymau diogelu data ac effeithiolrwydd busnes.

Rhaid cadw deunydd asesedig nad yw'n cyfri tuag at y dyfarniad terfynol ond sy'n rhan ofynnol o gwblhau tuag at y dyfarniad, e.e. FHEQ lefel 3 neu 4 ar gyfer Graddau Baglor neu Gychwynnol Uwch (neu raglenni tebyg, gan gynnwys MBBCh), am flwyddyn yn dilyn y dyddiad cyflwyno i fodloni ceisiadau i wirio cywirdeb y marciau, apeliadau a/neu gwynion.

Cadw cofnodion goruchwylio ar gynnydd myfyrwyr

Rhaid cadw'r holl adroddiadau ar gynnydd myfyrwyr mewn perthynas â thraethodau hir (h.y. nodiadau y mae goruchwylwyr yn eu dal ac adroddiadau ffurfiol a gyflwynwyd i bwyllgorau'r Gyfadran/Ysgol a'r Brifysgol ar gyfer yr holl flynyddoedd astudio) gan y Cyfadrannau/Ysgolion am gyfnod o flwyddyn ar ôl graddio.

Cadw gwaith am gyfnodau hwy o amser

Mae gan Gyfadran/Ysgol yr hawl i gadw gwaith am gyfnod hwy o amser am sawl rheswm a allai gynnwys:

• Cadw gwaith prosiect sy'n cynnwys data a/neu ddata gwreiddiol.
• Cadw gwaith ar gyfer arolygon hydredol o dueddiadau yng nghyrhaeddiad myfyrwyr.
• Cadw gwaith i ddangos fel enghraifft i fyfyrwyr yn y dyfodol – e.e. cyflwyno traethawd hir. (Dylid cael cydsyniad ysgrifenedig y myfyrwyr y mae eu gwaith yn cael ei gadw at ddefnydd y dyfodol, a sicrhau bod gwaith yn ddienw cyn ei rannu).

Cadw gwaith ar Turnitin

Bydd y gwasanaeth yn cadw cynnwys a gyflwynwyd iddo a'r data cysylltiedig tan derfynu'r gwasanaeth neu ei olynydd, gan helpu i gronni corpws o wybodaeth mor helaeth â phosib y gellir ei ddefnyddio i gymharu cynnwys a gyflwynir.

Cadw penderfyniadau Byrddau Arholi

Mae'r Brifysgol yn cadw cofnodion y Bwrdd Arholi a Dyfarnu a Dilyniant a'r gwaith papur cysylltiedig, gan gynnwys ffurflenni Adrodd a Chanlyniadau myfyrwyr ymchwil am 10 mlynedd (Dilyniant) neu 15 mlynedd (Dyfarnu) ar gyfer y Byrddau Dyfarnu a Dilyniant. Mae marciau a phenderfyniadau dilyniant myfyrwyr yn cael eu cadw’n ganolog ar systemau electronig sydd hefyd yn cael eu cadw am gyfnod amhenodol.

Eithriadau

Nid yw'r polisi hwn yn berthnasol i ddata ymchwil/gwybodaeth a gesglir gan brosiect ymchwil a gymeradwywyd yn foesegol yn ystod rhaglen Meistr ymchwil (MA/MSc, MPhil, Mhres), rhaglen PhD neu brosiect staff ymchwil.

5.2 Rolau a Chyfrifoldebau Asesu

Staff a Myfyrwyr

Mae cyfrifoldeb ar staff academaidd a myfyrwyr ar bob lefel gyfrifoldeb i gyfrannu at y gwaith o wella asesu ac adborth.

Myfyrwyr

Fel partneriaid yn y dysgu, rhaid i fyfyrwyr gyfranogi'n llawn yn y broses o wella eu profiad o asesu ac adborth. Disgwylir i fyfyrwyr roi adborth i'w Cyfadrannau/Ysgolion ar asesiadau trwy werthuso modiwlau a thrwy arolygon myfyrwyr, ond gallant hefyd gymryd rhan mewn trafodaethau mewn pwyllgorau, a hefyd mewn grwpiau anffurfiol llai.

Anogir myfyrwyr nad ydynt wedi datgelu anabledd, problem o ran lles neu gyflwr iechyd arall i hysbysu'r Gwasanaethau Lles ac Anabledd cyn gynted â phosib. Ni fydd myfyrwyr yn gallu cyrchu cymorth asesu ffurfiol o'r Brifysgol os na fyddant yn datgelu eu hanabledd.

Rhaid i fyfyrwyr sy'n dymuno gwneud asesiadau yn Gymraeg hysbysu eu Cyfadran/Ysgol cyn dechrau addysgu pob semester neu, ar gyfer myfyrwyr blwyddyn gyntaf, o fewn pedair wythnos i ddechrau'r modiwl.

Cynrychiolwyr Myfyrwyr

Caiff cynrychiolwyr myfyrwyr eu hethol ar gyfer rhaglenni a Chyfadrannau/Ysgolion. Mae cynrychiolwyr yn gyfrifol am godi materion sy'n ymwneud ag asesu ac adborth, ar ran eu cymheiriaid. Fel arfer, gwneir hyn drwy Fyrddau Astudio a/neu fforymau Myfyrwyr-Staff, oni bai na fydd amseru yn caniatáu hyn.

Tiwtoriaid Personol

Mae Tiwtoriaid Personol yn gyfrifol am olrhain perfformiad asesu eu menteion dros amser, gan gynnig cymorth, cyngor a tiwtora i gefnogi'r myfyriwr i wella a llwyddo.

Disgwylir i Tiwtorial Personol ddarparu adborth wyneb yn wyneb i fyfyriwr ar eu perfformiad asesu, ynghyd â helpu myfyrwyr i ddeall a defnyddio eu hadborth yn well.

Cydlynwyr Modiwlau

Mae Cydlynwyr Modiwlau yn gyfrifol am ddatblygu ac amserlenni asesiadau ar gyfer eu modiwlau ac am ymgysylltu â Chyfarwyddwyr Rhaglenni i sicrhau bod y patrwm asesu'n effeithiol ar gyfer y Rhaglen yn ei chyfanrwydd, ac am sicrhau bod yr asesiadau hynny'n briodol ar gyfer mesur cynnydd myfyrwyr wrth gyflawni'r deilliannau dysgu gosod. Felly, mae pennu deilliannau dysgu modiwl yn elfen allweddol o gynllunio modiwl. Rhaid i Gydlynwyr Modiwl gydbwyso gofynion y polisi hwn o ran asesu cynhwysol ac amrywiol â'r adnoddau sydd ar gael iddynt.

Mae Cydlynwyr Modiwlau yn gyfrifol am sicrhau bod digon o amser yn cael ei ddyrannu i sicrhau cyfieithiadau o asesiadau a meini prawf marcio drwy Uned Gyfieithu'r Brifysgol cyn i asesiadau'r modiwl gael eu rhyddhau i fyfyrwyr. Mae Cydlynwyr Modiwlau hefyd yn gyfrifol am sicrhau bod yr holl staff academaidd sy'n darparu modiwlau lle mae myfyrwyr yn gofyn am gael eu hasesu yn Gymraeg yn gwbl ymwybodol o'u dyletswyddau.

Mae Cydlynwyr Modiwlau hefyd yn gyfrifol am sicrhau bod myfyrwyr yn derbyn adborth addas ac effeithiol ar eu hasesiadau o fewn yr amserlen a ddiffinnir ac yn yr iaith briodol (Cymraeg neu Saesneg).

Rhaid i Gydlynwyr Modiwlau sicrhau eu bod yn gyfarwydd ag egwyddorion asesu cynhwysol a chefnogi myfyrwyr â nodweddion gwarchodedig, a mynd i'r sesiynau hyfforddiant perthnasol pan fydd angen.

Dylai Cydlynwyr Modiwlau weithio ar y cyd â chydweithwyr i wella a sicrhau cydraddoldeb rhwng darpariaeth Gymraeg a Saesneg.

Cyfarwyddwyr Rhaglen

Mae Cyfarwyddwyr Rhaglen yn gyfrifol am sicrhau bod asesu ar draws y rhaglen gyfan yn ddilys, yn gadarn, yn gyson, ac yn amrywiol. Rhaid iddynt sicrhau bod myfyrwyr yn cael profiad o asesiadau ffurfiannol priodol a pherthnasol i'w galluogi i ddatblygu. Hefyd, bydd Cyfarwyddwyr Rhaglen yn arwain y gwaith o amserlennu asesu ar draws y rhaglen er mwyn sicrhau bod y llwyth gwaith yn cael ei lledu'n gyfartal, ac osgoi cyfnodau trwm i fyfyrwyr o ran dyddiadau cyflwyno gwaith. Bydd Cyfarwyddwyr Rhaglen yn sicrhau bod ystyriaeth a chamau gweithredu priodol yn cael eu cymryd i gefnogi myfyrwyr sy'n astudio drwy gyfrwng y Gymraeg o fewn eu rhaglenni.

Arweinwyr Academi Cynhwysiant

Bydd Arweinwyr Academi Cynhwysiant y Gyfadran/Ysgol, mewn cydweithrediad ag Arweinwyr Addysg Ysgolion a Deoniaid Cysylltiol, Addysg, yn darparu cymorth ac arweiniad i wella cynhwysiant a hygyrchedd asesu, ac yn gweithio gyda Chydlynwyr Modiwlau a Chyfarwyddwyr Rhaglen i sicrhau bod asesu yn gynhwysol.

Arweinwyr y Gymraeg Cyfadrannau ac Ysgolion

Bydd Arweinwyr y Gymraeg ym mhob Cyfadran ac Ysgol yn gweithio'n agos gyda Deoniaid Cysylltiol Addysg ac Arweinwyr Addysg yr Ysgol i lywio a datblygu darpariaeth academaidd ar draws pynciau drwy gyfrwng y Gymraeg. Byddant yn gweithio ar y cyd â chydweithwyr ar lefel Cyfadran ac Ysgol i greu amgylchedd sy'n cefnogi myfyrwyr sy'n astudio drwy gyfrwng y Gymraeg a staff sy'n darparu'r ddarpariaeth honno.

Byrddau Astudio

Dylai Byrddau Astudio adolygu'r dulliau asesu bob blwyddyn i sicrhau ei fod yn ddigon cynhwysol, amrywiol, a chytbwys ar gyfer y myfyrwyr. Dylai Byrddau Astudio adolygu a chymeradwyo dulliau asesu newydd arfaethedig, a sicrhau bod myfyrwyr yn derbyn digon o asesu ffurfiannol ar gyfer y dulliau newydd hyn. Yn ogystal, bydd Byrddau Astudio yn goruchwylio cydraddoldeb dysgu, addysgu ac asesu o ran darpariaeth Gymraeg a Saesneg. Yn ogystal, bydd Byrddau Astudio yn gyfrifol am fonitro gweithrediad Polisi ac amseroedd rhoi adborth, gan adrodd am y rhain wrth Arweinydd Addysg yr Ysgol.

Cydlynwyr Anabledd Academaidd

Mae Cydlynwyr Anableddau Academaidd Cyfadrannau/Ysgolion yn gyfrifol am ddarparu cyngor, arweiniad a chymorth i staff a myfyrwyr yn eu Cyfadran/Ysgol ar agweddau cynhwysol/amgen/addasedig asesu, gan weithio gyda'r Gwasanaethau Cymorth i Fyfyrwyr i sicrhau bod myfyrwyr yn derbyn y cymorth y maent yn gymwys i’w dderbyn.

Swyddogion Arholiadau/Asesu

Mae Swyddogion Arholiadau/Asesu yn gyfrifol am oruchwylio gwaith rheoli darpariaeth arholiadau ac asesu ar gyfer y rhaglenni yn eu cylch gwaith yn Gymraeg a Saesneg, ac am gydlynu â Swyddfa Arholiadau Prifysgol Abertawe i sicrhau bod prosesau arholiadau'n deg, yn gadarn ac yn dryloyw. Gan gynorthwyo Cyfarwyddwyr Rhaglenni, maent yn gyfrifol hefyd am sicrhau bod addasiadau rhesymol neu ddulliau asesu amgen ar gyfer myfyrwyr ag anabledd yn cael eu trefnu, ac am gasglu ceisiadau, monitro a goruchwylio'r modd y cyflwynir asesiadau ar gyfer myfyrwyr drwy gyfrwng y Gymraeg.

Arweinydd Uniondeb Academaidd

Yr Arweinydd Uniondeb Academaidd sy'n gyfrifol am oruchwylio uniondeb arholiadau'r Brifysgol, gan sefydlu a chyflwyno achosion prima facie o gamymddygiad academaidd, ar lefel y Brifysgol, gan sicrhau cydymffurfiaeth â'r rheoliadau a gweithdrefnau perthnasol a'r strategaethau gwerthuso sy'n ymwneud ag atal, datgelu a phrosesu camymddygiad academaidd.

Swyddogion Uniondeb Academaidd

Mae Swyddogion Uniondeb Academaidd yn gyfrifol am ystyried holl achosion y Gyfadran a gwneud penderfyniadau arnynt, gan gynnwys cyngor i gydweithwyr ar reoliadau, gweithdrefnau a chylchredeg gwybodaeth am gamymddygiad academaidd i staff a myfyrwyr.

Pwyllgor Addysg Cyfadran a Fforwm Addysg Cyfadrannau/Ysgolion

Mae Pwyllgor Addysg Cyfadran a Fforymau Addysg Ysgolion yn gyfrifol am roi pob agwedd ar y Polisi Asesu ac Adborth ar waith a'u monitro ar draws eu Cyfadran/Ysgol, ac am sicrhau y caiff asesu ei wella mewn ffordd barhaus mewn partneriaeth â myfyrwyr. Bydd Cadeirydd y Gyfadran/Pwyllgor Addysg yn adrodd wrth Bwyllgor Addysg y Brifysgol o bryd i'w gilydd ar effeithiolrwydd rhoi'r polisi ar waith a'i wella.

Deon Gweithredol y Gyfadran

Yn y pen draw, y Deon Gweithredol fydd yn gyfrifol am sicrhau y caiff Polisi Asesu ac Adborth y Brifysgol ei roi ar waith yn effeithiol yn y Gyfadran.

Bwrdd Dyfarnu a Dilyniant y Brifysgol

Mae'r Bwrdd Dyfarnu a Dilyniant yn goruchwylio trylwyredd a dilysrwydd asesu a marcio er mwyn sicrhau bod safon y dyfarniadau'n cael ei chynnal.

Pwyllgor Addysg y Brifysgol

Mae Pwyllgor Addysg y Brifysgol yn goruchwylio sicrhau a gwella ansawdd, ac yn monitro cynnydd o ran sicrhau ansawdd a safonau asesu ac adborth yn rheolaidd ar draws darpariaeth cyfrwng Cymraeg a Saesneg, gan ymyrryd os yw safon ddisgwyliedig profiad myfyrwyr yn y fantol.

Pwyllgor Dilysu Rhaglenni'r Brifysgol (PAC)

Mae'r Pwyllgor Dilysu Rhaglenni yn gyfrifol am adolygu cynigion am raglenni newydd, ac am ddilysu rhai rhaglenni drwy Bwyllgor lle y bo'n briodol. Fel rhan o'r broses adolygu, dylai'r Pwyllgor roi sylw penodol i elfennau asesu ac adborth cynigion rhaglenni er mwyn sicrhau eu bod yn bodloni'r gofynion a amlinellir yn y polisi hwn.

Swyddfa Arholiadau'r Brifysgol

Mae'r Swyddfa Arholiadau (yn y Gwasanaethau Addysg) yn gyfrifol am amserlenni arholiadau ar gyfer y rhan fwyaf o raglenni (ac eithrio rhai profion dosbarth ac asesiadau yn y Gyfadran Meddygaeth, Gwyddorau Bywyd ac Iechyd, a darpariaeth wedi'i rhyddfreinio), ac am sicrhau y darperir ar gyfer myfyrwyr â gofynion penodol. Bydd y Swyddfa Arholiadau hefyd yn rheoli diogelwch ac uniondeb yr holl Arholiadau sy'n rhan o'i chylch gorchwyl.

Gwasanaethau Cymorth i Fyfyrwyr: Gwasanaeth Lles ac Anabledd

Bydd y Gwasanaeth Lles ac Anabledd yn darparu gwybodaeth i'r Cyfadrannau/Ysgolion am anghenion cymorth myfyrwyr ag anableddau, myfyrwyr â phroblemau iechyd, a myfyrwyr â phroblemau iechyd meddwl cyn gynted â phosib ar ôl cofrestru a/neu ar ôl datgelu'r anabledd/problem i'r Brifysgol. Nid yw'r Gwasanaeth yn gyfrifol am ddweud wrth staff sut y dylent asesu myfyrwyr. Pan na fydd yn bosib dod i gytundeb rhwng Cyfadrannau/Ysgolion, Gwasanaethau Cymorth i Fyfyrwyr a'r myfyriwr/myfyrwyr dan sylw, ceir proses uwchgyfeirio a datrys anghydfod i sicrhau y caiff myfyrwyr eu cefnogi'n briodol.

Academi Hywel Teifi

Mae Academi Hywel Teifi yn cefnogi myfyrwyr Cymraeg eu hiaith a'r rhai hynny sy'n dysgu Cymraeg i wneud eu hastudiaethau drwy gyfrwng y Gymraeg. Mae hefyd yn cefnogi staff sy'n addysgu drwy gyfrwng y Gymraeg neu sy'n cefnogi myfyrwyr sy'n dymuno cwblhau eu hastudiaethau drwy gyfrwng y Gymraeg, gan gynnwys asesiadau. Gall yr Academi roi cyngor i Gyfadrannau ar nodi Ymgynghorwyr Asesu allanol priodol fel yr amlinellir yn y canllawiau 'Asesu drwy gyfrwng y Gymraeg'.

Mae Cyfadrannau/Ysgolion yn adolygu'r holl ddarpariaeth asesu yn unol â'r Polisi Asesu ac Adborth, gan dalu sylw penodol i gyfranogiad myfyrwyr, llwythau asesu ac ymarferion asesu a'r dulliau i sicrhau eu bod yn gynhwysol. Caiff cydymffurfiaeth â'r Polisi ei fonitro drwy'r dulliau canlynol:

• Adolygiad o Raglenni Blynyddol a'r broses Adolygu Modiwlau;
• Gwerthuso Modiwlau Myfyrwyr;
• Canlyniadau Arolwg Profiad Myfyrwyr a Chynlluniau Camau Gweithredu;
• Adroddiadau Rheolaidd am brydlondeb adborth .
   
  Cadeirydd y Gyfadran/Ysgol a'r Pwyllgor Addysg a fydd yn adrodd wrth Bwyllgor Addysg y Brifysgol yn achlysurol ar weithrediad y polisi a phrydlondeb adborth. 
   
  Adolygiad o'r Polisi
  
  Caiff y polisi hwn ei adolygu'n flynyddol gan Bwyllgor Addysg y Brifysgol i sicrhau ei fod yn ymateb i ofynion allanol a mewnol a newidiadau o ran ymarferion effeithiol ym maes asesu mewn sefydliadau Addysg Uwch.  Cynhelir adolygiad mwy sylweddol bob tair blynedd.