Canllawiau ar Ymgeisyddiaeth Graddau Ymchwil

Mae myfyrwyr ymchwil yn astudio dros y flwyddyn galendr lawn. Mae myfyrwyr amser llawn yn gymwys am hyd at 31 niwrnod o wyliau blynyddol y flwyddyn, ynghyd â gwyliau statudol. Ar gyfer myfyrwyr rhan-amser, bydd hwn ar sail pro rata. Gweler Hawl Myfyrwyr Ymchwil Ôl-raddedig i Wyliau Blynyddol am ragor o fanylion.

1.1

Bydd myfyrwyr amser llawn yn treulio isafswm o 35 awr yr wythnos ar ymchwil ac astudio yn ystod y cyfnod astudio dan oruchwyliaeth ar gyfer y radd. Fel arfer, mae’n rhaid i bob myfyriwr amser llawn (Dull A a Dull B) breswylio yn y Deyrnas Unedig yn ystod y cyfnod astudio dan oruchwyliaeth ar gyfer y radd, a dylent fyw o fewn pellter teithio hawdd i’r Brifysgol. Dylai myfyrwyr amser llawn y mae'r Brifysgol yn gweithredu fel noddwr fisa myfyriwr drostynt breswylio yn y Deyrnas Unedig gan fyw o fewn cyrraedd hawdd i’r Brifysgol trwy gydol cyfnod yr ymgeisyddiaeth.

1.2

Disgwylir i fyfyrwyr rhan-amser dreulio tua 15 awr yr wythnos ar ymchwil ac astudio yn ystod y cyfnod astudio dan oruchwyliaeth ar gyfer y radd. Nid oes angen i fyfyrwyr rhan-amser breswylio yn y Deyrnas Unedig yn ystod y cyfnod astudio dan oruchwyliaeth ar gyfer y radd; fodd bynnag, dylent sicrhau cyswllt rheolaidd gyda'r goruchwyliwr, ac, man lleiaf, un cyfarfod wyneb yn wyneb yn ystod bob blwyddyn academaidd.

2.1

Fel arfer, yr uchafswm cyfnod cyflwyno ar gyfer cynlluniau gradd, beth bynnag y dull astudio, fydd blwyddyn yn fwy nag isafswm cyfnod yr ymgeisyddiaeth. Efallai bydd eithriadau (a gymeradwyir gan y Bwrdd Rheoliadau ac Achosion Academaidd ee DBA).

2.2

Mae i bob rhaglen gradd ymchwil gyfnod arferol o astudio dan oruchwyliaeth - sef y cyfnod ymgeisyddiaeth - a disgwylir i bob myfyriwr gyflwyno ei draethawd ymchwil ar ddiwedd y cyfnod hwnnw (y dyddiad gorffen disgwyliedig). Y mae hefyd dyddiad dod i ben. Ar ôl y dyddiad hwnnw, tybir bod y myfyriwr yn rhy hwyr, ac ni chaniateir iddo gyflwyno traethawd ymchwil.

Yn ystod y cyfnod ymgeisyddiaeth, bydd y myfyriwr ymchwil yn ymgymryd â gwaith ymchwil dan oruchwyliaeth lawn. Bydd y myfyriwr yn derbyn cymorth, cyngor a chyfarwyddyd rheolaidd gan ei oruchwylwyr er mwyn sicrhau y gellir cwblhau’r ymchwil, gan gynnwys paratoi’r traethawd ymchwil, erbyn diwedd y cyfnod ymgeisyddiaeth (y dyddiad gorffen disgwyliedig). Bydd y goruchwylwyr yn cynorthwyo’r myfyriwr i gynhyrchu cynllun gwaith manwl ac amserlen ar gyfer yr ymchwil a byddant yn monitro cynnydd y myfyriwr mewn perthynas â’r cynllun hwn. Yn ystod y cyfnod ymgeisyddiaeth, bydd y myfyriwr yn atebol am ffioedd ar y lefel briodol yn seiliedig ar breswyliad, dull yr ymgeisyddiaeth a’r maes pwnc.

Mae’n ofynnol i’r Gyfadran/Ysgol gadarnhau ymgeisyddiaeth myfyriwr i'r Grŵp Gweithredol o fewn tri mis i gofrestru’r myfyriwr yn y lle cyntaf. Drwy wneud hynny, mae’r Gyfadran/Ysgol yn cadarnhau bod y myfyriwr wedi bodloni’r gofynion gweinyddol a nodwyd, ei fod yn barod yn academaidd i ymgymryd â’r prosiect ymchwil a gytunwyd, y tybir ei fod o safon academaidd ddigonol i wneud hynny, a bod ganddo'r gallu i'w wneud (gweler y Canllaw i Fonitro Cynnydd Myfyrwyr Ymchwil am ragor o fanylion).

4.1

Cyflwynir adroddiad am bob ymgeisyddiaeth nas cadarnhawyd dri mis ar ôl cofrestru. Os nad yw’r Gyfadran/Ysgol yn gallu cadarnhau ymgeisyddiaeth ar gyfer myfyriwr ar ôl tri mis, bydd y Bwrdd Academaidd ar gyfer Ymchwil Ôl-raddedig yn mynnu bod y myfyriwr naill ai’n gohirio neu’n tynnu yn ôl o’r rhaglen (gweler y Canllawiau ar gyfer Myfyrwyr Ymchwil ar Ohiriadau ac Estyniadau a’r Canllawiau ar gyfer Myfyrwyr Ymchwil ar Drosglwyddo a Thynnu yn ôl). Fodd bynnag, mewn amgylchiadau eithriadol iawn, caiff myfyriwr gyflwyno cais i ymestyn ei Gadarnhad Ymgeisyddiaeth am dri mis i'r Grŵp Gweithredol ei ystyried.

4.2

Ar ôl cadarnhau ymgeisyddiaeth, ni chaniateir i fyfyriwr newid testun ei ymchwil yn sylweddol, gan y byddai newid o’r fath yn annilysu cadarnhau'r ymgeisyddiaeth. Os yw myfyriwr yn dymuno newid ei destun ymchwil yn sylweddol, dylid mynnu bod y myfyriwr yn tynnu yn ôl o’r radd bresennol ac yn ailymgeisio ar gyfer y testun ymchwil newydd.

4.3

Os gwneir unrhyw newidiadau i gynigion ymchwil myfyrwyr ôl-raddedig, mae’n ofynnol i’r Brifysgol hysbysu Fisâu a Mewnfudo y DU o fewn 28 niwrnod am newidiadau i gynigion ymchwil myfyrwyr ôl-raddedig y mae angen tystysgrif Cynllun Cymeradwyo Technoleg Academaidd (ATAS) arnynt. Gellir cael gwybodaeth am y cyrsiau y mae angen tystysgrif ATAS arnynt yma: https://www.gov.uk/guidance/find-out-if-you-require-an-atas-certificate#find-out-how-to-apply

Mae hyn yn berthnasol i fyfyrwyr nad ydynt o’r AAE yn unig. Cyfrifoldeb goruchwylwyr Prifysgol Abertawe yw hysbysu Tîm Cydymffurfio Myfyrwyr Rhyngwladol y Brifysgol (Gwasanaethau Addysg) am newidiadau i gynnig ymchwil gwreiddiol y myfyriwr neu’r defnydd o dechneg ymchwil newydd. Am ragor o wybodaeth, darllenwch Bolisi a Gweithdrefn Newid Pwnc Ymchwil ac ATAS.

Caiff cynnydd bob myfyriwr ymchwil ei fonitro'n gyson trwy gydol ei gyfnod astudio. Mae’n rhaid i Gyfadrannau/Ysgolion gyflwyno adroddiad cynnydd ffurfiol i'r Bwrdd Cynnydd Ymchwil Ôl-raddedig ar gyfer pob myfyriwr gradd ymchwil, ynghyd ag argymhelliad ynglŷn â chynnydd y myfyriwr er mwyn i'r myfyriwr barhau ar ei raglen (gweler y Canllawiau ar Fonitro Cynnydd Myfyrwyr Ymchwil am ragor o fanylion).

5.1

Ar ddiwedd y cyfnod ymgeisyddiaeth (y dyddiad gorffen disgwyliedig), disgwylir i’r myfyriwr fod wedi cwblhau ei ymchwil a bod wrthi'n paratoi i gyflwyno’r traethawd ymchwil. Mae’n rhaid i’r Gyfadran/Ysgol gyflwyno asesiad ffurfiol ar gynnydd y myfyriwr i Fwrdd Cynnydd Ymchwil Ôl-raddedig gan awgrymu pryd bydd y myfyriwr yn barod i gyflwyno traethawd ymchwil (gweler yr Canllawiau ar Fonitro Cynnydd Myfyrwyr Ymchwil am ragor o fanylion).

5.2

Fel arfer, disgwylir i fyfyriwr ymchwil gyflwyno ei draethawd ymchwil erbyn diwedd cyfnod/dyddiad hwyaf yr ymgeisyddiaeth, ac ar ôl hyn ystyrir bod y myfyriwr wedi rhedeg allan o amser a chaiff ei gofnod ei gau. Mewn achosion eithriadol, gall y myfyriwr ymchwil gyflwyno cais am estyniad i gyfnod/dyddiad hwyaf yr ymgeisyddiaeth (gweler y Canllaw ar Ohiriadau ac Estyniadau ar gyfer Myfyrwyr Ymchwil am ragor o wybodaeth).

Os yw myfyriwr ymchwil yn dymuno cyflwyno ei draethawd ymchwil mwy na chwe mis cyn y Dyddiad Gorffen Disgwyliedig (cyfnod ymgeisyddiaeth byrraf), dylid ceisio caniatâd y Bwrdd Dilyniant a Dyfarniadau. Dylai’r myfyriwr ymchwil a’r goruchwyliwr/goruchwylwyr ddarparu datganiad ysgrifenedig manwl, wedi’i gydlofnodi gan y Deon Gweithredol neu enwebai, yn amlinellu’r rhesymau dros gyflwyno’n gynnar ac yn cadarnhau bod y myfyriwr yn barod i gyflwyno mewn gwirionedd. Os yw myfyriwr ymchwil yn dymuno cyflwyno ei draethawd ymchwil llai na chwe mis cyn y Dyddiad Gorffen Disgwyliedig (cyfnod ymgeisyddiaeth byrraf), dylid fel arfer anfon datganiad byr gan y myfyriwr ymchwil a'r goruchwyliwr/goruchwylwyr, (wedi ei gymeradwyo fel arfer gan Arweinydd Academaidd Ymchwil Ôl-raddedig y Gyfadran neu rywun mewn rôl gyfwerth), i’r Bwrdd Dilyniant a Dyfarniadau. 

6.1

Lle caniateir i fyfyriwr gyflwyno traethawd ymchwil cyn y dyddiad gorffen disgwyliedig, dylid nodi y bydd y myfyriwr yn parhau i fod yn atebol am ffioedd ar gyfer y cyfan o’r cyfnod ymgeisyddiaeth.

6.2

Os nad yw Gyfadran/Ysgol neu'r Bwrdd Dilyniant a Dyfarnu yn cefnogi cais ymgeisydd am gyflwyno traethawd hir yn gynnar, neu cyn y ffenestr chwe mis a ganiateir o fewn y cyfnod ymgeisyddiaeth (yn unol â'r rheoliadau a'r canllawiau), gellir cyflwyno cais i'r Is-ganghellor am gyflwyno'n gynnar. Bydd yr Is-ganghellor neu ei enwebai (a fydd yn aelod o'r Uwch Dîm Rheoli ac sydd heb ddiddordeb materol yn yr achos) yn gallu awdurdodi cyflwyniad cynnar cyn belled â bod datganiad wedi'i eirio'n briodol wedi'i lofnodi gan y goruchwyliwr a'r myfyriwr, a hefyd wedi'i gydlofnodi gan aelod awdurdodedig yr Uwch Dîm Rheoli.

6.3

Bydd y datganiad hwn yn cynnwys hepgor unrhyw hawl ar ran yr ymgeisydd i ddilyn cwyn neu wneud yn iawn am unrhyw ddiffygion o ran cymorth ymchwil neu oruchwylio, neu unrhyw fater arall yn ymwneud â chofnodi a rheoli'r ymgeisyddiaeth sy'n codi oherwydd cyflwyno'n gynnar.

6.4

Ym mhob achos arall, bydd cyflwyno ac asesu'r traethawd ymchwil yn dilyn camau gweithredu priodol y Brifysgol, gan gynnwys er enghraifft, penodi arholwyr, ffurfio a threfnu'r bwrdd arholi, cynnal viva, a chanlyniadau posib yr arholiad.