Gofyn am gael ei Asesu ar gyfer Cyllid fel Myfyriwr Annibynnol oherwydd Ymddieithriad o'i Deulu

Pedwar myfyriwr yn eistedd ar draeth cerrig mân, yn siarad â'i gilydd.

Gofyn am Asesiad fel Myfyriwr sydd wedi'i ddieithrio o'i deulu

Ystyrir bod myfyrwyr wedi'u dieithrio o'u teuluoedd os yw'r berthynas â'u rhieni wedi methu ac nid oes modd rhagweld cyfle i gymodi. Os ydych wedi ymddieithrio o'ch rhieni, gallwch ofyn i'ch darparwr cyllid eich asesu fel myfyriwr annibynnol oherwydd eich ymddieithriad; fodd bynnag, nid oes sicrwydd y bydd eich cais yn cael ei dderbyn.

Er mwyn cyflwyno cais i gael eich asesu fel myfyriwr annibynnol oherwydd eich ymddieithriad, bydd angen i chi roi tystiolaeth addas i'ch darparwr cyllid ar ffurf llythyr(au) neu adroddiad(au) gan weithwyr proffesiynol a phobl uchel eu parch yn y gymuned e.e. yr heddlu, meddygon, gweithwyr cymdeithasol etc sy'n dangos eich ymddieithriad parhaus. Bydd un llythyr neu adroddiad ansawdd sylfaenol yn dderbyniol, ond mae croeso i chi gyflwyno pecyn o dystiolaeth, gan gynnwys tystiolaeth eilradd os dymunwch.

Gan ddibynnu ar yr amgylchiadau sy'n gysylltiedig â'ch ymddieithriad a'r dystiolaeth a ddarparwyd, os derbynnir eich cais, gallech gael eich asesu fel myfyriwr annibynnol oherwydd eich ymddieithriad ar gyfer y flwyddyn academaidd neu hyd eich cwrs.

Ni allwch ofyn i gael eich asesu fel myfyriwr annibynnol yn sgîl ymddieithrio o'ch teulu oherwydd:

Nad yw eich rhieni yn eich cefnogi'n ariannol
Nid ydych yn cyd-dynnu â'ch rhieni ond rydych yn dal i fod mewn cysylltiad
Nid ydych chi'n byw gyda'ch rhieni

Os ydych yn cael eich asesu fel myfyriwr annibynnol oherwydd eich ymddieithriad, byddwch yn gallu cael mynediad at gyllid myfyrwyr ar y gyfradd annibynnol ac ni fyddwch yn cael prawf modd yn seiliedig ar incwm aelwydydd rhieni.

Tystiolaeth Dderbyniol

Bydd eich darparwr cyllid yn chwilio am dystiolaeth sylfaenol ar ffurf llythyr neu adroddiad gan berson annibynnol sy’n uchel ei barch yn y gymuned. Mae person sy’n uchel ei barch yn y gymuned, er enghraifft:

Athro (ysgol, neu ddarlithwyr coleg neu brifysgol)
Meddyg neu Nyrs
Cwnselydd
Yr Heddlu
Cyfreithiwr
Gweithiwr Cymdeithasol
Gweinidog yr Efengyl

Dylai'r person hwn fod yn ymwybodol ohonoch chi a'ch amgylchiadau eisoes a gallu cadarnhau nad oes gennych gysylltiad â'ch rhieni. Rhaid i'r person hwn beidio â bod yn ffrind neu'n gysylltiedig â chi, hyd yn oed os yw'n cael ei ystyried yn berson sy’n uchel ei barch yn y gymuned.

Dylai'r llythyr gynnwys gwybodaeth sy'n cadarnhau ei berthynas â chi a faint o amser y mae wedi'ch adnabod. Dylai'r llythyr hefyd gynnwys gwybodaeth am y rheswm neu resymau dros eich ymddieithriad o'ch teulu, pryd digwyddodd hyn, os yw cymodi'n debygol. Dylid darparu ei fanylion cyswllt hefyd er mwyn i'ch darparwr cyllid gysylltu ag ef, os bydd angen. Mae'n bwysig sicrhau bod unrhyw lythyrau a/neu adroddiadau yn cael eu darparu ar bapur pennawd, wedi'u llofnodi a'u dyddio.

Er na all eich prif dystiolaeth fod yn llythyr neu'n adroddiad gan aelod o'r teulu neu ffrind, mae eich darparwr cyllid yn debygol o dderbyn tystiolaeth eilradd ar ffurf llythyrau neu adroddiadau gan aelod o'r teulu neu ffrind.

Os mai Cyllid Myfyrwyr yw eich darparwr cyllid, bydd angen i chi hefyd lenwi a chyflwyno ffurflen 'Cadarnhau Ymddieithrio'. Dylai'r ffurflen hon fod ar gael ar eich cyfrif ar-lein. Os nad yw'r ffurflen ar gael ar eich cyfrif ar-lein, cysylltwch â Chyllid Myfyrwyr yn uniongyrchol i gael copi.

Er y gallwch benderfynu faint o wybodaeth rydych yn ei datgelu am eich amgylchiadau, po fwyaf o wybodaeth byddwch yn ei darparu, hawdd fydd hi i'ch darparwr cyllid asesu eich cais.

Os nad ydych wedi dweud wrth weithiwr proffesiynol am eich amgylchiadau, neu os ydych chi wedi ymddieithrio o'ch teulu'n ddiweddar iawn a'ch bod yn cael trafferth wrth gasglu tystiolaeth briodol, peidiwch â phoeni. Gallwch gyflwyno llythyr ysgrifenedig sy’n esbonio eich amgylchiadau a'ch anawsterau wrth gael tystiolaeth briodol – mae'n debygol y bydd eich darparwr cyllid mewn cysylltiad â chi wedi hyn i roi gwybod am dystiolaeth ychwanegol y gallech ei darparu er mwyn dangos tystiolaeth o'ch amgylchiadau. Mewn rhai achosion, os na allwch ddarparu'r dystiolaeth ychwanegol, gall eich darparwr cyllid gynnal cyfweliad gyda chi dros y ffôn.

Mae'n bwysig nad ydych yn ceisio cael na chyflwyno unrhyw ddogfennau neu ddatganiadau a fydd yn peryglu eich diogelwch personol, eich iechyd neu'ch lles.

Os oes gennych gwestiynau am y broses o gael eich asesu â statws annibynnol o ganlyniad i'ch dieithriad, fe'ch anogir i siarad â'ch darparwr cyllid yn y lle cyntaf.

Os gwrthodir eich cais i gael ei asesu fel myfyriwr annibynnol oherwydd eich ymddieithriad o'ch teulu a hoffech apelio yn erbyn y penderfyniad hwn, neu os ydych yn cael trafferth wrth gael y dystiolaeth ofynnol, bydd Arian@BywydCampws yn gallu darparu cyngor ac arweiniad ychwanegol. Ceir manylion cyswllt Arian@BywydCampws yma.

Hefyd, mae gan yr elusen Stand Alone Ganllaw Cyllid Myfyrwyr sy'n cynnwys gwybodaeth ychwanegol am gyflwyno cais i gael eich asesu fel myfyriwr annibynnol oherwydd eich bod wedi ymddieithrio o'ch teulu, a gellir gweld hwn yma.