Graddau Meistr: Tynnu'n Ôl, Gohirio, Ail-wneud neu Drosglwyddo

Os ydych yn tynnu'n ôl o'ch cwrs Meistr ac rydych wedi derbyn Cyllid ar gyfer Astudio Ôl-raddedig gan Gyllid Myfyrwyr Cymru neu Student Finance England, ni fyddwch yn gymwys i dderbyn cyllid ar gyfer Cwrs Meistr Ôl-raddedig yn y dyfodol, hyd yn oed os nad ydych wedi derbyn yr uchafswm eto (gweler y tabl isod). Fodd bynnag, os ydych yn tynnu'n ôl o'r cwrs oherwydd Rhesymau Personol Anorchfygol, gallwch gyflwyno cais am gyllid dewisol ar gyfer y cwrs newydd, fel y nodir isod.

Os ydych yn penderfynu tynnu'n ôl o'ch cwrs, mae'n bosib y byddwch wedi derbyn gordaliad. Gweler isod am ragor o wybodaeth.

Rhesymau Personol Anorchfygol

Os teimlwch fod rhywbeth y tu hwnt i'ch rheolaeth wedi cael effaith niweidiol sylweddol ar eich perfformiad academaidd neu eich gallu i astudio a bu'n rhaid i chi dynnu'n ôl o'ch astudiaethau o ganlyniad, mae'n bosib y byddwch yn gymwys am gyllid dewisol ar sail Rhesymau Personol Anorchfygol.

Gall y rhain gynnwys materion sy'n ymwneud ag iechyd, anabledd, problemau teuluol neu brofedigaeth, ond nid yw'r rhestr hon yn gynhwysfawr. Os ydych yn meddwl bod hyn yn berthnasol i chi, ffoniwch ein swyddfa ar 01792 606699 neu e-bostiwch money.campuslife@abertawe.ac.uk  

Does dim sicrwydd y byddwch yn derbyn cyllid ychwanegol gan mai penderfyniad eich darparwr cyllid fydd hyn.

Gordaliadau

Gan ddibynnu ar y dyddiad olaf y buoch yn bresennol ar eich cwrs, bydd y cyllid rydych wedi'i dderbyn yn cael ei ail-gyfrifo ar sail pro rata. Os ydych wedi derbyn gordaliad, bydd angen i chi ad-dalu'r swm hwnnw i'r Cwmni Benthyciadau Myfyrwyr ar unwaith neu drwy lunio cynllun talu.

Os ydych yn gohirio'ch astudiaethau ac rydych wedi derbyn uchafswm eich Cyllid ar gyfer Astudio Ôl-raddedig, ni fydd gennych hawl i unrhyw daliadau gan Gyllid Myfyrwyr Cymru neu Student Finance England pan fyddwch yn ailgydio yn eich astudiaethau, hyd yn oed os ydych yn gohirio oherwydd Rhesymau Personol Anorchfygol, megis materion iechyd, anabledd, problemau teuluol neu brofedigaeth.

Os nad ydych wedi derbyn yr uchafswm o Gyllid Ôl-raddedig, efallai y byddwch yn gymwys i gael y swm sy'n weddill pan fyddwch yn dychwelyd i astudio yn dibynnu ar eich amgylchiadau. Rydym yn eich cynghori i siarad ag Arian@BywydCampws i drafod y goblygiadau ariannu cyn i chi weithredu eich ataliad.

Mae gohirio astudiaethau Ôl-raddedig yn gofyn i’r myfyriwr ddychwelyd y flwyddyn academaidd ddilynol. Os bydd angen i’ch astudiaethau gael eu gohirio ymhellach, bydd angen i chi dderbyn caniatâd. Gallai estyn eich cyfnod gohirio effeithio hefyd ar eich cyllid sy’n weddill (os yw’n berthnasol) ac efallai y bydd angen i chi apelio er mwyn cael mynediad at y cyllid hwn ar sail rhesymau personol cymhellol. Cysylltwch ag Arian@BywydCampws a’ch darparwr cyllid am ragor o wybodaeth. 

Os ydych yn ail-wneud rhan o'ch cwrs, neu os yw'ch cwrs yn cael ei estyn, ni fydd gennych hawl i daliadau pellach ar gyfer astudio ôl-raddedig oni bai nad ydych wedi derbyn uchafswm y cyllid sydd ar gael. Mae hyn yn berthnasol hyd yn oed os oes rhaid i chi ail-wneud rhan o'ch cwrs oherwydd Rhesymau Personol Anorchfygol, megis materion iechyd, anabledd, problemau teuluol neu brofedigaeth.

Os ydych yn trosglwyddo i gwrs arall, ac rydych eisoes wedi derbyn uchafswm y Cyllid ar gyfer Astudio Ôl-raddedig, ni fydd gennych hawl i daliadau pellach gan Gyllid Myfyrwyr Cymru neu Student Finance England, hyd yn oed os ydych yn trosglwyddo oherwydd Rhesymau Personol Anorchfygol, megis materion iechyd, anabledd, problemau teuluol neu brofedigaeth.

Cystwllt Arian@BywydCampws