Polisi Monitro Cyfranogiad Myfyrwyr a Addysgir

Mae'r Brifysgol hefyd yn cydnabod bod presenoldeb ac ymrwymiad i ddysgu ac addysgu yn elfennau allweddol wrth sicrhau cyfraddau llwyddiannus o gadw myfyrwyr, a chynnydd, cyflawniad a chyflogadwyedd myfyrwyr. Mae'r ymagwedd hon hefyd yn ein helpu i adnabod myfyrwyr a allai fod yn wynebu anawsterau ac y gallai fod angen cymorth penodol arnynt. Mae hefyd gan y Brifysgol ddyletswydd gyfreithiol i'r mwyafrif o fyfyrwyr i fonitro cyfranogiad mewn addysgu ac i weithredu pan fydd diffyg cyfranogiad. Mae'r ddyletswydd gyfreithiol hon yn deillio o'r gofyniad i hysbysu cwmnïau Benthyciadau Myfyrwyr y DU a noddwyr allanol ynghylch Ymgysylltu, yn ogystal â bodloni gofynion nawdd Fisâu a Mewnfudo y DU (UKVI) o ran monitro myfyrwyr rhyngwladol sy'n astudio yn y DU ar Fisa Llwybr Myfyriwr (Haen 4 gynt). Bydd y Brifysgol yn defnyddio amrywiaeth o ffynonellau data i gynrychioli cyfranogiad mewn astudiaethau at y dibenion hyn ac i sicrhau lles myfyrwyr.

Mae rhai rhaglenni yn cynnwys gofyniad i fonitro presenoldeb a bennir gan gorff proffesiynol; lle bo hyn yn fwy llym na'r un a bennir gan y Brifysgol, gofyniad y corff proffesiynol gaiff flaenoriaeth.

2.1

Bydd y polisi monitro cyfranogiad hwn yn berthnasol i'r holl fyfyrwyr a addysgir sydd wedi cofrestru ar raglen yn y Brifysgol boed yn Abertawe. Bydd myfyrwyr a addysgir sydd wedi cofrestru ar raglenni a ddarparwyd drwy bartneriaeth gydweithredol, a fydd wedi'u lleoli'n gyfan gwbl ar y safle partner, yn ddarostyngedig i'r polisïau monitro cyfranogiad a bennwyd gan y sefydliad partner. 

2.2

Disgwylir y bydd pob myfyriwr Abertawe i ymgysylltu â sesiynau dysgu wyneb yn wyneb o ddechrau'r flwyddyn academaidd. Efallai y bydd angen i fyfyrwyr nad ydynt yn gallu ar gyfer ymgysylltu wyneb yn wyneb ystyried gohirio eu hastudiaethau.

2.3

Mae'r Brifysgol yn disgwyl i fyfyrwyr gymryd rhan yn yr holl sesiynau dysgu sy'n gysylltiedig â phob modiwl neu raglen ymchwil maent wedi dewis eu dilyn, boed yn sesiynau wyneb yn wyneb neu rithwir. Mae sesiwn ddysgu gynlluniedig yn cynnwys darlithoedd, seminarau, grwpiau astudio,dosbarthiadau ymarferol, dosbarthiadau enghreifftiol, tiwtorialau, arholiadau, cyfarfodydd goruchwylio, lleoliadau diwydiannol, teithiau maes neu weithgareddau eraill y mae disgwyl i fyfyrwyr eu cwblhau, ond nid yw'r rhestr hon yn gyflawn. 

2.4

Bydd cyfranogiad yn cael ei fonitro gan Gyfadran/Ysgol y myfyriwr ar sail dreigl bob pythefnos o'r wythnos addysgu gyntaf ar gyfer pob cyfadran gan eithrio'r cyrsiau sydd wedi'u hamlinellu yn y polisi hwn a allai gael eu monitro yn unol â chyfnodau amser gwahanol.

2.5

I fyfyrwyr Llwybr Myfyriwr (Haen 4 gynt), caiff cyfranogiad ei fonitro ar sail bob pythefnos yn olynol gan y Tîm Monitro Presenoldeb yn y Gwasanaethau Cydymffurfiaeth Myfyrwyr fel a amlinellwyd yn y Polisi Monitro Cyfranogiad ar gyfer Myfyrwyr Llwybr Myfyriwr (Haen 4 gynt).

2.6

Mae monitro presenoldeb yn gefnogol a'i fwriad yw ceisio sicrhau bod lles myfyriwr yn flaenoriaeth. Golyga hyn y gallai Cyfadrannau/Ysgolion gysylltu â myfyrwyr am eu lefelau o gyfranogiad a chynnig help a/neu anogaeth iddynt i ymrwymo'n well hyd yn oed os byddant wedi bodloni trothwy ffurfiol y Brifysgol.

2.7

Bydd y Brifysgol yn defnyddio ystod eang o ffynonellau data i fonitro cyfranogiad myfyrwyr yn eu hastudiaethau. Seilir hyn yn bennaf ar bresenoldeb myfyrwyr yn y sesiynau dysgu wyneb yn wyneb a drefnwyd a'u defnydd o ddeunyddiau cwrs yn Canvas.  Mae'n bosib yr ystyrir data ychwanegol wrth ystyried Adolygiadau Gweinyddol ar gyfer diffyg cyfranogiad megis cyflwyno asesiadau a gwaith cwrs, data a gedwir gan y llyfrgell a chyfranogiad mewn cyfarfodydd tiwtor personol. Gweler pwynt 12 am ragor o wybodaeth am y broses Adolygiad Gweinyddol.    

2.8

I fyfyrwyr sy'n mynychu sesiynau wyneb yn wyneb, caiff presenoldeb ei fonitro gyda cherdyn sweipio. Bydd angen i fyfyrwyr dapio eu cerdyn ar y darllenwyr sydd wedi'u lleoli yn eu hystafell addysgu wrth gyrraedd, a chaiff y cerdyn ei gydnabod (bydd y darllenydd yn dangos enw'r myfyriwr).

2.9

 Mae'n ofynnol i fyfyriwr sganio gan ddefnyddio ei gerdyn ei hun yn unig mewn sesiynau dysgu wyneb yn wyneb. Er bod monitro cyfranogiad yn gefnogol yn hytrach na chosbol, mae'r Brifysgol yn cydnabod bod perygl y bydd peth gamfanteisio ar y system, gan gynnwys myfyrwyr sy'n sganio presenoldeb mewn sesiynau dysgu ar ran myfyrwyr eraill neu'n sganio gan beidio â mynychu'r sesiwn ddysgu a amserlennwyd. Bydd y Gyfadran/Ysgol neu Gydymffurfiaeth Myfyrwyr yn achos myfyrwyr Llwybr Myfyrwyr yn ymchwilio i unrhyw amheuaeth o gam-drin y system a gall myfyrwyr yr amheuir eu bod yn camddefnyddio'r system fod yn ddarostyngedig i'r broses yr amlinellwyd yn adran 11 isod neu bwynt 6 y Polisi Monitro Presenoldeb ar gyfer myfyrwyr Llwybr Myfyrwyr. Bydd y tîm Cydymffurfiaeth Myfyrwyr yn cynnal gwiriadau yn ystod sesiynau dysgu wyneb yn wyneb yn ystod y flwyddyn academaidd er mwyn atgoffa myfyrwyr i sweipio eu cerdyn wrth fynd i mewn i fannau addysgu. Bydd hyn hefyd yn sicrhau bod darllenwyr cardiau mewn lleoliadau ar draws y campws yn gweithio'n dda.

2.10

Byddwn dim ond yn ystyried cyfranogiad pan fydd modd i'w fonitro. Er enghraifft, os nad oes darllenydd cerdyn yn yr ystafell neu os nad yw'n gweithio, ni fydd hyn yn effeithio ar gofnod cyffredinol y myfyriwr. Yn yr un modd, os caiff sesiwn ddysgu a amserlennwyd ei chanslo drwy ei thynnu o'r amserlen, ni fydd y data cyfranogiad hwn yn cyfrif ar gofnod cyfranogiad y myfyriwr.

2.11

Mae myfyrwyr yn gyfrifol am gofio dod â'u cerdyn i sesiynau ddysgu wyneb yn wyneb  ac am gael cerdyn newydd os ydynt yn colli eu cerdyn neu os bydd yn torri cyn gynted â phosib.

2.12

Anfonir pob hysbysiad sy'n ofynnol yn unol â'r gofynion hyn at gyfrif e-bost y Brifysgol y myfyriwr yn y lle cyntaf, ac mewn rhai amgylchiadau, i gyfeiriad cartref a chyfeiriad tymor y myfyriwr, oni fydd y myfyriwr wedi rhoi gwybod i'r Gwasanaethau Addysg a'r Gyfadran/Ysgol yn mewn ysgrifen y dylid defnyddio cyfeiriad arall.

2.13

Bydd Cyfadran/Ysgol gartref y myfyriwr yn monitro presenoldeb myfyrwyr, gan ddechrau o wythnos addysgu gyntaf unrhyw dderbyniad. 

2.14

Bydd y Brifysgol yn cysylltu â myfyrwyr sydd wedi cael cyfnodau sylweddol o ddiffyg cyfranogiad yn eu hastudiaethau, yn unol â phwynt 12 isod, i sicrhau eu lles a chynnig cymorth. Pan na fydd y lefel o gyfranogiad yn gwella heb esboniad dros gyfnod o 4 wythnos, efallai y bydd y Brifysgol, mewn amgylchiadau eithriadol, yn ystyried tynnu'r myfyriwr yn ôl neu'i atal dros dro. Fel arfer, ni fydd ymgeiswyr sydd wedi cael penderfyniad eu bod yn ‘Gorfod Tynnu’n Ôl o’r Brifysgol’ yn cael eu derbyn yn ôl i’r un rhaglen astudio, nac i raglen gytras, heb gymeradwyaeth y Pwyllgor Recriwtio a Derbyn.

2.15

Os bydd yn rhaid i ymgeiswyr dynnu'n ôl o ganlyniad i'r broses hon, byddant yn gyfrifol am dalu costau'r ffioedd dysgu ar gyfer y cyfnod hyd at y dyddiad diwethaf pan wnaethant ymgysylltu â'u hastudiaethau, mynd i sesiwn addysgu neu gyrchu darpariaeth ar-lein (yn ystod cyfnodau addysgu, o ddydd Llun tan ddydd Gwener). Gall cyrsiau proffesiynol penodol, er enghraifft yn y Gyfadran Meddygaeth, Iechyd a Gwyddor Bywyd, gyfeirio at ddyddiadau lleoliad gwaith wrth gyfrif y dyddiad cyfranogi diwethaf.

2.16

Os bydd yn rhaid i fyfyrwyr newydd dynnu'n ôl ond nid ydynt wedi cyfranogi yn eu hastudiaethau o gwbl, bydd eu dyddiad presenoldeb/cyfranogiad diwethaf yn cael ei gofnodi fel dyddiad cyntaf y tymor.

2.17

Os bydd myfyrwyr yn ailgofrestru ond nid ydynt yn cyfranogi o gwbl, bydd eu dyddiad presenoldeb/cyfranogiad diwethaf yn cael ei gofnodi fel diwrnod olaf tymor y sesiwn addysgu flaenorol. Os bydd myfyrwyr yn dychwelyd ar ôl gohiriad, bydd eu dyddiad cyfranogi diwethaf yn cael ei gofnodi fel dechrau eu cyfnod gohirio blaenorol.

2.18

Mae gan rai cyrsiau ofynion presenoldeb penodol uwch oherwydd gofynion proffesiynol. Dylai Cyfadrannau/Ysgolion hysbysu myfyrwyr, fel rhan o'r wybodaeth am y cwrs, os oes unrhyw ofynion presenoldeb penodol ychwanegol.

2.19

Bydd hefyd ofyn i fyfyrwyr sy’n gwneud elfen astudio dramor neu leoliad diwydiannol sy'n rhan hanfodol ac asesedig o'u rhaglen gydymffurfio â'r polisi monitro cyfranogiad. Caiff myfyrwyr o'r fath eu monitro o leiaf bob mis (gweler adran 6).

2.20

Bydd myfyrwyr sy'n dilyn rhaglenni a gyflwynir drwy gyfnodau dwys byr o astudio yn cael eu monitro yn ystod y cyfnodau astudio dwys (gweler adran 7).

3.1

Er bod egwyddorion allweddol y polisi hwn yn berthnasol i'r holl fyfyrwyr a addysgir, mae'n ofynnol i'r Brifysgol fonitro cyfranogiad yr holl fyfyrwyr Llwybr Myfyrwyr (Haen 4 gynt), yn unol â rheoliadau Fisâu a Mewnfudo y DU, yn ogystal â'r Rheoliadau Mewnfudo sy'n rheoli mewnfudo i'r Deyrnas Unedig. Felly bydd y Gwasanaethau Cydymffurfiaeth Myfyrwyr yn cynnal gwiriadau cyfranogiad myfyrwyr ar sail wythnosol ar gyfer myfyrwyr Llwybr Myfyrwyr (Haen 4 gynt) ar raglenni a addysgir yn seiliedig ar ddata sweipio cardiau o sesiynau dysgu wyneb yn wyneb er mwyn cydymffurfio â rheoliadau Fisâu a Mewnfudo y DU. Gweler y Polisi Monitro Cyfranogiad ar gyfer Myfyrwyr Llwybr Myfyrwyr (Haen 4 gynt) a Noddir am fanylion penodol y broses monitro cyfranogiad sy'n berthnasol i ddeiliaid fisa Llwybr Myfyrwyr (Haen 4 gynt), a roddir ar waith yn ganolog gan y Gwasanaethau Cydymffurfiaeth Myfyrwyr. 

Bydd y broses monitro cyfranogiad  yn berthnasol hefyd i fyfyrwyr sydd wedi cofrestru ar gyrsiau Addysg Barhaus i Oedolion er mwyn sicrhau lles myfyrwyr. Ceir rhagor o wybodaeth am y gweithdrefnau monitro cyfranogiad i'r myfyrwyr hyn yn atodiad y polisi hwn isod.  

Bydd myfyrwyr sydd wedi cofrestru ar raglenni proffesiynol yn y Gyfadran Meddygaeth, Iechyd a Gwyddor Bywyd yn cael eu monitro ar sail wythnosol trwy ddata sweipio cerdyn mewn sesiynau addysgu wyneb yn wyneb yn unig yn ystod cyfnodau theori ar y campws yn sgil gofynion caeth y rhaglenni astudio. Hysbysir myfyrwyr ar ddechrau'r rhaglen os bydd eu presenoldeb yn cael ei fonitro yn y modd hwn. 

Gwahoddir myfyrwyr sy'n arddangos presenoldeb wyneb yn wyneb anfoddhaol dros gyfnod o 3 wythnos i gwrdd â Chyfarwyddwr y Rhaglen i drafod eu diffyg presenoldeb. Os na fydd myfyrwyr yn dod i gyfarfod gyda Chyfarwyddwr y Rhaglen neu ei enwebai, neu'n methu rhoi rhesymau boddhaol am eu habsenoldeb yn ystod y cyfarfod, efallai byddant yn cael llythyr i'w hysbysu eu bod yn cael eu tynnu'n ôl neu eu gwahardd.

Rhaid i fyfyrwyr ddangos presenoldeb boddhaol yn ystod yr wythnos yn dilyn y cyfarfod er mwyn caniatáu iddynt barhau ar eu rhaglen astudio.

Mae'r myfyrwyr yn gyfrifol am:

6.1 Sicrhau eu bod yn deall ac yn cydymffurfio â Pholisïau Monitro Cyfranogiad y Brifysgol;

6.2 Ymgysylltu â'r holl sesiynau dysgu cynlluniedig sy'n gysylltiedig â'u rhaglen astudio, yn cynnwys mynychu sesiynau addysgu wyneb yn wyneb, gwylio recordiadau lle bo sesiynau addysgu wedi'u recordio, cymryd rhan mewn sesiwn wedi’i ffrydio’n fyw a chyrchu deunyddiau dysgu ar-lein sydd ar gael iddynt gan eu Cyfadran/Ysgol;

6.3 Gall hysbysu eu Cyfadran/Ysgol pan fydd problemau technegol sy'n eu hatal rhag ymgymryd â'u hastudiaethau ar-lein wneud hi'n bosib cynnig cymorth;

6.4 Dylent sicrhau bod eu cardiau gyda nhw ar bob adeg mewn sesiynau wyneb yn wyneb a’u bod yn cael cerdyn newydd yn lle rhai sydd wedi eu colli neu eu difrodi cyn gynted â phosib;

6.5 Dylid cynnal cysylltiad â'r tiwtor personol a mynychu'r holl gyfarfodydd wyneb yn wyneb neu rithwir;

6.6 Bydd angen hysbysu eu Cyfadran/eu Hysgol  am unrhyw fwriad i fod yn absennol dros dro am gyfnod sy’n hwy na phum niwrnod. Caiff hyn ei ystyried yn "gais am absenoldeb dros dro o astudio”. 5.1 Mae "cais am absenoldeb dros dro o raglen astudio" yn absenoldeb dros dro sydd wedi'i gymeradwyo gan y Gyfadran/Ysgol. Rydym yn deall y gall fod gan fyfyrwyr reswm da dros golli sesiynau o bryd i'w gilydd, ond os bydd hyn yn digwydd, bydd angen i fyfyrwyr wneud yn siŵr eu bod yn dal i wneud eu gwaith. Dyma restr nad yw'n gynhwysfawr o amgylchiadau y byddai'r Brifysgol, fel arfer, yn eu derbyn:

• Amgylchiadau eithriadol megis salwch neu anaf difrifol.
• Marwolaeth neu salwch difrifol perthynas neu ffrind agos.
• Amgylchiadau personol neu deuluol anffafriol - megis ysgariad, byrgleriaeth, tân, achos llys sylweddol, anawsterau ariannol y tu hwnt i reolaeth y myfyriwr - sy'n gofyn bod y myfyriwr yn gadael y Brifysgol ar fyr rybudd.
• Gwasanaethu ar reithgor.
• Ymrwymiadau chwaraeon a/neu gelfyddydol, fel arfer pan fydd y myfyriwr yn cymryd rhan.

Dylid cyflwyno ceisiadau i'r Gyfadran/Ysgol i ddechrau a rhaid darparu tystiolaeth ategol fel arfer. Os yw myfyriwr yn profi anawsterau personol, teuluol, ariannol neu feddygol sy'n effeithio ar ei allu i ymrwymo i'w astudiaethau, y disgwyliad arferol yw y cynghorir y myfyriwr i ohirio ei astudiaethau.

Oherwydd y risg i lwyddiant academaidd, bydd ceisiadau am absenoldeb fel arfer yn cael eu hystyried am gyfnod o hyd at bythefnos yn unig ac ni ddylai'r cyfnod o absenoldeb olygu bod myfyriwr eisiau mwy o amser i gwblhau ei raglen. Os yw myfyrwyr Llwybr Myfyrwyr (Haen 4 gynt) yn gofyn am gyfnodau absenoldeb hwy, bydd rhaid iddynt ohirio eu hastudiaethau. Dylai myfyrwyr y mae angen iddynt ohirio eu hastudiaethau a/neu gael estyniad i’w hymgeisyddiaeth ymgynghori â rheoliadau Gohirio Astudiaethau’r Brifysgol ar gyfer rhaglenni a addysgir. Gan fod disgwyl i fyfyrwyr aros o fewn pellter cymudo i'w campws astudio i gwblhau gofynion academaidd eu rhaglen astudio, yn unol ag amodau eu fisâu Llwybr Myfyrwyr (Haen 4 gynt), ystyrir ceisiadau o'r fath fesul achos. Ni ddisgwylir i fwy nag un cyfnod o absenoldeb o'r fath gael ei ganiatáu fesul rhaglen astudio. Caiff ceisiadau mynych am gyfnodau estynedig o absenoldeb eu hystyried fesul achos ac efallai y bydd angen i fyfyrwyr ystyried gohirio eu hastudiaethau, gan ddibynnu ar yr amgylchiadau.

Lle caniateir absenoldeb dros dro o raglen astudio ar gyfer myfyriwr Llwybr Myfyrwyr (Haen 4 gynt), dylid rhoi gwybod i'r Uned Cydymffurfiaeth Myfyrwyr Rhyngwladol ar unwaith fel y gellir cofnodi hyn ar ffeil presenoldeb y myfyriwr.

6.7 Defnyddio eu cyfrif e-bost Prifysgol yn rheolaidd i fonitro a darllen pob e-bost a anfonir gan y Brifysgol

6.8 Ymateb i unrhyw gyfathrebiadau gan y Gyfadran/Ysgol, y Gwasanaethau Academaidd neu Wasanaethau Cydymffurfiaeth Myfyrwyr y Brifysgol ynghylch eu cyfranogiad.

6.9 Mynychu unrhyw gyfarfodydd wyneb yn wyneb neu rithwir a drefnir o ganlyniad i ddiffyg cyfranogiad mewn astudiaethau.

7.1 Mae staff gweinyddol ac academaidd y Gyfadran/Ysgol yn gyfrifol am:

7.1.1 Atgoffa myfyrwyr o bwysigrwydd ymgymryd â'r holl sesiynau dysgu a amserlennwyd a deunyddiau dysgu ar-lein;

7.1.2 Sicrhau bod yr wybodaeth, yr arweiniad a'r gweithdrefnau parthed y Polisi Monitro Presenoldeb Myfyrwyr ar gael i fyfyrwyr y Gyfadran/Ysgol;

7.1.3 Cynnig unrhyw wybodaeth bersonol sy'n ymwneud â'r Polisi Monitro Presenoldeb Myfyrwyr i fyfyrwyr a chyfnodau o astudio i ffwrdd o Abertawe;

7.1.4 Dylid sicrhau bod yr wybodaeth amserlenni mor gywir â phosib;

7.1.5 Sicrhau bod unrhyw newidiadau ad hoc i'r amserlen ddisgwyliedig yn cael eu cofnodi ar system amserlennu'r Brifysgol – er enghraifft, newid munud olaf i'r ystafell, neu ail-drefnu sesiwn ddysgu;

7.1.6 Adolygu cyfranogiad myfyrwyr gan ddefnyddio'r data a ddarparwyd gan y dulliau cyfranogiad gwahanol i sicrhau lles myfyrwyr a chynnig cymorth fel y bo'n briodol. Seilir hyn yn bennaf ar ddefnydd o ddeunyddiau cwrs yn Canvas a phresenoldeb mewn sesiynau dysgu wyneb yn wyneb a drefnwyd. Mae'n bosib yr ystyrir data ychwanegol wrth ystyried Adolygiadau Gweinyddol ar gyfer diffyg cyfranogiad megis cyflwyno asesiadau a gwaith cwrs, data a gedwir gan y llyfrgell a chyfranogiad mewn cyfarfodydd tiwtor personol.

7.1.7 Darparu gwybodaeth, cyfarwyddyd a gweithdrefnau i fyfyrwyr am roi gwybod i'w Cyfadran/Ysgol am unrhyw absenoldeb cynlluniedig byr dros dro fel y nodwyd yn 6.6 uchod.

7.1.8 Cadw mewn cysylltiad â myfyrwyr tiwtoriaid personol a threfnu a chofnodi presenoldeb myfyrwyr yn y sesiynau tiwtorial yn unol â System Tiwtor Personol y Brifysgol;

7.1.9  Rheoli'r broses ar gyfer diffyg cyfranogiad parhaus gydag astudiaethau i sicrhau lles myfyrwyr a chynnig cefnogaeth a gallai hyn, yn eithriadol, arwain at dynnu'r myfyriwr yn ôl neu'i atal dros dro;

7.1.10 Sicrhau y caiff presenoldeb yr holl fyfyrwyr ei fonitro a'i gofnodi'n deg, yn gywir ac ar ffurf anchwiliadwy i sicrhau cydraddoldeb o ran triniaeth a chydymffurfio â gofynion diogelu data a rhyddid gwybodaeth, yn ogystal â sicrhau y gall y myfyriwr a'r Gwasanaethau Cydymffurfiaeth Myfyrwyr neu’r Gwasanaethau Addysg graffu ar y cofnodion;

7.1.11 Cyfeirio unrhyw fyfyrwyr y nodir y gallai fod angen cefnogaeth ychwanegol arnynt at y Gwasanaeth Cymorth Myfyrwyr priodol.

7.2. Mae Deoniaid Gweithredol yn gyfrifol am:

7.2.1 Sicrhau bod staff y Gyfadran/yr Ysgol yn ymwybodol o'r cyfrifoldebau o ran monitro cyfranogiad;

7.2.2 Sefydlu a chyhoeddi enwau'r cysylltiadau sydd â chyfrifoldeb am y dyletswyddau hyn yn y Gyfadran/Ysgol;

7.2.3 Sicrhau y dynodir tiwtor personol i bob myfyriwr;

7.2.4 Sicrhau y caiff presenoldeb yr holl fyfyrwyr ei fonitro a'i gofnodi'n deg, yn gywir ac ar ffurf archwiliadwy i sicrhau cydraddoldeb o ran triniaeth a chydymffurfio â gofynion diogelu data a rhyddid gwybodaeth, yn ogystal â sicrhau y gall y myfyriwr a'r Gwasanaethau Cydymffurfiaeth Myfyrwyr neu’r Gwasanaethau Academaidd graffu ar y cofnodion;

7.2.5 Sicrhau lefel briodol o fonitro a chofnodi ar gyfer pob myfyriwr/rhaglen astudio yn unol â'r polisi.

8.1 Bydd yn orfodol i fyfyrwyr sy'n gwneud elfen astudio dramor neu leoliad gwaith diwydiannol sy'n rhan hanfodol neu asesedig o'u rhaglen gydymffurfio â Pholisi Monitro Cyfranogiad y Brifysgol i Fyfyrwyr a Addysgir, ac yn achos myfyrwyr Llwybr Myfyrwyr (Haen 4 gynt), y Polisi Monitro Cyfranogiad i fyfyrwyr Llwybr Myfyrwyr (Haen 4 gynt) a Noddir. Yn ogystal, bydd yn ofynnol i fyfyrwyr gydymffurfio ag unrhyw bolisïau a gweithdrefnau monitro cyfranogiad a bennwyd gan y sefydliad astudio dramor neu'r darparwr lleoliad gwaith diwydiannol.

8.2 Caiff myfyrwyr sy’n gwneud elfen astudio dramor neu leoliad gwaith diwydiannol sy’n rhan hanfodol neu asesedig o’u rhaglen eu monitro’n fisol neu’n amlach. Bydd Cyfadrannau/Ysgolion perthnasol yn cysylltu â’r myfyrwyr hyn unwaith y mis a bydd gofyn iddynt gadarnhau eu cyfranogiad parhaus yn eu rhaglen. Bydd Cyfadrannau/Ysgolion yn gyfrifol am ddweud wrth fyfyrwyr am y gofyniad hwn ac am y broses o gysylltu ar ddechrau lleoliad.

8.3 Os na fydd myfyriwr yn ymateb i'w Gyfadran/Ysgol pan gysylltir ag ef yn unol â 7.2 uchod, bydd y Gyfadran/Ysgol yn anfon e-bost dilynol ato i atgoffa'r myfyriwr bod yn rhaid iddo ymateb er mwyn cadarnhau ei gyfranogiad parhaus yn ei raglen. Bydd y Gyfadran/Ysgol yn ystyried tynnu myfyriwr yn ôl os na fydd yn ymateb i'r e-bost dilynol ac os na fydd tystiolaeth o amgylchiadau esgusodol. Yn achos myfyrwyr Llwybr Myfyrwyr (Haen 4 gynt), bydd y Gwasanaethau Cydymffurfiaeth Myfyrwyr yn cysylltu â'r myfyrwyr perthnasol i ymdrin â'r mater.

8.4. Mae'r rhestr ganlynol yn enghreifftiau o ddigwyddiadau priodol ar gyfer monitro cyfranogiad myfyrwyr sy'n astudio dramor neu ar leoliadau gwaith:

• Cyswllt rhwng y myfyriwr a chydlynydd academaidd y Gyfadran/Ysgol neu aelod penodedig arall o staff. Gall hyn fod ar Skype, dros y ffôn neu drwy e-bost.
• Cadarnhad o bresenoldeb myfyriwr gan gynrychiolydd penodedig priodol y Brifysgol sy'n derbyn myfyrwyr sy'n astudio dramor neu gynrychiolydd cwmni i fyfyrwyr ar leoliad gwaith.
• Data o gofnodion presenoldeb y Brifysgol berthnasol.
• Mae angen tystiolaeth ychwanegol hefyd ar rai rhaglenni.

8.5 Mae myfyrwyr Llwybr Myfyrwyr (Haen 4 gynt) sydd ar leoliad neu sy'n astudio dramor yn destun y gofynion ychwanegol a nodir yn 3.2 y Polisi Monitro Cyfranogiad i Fyfyrwyr Rhyngwladol a Myfyrwyr Llwybr Myfyrwyr (Haen 4 gynt) a Noddir.

8.6     Bydd myfyrwyr sy'n methu â chydymffurfio â gofynion eu rhaglen neu y mae eu cyfranogiad yn anfoddhaol yn cael eu hystyried gan y Gyfadran/yr Ysgol, a bydd camau gweithredu priodol yn cael eu cymryd.

9.1     Bydd yn ofynnol i fyfyrwyr gydymffurfio â'r polisi monitro cyfranogiad.  Ar gyfer rhaglenni a addysgir dros gyfnodau dwys byr, bydd y broses monitro presenoldeb yn seiliedig ar gyfnodau o 2 ddiwrnod yn ystod pob cyfnod pan fydd sesiynau dysgu a amserlennir wedi'u hamserlennu. Bydd y Gyfadran/yr Ysgol yn darparu manylion am ddyddiadau'r cyfnodau hyn i'r myfyrwyr ar ddechrau’r cwrs. Sylwer, bod gan rai rhaglenni ofynion presenoldeb uwch oherwydd achrediad proffesiynol. 

9.2 Bydd Colegau/Ysgolion yn cysylltu â myfyrwyr nad ydynt yn cymryd rhan yn eu hastudiaethau am gyfnod o 2 ddydd ac yn cynnig cymorth iddynt i'w helpu i ailgydio yn eu hastudiaethau.

9.3 Bydd cyfranogiad i fyfyrwyr ar raglenni dysgwr proffesiynol byw yn cael ei fonitro hanner ffordd drwy'r cwrs a bydd eu Cyfadran/Ysgol yn cysylltu â'r myfyrwyr nad ydynt wedi cyfranogi yn y cwrs hyd at y cyfnod hwn i gadarnhau eu cyfranogiad parhaus ar y cwrs. Bydd hysbysiad tynnu'n ôl yn cael ei anfon at fyfyrwyr nad ydynt yn ymateb i'w Cyfadran/Ysgol.

10.1 Bydd myfyrwyr sydd wedi cofrestru ar raglen meistr ôl-raddedig a addysgir, ac sy'n ymgymryd ag elfen ymchwil eu rhaglen (y modiwl(au) dysgu annibynnol dan gyfarwyddyd), yn destun gofynion y Polisi Monitro Cyfranogiad Myfyrwyr Ymchwil o ran amlder y monitro (misol).

10.2    Bydd myfyrwyr o'r fath hefyd yn destun y Polisi Monitro Cyfranogiad Myfyrwyr Ymchwil  o ran y broses uwchgyfeirio. Fodd bynnag, bydd Cadeirydd y Pwyllgor Dysgu ac Addysgu neu ei enwebai yn cymryd cyfrifoldebau'r Cyfarwyddwr Ymchwil, yng ngham dau o'r broses.

10.3 Gall y myfyrwyr hynny sydd wedi symud ymlaen yn swyddogol i Ran Dau'r prosiect/traethawd hir ar Raglen Gradd Meistr Ôl-raddedig a Addysgir sy’n dechrau ym mis Medi ac a hoffai adael Abertawe am resymau personol, ddewis cyflwyno “Cais i Gwblhau Astudiaethau o Bell”.

Caiff ceisiadau eu hystyried fesul achos gan y Gyfadran/yr Ysgol a chan y Gwasanaethau Cydymffurfiaeth Myfyrwyr yn achos myfyrwyr Llwybr Myfyrwyr (Haen 4 gynt). Sylwer na fydd cyflwyno cais yn gwarantu y caiff y cais ei gymeradwyo. Gwneir penderfyniadau'n seiliedig ar ofynion academaidd y rhaglen astudio dan sylw ac arweiniad Fisâu a Mewnfudo y DU yn achos myfyrwyr Llwybr Myfyrwyr (Haen 4 gynt). Mae Prifysgol Abertawe’n cadw'r hawl i wrthod cymeradwyo cais os bernir y gallai cymeradwyaeth o'r fath beri risg i ddyletswyddau a chyfrifoldebau cydymffurfiaeth Prifysgol Abertawe fel Noddwr Trwyddedig.  Rhoddir gwybod yn ysgrifenedig i fyfyrwyr os na fu eu cais yn llwyddiannus.

Dylai myfyrwyr Llwybr Myfyrwyr (Haen 4 gynt) fod yn ymwybodol os caiff eu cais ei gymeradwyo, gallai'r Brifysgol dynnu ei nawdd ar gyfer eu fisa myfyriwr yn ôl.  O ganlyniad, byddai fisa'r myfyriwr yn cael ei chwtogi gan na fyddai'n ofynnol mwyach i'r myfyriwr hwnnw deithio/dychwelyd i'r DU i gwblhau'r cwrs.

Pan gaiff fisa myfyriwr ei chwtogi, ni fydd y myfyriwr hwnnw'n gymwys ar gyfer fisa gwaith ôl-astudio'r Llwybr i Raddedigion.   

Ar gyfer deiliaid fisa Llwybr Myfyrwyr (Haen 4 gynt), bydd angen prawf ar y Gwasanaethau Cydymffurfiaeth Myfyrwyr fod y myfyriwr wedi dychwelyd adref i gwblhau'r cadarnhad o’r cais a rhoi gwybod i'r Swyddfa Gartref am dynnu'r nawdd. Ar ôl derbyn y prawf ymadael, bydd y Gwasanaethau Cydymffurfiaeth Myfyrwyr yn darparu cadarnhad terfynol bod cofnod y myfyriwr wedi cael ei ddiweddaru ac nad yw'r myfyriwr yn ddarostyngedig mwyach i broses monitro cyfranogiad wyneb yn wyneb y Brifysgol ar gyfer myfyrwyr a noddir.

Fel y nodwyd yn 2.9 uchod, mae'n ofynnol i fyfyrwyr ar raglenni a addysgir gofrestru eu presenoldeb mewn sesiynau dysgu cynlluniedig wyneb yn wyneb yn electronig drwy sganio eu cerdyn myfyriwr ar y darllenwyr a geir ym mhob ystafell addysgu. Mae'r Brifysgol yn cydnabod y gellir camddefnyddio'r system os yw myfyrwyr yn sganio cardiau myfyrwyr eraill neu'n sganio ac yna’n dewis peidio ag aros am y sesiwn ddysgu gynlluniedig. Bydd y Gyfadran/yr Ysgol yn ymchwilio i unrhyw amheuon o gamddefnyddio'r system. Mae'r broses ganlynol yn gymwys i’r rhai hynny nad oes ganddynt Fisa Myfyriwrsy'n sganio eu cerdyn ac yn gadael sesiwn, yn sganio cerdyn ar ran myfyriwr arall neu'n rhoi eu cerdyn i fyfyriwr arall i gofrestru eu presenoldeb:

11.1 Bydd y myfyriwr yn derbyn e-bost gan y Gyfadran/yr Ysgol yn amlinellu'r polisi ac yn esbonio y gallai unrhyw ddigwyddiadau pellach arwain at hysbysiad tynnu'n ôl.

11.2 Os canfyddir bod y myfyriwr wedi ymgysylltu yn y fath weithgarwch am yr eil dro, bydd angen i'r myfyriwr gwrdd â'u Cyfadran/Ysgol i esbonio'r rhesymau. Bydd y Gyfadran/yr Ysgol yn asesu'r rhesymau a nodwyd ac yn gwneud penderfyniad a fydd caniatâd i'r myfyriwr barhau neu a fydd hysbysiad tynnu'n ôl yn cael ei ystyried.

12.1 Bydd y Brifysgol yn adolygu defnydd myfyrwyr o ddeunyddiau cwrs yn Canvas a’u cyfranogiad mewn sesiynau wyneb yn wyneb bob pythefnos. Lluniwyd yr adolygiadau hyn i nodi myfyrwyr y mae eu cyfranogiad wedi disgyn dan y trothwy angenrheidiol, i sicrhau lles myfyrwyr, cadarnhau'r rhesymau am y diffyg cyfranogiad a chynorthwyo myfyrwyr a allai fod yn profi anawsterau neu y gallai fod angen cymorth penodol arnynt i ailgydio o ddifrif.

Esbonnir y broses isod:

Yn unol â Pholisi Monitro Cyfranogiad y Brifysgol, gall myfyrwyr sy'n derbyn hysbysiad o dynnu'n ôl neu ataliad dros dro gan y Brifysgol gyflwyno cais am adolygiad terfynol o'r penderfyniad hwn. I ddechrau bydd myfyrwyr yn cael y cyfle i gyflwyno ffurflen Adolygiad Gweinyddol i'r Gwasanaethau Cydymffurfiaeth Myfyrwyr o fewn 5 niwrnod gwaith o ddyddiad y llythyr/e-bost at y myfyriwr yn cadarnhau'r penderfyniad i dynnu'n ôl neu atal dros dro.  Caiff y ffurflen ei hadolygu gan Gyfadran/Ysgol y myfyriwr a'r Gwasanaethau Cydymffurfiaeth Myfyrwyr yn achos myfyrwyr Llwybr Myfyrwyr (Haen 4 gynt). Y Cyfarwyddwr Cysylltiol: Gall Weithrediadau Myfyrwyr neu eu henwebai adolygu achosion lle mae'r Gyfadran/Ysgol neu Wasanaethau Cydymffurfiaeth Myfyrwyr yn parhau i argymell tynnu'n ôl neu ataliad dros dro yn y cyfnod apelio. Bydd yr Adolygiad Gweinyddol yn golygu cwblhau prosesau mewnol y Brifysgol ar gyfer y Broses Monitro Cyfranogiad.

Proses Monitro Cyfranogiad ar gyfer Cyrsiau Addysg Barhaus Oedolion