Dysgu o weminarau

Pryd bynnag rydych chi’n cymryd rhan mewn darlith/seminar neu weminar ar-lein, mae’n bwysig eich bod yn paratoi eich dyfais ymlaen llaw. Gwnewch yn siŵr bod  y meddalwedd ar gael ar eich dyfais cyn y sesiwn  Y peth lleiaf y bydd ei angen yw’r gallu i glywed eich tiwtor, felly gwnewch yn siŵr bod seinyddion gan y ddyfais byddwch yn ei defnyddio, neu y gallwch atodi clustffonau iddi. Gwiriwch fod y sain wedi’i throi i fyny ar y rhain.

Er bod modd dilyn gweminar ar eich ffôn yn aml, gall fod yn fwy anodd teipio mewn ffenestri sgwrsio felly, os gallwch ddefnyddio gliniadur neu lechen mae hon yn adeg dda i ofyn. Os na allwch, peidiwch â phoeni, o leiaf byddwch yn gallu dilyn y sesiwn.

Hefyd, os ydych yn defnyddio calendr ar-lein, ychwanegwch y gweminar fel digwyddiad, a rhowch y ddolen a anfonwyd atoch yn yr adran lleoliad neu nodiadau, Fel hyn, fyddwch chi ddim yn gorfod chwilota amdani ym mewnflwch eich e-byst pan fydd ei hangen arnoch chi.

Gellir rhannu gweminarau’n ddau fath: y rhai lle gallwch siarad (ac efallai rhannu fideo drwy eich gwe-gam) a’r rhai lle nad oes modd i chi siarad.

Gweminarau lle gallwch siarad

Mewn gweminarau ar gyfer grwpiau llai, efallai y byddwch yn cael troi eich microffon a’ch gwe-gam ymlaen ac felly cymryd rhan drwy siarad. Mae rhai platfformau’n cynnwys botwm dwylo i fyny y gallwch glicio arno i ddangos eich bod am gyfrannu a gall y sawl sy’n cyflwyno’r sesiwn roi caniatâd i chi siarad. Mae angen hyn yn aml mewn grwpiau maint canolig i atal pobl rhag torri ar draws ei gilydd.

Hyd yn oed yn y gweminarau hyn gallwch gymryd rhan hefyd drwy deipio mewn ffenestri sgwrsio. Dyma’r lle i ofyn cwestiynau, rhannu syniadau byr ac yn aml ddolenni i dudalennau gwe a dogfennau. Dydyn nhw ddim yn agor yn awtomatig mewn rhai platfformau – felly chwiliwch am y gair ‘chat’ neu eicon ar ffurf swigen siarad neu rywbeth tebyg.

Gweminarau lle na allwch siarad

Mewn gweminarau mwy, mae’n gallu bod yn lletchwith os yw pawb yn gallu siarad, felly mae’n bosib na fydd yr opsiwn hwn ar gael. Os yw hyn yn wir, ffenestr sgwrsio fydd eich prif ffordd o gyfrannu. Fel y nodwyd uchod, dyw rhai platfformau ddim yn dangos eu ffenestri sgwrsio’n awtomatig, felly cadwch lygad am y gair ‘chat’ neu eicon ar ffurf swigen siarad neu rywbeth tebyg.

Gall y cyflwynydd ofyn i chi am atebion i gwestiynau penodol y bydd angen i chi eu teipio yn y ffenestr sgwrsio, neu gallech ddewis ei defnyddio i ofyn cwestiynau i’r cyflwynydd.

Gall gweminarau mwy lle na allwch siarad gynnig nodwedd arall, sef pleidlais. Os yw’r cyflwynwyd eisiau cael barn y grŵp am rywbeth gallai ofyn i chi gymryd rhan mewn pleidlais. Mae’r rhain yn ddienw fel arfer.

Cymerwch ran:

Mae’n ymddangos yn amlwg ond y prif wahaniaeth rhwng gweminar a darlith wedi’i recordio yw’r cyfle i gyfrannu. Felly, gofynnwch ac atebwch gwestiynau a siaradwch os cewch chi gyfle.

Paratowch:

Gwnewch yn siŵr eich bod yn gwneud unrhyw waith darllen ymlaen llaw. Hyd yn oed os nad oes dim byd penodol yn cael ei roi, gall fod yn werth edrych ar restrau darllen neu fynd ar-lein i weld beth gallwch ei ddysgu am y pwnc.

Arhoswch:

Yn aml bydd oediad wrth i’r cyflwynydd siarad, neu gall fod yn canolbwyntio ar rywbeth arall felly, os gofynnwch gwestiwn yn y ffenestr sgwrsio, peidiwch â phoeni os na chaiff ei ateb ar unwaith. Hefyd, os ydych mewn gweminar lle gallwch siarad, ceisiwch aros nes bod rhywun arall wedi gorffen cyn i chi ddechrau siarad.

Gwyliwch eto:

Caiff llawer o weminarau eu recordio sy’n golygu y gallwch eu gwylio eto. Gall hyn fod yn amser gwell i gymryd nodiadau oherwydd nad oes disgwyl i chi gyfrannu.

Gwnewch nodiadau:

Fel y nodwyd uchod, gall hyn fod yn haws wrth wylio recordiad o’r gweminar eilwaith. Fodd bynnag, mae’n bosib iawn y bydd adegau yn ystod cyflwyniad pan allwch ei drin fel darlith arferol ac ysgrifennu nodiadau.