Gweithleoedd Cydweithredol

grŵp o bobl yn cael cyfarfod â'u dyfeisiau

Os ydych yn cydweithio ar brosiect, gall fod yn ddefnyddiol os oes gennych le cyffredin lle gallwch i gyd rannu ffeiliau neu weithio ar yr un pryd.

Ym Mhrifysgol Abertawe mae gan ein holl fyfyrwyr gyfrif Office 365 a meddalwedd arall a fydd yn caniatáu i chi gymryd rhan mewn cyfarfodydd ar-lein, storio a rhannu ffeiliau ar-lein a llunio dogfennau ar y cyd. Mae opsiynau eraill ar gael hefyd, megis Google Drive a DropBox. Gydag Office 365 a Google Drive, yn ogystal â storio ffeiliau yn yr un lle, gallwch hefyd eu golygu ar y cyd ar yr un pryd.

Defnyddio Gweithleoedd Cydweithredol

Pryd bynnag rydych chi'n defnyddio gweithle cydweithredol ar gyfer gwaith grŵp, bydd angen sicrhau eich bod yn rhannu cynnwys â phawb yn eich grŵp. Ar ôl i chi lanlwytho eich ffeiliau, gwnewch yn siŵr eich bod yn dewis y ffolder perthnasol ac yn dewis yr opsiwn 'share'. Fel arfer, bydd angen cyfeiriadau e-bost pawb arnoch chi i wneud hyn. Ar ôl i chi wneud hyn, bydd pawb yn gallu ychwanegu eu ffeiliau, eu sylwadau a'u nodiadau yn yr un lle a rennir.

Awgrym euraidd: Cymerwch gofnodion neu nodiadau ar gyfer pob cyfarfod grŵp sy'n cael ei gynnal - hyd yn oed os nad yw hyn yn ofyniad. Mae'n ffordd wych o gofnodi penderfyniadau, cyfrifoldebau a chamau gweithredu.

Cydweithio Llwyddiannus

Yn union fel gyda chydweithio wyneb yn wyneb, mae'n bwysig iawn cyfathrebu mewn modd effeithiol a phroffesiynol. Dylech chi sicrhau bod rôl gan bawb yn eich grŵp a bod pawb yn cymryd cyfrifoldeb am gymryd y camau gweithredu gofynnol. Pan gaiff penderfyniadau eu gwneud, dylech eu cofnodi a dylai pawb yn y grŵp lynu wrthynt.

Mae’r cynnwys hwn yn dod o’r ffynhonnell ganlynol gan Brifysgol Hull, ac mae wedi’i drwyddedu dan Drwydded Ryngwladol Creative Commons Attribution-NonCommercial-ShareAlike 4.0.