Cynnal a Chadw ac Atgyweiriadau

Mae atgyweiriadau brys yn faterion a allai beryglu iechyd a diogelwch preswylwyr neu staff, materion sy'n achosi difrod mawr i adeiladau a/neu eu cynnwys, neu os yw diogelwch yr adeilad yn cael ei beryglu. Gallai enghreifftiau o waith atgyweirio brys gynnwys:

• Nwy yn gollwng
• Gollyngiadau dŵr difrifol
• Methiant llwyr y system wresogi (yn dibynnu ar adeg y flwyddyn)
• Methiant llwyr y cyflenwad trydan
• Diffygion trydanol difrifol
• Problemau difrifol gyda draenio
• Drysau allanfa dân wedi'u rhwystro neu eu difrodi
• Cael eich dal mewn lifft

Dylid rhoi gwybod am faterion brys yn bersonol ar unwaith i Dderbynfa eich Safle neu drwy’r ap SafeZone. Y tu allan i oriau agor y Dderbynfa, cysylltwch â swyddogion Diogelwch Prifysgol Abertawe ar +44 (0) 1792 606010.

Pan fydd colled neu ddifrod i eiddo, nad yw o ganlyniad i 'draul cyffredinol teg', codir tâl ar y preswylydd/preswylwyr dan sylw. Bydd y ffi yn cael ei hychwanegu at eich cyfrif ar y Fewnrwyd.
Bydd y taliadau'n adlewyrchu cost y gwaith atgyweirio neu adnewyddu yn unol â chostau presennol ein cyflenwyr, namyn dibrisiant, ynghyd â ffi weinyddol. Ni allwn ragweld hyd a lled yr holl ddifrod na rhagweld cynnydd mewn prisiau.

Cysylltwch â ni os oes gennych chi bryderon ynghylch ad-daliadau.

Bydd y timau Llety'n cynnal archwiliadau mewn mannau cymunedol ac ystafelloedd gwely drwy gydol y flwyddyn. Defnyddir yr archwiliadau i wirio cyflwr, glendid ac ansawdd y gosodiadau yn y llety.

• Preswylwyr sy'n gyfrifol am lanhau a thacluso eu hystafelloedd gwely.
• Disgwylir i bob cyd-breswylydd helpu i gynnal a chadw'r gegin a'r coridorau i safon resymol a bydd yr ardaloedd hyn yn cael eu monitro gan y timau cadw tŷ a glanhau.
• Gall peidio â chynnal a chadw mannau i safon resymol beri risg i iechyd ac effeithio ar gyflwr yr adeilad.
• Gellir codi taliadau a chymryd camau disgyblu ar gyfer meysydd sy'n peri pryder parhaus.

Byddwch chi’n derbyn e-bost ymlaen llaw gyda gwybodaeth am pryd y cynhelir yr archwiliadau.

Mae'n ofynnol hefyd i'r Brifysgol gynnal nifer o archwiliadau cynnal a chadw cynlluniedig statudol drwy gydol y flwyddyn. Dyma weithrediadau a gwiriadau rheolaidd sy’n cael eu cynnal gan y timau Llety i sicrhau eich diogelwch ac i gydymffurfio â'r ddeddfwriaeth bresennol. Ar adegau, bydd contractwyr allanol cymeradwy hefyd yn gweithio ar draws y safle ac yn y preswylfeydd.

Isod ceir rhai o'r archwiliadau a'r gwiriadau a gynhelir drwy adeiladau'r preswylfeydd. Ar adegau, mae angen mynediad i’ch ystafelloedd i wneud gwaith cynnal a chadw cynlluniedig. Byddwn yn cysylltu â chi drwy e-bost cyn i'r gwaith ddechrau.

Os byddwch chi i ffwrdd o’ch llety am 7 niwrnod neu fwy, gwnewch yn ’siŵr eich bod yn troi ymlaen eich holl allfeydd dŵr am o leiaf 5 munud ar ôl i chi ddychwelyd. 

Mae'r Gwasanaethau Preswyl ac UPP yn cadw'r hawl i'w gyflogeion a chontractwyr awdurdodedig i fynd i mewn i lety preswyl at ddibenion lles, archwilio, gwaith cynnal a chadw cynlluniedig ac adweithiol, atgyweiriadau, neu i unioni mater iechyd a diogelwch neu dorri tenantiaeth.

Rhoddir o leiaf saith niwrnod o rybudd, pan fo'n bosibl, ar gyfer yr holl waith cynnal a chadw cynlluniedig neu pan fo angen mynediad i ystafelloedd gwely.

Pan fyddwn yn ymweld, byddwn bob amser yn curo'r drws cyn mynd i mewn i’ch preswylfa yn ogystal ag ystafelloedd unigol. Mae gennych chi’r hawl i ofyn am brawf adnabod neu ffonio Derbynfa eich Safle i'w wirio cyn caniatáu mynediad.

• Byddwn yn gwneud pob ymdrech i ymdrin â’ch cais cyn gynted ag y gallwn a chyda chyn lleied o darfu â phosibl.
• Byddwn yn gadael eich eiddo fel yr oedd pan gyrhaeddon ni, a byddwn yn cloi'r drws ni waeth sut yr oedd wrth gyrraedd.
• Ein nod fydd cysylltu â chi o leiaf 24 awr ymlaen llaw pan fo angen mynediad i fannau cymunedol. Nid yw hyn yn berthnasol mewn achosion brys, am resymau diogelwch, neu pan fyddwn yn ymweld ar eich cais chi.