Gwallau cyffredin o ran strwythur a dadl

Erbyn diwedd y rhagarweiniad, dylai eich darllenydd wybod yn union beth yw pwnc eich aseiniad a sut byddwch yn mynd i'r afael â'ch pwnc. Yn y rhagarweiniad, dylid amlinellu popeth sy'n dilyn ym mhrif gorff eich traethawd. Cofiwch, mae bod yn glir ac yn rhagweladwy yn allweddol ar gyfer ysgrifennu academaidd da.

Y diweddglo yw'r lle perffaith i atgoffa'r darllenydd beth rydych newydd ei wneud a pham rydych wedi'i wneud. Mae'n gyfle i ddangos sut rydych wedi ateb y cwestiwn a 'phrofi' eich honiad eich hun. Bydd dilyn y strwythurau uchod yn helpu i sicrhau eich bod yn cynnwys yr wybodaeth angenrheidiol.

Heb frawddeg grynodol sy'n gwerthuso, ni fyddwch yn gwneud pwynt y paragraff yn llawn ac ni fydd y darllenydd yn deall beth rydych yn ei feddwl. Hyd yn oed os ydych yn cynnwys cefnogaeth ar gyfer eich honiadau, mae angen i chi ddod i'ch dadansoddiad at ei gilydd drwy gysylltu'n benodol rhwng eich brawddeg bwnc a'r brawddegau ategol.

Hyd yn oed os bydd eich cynnwys yn rhagorol, mae angen i chi ddefnyddio iaith i gyfeirio'r darllenydd drwy eich dadl. Cofiwch bwysigrwydd geiriau ac ymadroddion pontio ar gyfer rhoi gwybod i'r darllenydd beth rydych yn ei wneud. Heb bontio fel hyn, bydd diffyg llif yn eich traethawd a bydd yn teimlo'n lletchwith.

Mae defnyddio gwaith ysgolheigion o'ch maes yn eich aseiniad eich hun yn dangos eich bod yn gallu gwneud cysylltiadau rhwng eich syniadau eich hun a gwaith pobl eraill. Nid yw hyn yn golygu na ddylech gael eich syniadau eich hun; yn hytrach, dylech allu dangos sut mae eich syniadau chi'n cysylltu â gwybodaeth pobl eraill, neu'n ehangu ar honno. Os ydych yn gwneud datganiadau a honiadau heb eu gwreiddio yn eich disgyblaeth, ni fydd eich dadl yn darbwyllo . Yn yr un modd, dylech wneud yn siŵr bod y deunydd rydych yn ei ddefnyddio’n dod o ffynonellau dibynadwy, a'i fod wedi'i adolygu gan gymheiriaid - os bydd y ffynonellau'n amheus, bydd eich dadl eich hun yn llai dilys.