Cymorth am Ymosodiadau Rhywiol

Os ydych yn teimlo eich bod chi neu rywun arall mewn perygl o hyd ffoniwch:

Diogelwch ar y campws: 333 o'r ffôn yn eich ystafell neu (01792) 205678

Yr heddlu: 999

Os ydych wedi cael eich anafu neu fod angen cymorth meddygol arnoch, ffoniwch 999 am ambiwlans neu'r tîm Diogelwch ar 333 o'r ffôn yn eich ystafell neu (01792) 205678.

Os nad ydych mewn perygl ac wedi dod o hyd i rywle diogel a chynnes, ffoniwch rywun rydych yn ymddiried ynddo i'ch cefnogi chi. Os ydych mewn neuadd breswyl, gallwch ffonio eich Cynorthwy-ydd Myfyrwyr Preswyl (RSA) os nad ydych am gysylltu â theulu neu ffrindiau.

Er y gallai fod yn anghyfforddus i wneud hynny, mae'n bwysig eich bod yn cadw unrhyw dystiolaeth a allai helpu'r heddlu gyda'i ymholiadau os oes rhywun wedi ymosod arnoch yn rhywiol.

I gadw gwybodaeth nes i'r heddlu gyrraedd, ceisiwch beidio â gwneud y canlynol:

• Defnyddio'r toiled neu daflu dillad isaf neu gynnyrch misglwyf
• Golchi, cael cawod, cael bath neu eillio
• Golchi eich dwylo
• Dadwisgo, golchi, taflu neu ddinistrio dillad a wisgwyd, dillad gwely neu dywelion a ddefnyddiwyd ar adeg y digwyddiad neu ar ôl y digwyddiad
• Bwyta neu yfed unrhyw beth, gan gynnwys meddyginiaeth nad yw'n hanfodol
• Glanhau eich dannedd
• Ysmygu
• Tarfu ar y lleoliad neu ganiatáu i bobl eraill neu anifeiliaid fynd i leoliad y digwyddiad, lle bo'n bosibl.

Dylid cadw tystiolaeth nad yw'n gorfforol, megis negeseuon testun perthnasol, negeseuon ar y cyfryngau cymdeithasol ac e-byst.

Beth sydd angen i chi ei wybod

• Os credwch eich bod wedi cael unrhyw fath o gyffur, y peth gorau yw ei brofi o fewn 24 awr
• Os oes angen dulliau atal cenhedlu brys arnoch, dylid dechrau'r feddyginiaeth o fewn 72 awr
• Os hoffech gyffuriau atal HIV, dylid dechrau'r feddyginiaeth o fewn 36 awr

Os oes rhywun wedi ymosod yn rhywiol arnoch chi, fe'ch anogir i gysylltu â Gwasanaeth Lles ac Anabledd y Brifysgol neu Ganolfan Gyngor a Chymorth Undeb y Myfyrwyr. Rydym yn gallu rhoi gofal a chymorth cychwynnol i chi a thrafod yr opsiynau gyda chi. Nid ydym yma i'ch beirniadu na rhoi'r bai arnoch chi. Byddwn yn gwrando ac yn cynnig cymorth a chyngor. Gall aelod o'r tîm fod yn gyswllt cymorth parhaus i chi.

Os ydych am ddweud wrth yr heddlu am y digwyddiad, byddant fel arfer yn trefnu bod SOLO (Swyddog Cyswllt ar gyfer Troseddau Rhywiol) yn dod i'ch gweld unwaith y byddant wedi gwirio eich bod yn iawn. Yna bydd y SOLO yn cymryd swabiau o'ch ceg a samplau wrin fel tystiolaeth fforensig. Nhw fydd eich prif gyswllt yn ystod eich achos chi.

Os ydych yn penderfynu mynd at Ganolfan Cyfeirio Ymosodiadau Rhywiol (SARC) neu orsaf heddlu yn uniongyrchol, mae'n bwysig eich bod yn mynd ag unrhyw ddillad isaf neu ddillad a wisgwyd ar adeg y digwyddiad mewn bag plastig, os nad ydych yn eu gwisgo ar gyfer y daith. Dylid hefyd gwneud yn siŵr bod lleoliad y digwyddiad yn ddiogel os yn bosibl.

Efallai y byddwch yn penderfynu peidio â dweud wrth yr heddlu am y digwyddiad. Eich penderfyniad chi yw hwn yn llwyr, a chewch eich parchu a'ch cefnogi pa bynnag benderfyniad y byddwch yn ei wneud. Ni fydd neb yn eich beirniadu nac yn rhoi'r bai arnoch chi. Gallwch siarad ag aelod o Wasanaeth Lles ac Anabledd y Brifysgol neu Ganolfan Cyngor a Chymorth Undeb y Myfyrwyr o hyd a fydd yn gallu eich cefnogi chi. Byddai'n ddefnyddiol, lle bynnag y bo'n bosibl, i gymryd lluniau o leoliad y digwyddiad a chadw unrhyw ddillad, dillad gwely, negeseuon testun neu e-byst perthnasol ac ati, oherwydd y gellir defnyddio'r rhain os ydych yn penderfynu dweud wrth yr heddlu yn y dyfodol.

Os ydych yn dewis peidio â dweud wrth yr heddlu am y digwyddiad, gallwch ddefnyddio'r gwasanaethau a ddarperir gan y Ganolfan Cyfeirio Ymosodiadau Rhywiol (SARC) leol o hyd. Gall y tîm yn y Ganolfan eich gweld heb i'r heddlu fod yn rhan, a threfnu apwyntiad ar eich cyfer fel hunan-atgyfeiriad. Gallant gasglu tystiolaeth rhag ofn eich bod yn penderfynu adrodd am y digwyddiad yn ddiweddarach, a gallant gynnig dulliau atal cenhedlu mewn argyfwng a gwasanaeth sgrinio iechyd rhywiol.

Cyfleuster arbennig yw Canolfan Cyfeirio Ymosodiadau Rhywiol (SARC) lle gall goroeswyr trais rhywiol neu ymosodiad rhywiol gael cymorth a chefnogaeth ar frys. Mae hyn yn cynnwys mynediad at archwiliad meddygol fforensig, a gynhelir gan feddyg profiadol a chymwys, a'r cyfle i siarad â'r heddlu am yr hyn sydd wedi digwydd iddynt os ydynt yn dymuno gwneud hynny. Mae cleientiaid SARC hefyd yn cael cyngor a chymorth gan Weithiwr Argyfwng a all gynnig eu cefnogi ac aros gyda nhw drwy gydol y broses.

I gael rhagor o wybodaeth am y cyngor a'r cymorth y gall SARC eu cynnig, ewch i http://www.newpathways.org.uk/sexual-assault-referral-centre/  

Canolfan Beech Tree – Canolfan Cyfeirio Ymosodiadau Rhywiol

Mae New Pathways yn ganolfan atgyfeirio ymosodiadau rhywio lle mae amrywiaeth o weithwyr proffesiynol profiadol a hyfforddwyd yn arbenigol yn rhoi cymorth, cefnogaeth a chyngor i ddynion, menywod, plant a phobl ifanc os ydynt wedi dioddef o ymosodiad rhywiol yn Abertawe neu'r ardaloedd o gwmpas.
 

New Pathways
Unit 3
Langdon House
Langdon Road
Abertawe
SA1 8QY
Tel: 01792 966660

E-bost: enquiries@newpathways.org.uk
Gwefan:www.newpathways.org.uk

Mae New Pathways yn darparu gwasanaeth cyfannol mewn amgylchedd diogel a chyfforddus sy'n canolbwyntio ar gleientiaid. Gall unrhyw un fynd atynt. Nid oes ots pa mor hir yn ôl yr ymosodwyd arnoch, neu os nad ydych am ddweud wrth yr heddlu.

Mae'r Gwasanaethau'n cynnwys: 

– Cyngor, i'ch helpu i benderfynu ar y ffordd ymlaen.
- Cefnogaeth i hwyluso cyfweliad gyda'r heddlu, mewn sefyllfa gyfforddus a chyfrinachol.
– Cyngor a chymorth emosiynol.
– Archwiliad meddygol fforensig gan feddyg a hyfforddwyd yn arbennig.
– Cymorth parhaus ac eiriolaeth drwy'r system cyfiawnder troseddol.
– Gwasanaeth cwnsela arbenigol gan gwnselydd profiadol a chymwys.

I gael rhagor o wybodaeth, cysylltwch dros y ffôn, drwy e-bost neu ewch i'r wefan. Mae'r ddolen i'r wefan yn mynd â chi i wefan New Pathways, sy'n ymdrin â nifer o ardaloedd ledled Cymru.

Rhif ffôn y tu allan i oriau: 07423 437020

Os ydych yn dweud wrth yr heddlu am drais rhywiol, byddant yn cynnal ymchwiliad. Os caiff rhywun a ddrwgdybir ei gyhuddo, bydd yr achos yn mynd i'r llys.

Fe'ch anogir i adrodd am unrhyw ddigwyddiad i'r Gwasanaethau Myfyrwyr sydd â staff arbennig i gefnogi myfyrwyr sydd wedi dioddef o drais rhywiol. Bydd aelod o'r tîm yn trafod y camau nesaf gyda chi o ran eich cefnogi chi ac unrhyw gamau disgyblu y gallwn eu cymryd. Mae gweithdrefnau ar waith i reoli unrhyw risgiau i chi  ac aelodau eraill o gymuned y Brifysgol. Os ydych wedi dweud wrth yr heddlu am y digwyddiad, ni fyddwn yn cymryd unrhyw gamau a allai amharu ar yr ymchwiliadau hyn. Fodd bynnag, mae nifer o addasiadau y gallwn eu gwneud i chi. Mae'r rhain yn cynnwys:

Addasiadau academaidd

Lle bo hynny'n briodol, byddwn yn gwneud addasiadau academaidd i'ch galluogi chi i barhau â'ch cwrs, gall y rhain gynnwys:

• Cyflwyno ffurflenni amgylchiadau esgusodol a llythyron o dystiolaeth ategol i amlinellu eich bod wedi profi amgylchiadau esgusodol o natur bersonol a chyfrinachol.
• Oedi cyfleoedd asesu neu gael cyfleoedd asesu ychwanegol fel ymgais gyntaf.
• Estyniadau i ddyddiadau cau ar gyfer cyflwyno aseiniadau ysgrifenedig.
• Mewn rhai achosion, dulliau asesu amgen e.e. dylid ystyried gwaith ysgrifenedig yn hytrach na gwaith grŵp neu gyflwyniadau.

Trefniadau arholi

Bydd staff yn ymgysylltu ag ysgolion academaidd a'r swyddfa arholiadau i drefnu:

• Arholiadau mewn ystafell ar eich pen eich hun neu ystafell lai.
• 25% o amser ychwanegol.

Addysgu a phresenoldeb

• Bydd staff yn cysylltu ag ysgolion eraill i esbonio absenoldebau posibl o ddosbarthiadau.
• Bydd nodiadau ar gyfer unrhyw ddarlithoedd a fethwyd ar gael.
• Dylid hefyd ystyried newidiadau i'r amserlen a slotiau addysgu amgen os yw hynny'n briodol.

Absenoldeb â chaniatâd

• Os ydych yn teimlo y byddai amser i ffwrdd o'ch cwrs o fudd i chi, caiff cyfnod o absenoldeb â chaniatâd ei awdurdodi.
• Bydd staff yn cyflwyno tystiolaeth ategol briodol am hyn ac yn eich cynghori ar unrhyw oblygiadau ymarferol ac ariannol o wneud hyn.
• Bydd staff yn cynnig cymorth drwy gydol eich cyfnod o absenoldeb â chaniatâd, ac yn sicrhau eu bod yn cadw mewn cysylltiad â chi ar ôl i chi ddychwelyd i astudio.

Llety

• Ar gyfer myfyrwyr sy'n byw yn llety'r Brifysgol, newid i ystafell arall ar y campws (os yw'n briodol).
• Ar gyfer myfyrwyr sy'n byw oddi ar y campws, cynnig ystafell ar y campws.
• Cymorth ariannol gyda'r costau hyn.
• Dylid ystyried mesurau diogelwch ychwanegol ar gyfer llety presennol (e.e. cloeon ar ffenestri, patrolau diogelwch, drysau awtomatig a amserir).

Cyfarpar

• Gellir benthyg ffôn symudol a gliniadur i chi os yw'r heddlu eu hangen nhw ar gyfer ymchwiliadau fforensig.

Diogelwch

• Rhoddir rhifau ffôn priodol i chi gael gafael ar gymorth y tu allan i oriau gan gynnwys, y Gwasanaethau Brys, Diogelwch ar y Campws, Tîm Cymorth y Breswylfa (os yw'n briodol) yn ogystal â manylion am sut i ddefnyddio ap 'SafeZone' y Brifysgol.
• Bydd staff yn sicrhau eu bod yn rhannu gwybodaeth berthnasol â thîm Diogelwch y Brifysgol fel bod modd cyflwyno mesurau diogelwch ychwanegol. Gallai'r rhain gynnwys mesurau pellach i gadw golwg ac ymweliadau ychwanegol â neuaddau yn ogystal â gwybodaeth am y tramgwyddwr honedig lle bo'n briodol.

Prosesau adrodd

Os yw'r tramgwyddwr honedig yn fyfyriwr ym Mhrifysgol Abertawe, gellir cymryd rhai o'r camau gweithredu canlynol yn ei erbyn:

• Ymchwiliad disgyblu mewnol.
• Mynediad cyfyngedig i'r campws neu ardaloedd penodol o'r campws.
• Symud llety.

Gall y sefydliadau canlynol gynnig cymorth i ddioddefwyr a'r rhai sy'n amddiffyn dioddefwyr ymosodiadau rhywiol neu ymosodiadau sy'n seiliedig ar rywedd:

• Rape Crisis: Llinell gymorth am ddim sy'n gallu rhoi cyngor i ddynion a menywod.
• Cymorth i Ddioddefwyr: Opsiynau o ran cymorth i ddioddefwyr trosedd.
• NHS Choices: Help ar ôl dioddef trais rhywiol ac ymosodiad rhywiol.
• BAWSO: Sefydliad gwirfoddol Cymru gyfan yw BAWSO, sy'n cynnig gwasanaethau arbenigol i ddioddefwyr a phobl dduon, asiaidd, lleiafrifoedd ethnig ac anabl (BAME) sydd wedi dioddef o gam-drin domestig a phob math o drais, neu mewn perygl o hyn.
• Cymorth i Fenywod Abertawe: Sefydliad i fenywod yn unig yw Cymorth i Fenywod Abertawe. Mae'n cefnogi menywod, sydd â phlant neu heb blant, sydd wedi dioddef o gam-drin domestig.
• Llinell Gymorth: Llinell gymorth gyfrinachol.
• Mind: Elusen iechyd meddwl.
• The Survivors Trust: Sefydliadau arbenigol ledled y DU
• Karma Nirvana: Elusen sy'n cefnogi dioddefwyr a goroeswyr priodasau gorfodol a cham-drin sy'n seiliedig ar anrhydedd.

Survivors UK: Llinell gymorth gyfrinachol ac am ddim i ddynion a bechgyn sy'n ymdrin ag effeithiau trais rhywiol.