Cwestiynau Cyffredin: Ymholiadau Cyffredinol

Mae’n bleser gennym gyhoeddi y bydd Prifysgol Abertawe’n cynnig gostyngiad rhent i fyfyrwyr yn Neuaddau Preswyl y Brifysgol (Campws y Bae, Tŷ Beck, Campws Singleton a Phentref Myfyrwyr Hendrefoelan) y gofynnwyd iddynt aros gartref a pheidio â dychwelyd i Abertawe o ganlyniad i gyfyngiadau Covid.

Gofynnir i fyfyrwyr cymwys gyflwyno cais am ostyngiad rhent am y cyfnod 4 Ionawr tan 15 Chwefror. Caiff anfonebau eu gohirio ar gyfer myfyrwyr yn Neuaddau Preswyl y Brifysgol tan 6 Mai. Sylwer, os ydych yn Neuaddau Preswyl y Brifysgol yn ystod y cyfnod hwn, ni fyddwch yn cael gostyngiad a gallwch dalu drwy eich cyfrif ar y fewnrwyd.

Byddwn yn e-bostio’r holl fyfyrwyr yn llety’r Brifysgol yr wythnos nesaf gyda rhagor o fanylion am gymhwysedd a sut i gyflwyno cais a sut bydd hwn yn cael ei weithredu.

Os ydych yn byw mewn ardal sy'n destun cyfyngiadau symud lleol, mae'n rhaid i chi ddilyn y cyngor a roddwyd yn yr ardal honno. Yn y rhan fwyaf (os nad pob un) o'r ardaloedd sy'n destun cyfyngiadau symud lleol, mae teithio i sefydliad addysgol yn eithriad, felly cewch deithio i Brifysgol Abertawe i astudio.

Fodd bynnag, ni ddylech ddod i'r Brifysgol os oes gennych symptomau Covid-19 a rhaid i chi ddilyn cyngor iechyd cyhoeddus ar hunanynysu a phrofi.

OS OES SYMPTOMAU COVID-19 GAN AELOD O GYMUNED Y BRIFYSGOL SY'N DYCHWELYD, MAE'N HOLLBWYSIG EI FOD YN HUNANYNYSU AR UNWAITH.

Graddio 2020 a Graddio Haf 2021

Er nad oeddem eisiau gwneud hyn, mae'r Brifysgol wedi penderfynu gohirio seremonïau graddio 2020 a seremonïau haf 2021 oherwydd pandemig Covid sy'n parhau.

Rydym yn sylweddoli y bydd hyn yn siomi'r rhai ohonoch chi a oedd yn edrych ymlaen at ddathlu eich cyflawniadau hwn, ond ein bwriad yw aildrefnu'r digwyddiad pan fydd hi'n ddiogel ac yn briodol gwneud hynny a byddwn yn rhoi gwybod i bawb sy'n gymwys pan fydd dyddiadau newydd wedi'u trefnu.

Sylwch nad yw'r gohirio hwn yn effeithio ar yr amserlen ar gyfer cwblhau eich astudiaethau.

Mae staff Llyfrgell Prifysgol Abertawe wedi bod yn gweithio'n galed ar y cyd ag Ystadau a Rheoli Cyfleusterau i roi mesurau diogelwch ar waith a dechrau ail-agor gwasanaethau yn ein llyfrgelloedd fesul cam (ar gyfer myfyrwyr a staff yn unig). Gan weithio yn unol â chanllawiau Llywodraeth Cymru a'r Brifysgol, rydym wedi agor y llyfrgelloedd canlynol ar yr adegau a nodir ar gyfer Gwasanaeth Cais a Chasglu yn unig:

Llyfrgell Campws Singleton
Llyfrgell Campws y Bae

Mae'r gwasanaeth hwn ar agor i staff a myfyrwyr Prifysgol Abertawe yn unig ar hyn o bryd.Bydd angen i chi ddangos eich cerdyn adnabod myfyriwr neu staff i ddod i mewn i'r llyfrgell a chasglu eich eitemau a archebwyd. Sylwch na fydd y llyfrgelloedd ar agor at ddibenion cyffredinol neu astudio ar hyn o bryd.

Darllenwch Ganllawiau Coronafeirws y Brifysgol cyn teithio i'r campws.
I ddarllen rhagor am y Gwasanaeth Cais a Chasglu, neu i gael yr wybodaeth ddiweddaraf am fynediad i'r llyfrgell, ewch i dudalen we'r Llyfrgelloedd neu e-bostiwch wasanaethau cwsmeriaid.

Mae’n bosib y bydd gan fyfyrwyr a brynodd docyn bws blynyddol ar gyfer blwyddyn academaidd 2019/20 ond sydd wedi gadael Abertawe gredyd heb ei ddefnyddio o ddiwedd mis Mawrth tan ddiwedd y flwyddyn academaidd. Mae'n bleser gennym roi gwybod i chi ein bod wedi derbyn cynnig gan First Cymru a fydd yn digolledu'r holl fyfyrwyr hyn am y credyd maen nhw wedi'i golli.

Mae'r cynnig ar gyfer ein myfyrwyr fel a ganlyn:
Os bydd gan fyfyrwyr gredyd heb ei ddefnyddio wrth iddynt ddychwelyd ym mis Medi 2020 (h.y. o’r tymor diwethaf) byddan nhw'n talu am dymor 1 a 2 yn unig a chaiff tymor 3 ei gredydu iddynt drwy ap Mticket.

Os yw myfyrwyr yn dychwelyd ym mis Ionawr 2021 â chredyd heb ei ddefnyddio (h.y. o’r tymor diwethaf) byddan nhw'n talu am dymor 2 yn unig ac yn derbyn credyd am dymor 3 drwy ap Mticket.

Bydd myfyrwyr nad ydynt yn dychwelyd eleni ond sy'n gohirio tan fis Medi 2021 yn derbyn yr un credyd yn seiliedig ar y senarios uchod.

Caiff yr holl gredyd ei ychwanegu'n awtomatig drwy ap Mticket, felly ni fydd angen i fyfyrwyr gysylltu â First Cymru.

Myfyrwyr nad ydynt yn dychwelyd

Ymdrinnir fesul achos â myfyrwyr yn eu blwyddyn olaf nad ydynt yn dychwelyd i astudio yn Abertawe ac sydd â chredyd heb ei ddefnyddio am y tymor olaf cyfan.

Dylai'r myfyrwyr hyn gysylltu â Jayne Cornelius, y Swyddog Teithio Cynaliadwy a fydd yn anfon eich manylion at First Cymru i gael ymateb.

Oherwydd bod staff yn gweithio o bell, ni fydd MyUniHub yn gallu derbyn ffurflenni cais, dogfennau neu ohebiaeth drwy'r post ar hyn o bryd. Dylech ddefnyddio'r ffurflenni sydd ar gael ar-lein i gyflwyno ceisiadau.

Nid yw Abertawe'n goddef gwahaniaethu neu aflonyddu. Rydym yn ystyried pob honiad o gamdriniaeth ac aflonyddu'n ddifrifol iawn.

Os ydych chi'n fyfyriwr sy'n poeni am hyn, cysylltwch â advice@swansea-union.co.uk neu adrodd amdano yma. 

Os bu angen i chi ddychwelyd adref yn gynnar oherwydd sefyllfa Covid-19, gallwch gyflwyno cais i adennill eich costau teithio ychwanegol.

Cwblhewch y ffurflen hawliad yswiriant. Cofiwch gadw copi cyn i chi ei hanfon i insurance@abertawe.ac.uk. Peidiwch ag anfon y ffurflen yn uniongyrchol i UMAL ein darparwr yswiriant teithio.

Beth mae angen ei gynnwys:-

Rhaid i chi sicrhau eich bod yn cwblhau'r holl gostau perthnasol i'w hadennill ar dudalen 3 a llofnodi'r ffurflen;

Darparwch y trefniadau a'r costau gwreiddiol ar gyfer eich taith adref ac yn ôl, gan gynnwys dyddiad archebu a dyddiadau teithio;

Tynnwch sylw at y costau ychwanegol y bu'n rhaid i chi eu talu, ond sylwch na fydd modd i chi ad-ennill cost eich taith yn ôl os nad oeddech wedi archebu eich tocyn ymlaen llaw.

Bydd rhaid i chi gyflwyno cais am unrhyw ad-daliadau sydd ar gael a darparu manylion llawn am y rhain. Cofiwch, hyd yn oed os nad yw cost eich tocyn hedfan yn ad-daladwy, mae modd hawlio'r trethi'n ôl yn aml. Oni bai i chi ddarparu gwybodaeth o'r fath ni fydd modd ystyried eich cais;

Os bu’n rhaid i chi ganslo eich taith cyn 24 Mawrth, rhowch y rheswm dros ei chanslo. h.y. cynhadledd/lleoliad gwaith/lleoliad dewisol wedi cael ei ganslo neu ei ohirio;

Os bu’n rhaid i chi ganslo eich taith cyn 17 Mawrth (gan ddibynnu ar gyrchfan y daith), rhowch y rheswm dros ganslo'r daith. h.y. cynhadledd/lleoliad gwaith/lleoliad dewisol wedi'i ganslo;

Sylwer nad oes modd adennill costau llety os cafodd ei golli neu os na chafodd ei ddefnyddio.

Mae angen i deithwyr gyflwyno cais i gwmnïau hedfan neu asiantau teithio ar gyfer ad-daliadau neu dalebau am docynnau hedfan adref nad ydych wedi'u defnyddio.

Mae'r yswiriant teithio gydag UMAL yn gymwys ar ôl i chi wneud cais am yr holl ad-daliadau a thalebau sydd ar gael, hyd yn oed os yw'r cwmnïau hedfan yn araf yn prosesu'r rhain. Hyd yn oed os yw'r daith hedfan allan wedi'i gwneud, sy'n golygu na chaiff y gost ei had-dalu, gellir ad-ennill y trethi a'r taliadau perthnasol.

Mae cwmnïau hedfan sy'n wynebu problemau sylweddol gyda llif arian yn ei gwneud hi'n anodd iawn i bobl sy'n ceisio ad-daliadau.

Lle bynnag y bo modd, bydd UMAL yn ceisio datrys y mathau hyn o hawliadau nawr gyda chytundeb ar ad-dalu costau teithio a threthi, yn hytrach na bod yr hawliadau hyn ar agor am fisoedd.

Ni fydd modd ystyried y costau canlynol am fod ein darparwyr yswiriant wedi estyn y ddarpariaeth ar gyfer teithiau a ganslwyd ar sail disgresiwn yn unig i dalu dim ond y costau ychwanegol sy'n codi mewn perthynas â hedfan adref:

Ad-dadliad tocyn hedfan pan nad oedd tocyn dychwelyd wedi'i archebu;

Ad-daliad am deithiau gwreiddiol yn ogystal â'r daith ddychwelyd ychwanegol;

Ad-daliad costau trên/tacsi/coets o faes awyr yn y DU i adref pan fyddai'r teithiwr wedi gorfod talu'r gost honno beth bynnag;

Teithiau personol neu gostau ar gyfer teithio adref ar y penwythnos neu deithiau na chafodd eu gwneud yn ystod cyfnod lleoliad gwaith;

Cludo eiddo personol adref;

Ad-daliadau rhent, blaendal rhent neu ddirwyon.

Edrychwn ymlaen at eich croesawu yn ôl i'ch astudiaethau ym Mhrifysgol Abertawe ym mis Medi. Rydym yn deall efallai fod gennych gwestiynau am sut cewch eich addysgu eleni a pha fath o brofiad byddwch yn ei gael fel myfyriwr. Rydym wedi newid rhai agweddau ar y ffordd rydym yn addysgu eleni, ac mae rhagor o weithgareddau nag arfer yn digwydd ar-lein.

Rydym yn sylweddoli efallai na fyddwch yn gallu ymuno â ni ar y campws ar ddechrau'r tymor ac felly gallwch fod yn dechrau eich rhaglen ar-lein (gall eithriadau gynnwys rhai cyrsiau yn Ysgol Feddygaeth Prifysgol Abertawe a Choleg y Gwyddorau Dynol ac Iechyd).

Cyn gynted ag y bydd amgylchiadau'n caniatáu, rydym yn annog myfyrwyr i ymuno â ni yn Abertawe. Rhaid i'r holl fyfyrwyr, p'un a ydynt yn dechrau astudio ar y campws neu ar-lein, gofrestru erbyn 30 Hydref 2020.

Os nad yw amgylchiadau'n caniatáu i chi ymuno â ni ar y campws ar ddechrau'r tymor, dylech gysylltu â'ch Coleg/Ysgol i roi gwybod iddynt am eich cynlluniau.
Byddwn yn anfon rhagor o wybodaeth atoch chi yn y cyfnod yn arwain at gofrestru a'r tymor newydd, felly cadwch lygad ar eich mewnflwch e-bost yn rheolaidd. Yn ogystal, gallwch weld yr wybodaeth ddiweddaraf am fformat addysgu, oriau addysgu a phrofiad y myfyrwyr yn yr adran 'fy nghyfrif'.