Cynorthwywyr Addysgu / Arddangoswr Dysgu

CYNORTHWYWYR ADDYSGU AR GYFER MODIWLAU ISRADDEDIG

Mae gweithio fel Cynorthwy-ydd Addysgu yn gyfle i chi gael profiad gwerthfawr wrth ennill arian ychwanegol.Yn ogystal â hynny, mae’n edrych yn wych ar eich CV!

Mae'r Brifysgol wedi cyflogi myfyrwyr ôl-raddedig i gynorthwyo wrth addysgu modiwlau israddedig ers amser maith. Mae'n gyfle heriol a gwobrwyol i ôl-raddedigion gael profiad mewn meysydd heblaw am eu gweithgareddau ymchwil, ac mae'r rôl yn ddelfrydol at ddibenion datblygiad proffesiynol parhaus. Mae'r Cynghorau Ymchwil, a chyrff eraill sy'n dyfarnu ysgoloriaethau ymchwil, yn cydnabod yr angen i fyfyrwyr gymryd rhan mewn gweithgareddau o'r fath.

Prif ddiben y rôl yw cynorthwyo'r staff academaidd/arweinydd y modiwl i gyflwyno maes penodol i fyfyrwyr israddedig, neu ehangu eu dealltwriaeth ohono. Mae Cynorthwywyr Addysgu hefyd yn cynorthwyo staff academaidd yn eu dyletswyddau addysgu cyffredinol.

Darperir arweiniad, mentora a monitro llawn gan aelod priodol o'r staff academaidd, fel arfer, arweinydd y modiwl.

Os ydych chi wedi cael eich cyflogi fel Cynorthwy-ydd Addysgu yn ystod Semester 1, byddwch yn parhau i fod ar y rhestr o Gynorthwywyr Addysgu ar gyfer Semester 2. Os na fyddwch ar gael ar gyfer Semester 2 mwyach, gwnewch yn siŵr eich bod yn rhoi gwybod i PGR-scienceengineering@abertawe.ac.uk cyn gynted â phosib pan fyddwch yn gwybod am hyn – fel arall, cewch eich clustnodi i fodiwlau yn Semester 2.

Sut i Wneud Cais

I wneud cais am rôl Cynorthwy-ydd Addysgu, rhowch wybod i'ch goruchwyliwr a/neu cadwch lygad am e-byst gan Dderbynfa'r Gyfadran Gwyddoniaeth a Pheirianneg yn cyhoeddi pan fydd y broses ymgeisio'n agor.

I ddechrau gweithio fel Cynorthwy-ydd Addysgu, bydd angen i chi gwblhau hyfforddiant sefydlu wedi'i drefnu gan yr Adran Adnoddau Dynol, a'r cwrs "Sgiliau Addysgu" a gynhelir gan y Swyddfa Ymchwil Ôl-raddedig. Ni fyddwch yn cael gweithio nes eich bod wedi cwblhau'r hyfforddiant.

Dynodi Modiwlau

Cyn i fodiwl gael ei ddynodi i chi, byddwn yn gofyn i chi gwblhau Arolwg Sgiliau, er mwyn i ni fod yn ymwybodol o'ch sgiliau perthnasol. Ar ôl i chi gyflwyno cais, bydd y Tîm Ymchwil Ôl-raddedig yn anfon dolen atoch i gwblhau'r arolwg. Gwnewch yn siŵr eich bod yn cwblhau hwn er mwyn i ni allu dynodi'r modiwl cywir i chi. Os nad ydych yn cwblhau'r arolwg hwn, ni fyddwn yn gallu gwarantu y caiff modiwl ei ddynodi i chi. Mae'r arolwg yn cynnwys meysydd i chi allu rhoi gwybod i ni pryd byddwch ar gael ac a ydych chi wedi siarad â chydlynwyr modiwl priodol - er na allwn addo dynodi modiwl penodol i chi. Caiff modiwlau eu dynodi i Gynorthwywyr Addysgu gan ystyried eu sgiliau; Tîm Gweinyddol y Swyddfa Ymchwil Ôl-raddedig sy’n gyfrifol am ddynodi modiwlau, nid academyddion. Oherwydd nifer y Cynorthwywyr Addysgu, a’r gofynion addysgu penodol mae angen eu bodloni, ni fyddwch yn cael dewis y modiwl rydych chi’n cynorthwyo i'w addysgu.

Gwybodaeth am daliadau

Gallwch wirio eich slip cyflog ar ABW - bydd angen eich rhif staff i weld eich slipiau cyflog. I gael eich rhif staff, e-bostiwch PGR-scienceengineering@abertawe.ac.uk a byddwn ni'n gallu ei ddarparu i chi ar ôl cynnal cyflogres y mis cyntaf. Gallwch gael cyfrineiriau staff o ddesg gymorth y Llyfrgell. Os oes gennych broblemau gyda'ch cyflog, e-bostiwch PRG-scienceengineering@abertawe.ac.uk. Gwnewch yn siŵr bod eich taflenni amser wedi’u cwblhau cyn i’r system gloi ar ddiwedd pob mis. Mae angen i’r academydd sy’n gyfrifol am eich modiwl gymeradwyo eich oriau cyn y gellir eu hanfon at AD (a gaiff eu hanfon ar ddechrau’r mis). Os nad ydych chi wedi cael eich talu, e-bostiwch PGR-scienceengineering@abertawe.ac.uk a byddwn yn eich helpu gyda hyn.

Mewnrwyd y CGP

CYNORTHWYWYR ADDYSGU PRESENNOL - Defnyddiwch fewnrwyd y Gyfadran Gwyddoniaeth a Pheirianneg i gofnodi oriau a weithiwyd. I fewngofnodi i'r Fewnrwyd, defnyddiwch eich rhif myfyriwr wedi'i ddilyn gan @abertawe.ac.uk

Sylwer, bydd pob taflen amser yn cau ddydd Gwener olaf pob mis. Os byddwch yn colli'r dyddiad cau hwn, cysylltwch â'r tîm cyn gynted ag y bo modd er mwyn sicrhau y caiff yr oriau eu cofnodi ar eich rhan chi.

YSGOLORIAETHAU YMCHWIL - Os ydych yn fyfyriwr sy'n dilyn ysgoloriaeth ymchwil ar hyn o bryd ac rydych chi'n gweithio fel cynorthwy-ydd addysgu, bydd eich contract cynorthwy-ydd addysgu'n dod i ben yn awtomatig pan ddaw eich ysgoloriaeth ymchwil i ben.

Ar gyfer ymholiadau pellach mewn perthynas â chynorthwywyr addysgu, cysylltwch yn uniongyrchol â

Theresa Carlsen or Tom Gooch

Mewngofnodwch