Cosbau disgyblu Covid-19 i fyfyrwyr

Rydym yn ymrwymedig i'ch diweddaru a sicrhau eich bod chi'n ymwybodol o'r mesurau a'r ymddygiad sy'n ofynnol i gadw unigolion a'r gymuned ehangach yn ddiogel. Byddwn yn cadw mewn cysylltiad yn y ffyrdd canlynol:
• E-bost myfyriwr
• Y cyfryngau cymdeithasol
• Cwestiynau Cyffredin Covid-19 ar wefan MyUni
• Arwyddion ar y campws
• Arwyddion digidol ar y campws

Os ydych chi'n gweld rhywun sy'n ymddwyn yn amhriodol ac yn groes i'r canllawiau, dylech chi godi'r mater gyda nhw'n uniongyrchol mewn ffordd agored, adeiladol a chwrtais. Cofiwch fod rhai pobl wedi'u heithrio o'r canllawiau. Mae timoedd y Gwasanaethau Preswyl ar y campws, Swyddfa eich Cyfadran, BywydCampws a Diogelwch ar y Campws oll yno i'ch cadw chi'n ddiogel – gallwch chi godi eich pryderon gyda nhw [am ragor o wybodaeth, gweler yr adran isod ‘Sut gallaf godi fy mhryderon’).

Os bydd unrhyw un yn mynd yn groes i'r disgwyliadau a nodwyd yn y dogfennau canlynol yn fwriadol neu dro ar ôl tro:
• Siarter Myfyrwyr Atodol Covid-19 a/neu
• Ofynion Llywodraeth Cymru a/neu
• Ofynion Prifysgol Abertawe

am gyfyngiadau Iechyd a Diogelwch Covid-19, maent yn rhoi ein cymuned mewn perygl a gallant fod yn destun cosbau'n unol â Gweithdrefn Disgyblu'r Brifysgol a/neu Reoliadau Preswylio'r Gwasanaethau Preswyl.

Isod, ceir amlinelliad o rai enghreifftiau o ddigwyddiadau a'r mathau o gosbau sy'n debygol o gael eu rhoi i fyfyrwyr.  Sylwer bod y rhain yn berthnasol i ddigwyddiadau sy'n digwydd ar y campws ac oddi arno, a gall y Gwasanaethau Preswyl gymryd camau pellach yn unol â Rheoliadau Preswylio'r Gwasanaethau Preswyl lle bydd digwyddiad mewn llety ar y campws.  Sylwer hefyd fod y rhain yn enghreifftiau'n unig, a chaiff achosion eu hystyried fesul un. 

Mae'r gymuned gyfan wedi'i grymuso i herio ymddygiad sy'n mynd yn groes i ddisgwyliadau a amlinellwyd yn Siarter Myfyrwyr Atodol Covid-19 a gofynion Llywodraeth Cymru a Phrifysgol Abertawe ynghylch iechyd a diogelwch Covid-19 fel man cychwyn.

Os ydych chi'n gweld rhywun sy'n ymddwyn yn amhriodol ac yn groes i'r canllawiau, dylech chi godi'r mater gyda nhw'n uniongyrchol mewn ffordd agored, adeiladol a chwrtais. Cofiwch fod rhai pobl wedi'u heithrio o'r canllawiau.

Os bydd aelod o'r gymuned yn derbyn ymateb cadarnhaol i'r cais i gydymffurfio, ni fydd angen camau pellach.

Os bydd ymateb negyddol, gellir uwchgyfeirio’r digwyddiad i Dramgwydd Cyntaf.
Mae timoedd y Gwasanaethau Preswyl ar y campws, Swyddfa eich Cyfadran, BywydCampws a Diogelwch ar y Campws oll yno i'ch cadw chi'n ddiogel – gallwch chi godi eich pryderon gyda nhw.

Os bydd myfyriwr yn ymddwyn yn amhriodol ac yn groes i'r canllawiau a amlinellwyd yn Siarter Myfyrwyr Atodol Covid-19 a gofynion Llywodraeth Cymru a Phrifysgol Abertawe ynghylch iechyd a diogelwch Covid-19, mae'n bosib y bydd yn destun cosb Tramgwydd Cyntaf.

Mae enghreifftiau o Dramgwyddau Cyntaf yn cynnwys diffyg cydymffurfiaeth â chais rhesymol mewn perthynas â digwyddiad Covid-19 gan fyfyriwr, er enghraifft peidio â chydymffurfio â chais i gadw pellter cymdeithasol.

Gall timoedd y Gwasanaethau Preswyl a Diogelwch ar y campws roi rhybudd llafar anffurfiol am Dramgwyddau Cyntaf, a chedwir cofnod ohonynt.
Os caiff y tramgwydd cyntaf ei ystyried i fod o natur ddifrifol iawn neu ceir digwyddiad pellach lle ystyrir bod y myfyrwyr yn ymddwyn yn groes i ofynion Llywodraeth Cymru neu'r Brifysgol mewn perthynas ag iechyd a diogelwch Covid-19, gellir cymryd camau disgyblu ar unwaith yn unol â fframwaith ar lefel uwch.

Mae achos o ddau ddigwyddiad neu fwy sy'n dramgwydd neu'n 'dramgwydd difrifol' yn debygol o gael ei gyfeirio at y Gwasanaethau Academaidd yn unol â Gweithdrefnau Disgyblu Myfyrwyr.

Mae enghreifftiau o dramgwyddau o'r fath yn cynnwys:
• Gwahodd gwesteion neu ganiatáu mynediad iddynt i'ch llety preswyl sy'n destun hunanynysu.
• Mynd i lety preswyl myfyriwr arall sy'n destun hunanynysu.
• Gwahodd gwesteion neu ganiatáu mynediad iddynt i'ch llety preswyl yn groes i ofynion Llywodraeth Cymru (e.e. gofynion cyfyngiadau symud).
• Mynd i lety preswyl myfyrwyr eraill yn groes i ofynion Llywodraeth Cymru (e.e. gofynion cyfyngiadau symud).
• Presenoldeb mewn digwyddiad/ymgynulliad cymdeithasol pan fydd digwyddiadau/ymgynulliadau cymdeithasol o'r fath wedi'u gwahardd gan gyfyngiadau Llywodraeth Cymru.
• Digwyddiad unigol (untro) a restrwyd uchod sy'n achosi, neu sy'n debygol o achosi, niwed i enw da'r Brifysgol.
• Rhoi gwybodaeth ffug neu gamarweiniol i'r Brifysgol yn dilyn cais rhesymol mewn perthynas â digwyddiad Covid-19.
• Digwyddiadau sydd wedi arwain at yr Heddlu yn rhoi Hysbysiad o Gosb Benodol neu Ddirwy neu Rybudd mewn perthynas â thorri cyfreithiau neu gyfyngiadau Covid-19.

Mae achosion o'r fath yn debygol o gael eu hatgyfeirio at Swyddog Disgyblu Myfyrwyr ac mae'r mathau o gosbau a allai fod yn berthnasol wedi'u cynnwys yn Atodiad 3 Gweithdrefn Disgyblu'r Brifysgol, ac maent yn cynnwys y canlynol:
• Rhybudd ysgrifenedig ffurfiol
• Gofyniad i lofnodi Cytundeb Ymddygiad
• Gofyniad bod y myfyriwr yn ymgymryd â gwasanaethau heb dâl hyd at uchafswm o 28 awr ar gyfer y Brifysgol, Undeb y Myfyrwyr, neu’r gymuned

Yn ogystal, gan ddibynnu ar natur y digwyddiad, efallai y cynhelir asesiad risg yn unol ag Atodiad 2 Gweithdrefn Disgyblu'r Brifysgol a gallai hyn arwain at wahardd y myfyriwr yn rhannol neu'n llawn rhag astudio a'i wahardd rhag safleoedd y Brifysgol wrth aros am ganlyniad y weithdrefn ddisgyblu. Mae gan waharddiadau interim fel hyn oblygiadau difrifol ar gyfer astudiaethau myfyriwr.

Mae tramgwyddau difrifol yn debygol o gael eu huwchgyfeirio at Bwyllgor Ymchwiliad Disgyblu ac mae cosbau mae'r Pwyllgor yn eu cyflwyno yn debygol o gael goblygiadau difrifol ar astudiaethau myfyriwr.

Mae enghreifftiau o Dramgwyddau Difrifol yn cynnwys:
• Peidio â hunanynysu pan fydd yn ofynnol gwneud hynny ar gais y Brifysgol a Gwasanaeth Profi ac Olrhain y GIG.
• Diffyg cydymffurfiaeth â chyfyngiadau teithio, gan gynnwys hunanynysu ar gyfer cwarantin, yn unol â chanllawiau Llywodraeth Cymru.
• Pesychu neu boeri yn uniongyrchol ar unigolyn arall (neu fygwth gwneud hynny).
• Digwyddiadau sy'n ymwneud â thorri cyfreithiau Covid-19 sy'n arwain at euogfarn o'r Llys Troseddol yn erbyn y myfyriwr.
• Digwyddiad pellach yn dilyn cosb flaenorol a roddwyd yn unol â Gweithdrefn Disgyblu'r Brifysgol ar gyfer digwyddiad sy'n groes i ofynion Llywodraeth Cymru neu'r Brifysgol mewn perthynas ag iechyd a diogelwch Covid-19.

Mae'r mathau o gosbau y gall y Pwyllgor Ymchwiliad Disgyblu eu cyflwyno wedi'u cynnwys yn Atodiad 3 Gweithdrefn Disgyblu'r Brifysgol, ac maent yn amrywio o Rybudd Ysgrifenedig Ffurfiol i wahardd myfyriwr (h.y. tynnu'n ôl) o'r Brifysgol.

Yn ogystal, gan ddibynnu ar natur y digwyddiad, efallai y cynhelir asesiad risg yn unol ag Atodiad 2 Gweithdrefn Disgyblu'r Brifysgol a gallai hyn arwain at wahardd y myfyriwr yn rhannol neu'n llawn rhag astudio a'i wahardd rhag safleoedd y Brifysgol wrth aros am ganlyniad y weithdrefn ddisgyblu.

Os oes gan fyfyrwyr/staff bryderon am fyfyriwr nad yw'n dilyn canllawiau sy'n gysylltiedig â Covid-19, gallant gysylltu â'r canlynol:
• Mewn perthynas â llety – y Gwasanaethau Preswyl
• Mewn perthynas â sesiynau dysgu neu addysgu – y swyddfa cyfadran berthnasol
• Amgylchedd arall yn y Brifysgol – Diogelwch ar y campws neu BywydCampws

Rydym yn disgwyl y bydd yn bosib ymdrin â'r rhan fwyaf o broblemau drwy atgoffa myfyrwyr am y canllawiau.